TITUS
Black Yajur-Veda: Taittiriya-Samhita
Part No. 39
Previous part

Chapter: 4 
Paragraph: 1 
Verse: 1 
Sentence: 1    य॒ज्ञेन वै प्र॒जाप॑तिः प्र॒जा अ॑सृजत
Sentence: 2    ता उ॑प॒यड्भि॑रे॒वासृ॑जत
Sentence: 3    यदु॑प॒यज॑ उप॒यज॑ति प्र॒जा ए॒व तद्यज॑मानः सृजते
Sentence: 4    जघना॒र्धादव॑ द्यति
Sentence: 5    जघना॒र्धाद्धि प्र॒जाः प्र॒जाय॑न्ते
Sentence: 6    स्थविम॒तो ऽव॑ द्यति
Sentence: 7    स्थविम॒तो हि प्र॒जाः प्र॒जाय॑न्ते ।
Sentence: 8    अस॑म्भिन्द॒न्नव॑ द्यति प्रा॒णाना॒मस॑म्भेदाय
Sentence: 9    न प॒र्याव॑र्तयति
Sentence: 10    यत्प॑र्याव॒र्तये॑दुदाव॒र्तः प्र॒जा ग्राहु॑कः स्यात्
Sentence: 11    समु॒द्रं ग॑छ॒ स्वाहेत्या॑ह
Sentence: 12    रे॒तः ।।

Verse: 2 
Sentence: 1    ए॒व तद्द॑धाति ।
Sentence: 2    अ॒न्तरि॑क्षं गछ॒ स्वाहेत्या॑ह ।
Sentence: 3    अ॒न्तरि॑क्षेणै॒वास्मै॑ प्र॒जाः प्र ज॑नयति ।
Sentence: 4    अ॒न्तरि॑क्षं॒ ह्यनु॑ प्र॒जाः प्र॒जाय॑न्ते
Sentence: 5    दे॒वं स॑वि॒तारं॑ गछ॒ स्वाहेत्या॑ह
Sentence: 6    सवि॒तृप्र॑सूत ए॒वास्मै॑ प्र॒जाः प्र ज॑नयति ।
Sentence: 7    अ॑होरा॒त्रे ग॑छ॒ स्वाहेत्या॑ह ।
Sentence: 8    अ॑होरा॒त्राभ्या॑मे॒वास्मै॑ प्र॒जाः प्र ज॑नयति ।
Sentence: 9    अ॑होरा॒त्रे ह्यनु॑ प्र॒जाः प्र॒जाय॑न्ते
Sentence: 10    मि॒त्रावरु॑णौ गछ॒ स्वाहा॑ ।।

Verse: 3 
Sentence: 1    इत्या॑ह
Sentence: 2    प्र॒जास्वे॒व प्रजा॑तासु प्राणापानौ दधाति
Sentence: 3    सोमं॑ गछ॒ स्वाहेत्या॑ह
Sentence: 4    सौ॒म्या हि दे॒वत॑या प्र॒जास् ।
Sentence: 5    य॒ज्ञं ग॑छ॒ स्वाहेत्या॑ह
Sentence: 6    प्र॒जा ए॒व य॒ज्ञियाः॑ करोति
Sentence: 7    छन्दां॑सि गछ॒ स्वाहेत्या॑ह
Sentence: 8    प॒शवो वै॒ छन्दां॑सि
Sentence: 9    प॒शूने॒वाव॑ रुन्द्धे
Sentence: 10    द्यावा॑पृथि॒वी ग॑छ॒ स्वाहेत्या॑ह
Sentence: 11    प्र॒जा ए॒व प्रजा॑ता॒ द्यावा॑पृथि॒वीभ्या॑मुभ॒यतः॒ परि॑ गृह्णाति
Sentence: 12    नभः॑ ।।

Verse: 4 
Sentence: 1    दि॒व्यं ग॑छ॒ स्वाहेत्या॑ह
Sentence: 2    प्र॒जाभ्य॑ ए॒व प्रजा॑ताभ्यो॒ वृष्टिं॒ नि य॑छति ।
Sentence: 3    अ॒ग्निं वै॑श्वान॒रं ग॑छ॒ स्वाहेत्या॑ह
Sentence: 4    प्र॒जा ए॒व प्रजा॑ता अ॒स्याम्प्रति॑ ष्ठापयति
Sentence: 5    प्रा॒णानां॒ वा ए॒षो ऽव॑ द्यति॒ यो॑ ऽव॒द्यति॑ गु॒दस्य
Sentence: 6    मनो॑ मे॒ हार्दि॑ य॒छेत्या॑ह
Sentence: 7    प्रा॒णाने॒व य॑थास्था॒नमुप॑ ह्वयते
Sentence: 8    प॒शोर्वा आल॑ब्धस्य॒ हृद॑यं शुगृछति
Sentence: 9    सा हृ॑दयशू॒लम् ।।

Verse: 5 
Sentence: 1    अ॒भि समे॑ति
Sentence: 2    यत्पृ॑थि॒व्यां हृ॑दयशू॒लमु॑द्वा॒सये॑त्पृथि॒वीं शु॒चार्प॑येत् ।
Sentence: 3    यद॒प्स्व॒पः शु॒चार्प॑येत् ।
Sentence: 4    शु॑ष्कस्य चा॒र्द्रस्य॑ च सं॒धावुद्वा॑सयत्यु॒भय॑स्य॒ शान्त्यै
Sentence: 5    यं द्वि॒ष्यात्तं ध्या॑येत् ।
Sentence: 6    शुचैवैनमर्पयति ।।

Paragraph: 2 
Verse: 1 
Sentence: 1    दे॒वा वै॑ य॒ज्ञमाग्नी॑ध्रे॒ व्य॑भजन्त
Sentence: 2    ततो॒ यद॒त्यशि॑ष्यत॒ तद्ब्रुवन्न्^ब्रुवन्
Sentence: 3    वस॑तु॒ नु न॑ इ॒दमिति
Sentence: 4    तद्व॑सती॒वरी॑णां वसतीवरि॒त्वम् ।
Sentence: 5    तस्मि॑न्प्रा॒तर्न सम॑शक्नुवन्
Sentence: 6    तद॒प्सु प्रावे॑शयन्
Sentence: 7    ता व॑सती॒वरी॑रभवन्
Sentence: 8    वसती॒वरी॑र्गृह्णाति
Sentence: 9    य॒ज्ञो वै॑ वसती॒वरी॑स् ।
Sentence: 10    य॒ज्ञमे॒वारभ्य॑ गृही॒त्वोप॑ वसति
Sentence: 11    यस्यागृ॑हीता अ॒भि नि॒म्रोचे॒दना॑रब्धो ऽस्य य॒ज्ञः स्या॑त् ।।

Verse: 2 
Sentence: 1    य॒ज्ञं वि छि॑न्द्यात् ।
Sentence: 2    ज्यो॑ति॒ष्या॑ वा गृह्णी॒याद्धिर॑ण्यं वाव॒धाय॒ सशु॑क्राणामे॒व गृ॑ह्णाति
Sentence: 3    यो वा॑ ब्राह्म॒णो ब॑हुया॒जी तस्य॒ कुम्भ्या॑नां गृह्णीयात्
Sentence: 4    स हि गृ॑ही॒तव॑सतीवरीकस् ।
Sentence: 5    व॑सती॒वरी॑र्गृह्णाति
Sentence: 6    प॒शवो वै वसती॒वरीः
Sentence: 7    प॒शूने॒वारभ्य॑ गृही॒त्वोप॑ वसति
Sentence: 8    यद॑न्वी॒पं तिष्ठ॑न्गृह्णी॒यान्नि॒र्मार्गु॑का अस्मात्प॒शवः॑ स्युः
Sentence: 9    प्रती॒पं तिष्ठ॑न्गृह्णाति
Sentence: 10    प्रति॒रुध्यै॒वास्मै॑ प॒शून्गृ॑ह्णाति ।
Sentence: 11    इन्द्रः॑ ।।

Verse: 3 
Sentence: 1    वृ॒त्रं अ॑हन् ।
Sentence: 2    सो॒ ऽपो॒ ऽभ्य॑म्रियत
Sentence: 3    तासां॒ यन्मेध्यं॑ य॒ज्ञियं॒ सदे॑व॒मासी॒त्तदत्य॑मुच्यत
Sentence: 4    ता वह॑न्तीरभवन्
Sentence: 5    वह॑न्तीनां गृह्णाति
Sentence: 6    या ए॒व मेध्या॑ य॒ज्ञियाः॒ सदे॑वा॒ आप॒स्तासा॑मे॒व गृ॑ह्णाति
Sentence: 7    नान्त॒मा वह॑न्ती॒रती॑यात् ।
Sentence: 8    यद॑न्त॒मा वह॑न्तीरती॒याद्य॒ज्ञमति॑ मन्येत
Sentence: 9    न स्था॑व॒राणां॑ गृह्णीयात् ।
Sentence: 10    वरु॑णगृहीता वै स्थाव॒रास् ।
Sentence: 11    यत्स्था॑व॒राणां॑ गृह्णी॒यात् ।।

Verse: 4 
Sentence: 1    वरु॑णेनास्य य॒ज्ञं ग्रा॑हयेत् ।
Sentence: 2    यद्वै॒ दिवा॒ भव॑त्य॒पो रात्रिः॒ प्र वि॑शति
Sentence: 3    तस्मा॑त्ता॒म्रा आपो॒ दिवा॑ ददृश्रे
Sentence: 4    यन्नक्त॒म्भव॑त्य॒पो ऽहः॒ प्र वि॑शति
Sentence: 5    तस्मा॑च्च॒न्द्रा आपो॒ नक्तं॑ ददृश्रे
Sentence: 6    छा॒यायै॑ चा॒तप॑तश्च संधौ गृह्णाति ।
Sentence: 7    अ॑होरा॒त्रयो॑रे॒वास्मै॒ वर्णं॑ गृह्णाति
Sentence: 8    ह॒विष्म॑तीरि॒मा आप॒ इत्या॑ह
Sentence: 9    ह॒विष्कृ॑तानामे॒व गृ॑ह्णाति
Sentence: 10    ह॒विष्मां॑ अस्तु ।।

Verse: 5 
Sentence: 1    सूर्य॒ इत्या॑ह
Sentence: 2    सशु॑क्राणामे॒व गृ॑ह्णाति ।
Sentence: 3    अ॑नु॒ष्टुभा॑ गृह्णाति
Sentence: 4    वाग्वा अनु॒ष्टुग्^नु॒ष्टुभ्
Sentence: 5    वाचैवैनाः॒ सर्व॑या गृह्णाति
Sentence: 6    चतु॑ष्पदय॒र्चा गृ॑ह्णाति
Sentence: 7    त्रिः सा॑दयति
Sentence: 8    स॒प्त सम्प॑द्यन्ते
Sentence: 9    स॒प्तप॑दा॒ शक्व॑री
Sentence: 10    प॒शवः॒ शक्व॑री
Sentence: 11    प॒शूने॒वाव॑ रुन्द्धे ।
Sentence: 12    अस्मै वै लो॒काय॒ गार्ह॑पत्य॒ आ धी॑यते॒ ऽमुष्मा॑ आहव॒नीय॑स् ।
Sentence: 13    यद्गार्ह॑पत्य उपसा॒दये॑द॒स्मिँ लो॒के प॑शु॒मान्त्स्या॑त् ।
Sentence: 14    यदा॑हव॒नीये॒ ऽमुष्मि॑न् ।।

Verse: 6 
Sentence: 1    लो॒के प॑शु॒मान्त्स्या॑त् ।
Sentence: 2    उ॒भयो॒रुप॑ सादयति ।
Sentence: 3    उ॒भयो॑रेवैनं लो॒कयोः॑ पशु॒मन्तं॑ करोति
Sentence: 4    स॒र्वतः॒ परि॑ हरति
Sentence: 5    रक्ष॑सा॒मप॑हत्यै ।
Sentence: 6    इ॑न्द्राग्नि॒योर्भा॑ग॒धेयी॒ स्थेत्या॑ह
Sentence: 7    यथाय॒जुरेवै॒तत् ।
Sentence: 8    आग्नी॑ध्र॒ उप॑ वासयति ।
Sentence: 9    ए॒तद्वै॑ य॒ज्ञस्याप॑राजितं॒ यदाग्नी॑ध्रम् ।
Sentence: 10    यदे॒व य॒ज्ञस्याप॑राजितं॒ तदेवैना॒ उप॑ वासयति
Sentence: 11    यतः॒ खलु वै य॒ज्ञस्य॒ वित॑तस्य॒ न क्रि॒यते॒ तदनु॑ य॒ज्ञं रक्षां॑स्य॒ अव॑ चरन्ति
Sentence: 12    यद्वह॑न्तीनां गृ॒ह्णाति॑ क्रि॒यमा॑नामे॒व तद्य॒ज्ञस्य॑ शये
Sentence: 13    रक्ष॑सा॒मन॑न्ववचाराय
Sentence: 14    न ह्ये॒ता ई॒लय॑न्ति ।
Sentence: 15    आ तृ॑तीयसव॒नात्परि॑ शेरे
Sentence: 16    य॒ज्ञस्य॒ संत॑त्यै ।।

Paragraph: 3 
Verse: 1 
Sentence: 1    ब्र॑ह्मवा॒दिनो॑ वदन्ति
Sentence: 2    स त्वा अ॑ध्व॒र्युः स्या॒द्यः सोम॑मुपाव॒हर॒न्त्सर्वा॑भ्यो दे॒वता॑भ्य उपाव॒हरे॒दिति
Sentence: 3    हृ॒दे त्वेत्या॑ह मनु॒ष्ये॑भ्य एवै॒तेन॑ करोति
Sentence: 4    मन॑से॒ त्वेत्या॑ह पि॒तृभ्य॑ एवै॒तेन॑ करोति दि॒वे त्वा॑ सू॒र्याय॒ त्वेत्या॑ह दे॒वेभ्य॑ एवै॒तेन॑ करोति ।
Sentence: 5    ए॒ताव॑तीर्वै दे॒वता॒स्ताभ्य॑ एवैनं॒ सर्वा॑भ्य उ॒पाव॑हरति
Sentence: 6    पु॒रा वा॒चः ।।

Verse: 2 
Sentence: 1    प्रव॑दितोः प्रातरनुवा॒कमु॒पाक॑रोति॒ याव॑त्ये॒व वाक्तामव॑ रुन्द्धे ।
Sentence: 2    अ॒पो ऽग्रे॑ ऽभि॒व्याह॑रति य॒ज्ञो वा आपो॑ य॒ज्ञमे॒वाभि वाचं॒ वि सृ॑जति
Sentence: 3    सर्वा॑णि॒ छन्दां॒स्यन्वा॑ह प॒शवो वै॒ छन्दां॑सि प॒शूने॒वाव॑ रुन्द्धे
Sentence: 4    गायत्रि॒या तेज॑स्कामस्य॒ परि॑ दध्यात्त्रि॒ष्टुभे॑न्द्रि॒यका॑मस्य॒ जग॑त्या प॒शुका॑मस्यानुभा॑ प्रति॒ष्ठाका॑मस्य प॒ङ्क्त्या य॒ज्ञका॑मस्य वि॒राजान्न॑कामस्य
Sentence: 5    श्रि॒णोत्व॒ग्निः स॒मिधा॒ हव॑म् ।।

Verse: 3 
Sentence: 1    म॒ इत्या॑ह सवि॒तृप्र॑सूत ए॒व दे॒वता॑भ्यो नि॒वेद्या॒पो ऽछै॑ति ।
Sentence: 2    अ॒प इ॑ष्य होत॒रित्या॑हेषि॒तं हि कर्म॑ क्रि॒यते
Sentence: 3    मैत्रावरुणस्य चमसाध्वर्य॒वा द्र॒वेत्या॑ह मै॒त्रावरु॑णौ॒ वा अ॒पां ने॒तारौ॒ ताभ्या॑मेवैना॒ अछै॑ति
Sentence: 4    देवी॑रापो अपां नपा॒दित्या॒हाहु॑त्यैवैना नि॒ष्क्रीय॑ गृह्णा॒त्यथो॑ ह॒विष्कृ॑तानामे॒वाभिघृनां गृह्णाति ।।

Verse: 4 
Sentence: 1    कार्षि॑र॒सीत्या॑ह॒ शम॑लमे॒वासा॒मप॑ प्लावयति
Sentence: 2    समु॒द्रस्य॒ वोक्षि॑त्या॒ उन्न॑य॒ इत्या॑ह॒ तस्मा॑द॒द्यमा॑नाः पी॒यमा॑ना॒ आपो॒ न क्षी॑यन्ते
Sentence: 3    योनिर्वै य॒ज्ञस्य॒ चात्वा॑लं य॒ज्ञो व॑सती॒वरी॑र्होतृचम॒सं च॑ मैत्रावरुणचम॒सं च॑ सं॒स्पर्श्य॑ वसती॒वरी॒र्व्यान॑यति य॒ज्ञस्य॑ सयोनि॒त्वाय॑ ।
Sentence: 4    अथो॒ स्वादेवैना॒ योनेः॒ प्र ज॑नयति ।
Sentence: 5    अध्व॒र्यो ऽवे॑र्पा३^ अ॒पास्
Sentence: 6    इत्या॑ह ।
Sentence: 7    उ॒तेम॑नंनमुरु॒तेमाः प॑श्य ।
Sentence: 8    इति॒ वावै॒तदा॑ह
Sentence: 9    यद्य॑ग्निष्टो॒मो जु॒होति॒ यद्यु॒क्थ्यः॑ परिधौ॒ नि मा॑र्ष्टि॒ यद्य॑तिरा॒त्रो यजु॒र्वद॒न्प्र प॑द्यते यज्ञक्रतू॒नां व्यावृ॑त्त्यै ।।

Paragraph: 4 
Verse: 1 
Sentence: 1    दे॒वस्य॑ त्वा सवि॒तुः प्र॑स॒व इति॒ ग्रावा॑ण॒मा द॑त्ते
Sentence: 2    प्रसू॑त्यै ।
Sentence: 3    अ॒श्विनो॑र्बा॒हुभ्या॒मित्या॑ह ।
Sentence: 4    अ॒श्विनौ॒ हि दे॒वाना॑मध्व॒र्यू आस्ता॑म्
Sentence: 5    पू॒ष्णो हस्ता॑भ्या॒मित्या॑ह॒ यत्यै
Sentence: 6    प॒शवो वै॒ सोमो॑ व्या॒न उ॑पांशु॒सव॑नस् ।
Sentence: 7    यदु॑पांशु॒सव॑नम॒भि मिमी॑ते व्या॒नमे॒व प॒शुषु॑ दधाति ।
Sentence: 8    इन्द्रा॑य॒ त्वेन्द्रा॑य॒ त्वेति॑ मिमीते ।
Sentence: 9    इन्द्रा॑य॒ हि सोम॑ आह्रि॒यते
Sentence: 10    पञ्च॒ कृत्वो॒ यजु॑षा मिमीते ।।

Verse: 2 
Sentence: 1    पञ्चा॑क्षरा प॒ङ्क्तिः
Sentence: 2    पाङ्क्तो॑ य॒ज्ञस् ।
Sentence: 3    य॒ज्ञमे॒वाव॑ रुन्द्धे
Sentence: 4    पञ्च॒ कृत्व॒स्तूष्णी॑म् ।
Sentence: 5    दश॒ सम्प॑द्यन्ते
Sentence: 6    दशा॑क्षरा वि॒राड्^वि॒राज्
Sentence: 7    अन्नं वि॒राड्^वि॒राज्
Sentence: 8    वि॒राजै॒वान्नाद्य॒मव॑ रुन्द्धे
Sentence: 9    श्वा॒त्रा स्थ॑ वृत्र॒तुर॒ इत्या॑ह ।
Sentence: 10    ए॒ष वा अ॒पां सो॑मपी॒थस् ।
Sentence: 11    य ए॒वं वेद॒ नाप्स्वार्ति॒मार्छ॑ति
Sentence: 12    यत्ते॑ सोम दि॒वि ज्योति॒रित्या॑ह ।
Sentence: 13    ए॒भ्य एवैनम् ।।

Verse: 3 
Sentence: 1    लो॒केभ्यः॒ सम्भ॑रति
Sentence: 2    सोमो वै॒ राजा॒ दिशो॒ ऽभ्य॑ध्यायत्
Sentence: 3    स दिशो ऽनु॒ प्रावि॑शत्
Sentence: 4    प्रागपा॒गुद॑गध॒रागित्या॑ह
Sentence: 5    दि॒ग्भ्य एवैनं॒ सम्भ॑र॒त्यथो॒ दिश॑ ए॒वास्मा॒ अव॑ रुन्द्धे ।
Sentence: 6    अम्ब॒ नि ष्व॒रेत्या॑ह
Sentence: 7    कामु॑का एनं॒ स्त्रियो॑ भवन्ति॒ य ए॒वं वेद
Sentence: 8    यत्ते॑ सो॒मादा॑भ्यं॒ नाम॒ जागृ॒वीति॑ ।।

Verse: 4 
Sentence: 1    आ॑ह ।
Sentence: 2    ए॒ष वै॒ सोम॑स्य सोमपी॒थस् ।
Sentence: 3    य ए॒वं वेद॒ न सौ॒म्यामार्ति॒मार्छ॑ति
Sentence: 4    घ्नन्ति॒ वा ए॒तत्सोमं॒ यद॑भिषु॒ण्वन्ति॑ ।
Sentence: 5    अं॒शूनप॑ गृह्णाति
Sentence: 6    त्राय॑त एवैनम्
Sentence: 7    प्रा॒णा वा अं॒शवः॑ प॒शवः॒ सोम॑स् ।
Sentence: 8    अं॒शून्पुन॒रपि॑ सृजति
Sentence: 9    प्रा॒णाने॒व प॒शुषु॑ दधाति
Sentence: 10    द्वौद्वा॒वपि॑ सृजति
Sentence: 11    तस्माद्द्वौद्वौ प्रा॒णाः ।।

Paragraph: 5 
Verse: 1 
Sentence: 1    प्रा॒णो वा ए॒ष यदु॑पांशुस् ।
Sentence: 2    यदु॑पां॒श्व॑ग्रा॒ ग्रहा॑ गृ॒ह्यन्ते॑ प्रा॒णमे॒वानु॒ प्र य॑न्ति ।
Sentence: 3    अ॑रु॒णो ह॑ स्माहौपवेशिः
Sentence: 4    प्रातःसव॒न ए॒वाहं य॒ज्ञं सं स्था॑पयामि॒ तेन॒ ततः॒ संस्थि॑तेन चरा॒मीति॑ ।
Sentence: 5    अष्टौ कृ॒तो ऽग्रे॒ ऽभि षु॑णोति ।
Sentence: 6    अ॒ष्टाक्ष॑रा गाय॒त्री
Sentence: 7    गा॑य॒त्रम्प्रा॑तःसव॒नम्
Sentence: 8    प्रातःसव॒नमे॒व तेना॑प्नोति ।
Sentence: 9    एका॑दश॒ कृत्वो॑ द्वि॒तीय॑म्
Sentence: 10    एका॑दशाक्षरा तृ॒ष्टुभ् ।
Sentence: 11    त्रै॑ष्टुभ॒म्माध्यं॑दिनम् ।।

Verse: 2 
Sentence: 1    सव॑नम्
Sentence: 2    माध्यं॑दिनमे॒व सव॑नं॒ तेना॑प्नोति
Sentence: 3    द्वाद॑श॒ कृत्व॑स्तृ॒तीय॑म् ।
Sentence: 4    द्वाद॑शाक्षरा॒ जग॑ती
Sentence: 5    जाग॑तं तृतीयसव॒नम् ।
Sentence: 6    तृ॑तीयसव॒नमे॒व तेना॑प्नोति ।
Sentence: 7    ए॒तां ह॒ वाव स य॒ज्ञस्य॒ संस्थि॑तिमुवाच ।
Sentence: 8    अस्क॑न्दाय ।
Sentence: 9    अक्स॑न्नं॒ हि तद्यद्य॒ज्ञस्य॒ संस्थि॑तस्य॒ स्कन्द॑ति ।
Sentence: 10    अथो॒ खल्वा॑हुस् ।
Sentence: 11    गा॑य॒त्री वाव प्रा॑तःसव॒ने नाति॒वाद॒ इति॑ ।
Sentence: 12    अन॑तिवादुक एन॒म्भ्रातृ॑व्यो भवति॒ य ए॒वं वेद
Sentence: 13    तस्मा॑द॒ष्टाव॑ष्टौ ।।

Verse: 3 
Sentence: 1    कृ॑त्वो ऽभि॒षुत्य॑म्
Sentence: 2    ब्रह्मवा॒दिनो॑ वदनति
Sentence: 3    प॒वित्र॑वन्तो॒ ऽन्ये ग्रहा॑ गृ॒ह्यन्ते॒ किम्प॑वित्र उपांशु॒रिति
Sentence: 4    वाक्प॑वित्र॒ इति॑ ब्रूयात् ।
Sentence: 5    वा॒चस्पत॑ये पवस्व वाजि॒न्नित्या॑ह
Sentence: 6    वाचैवैनम्पवयति
Sentence: 7    वृष्णो॑ अस्ं॒शुभ्या॒मित्या॑ह
Sentence: 8    वृष्णो॒ ह्ये॒तावं॒सू यौ॒ सोम॑स्य
Sentence: 9    गभ॑स्तिपूत॒ इत्या॑ह
Sentence: 10    गभ॑स्तिना॒ ह्ये॑नम्प॒वय॑ति
Sentence: 11    दे॒वो दे॒वाना॑म्प॒वित्र॑म॒सीत्या॑ह
Sentence: 12    दे॒वो ह्ये॒षः ।।

Verse: 4 
Sentence: 1    दे॒वाना॑म्प॒वित्र॑म् ।
Sentence: 2    येषा॑म्भा॒गो ऽसि॒ तेभ्य॒स्त्वेत्या॑ह
Sentence: 3    येषां॒ ह्ये॒ष भा॒गस्तेभ्य॑ एनं गृह्णाति
Sentence: 4    स्वांकृ॑तो॒ ऽसीत्या॑ह
Sentence: 5    प्रा॒णमे॒व स्वम॑कृत
Sentence: 6    मधु॑मतीर्न॒ इष॑स्कृ॒धीत्या॑ह
Sentence: 7    सर्व॑मे॒वास्मा॑ इ॒दं स्व॑दयति
Sentence: 8    विश्वे॑भ्यस्त्वेन्द्रि॒येभ्यो॑ दि॒व्येभ्यः॒ पार्थि॒वेभ्य॒ इत्या॑ह ।
Sentence: 9    उ॒भये॑ष्वे॒व दे॑वमनु॒ष्येषु॑ प्रा॒णान्द॑धाति
Sentence: 10    मन॑स्त्वा ।।

Verse: 5 
Sentence: 1    अ॒ष्ट्वित्या॑ह
Sentence: 2    मन॑ ए॒वाश्नु॑ते ।
Sentence: 3    उ॒र्व॒न्तरि॑क्ष॒मन्वि॒हीत्या॑ह ।
Sentence: 4    अ॑न्तरिक्षदेव॒त्यो॒ हि प्रा॒णः
Sentence: 5    स्वाहा॑ त्वा सुभवः॒ सूर्या॒येत्या॑ह
Sentence: 6    प्रा॒णा वै॒ स्वभ॑वसो दे॒वास्
Sentence: 7    तेष्वे॒व प॒रोऽक्षं॑ जुहोति
Sentence: 8    दे॒वेभ्य॑स्त्वा मरीचि॒पेभ्य॒ इत्या॑ह ।
Sentence: 9    आ॑दि॒त्यस्य वै र॒श्मयो॑ दे॒वा म॑रीचि॒पास्
Sentence: 10    तेषां॒ तद्भा॑ग॒धेय॑म् ।
Sentence: 11    ताने॒व तेन॑ प्रीणाति
Sentence: 12    यदि॑ का॒मये॑त
Sentence: 13    वर्षु॑कः प॒र्जन्यः॑ ।।

Verse: 6 
Sentence: 1    स्या॒दिति॒ नीचा॒ हस्ते॑न॒ नि मृ॑ज्यात् ।
Sentence: 2    वृष्टि॑मे॒व नि य॑छति
Sentence: 3    यदि॑ का॒मये॑त ।
Sentence: 4    अव॑र्षुकः स्या॒दित्यु॑त्ता॒नेन॒ नि मृ॑ज्यात् ।
Sentence: 5    वृष्टि॑मे॒वोद्य॑छति
Sentence: 6    यद्य॑भि॒चरे॑द॒मुं ज॒ह्यथ॑ त्वा होष्या॒मीति॑ ब्रूयात् ।
Sentence: 7    आहु॑तिमेवैनम्प्रा॒प्सन्ह॑न्ति
Sentence: 8    यदि॑ दू॒रे स्यादा तमि॑तोस्तिष्ठेत्
Sentence: 9    प्रा॒णमे॒वास्या॑नु॒गत्य॑ हन्ति
Sentence: 10    यद्य॑भि॒चरे॑द॒मुष्य॑ ।।

Verse: 7 
Sentence: 1    त्वा॑ प्रा॒णे{F सा॑दया॒मीति{W सादय॒मीति{GLOS सादया॒मीति सादयेत् ।
Sentence: 2    अस॑न्नो वै प्रा॒णः
Sentence: 3    प्रा॒णमे॒वास्य॑ सादयति
Sentence: 4    ष॒ड्भिरं॒शुभिः॑ पवयति
Sentence: 5    षड्वा ऋ॒तव॑स् ।
Sentence: 6    ऋ॒तुभि॑रेवैनम्पवयति
Sentence: 7    त्रिः प॑वयति
Sentence: 8    त्रय॑ इ॒मे लो॒कास् ।
Sentence: 9    ए॒भिरेवैनं लोकैः पवयति
Sentence: 10    ब्रह्मवा॒दिनो॑ वदन्ति
Sentence: 11    कस्मा॒द्सत्या॒त्त्रयः॑ पशू॒नां हस्ता॑दाना॒ इति
Sentence: 12    यत्त्रिरु॑पां॒शुं हस्ते॑न विगृ॒ह्णाति
Sentence: 13    तस्मा॒द्त्रयः॑ पशू॒नां हस्ता॑दानाः॒ पुरु॑षो ह॒स्ती म॒र्कटः॑ ।।

Paragraph: 6 
Verse: 1 
Sentence: 1    दे॒वा वै॒ यद्य॒ज्ञे ऽकु॑र्वत॒ तदसु॑रा अकुर्वत
Sentence: 2    ते दे॒वा उ॑पांशौ य॒ज्ञं सं॒स्थाप्य॑मपश्यन्
Sentence: 3    तमु॑पांशौ॒ सम॑स्थापयन्
Sentence: 4    ते ऽसु॑रा॒ वज्र॑मु॒द्यत्य॑ दे॒वान॒भ्या॑यन्त
Sentence: 5    ते दे॒वा बिभ्य॑त॒ इन्द्र॒मुपा॑धावन्
Sentence: 6    तानिन्द्रो॑ ऽन्तर्या॒मेणा॒न्तर॑धत्त
Sentence: 7    तद॑न्तर्या॒मस्या॑न्तर्याम॒त्वम् ।
Sentence: 8    यद॑न्तर्या॒मो गृ॒ह्यते॒ भ्रातृ॑व्याने॒व तद्यज॑मानो॒ ऽन्तर्ध॑त्ते ।
Sentence: 9    अ॒न्तस्ते॑ ।।

Verse: 2 
Sentence: 1    द॑धामि॒ द्यावा॑पृथि॒वी अ॒न्तरु॒र्व॒न्तरि॑क्ष॒मित्या॑ह ।
Sentence: 2    ए॒भिरे॒व लोकै॒र्यज॑मानो॒ भ्रातृ॑व्यान॒न्तर्ध॑त्ते
Sentence: 3    ते दे॒वा अ॑मन्यन्त ।
Sentence: 4    इन्द्रो॒ वा इ॒दम॑भू॒द्यद्व॒यं स्म इति
Sentence: 5    ते॑ ऽब्रुवन्
Sentence: 6    मघ॑व॒न्ननु॑ न॒ आ भ॒जेति
Sentence: 7    स॒जोषा॑ देवै॒रव॑रैः॒ परै॒श्चेत्य॑ब्रवीत् ।
Sentence: 8    ये चै॒व दे॒वाः परे॒ य चाव॑रे॒ तानु॒भया॑न् ।।

Verse: 3 
Sentence: 1    अ॒न्वाभ॑जत्
Sentence: 2    स॒जोषा॑ देवै॒रव॑रैः॒ परै॒श्चेत्या॑ह
Sentence: 3    ये चै॒व दे॒वाः परे॒ य चाव॑रे॒ तानु॒भया॑न॒न्वाभ॑जति ।
Sentence: 4    अ॑न्तर्या॒मे म॑घवन्मादय॒स्वेत्या॑ह
Sentence: 5    य॒ज्ञादे॒व यज॑मानं॒ नान्तरे॑ति ।
Sentence: 6    उ॑पया॒मगृ॑हीतो॒ ऽसीत्या॑ह ।
Sentence: 7    अ॑पा॒नस्य॒ धृत्यै
Sentence: 8    यदु॒भाव॑पवित्रौ गृ॒ह्येया॑ताम्प्रा॒णम॑पा॒नो ऽनु॒ न्यृ॑छेत्
Sentence: 9    प्र॒मायु॑कः स्यात्
Sentence: 10    प॒वित्र॑वानन्तर्या॒मो गृ॑ह्यते ।।

Verse: 4 
Sentence: 1    प्रा॑णापा॒नयो॒र्विधृ॑त्यै
Sentence: 2    प्राणापानौ॒ वा एतौ॒ यदु॑पांश्वन्तर्यामौ व्या॒न उ॑पांशु॒सव॑नस् ।
Sentence: 3    यं का॒मये॑त
Sentence: 4    प्र॒मायु॑कः स्या॒दित्यसं॑स्पृष्टौ॒ तस्य॑ सादयेत् ।
Sentence: 5    व्या॒नेनै॒वास्य॑ प्राणापानौ॒ वि छि॑नत्ति
Sentence: 6    ता॒जक्प्रमी॑यते
Sentence: 7    यं का॒मये॑त
Sentence: 8    सर्व॒मायु॑रिया॒दिति॒ संस्पृ॑ष्टौ॒ तस्य॑ सादयेत् ।
Sentence: 9    व्या॒नेनै॒वास्य॑ प्राणापानौ॒ सं त॑नोति
Sentence: 10    सर्व॒मायु॑रेति ।।

Paragraph: 7 
Verse: 1 
Sentence: 1    वाग्वा ए॒षा यऐ॑न्द्रवाय॒वस् ।
Sentence: 2    यऐ॑न्द्रवाय॒वाग्रा॒ ग्रहा॑ गृ॒ह्यन्ते॒ वाच॑मे॒वानु॒ प्र य॑न्ति
Sentence: 3    वा॒युं दे॒वा अ॑ब्रुवन् ।
Sentence: 4    सोमं॒ राजा॑नं हना॒मेति
Sentence: 5    सो॑ ऽब्रवीत् ।
Sentence: 6    वरं॑ वृणै॒ मद॑ग्रा ए॒व वो॒ ग्रहा॑ गृह्यान्ता॒ इति
Sentence: 7    तस्मा॑ऐन्द्रवाय॒वाग्रा॒ ग्रहा॑ गृह्यन्ते
Sentence: 8    तम॑घ्नन् ।
Sentence: 9    सो॑ ऽपूयत्
Sentence: 10    तं दे॒वा नोपा॑धृष्णुवन्
Sentence: 11    ते वा॒युम॑ब्रुवन् ।
Sentence: 12    इ॒मं नः॑ स्वदय ।।

Verse: 2 
Sentence: 1    इति
Sentence: 2    सो॑ ऽब्रवीत् ।
Sentence: 3    वरं॑ वृणै मद्देव॒त्या॑न्ये॒व वः॒ पात्रा॑ण्युच्यान्ता॒ इति
Sentence: 4    तस्मा॑न्नानादेव॒त्या॑नि॒ सन्ति॑ वाय॒व्या॑न्युच्यन्ते
Sentence: 5    तमे॑भ्यो वा॒युरे॒वास्व॑दयत्
Sentence: 6    तस्मा॒द्यत्पूय॑ति॒ तत्प्र॑वा॒ते वि ष॑जन्ति
Sentence: 7    वा॒युर्हि तस्य॑ पवयि॒ता स्व॑दयि॒ता
Sentence: 8    तस्य॑ वि॒ग्रह॑णं॒ नावि॑न्दन् ।
Sentence: 9    सादि॑तिरब्रवीत् ।
Sentence: 10    वरं॑ वृणा॒ अथ॒ मया॒ वि गृ॑ह्णीध्वम्मद्देव॒त्या॑ ए॒व वः॒ सोमाः॑ ।।

Verse: 3 
Sentence: 1    स॒न्ना अ॑स॒न्निति॑ ।
Sentence: 2    उ॑पया॒मगृ॑हीतो॒ ऽसीत्या॑हादितिदेव॒त्या॒स्तेन
Sentence: 3    यानि॒ हि दा॑रु॒मया॑णि॒ पात्रा॑ण्यस्यै॒ तानि॒ योनेः॒ सम्भू॑तानि
Sentence: 4    यानि॑ मृ॒न्मया॑नि सा॒क्षात्तान्यस्यै
Sentence: 5    तस्मा॑दे॒वमा॑ह
Sentence: 6    वाग्वै॒ परा॒च्यव्या॑कृतावदत्
Sentence: 7    ते दे॒वा इन्द्र॑मब्रुवन् ।
Sentence: 8    इ॒मां नो॒ वाचं॒ व्याकु॒र्विति
Sentence: 9    सो॑ ऽब्रवीत् ।
Sentence: 10    वरं॑ वृणै॒ मह्यं॑ चैवै॒ष वा॒यवे॑ च स॒ह गृ॑ह्याता॒ इति
Sentence: 11    तस्मा॑ऐन्द्रवाय॒वः स॒ह गृ॑ह्यते
Sentence: 12    तामिन्द्रो॑ मध्य॒तो॑ ऽव॒क्रम्य॒ व्याक॑रोत्
Sentence: 13    तस्मा॑दि॒यं व्याकृ॑ता॒ वागु॑द्यते
Sentence: 14    तस्मा॑त्स॒कृदिन्द्रा॑य मध्य॒तो गृ॑ह्यते॒ द्विर्वा॒यवे
Sentence: 15    द्वौ॒ हि स वरा॒ववृ॑णीत ।।

Paragraph: 8 
Verse: 1 
Sentence: 1    मि॒त्रं दे॒वा अ॑ब्रुवन् ।
Sentence: 2    सोमं॒ राजा॑नं हना॒मेति
Sentence: 3    सो॑ ऽब्रवीत् ।
Sentence: 4    नाहं सर्व॑स्य॒ वा अ॒हम्मि॒त्रम॒स्मीति
Sentence: 5    तम॑ब्रुवन्
Sentence: 6    हना॑मै॒वेति
Sentence: 7    सो॑ ऽब्रवीत् ।
Sentence: 8    वरं॑ वृणै॒ पय॑सै॒व मे॒ सोमं॑ श्रीण॒न्निति
Sentence: 9    तस्मा॑न्मैत्रावरु॒णम्पय॑सा श्रीणन्ति
Sentence: 10    तस्मा॑त्प॒शवो॑ ऽपाक्रामन्
Sentence: 11    मि॒त्रः सन्क्रू॒रम॑क॒रिति
Sentence: 12    क्रू॒रमि॑व॒ खलु॒ वा ए॒षः ।।

Verse: 2 
Sentence: 1    क॑रोति॒ यः सोमे॑न॒ यज॑ते
Sentence: 2    तस्मा॑त्प॒शवो ऽप॑ क्रामन्ति
Sentence: 3    यन्मै॑त्रावरु॒णम्पय॑सा श्री॒णाति॑ प॒शुभि॑रे॒व तन्मि॒त्रं स॑म॒र्धय॑ति प॒शुभि॒र्यज॑मानम्
Sentence: 4    पु॒रा खलु॒ वावै॒वम्मि॒त्रो॑ ऽवेत् ।
Sentence: 5    अप॒ मत्क्रू॒रं च॒क्रुषः॑ प॒शवः॑ क्रमिष्य॒न्तीति
Sentence: 6    तस्मा॑दे॒वम॑वृणीत
Sentence: 7    वरु॑णं दे॒वा अ॑ब्रुवन्
Sentence: 8    त्वयां॑श॒भुवा॒ सोमं॒ राजा॑नं हना॒मेति
Sentence: 9    सो॑ ऽब्रवीत् ।
Sentence: 10    वरं॑ वृणै॒ मह्यं॑ च ।।

Verse: 3 
Sentence: 1    एवै॒ष मि॒त्राय॑ च स॒ह गृ॑ह्याता॒ इति
Sentence: 2    तस्मा॑न्मैत्रावरु॒णः स॒ह गृ॑ह्यते
Sentence: 3    तस्मा॒द्राज्ञा॒ राजा॑नमंश॒भुवा॑ घ्नन्ति वैश्येन वैश्यं शू॒द्रेण॒ सूद्रम् ।
Sentence: 4    न वा इ॒दं दिवा॒ न नक्त॑मासी॒दव्या॑वृत्तम् ।
Sentence: 5    ते दे॒वा मि॒त्रावरु॑णावब्रुवन् ।
Sentence: 6    इ॒दं नो॒ वि वा॑सयत॒मिति
Sentence: 7    ताव॑ब्रूताम् ।
Sentence: 8    वरं॑ वृणावहा॒ एक॑ ए॒वावत्पूर्वो{F ग्रहो{W ग्रहो गृह्याता॒ इति
Sentence: 9    तस्मा॑ऐन्द्रवाय॒वः पूर्वो॑ मैत्रावरु॒णाद्गृ॑ह्यते
Sentence: 10    प्राणापानौ॒ ह्येतौ॒ यदु॑पांश्वन्तर्यामौ
Sentence: 11    मि॒त्रो ऽह॒रज॑नय॒द्वरु॑णो॒ रात्रि॑म् ।
Sentence: 12    ततो॒ वा इ॒दं व्औ॑छत् ।
Sentence: 13    यन्मै॑त्रावरु॒णो गृ॒ह्यते॒ व्यु॑ष्ट्यै ।।

Paragraph: 9 
Verse: 1 
Sentence: 1    य॒ज्ञस्य॒ शिरो॑ ऽछिद्यत
Sentence: 2    ते दे॒वा अ॒श्विना॑वब्रुवन्
Sentence: 3    भि॒षजौ वै स्थ इ॒दं य॒ज्ञस्य॒ शिरः॒ प्रति॑ धत्त॒मिति
Sentence: 4    ताव॑ब्रूताम् ।
Sentence: 5    वरं॑ वृणावहै॒ ग्रह॑ ए॒व ना॑व॒त्रापि॑ गृह्यता॒मिति
Sentence: 6    ताभ्या॑मे॒तमा॑श्वि॒नम॑गृह्णन्
Sentence: 7    ततो वै तौ य॒ज्ञस्य॒ शिरः॒ प्रत्य॑धताम् ।
Sentence: 8    यदा॑श्वि॒नो गृ॒ह्यते॑ य॒ज्ञस्य॒ निष्कृ॑त्यै
Sentence: 9    तौ दे॒वा अ॑ब्रुवन् ।
Sentence: 10    अपू॑तौ॒ वा इमौ मनुष्यचरौ ।।

Verse: 2 
Sentence: 1    भि॒षजा॒विति
Sentence: 2    तस्मा॑द्ब्राह्म॒णेन॑ भेष॒जं न का॒र्य॒मपू॑तो॒ ह्ये॒षो॑ ऽमे॒ध्यो यो भि॒षक्^भि॒षज्
Sentence: 3    तौ बहिष्पवमा॒नेन॑ पवयि॒त्वा ताभ्या॑मे॒तमा॑श्वि॒नम॑गृह्णन्
Sentence: 4    तस्मा॑द्बहिष्पवमा॒ने स्तु॒त आ॑श्वि॒नो गृ॑ह्यते
Sentence: 5    तस्मा॑दे॒वं वि॒दुषा॑ बहिष्पवमा॒न उ॑प॒सद्यः॑ प॒वित्रं वै बहिष्पवमा॒न आ॒त्मान॑मे॒व प॑वयते
Sentence: 6    तयो॑स्त्रे॒धा भै॑षज्यं॒ वि न्य॑दधुस् ।
Sentence: 7    अग्नौ॒ तृती॑यम॒प्सु तृती॑यम्ब्राह्म॒णे तृती॑यम् ।
Sentence: 8    तस्मा॑दुदपा॒त्रम् ।।

Verse: 3 
Sentence: 1    उ॑पनि॒धाय॑ ब्राह्म॒णं द॑क्षिण॒तो नि॒षाद्य॑ भेष॒जं कु॑र्यात् ।
Sentence: 2    याव॑दे॒व भे॑ष॒जं तेन॑ करोति स॒मर्धु॑कमस्य कृ॒तम्भ॑वति
Sentence: 3    ब्रह्मवा॒दिनो॑ वदन्ति
Sentence: 4    कस्मा॑त्स॒त्यादेक॑पात्रा द्विदेव॒त्या॑ गृ॒ह्यन्ते॑ द्वि॒पात्रा॑ हूयन्त॒ इति
Sentence: 5    यदेक॑पात्रा गृ॒ह्यन्ते॒ तस्मा॒देको॑ ऽन्तर॒तः प्रा॒णो द्वि॒पात्त्रा॑ हूयन्ते॒ तस्माद्द्वौद्वौ ब॒हिष्टा॑त्प्रा॒णाः
Sentence: 6    पा॒णा वा ए॒ते यद्द्वि॑देव॒त्याः॑ प॒शव॒ इडा॒ यदिडा॒म्पूर्वां॑ द्विदेव॒त्ये॑भ्य उप॒ह्वये॑त ।।

Verse: 4 
Sentence: 1    प॒शुभिः॑ प्रा॒णान॒न्तर्द॑धीत प्र॒मायु॑कः स्यात् ।
Sentence: 2    द्वि॑देव॒त्या॑न्भक्षयि॒त्वेडा॒मुप॑ ह्वयते
Sentence: 3    प्रा॒णाने॒वात्मन्धि॒त्वा प॒शूनुप॑ ह्वयते
Sentence: 4    वाग्वा ऐ॑न्द्र वाय॒वश्चक्षु॑र्मैत्रावरु॒णः श्रोत्र॑माश्वि॒नः
Sentence: 5    पु॒रस्ता॑ऐन्द्रवाय॒वम्भ॑क्षयति॒ तस्मा॑त्पु॒रस्ता॑द्वा॒चा व॑दति
Sentence: 6    पु॒रस्ता॑न्मैत्रावरु॒णं तस्मा॑द्पु॒रस्ता॒च्चक्षु॑षा पश्यति स॒र्वतः॑ प्रै॒हार॑माश्वि॒नं तस्मा॑त्स॒र्वतः॒ श्रोत्रे॑ण शृणोति
Sentence: 7    प्रा॒णा वा ए॒ते यद्द्वि॑देव॒त्याः॑ ।।

Verse: 5 
Sentence: 1    अरि॑क्तानि॒ पात्रा॑णि सादयति
Sentence: 2    तस्मा॒दरि॑क्ता अन्तर॒तः प्रा॒णा यतः॒ खलु वै य॒ज्ञस्य॒ वित॑तस्य॒ न क्रि॒यते॒ तदनु॑ य॒ज्ञं रक्षां॒स्यव॑ चरन्ति
Sentence: 3    यदरि॑क्तानि॒ पात्रा॑णि सा॒दय॑ति क्रि॒यमा॑णमे॒व तद्य॒ज्ञस्य॑ शये॒ रक्ष॑सा॒मन॑न्ववचाराय
Sentence: 4    दक्षि॑णस्य हवि॒र्धान॒स्योत्त॑रस्यां वर्त॒न्यां सा॑दयति वा॒च्ये॒व वाचं॑ दधाति ।
Sentence: 5    आ तृ॑तीयसव॒नात्परि॑ शेरे य॒ज्ञस्य॒ संत॑त्यै

Paragraph: 10 
Verse: 1 
Sentence: 1    बृह॒स्पति॑र्दे॒वाना॑म्पु॒रोहि॑त॒ आसी॒च्छण्डा॒मर्का॒वसु॑राणाम्
Sentence: 2    ब्रह्म॑ण्वन्तो दे॒वा आस॒न्ब्रह्म॑ण्व॒न्तो ऽसु॑रास्
Sentence: 3    ते॒ ऽन्यो॒ऽन्यं नाश॑क्नुवन्न॒भिभ॑वितुम् ।
Sentence: 4    ते दे॒वाः शण्डा॒मर्का॒वुपा॑मन्त्रयन्त
Sentence: 5    ताव॑ब्रूताम् ।
Sentence: 6    वरं॑ वृणावहै॒ ग्रहा॑वे॒व ना॒वत्रापि॑ गृह्येता॒मिति
Sentence: 7    ताभ्या॑मेतौ शु॒क्राम॒न्थिना॑वगृह्णन्
Sentence: 8    ततो॑ दे॒वा अभ॑व॒न्परासु॑रास् ।
Sentence: 9    यस्यै॒वं वि॒दुषः॑ शु॒क्राम॒न्थिनौ॑ गृ॒ह्येते॒ भव॑त्या॒त्मना॒ परा॑ ।।

Verse: 2 
Sentence: 1    अ॑स्य॒ भ्रात्रि॑व्यो भवति
Sentence: 2    तौ दे॒वा अ॑प॒नुद्या॒त्मन॒ इन्द्रा॑याजुहवुस् ।
Sentence: 3    अप॑नुत्तौ॒ शण्डा॒मर्कौ॑ स॒हामुनेति॑ ब्रूया॒द्यं द्वि॒ष्यात् ।
Sentence: 4    यमे॒व द्वेष्टि॒ तेनै॑नौ स॒हाप॑ नुदते
Sentence: 5    स प्र॑थ॒मः संकृ॑तिर्वि॒श्वक॒र्मेत्येवैनावा॒त्मन॒ इन्द्रा॑याजुहवुस् ।
Sentence: 6    इन्द्रो॒ ह्ये॒तानि॑ रू॒पाणि॒ करि॑क्र॒दच॑रत् ।
Sentence: 7    असौ॒ वा आ॑दि॒त्यः शु॒क्रश्च॒न्द्रमा॑ म॒न्थी ।
Sentence: 8    अ॑पि॒गृह्य॒ प्राञ्चौ॒ निः ।।

Verse: 3 
Sentence: 1    क्रा॑मतस्
Sentence: 2    तस्मा॒त्प्राञ्चौ॒ यन्तौ॒ न प॑श्यन्ति
Sentence: 3    प्र॒त्यञ्चा॑वा॒वृत्य॑ जुहुतस्
Sentence: 4    तस्मा॑त्प्र॒त्यञ्चौ॒ यन्तौ॑ पश्यन्ति
Sentence: 5    चक्षु॑षी॒ वा ए॒ते य॒ज्ञस्य॒ यच्छु॒क्राम॒न्थिनौ॒ नासि॑कोत्तरवे॒दिस् ।
Sentence: 6    अ॒भितः॑ परि॒क्रम्य॑ जुहुतस्
Sentence: 7    तस्मा॑द॒भितो॒ नासि॑कां॒ चक्षु॑षी
Sentence: 8    तस्मा॒न्नासि॑कया॒ चक्षु॑षी॒ विधृ॑ते
Sentence: 9    स॒र्वतः॒ परि॑ क्रामतो॒ रक्ष॑सा॒मप॑हत्यै
Sentence: 10    दे॒वा वै॒ याः प्राची॒राहु॑ती॒रजु॑हवु॒र्ये पु॒रस्ता॒दसु॑रा॒ आस॒न्तांस्ताभिः॒ प्र ।।

Verse: 4 
Sentence: 1    अ॑नुदन्त
Sentence: 2    याः प्र॒तीची॒र्ये प॒श्चादसु॑रा॒ आस॒न्तांस्ताभि॒रपा॑नुदन्त
Sentence: 3    प्राची॑र॒न्या आहु॑तयो हू॒यन्ते॑ प्र॒त्यञ्चौ॑ शु॒क्राम॒न्थिनौ
Sentence: 4    प॒श्चाच्चै॒व पु॒रस्ता॑च्च॒ यज॑मानो॒ भ्रातृ॑व्या॒न्प्र णु॑दते
Sentence: 5    तस्मा॒त्परा॑चीः प्र॒जाः प्र वी॑यन्ते प्र॒तीची॑र्जायन्ते
Sentence: 6    शु॒क्राम॒न्थिनौ॒ वा अनु॑ प्र॒जाः प्र जा॑यन्ते॒ ऽत्त्रीश्चा॒द्या॑श्च
Sentence: 7    सु॒वीराः॑ प्र॒जाः प्र॑ज॒नय॒न्परी॑हि शु॒क्रः शु॒क्रशो॑चिषा ।।

Verse: 5 
Sentence: 1    सु॑प्र॒जाः प्र॒जाः प्र॑ज॒नय॒न्परी॑हि म॒न्थी म॒न्थिशो॑चि॒षेत्या॑ह ।
Sentence: 2    ए॒ता वै॑ सु॒वीरा॒ या अत्त्री॑स् ।
Sentence: 3    ए॒ताः सु॑प्र॒जा या आ॒द्या॑स् ।
Sentence: 4    य ए॒वं वेदा॒त्त्र्य॑स्य प्र॒जा जा॑यते॒ नाद्या
Sentence: 5    प्र॒जाप॑ते॒रक्ष्य॑श्वयत्
Sentence: 6    तत्परा॑पतत्
Sentence: 7    तद्विक॑ङ्कत॒म्प्रावि॑शत्
Sentence: 8    तद्विक॑ङ्कते॒ नार॑मत
Sentence: 9    तद्यव॒म्प्रावि॑शत्
Sentence: 10    तद्यवे॑ ऽरमत
Sentence: 11    तद्यव॑स्य ।।

Verse: 6 
Sentence: 1    य॑व॒त्वम् ।
Sentence: 2    यद्वै॑कङ्कतम्मन्थिपा॒त्रम्भव॑ति॒ सक्तु॑भिः श्री॒णाति॑ प्र॒जाप॑तेरे॒व तच्चक्षुः॒ सम्भ॑रति
Sentence: 3    ब्रह्मवा॒दिनो॑ वदन्ति
Sentence: 4    कस्मा॑त्स॒त्यान्म॑न्थिपा॒त्रं सदो॒ नाश्नु॑त॒ इति॑ ।
Sentence: 5    आ॑र्तपा॒त्रं हीति॑ ब्रूयात् ।
Sentence: 6    यद॑श्नुवी॒तान्धो॑ ऽध्व॒र्युः स्यादार्ति॒मार्छे॑त्
Sentence: 7    तस्मा॒न्नाश्नु॑ते ।।

Paragraph: 11 
Verse: 1 
Sentence: 1    दे॒वा वै॒ यद्य॒ज्ञे ऽकु॑र्वत॒ तदसु॑रा अकुर्वत
Sentence: 2    ते दे॒वा आ॑ग्रय॒णाग्रा॒न्ग्रहा॑नपश्यन्
Sentence: 3    तान॑गृह्णत
Sentence: 4    ततो वै॒ ते ऽग्र॒म्पर्या॑यन्
Sentence: 5    यस्यै॒वं वि॒दुष॑ आग्रय॒णाग्रा॒ ग्रहा॑ गृ॒ह्यन्ते ऽग्र॑मे॒व स॑मा॒नाना॒म्पर्ये॑ति
Sentence: 6    रु॒ग्णव॑त्य॒र्चा भ्रातृ॑व्यवतो गृह्णीयात् ।
Sentence: 7    भ्रातृ॑व्यस्यै॒व रु॒क्त्वाग्रं॑ समा॒नाना॒म्पर्ये॑ति
Sentence: 8    ये दे॒वा दि॒व्येका॑दश॒ स्थेत्या॑ह ।।

Verse: 2 
Sentence: 1    ए॒ताव॑तीर्वै दे॒वता॒स्ताभ्य॑ एवैनं॒ सर्वा॑भ्यो गृह्णाति ।
Sentence: 2    ए॒ष ते॒ योनि॒र्विश्वे॑भ्यस्त्वा दे॒वेभ्य॒ इति॑ आह
Sentence: 3    वैश्वदे॒वो ह्ये॒ष दे॒वत॑या
Sentence: 4    वाग्वै॑ दे॒वेभ्य्यो ऽपा॑क्रामद्य॒ज्ञायाति॑ष्ठमाना॒ ते दे॒वा वा॒च्यप॑क्रान्तायां तू॒ष्णीं ग्रहा॑नगृह्णत॒ साम॑न्यत॒ वाग॒न्तर्य॑न्ति वै॒ मेति॒ साग्र॑य॒णम्प्रत्याग॑छत्
Sentence: 5    तदा॑ग्रय॒णस्या॑ग्रयण॒त्वम् ।।

Verse: 3 
Sentence: 1    तस्मा॑दाग्रय॒णे वाग्वि सृ॑ज्यते
Sentence: 2    यत्तू॒ष्णीम्पूर्वे॒ ग्रहा॑ गृ॒ह्यन्ते॒ यथा॑ त्सा॒री ।
Sentence: 3    इय॑ति म॒ आख॒ इय॑ति॒ नाप॑ रात्स्या॒मीत्यु॑पावसृ॒जत्ये॒वमे॒व तद॑ध्व॒र्युरा॑ग्रय॒णं गृ॑ही॒त्वा य॒ज्ञमा॒रभ्य॒ वाचं॒ वि सृ॑जते
Sentence: 4    त्रिर्हिं क॑रोत्युद्गा॒तॄने॒व तद्वृ॑णीते
Sentence: 5    प्र॒जाप॑ति॒र्वा ए॒ष यदा॑ग्रय॒णो यदा॑ग्रय॒णं गृ॑ही॒त्वा हिं॑क॒रोति॑ प्र॒जाप॑तिरेव ।।

Verse: 4 
Sentence: 1    तत्प्र॒जा अ॒भि जि॑घ्रति
Sentence: 2    तस्मा॑द्व॒त्सं जा॒तं गौ॑र॒भि जि॑घ्रति ।
Sentence: 3    आ॒त्मा वा ए॒ष य॒ज्ञस्य॒ यदा॑ग्रय॒णः सव॑नेसवने॒ ऽभि गृ॑ह्णात्या॒त्मन्ने॒व य॒ज्ञं सं त॑नोति ।
Sentence: 4    उ॑परिष्टा॒दा न॑यति॒ रेत॑ ए॒व तद्द॑धाति ।
Sentence: 5    अ॒धस्ता॒दुप॑ गृह्णाति॒ प्र ज॑नयत्ये॒व तत् ।
Sentence: 6    ब्र॑ह्मवा॒दिनो॑ वदन्ति
Sentence: 7    कस्मा॑त्स॒त्याद्गा॑य॒त्री कनि॑ष्ठा॒ छन्द॑सां स॒ती सर्वा॑णि॒ सव॑नानि वह॒तीति॑ ।
Sentence: 8    ए॒ष वै॑ गायत्रियै व॒त्सो यदा॑ग्रय॒णस्तमे॒व तद॑भिनि॒वर्तं॒ सर्वा॑णि॒ सव॑नानि वहति
Sentence: 9    तस्मा॑द्व॒त्सम॒पाकृ॑तं गौर॒भि नि व॑र्तते ।।

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.