TITUS
White Yajur-Veda: Vajasaneyi-Samhita (Madhyandina)
Part No. 10
Previous part

Paragraph: 10 

Verse: 1 
Sentence: a    अ॒पो दे॒वा मधु॑मतीरगृभ्ण॒न्नूर्ज॑स्वती राज॒स्व॒श्चिता॑नाः ।
Sentence: b    याभि॑र्मि॒त्रावरु॑णाव॒भ्यषि॑ञ्च॒न्याभि॒रिन्द्र॒मन॑य॒न्नत्यरा॑तीः ।।

Verse: 2 
Sentence: a    वृष्ण॑ ऊ॒र्मिर॑सि राष्ट्र॒दा रा॒ष्ट्रं मे॑ देहि॒ स्वाहा॑ ।
Sentence: b    वृष्ण॑ ऊ॒र्मिर॑सि राष्ट्र॒दा रा॒ष्ट्रम॒मुष्मै॑ देहि ।
Sentence: c    वृ॑षसे॒नो॑ सि राष्ट्र॒दा रा॒ष्ट्रं मे॑ देहि॒ स्वाहा॑ ।
Sentence: d    वृ॑षसे॒नो॑ सि राष्ट्र॒दा रा॒ष्ट्रम॒मुष्मै॑ देहि ।।

Verse: 3 
Sentence: a    अ॒र्थेत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ ।
Sentence: b    अ॒र्थेत॑ स्थ राष्ट्र॒दा रा॒ष्ट्रम॒मुष्मै॑ दत्त ।
Sentence: c    ओज॑स्वती स्थ राष्ट्र॒दा रा॒ष्ट्रं मे॑ दत्त॒ स्वाहा॑ ।
Sentence: d    ओज॑स्वती स्थ राष्ट्र॒दा रा॒ष्ट्रम॒मुष्मै॑ दत्त ।
Sentence: e    आपः॑ परिवा॒हिणी॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ ।
Sentence: f    आपः॑ परिवा॒हिणी॑ स्थ राष्ट्र॒दा रा॒ष्ट्रम॒मुष्मै॑ दत्त ।
Sentence: g    अ॒पां पति॑रसि राष्ट्र॒दा रा॒ष्ट्रं मे॑ देहि॒ स्वाहा॑ ।
Sentence: h    अ॒पां पति॑रसि राष्ट्र॒दा रा॒ष्ट्रम॒मुष्मै॑ देहि ।
Sentence: i    अ॒पां गर्भो॑ सि राष्ट्र॒दा रा॒ष्ट्रं मे॑ देहि॒ स्वाहा॑ ।
Sentence: j    अ॒पां गर्भो॑ सि राष्ट्र॒दा रा॒ष्ट्रम॒मुष्मै॑ देहि ।।

Verse: 4 
Sentence: a    सूर्य॑त्वचस स्थ राष्ट्र॒दा रा॒ष्ट्रं मे॑ दत्त॒ स्वाहा॑ ।
Sentence: b    सूर्य॑त्वचस स्थ राष्ट्र॒दा रा॒ष्ट्रम॒मुष्मै॑ दत्त ।
Sentence: c    सूर्य॑वर्चस स्थ राष्ट्र॒दा रा॒ष्ट्रं मे॑ दत्त॒ स्वाहा॑ ।
Sentence: d    सूर्य॑वर्चस स्थ राष्ट्र॒दा रा॒ष्ट्रम॒मुष्मै॑ दत्त ।
Sentence: e    मान्दा॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ ।
Sentence: f    मान्दा॑ स्थ राष्ट्र॒दा रा॒ष्ट्रम॒मुष्मै॑ दत्त ।
Sentence: g    व्र॑ज॒क्षित॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ ।
Sentence: h    व्र॑ज॒क्षित॑ स्थ राष्ट्र॒दा रा॒ष्ट्रम॒मुष्मै॑ दत्त ।
Sentence: i    वाशा॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ ।
Sentence: j    वाशा॑ स्थ राष्ट्र॒दा रा॒ष्ट्रम॒मुष्मै॑ दत्त ।
Sentence: k    शवि॑ष्ठा स्थ राष्ट्र॒दा रा॒ष्ट्रं मे॑ दत्त॒ स्वाहा॑ ।
Sentence: l    शवि॑ष्ठा स्थ राष्ट्र॒दा रा॒ष्ट्रम॒मुष्मै॑ दत्त ।
Sentence: m    शक्व॑री स्थ राष्ट्र॒दा रा॒ष्ट्रं मे॑ दत्त॒ स्वाहा॑ ।
Sentence: n    शक्व॑री स्थ राष्ट्र॒दा रा॒ष्ट्रम॒मुष्मै॑ दत्त ।
Sentence: o    ज॑न॒भृत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ ।
Sentence: p    ज॑न॒भृत॑ स्थ राष्ट्र॒दा रा॒ष्ट्रम॒मुष्मै॑ दत्त ।
Sentence: q    वि॑श्व॒भृत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ ।
Sentence: r    वि॑श्व॒भृत॑ स्थ राष्ट्र॒दा रा॒ष्ट्रम॒मुष्मै॑ दत्त ।
Sentence: s    आपः॑ स्व॒राज॑ स्थ राष्ट्र॒दा रा॒ष्ट्रममुंअै दत्त ।
Sentence: t    मधु॑मती॒र्मधु॑मतीभिः पृच्यन्तां॒ महि॑ क्ष॒त्रं क्ष॒त्रिया॑य वन्वा॒नाः ।
Sentence: u    अना॑धृष्टाः सीदत सहौजसो॒ महि॑ क्ष॒त्रं क्ष॒त्रिया॑य॒ दध॑तीः ।।

Verse: 5 
Sentence: a    सोम॑स्य॒ त्विषि॑रसि॒ तवे॑व मे॒ त्विषि॑र्भूयात् ।
Sentence: b    अ॒ग्नये॒ स्वाहा॑ ।
Sentence: c    सोमा॑य॒ स्वाहा॑ ।
Sentence: d    स॑वि॒त्रे स्वाहा॑ ।
Sentence: e    सर॑स्वत्यै॒ स्वाहा॑ ।
Sentence: f    पू॒ष्णे स्वाहा॑ ।
Sentence: g    बृह॒स्पत॑ये॒ स्वाहा॑ ।
Sentence: h    इन्द्रा॑य॒ स्वाहा॑ ।
Sentence: i    घोषा॑य॒ स्वाहा॑ ।
Sentence: j    श्लोका॑य॒ स्वाहा॑ ।
Sentence: k    अँशा॑य॒ स्वाहा॑ ।
Sentence: l    भगा॑य॒ स्वाहा॑ ।
Sentence: m    अ॑र्य॒म्णे स्वाहा॑ ।।

Verse: 6 
Sentence: a    प॒वित्रे॑ स्थो वैष्णव्यौ ।
Sentence: b    स॑वि॒तुर्वः॑ प्रस॒व उत्पु॑ना॒म्यच्छि॑द्रेण प॒वित्रे॑ण॒ सूर्य॑स्य र॒श्मिभिः॑ ।
Sentence: c    अनि॑भृष्टमसि वा॒चो बन्धु॑स्तपो॒जाः सोम॑स्य दा॒त्रम॑सि॒ स्वाहा॑ राज॒स्वः॑ ।।

Verse: 7 
Sentence: a    स॑ध॒मादो॑ द्यु॒म्निनी॒राप॑ ए॒ता अना॑धृष्टा अप॒स्यो॒ वसा॑नाः ।
Sentence: b    प॒स्त्या॑सु चक्रे॒ वरु॑णः स॒धस्थ॑म॒पाँ शिशु॑र्मा॒तृत॑मास्व॒न्तः ।।

Verse: 8 
Sentence: a    क्ष॒त्रस्योल्व॑मसि ।
Sentence: b    क्ष॒त्रस्य॑ ज॒राय्व॑सि ।
Sentence: c    क्ष॒त्रस्य॒ योनि॑रसि ।
Sentence: d    क्ष॒त्रस्य॒ नाभि॑रसि ।
Sentence: e    इन्द्र॑स्य॒ वात्र॑घ्नम् ।
Sentence: f    मि॒त्रस्या॑सि॒ वरु॑णस्यासि ।
Sentence: g    त्वया॒यं वृ॒त्रं ब॑धेत् ।
Sentence: h    दृ॒वासि॑ ।
Sentence: i    रु॒जासि॑ ।
Sentence: j    क्षु॒मासि॑ ।
Sentence: k    पातैनं॒ प्राञ्च॑म् ।
Sentence: l    पातैनं प्र॒त्यञ्च॑म् ।
Sentence: m    पातैनं ति॒र्यञ्चं॑ दि॒ग्भ्यः पा॑त ।।

Verse: 9 
Sentence: a    आ॒विर्म॑याः ।
Sentence: b    आवि॑त्तो अ॒ग्निर्गृ॒हप॑तिः ।
Sentence: c    आवि॑त्त॒ इन्द्रो॑ वृ॒द्धश्र॑वाः ।
Sentence: d    आवि॑त्तौ मि॒त्रावरु॑णौ धृ॒तव्र॑तौ ।
Sentence: e    आवि॑त्तः पू॒षा वि॒श्ववे॑दाः ।
Sentence: f    आवि॑त्ते॒ द्यावा॑पृथि॒वी वि॒श्वश॑म्भुवौ ।
Sentence: g    आवि॒त्तादि॑तिरु॒रुश॑र्मा ।।

Verse: 10 
Sentence: a    अवे॑ष्टा दन्द॒शूकाः॑ ।
Sentence: b    प्राची॒मा रो॑ह गाय॒त्री त्वा॑वतु रथन्त॒रँ साम॑ त्रि॒वृत्स्तोमो॑ वस॒न्त ऋ॒तुर्ब्रह्म॒ द्रवि॑णम् ।।

Verse: 11 
Sentence: a    दक्षि॑णा॒मा रो॑ह त्रि॒ष्टुप्त्वा॑वतु बृ॒हत्साम॑ पञ्चद॒श स्तोमो॑ ग्री॒ष्म ऋ॒तुः क्ष॒त्रं द्रवि॑णम् ।।

Verse: 12 
Sentence: a    प्र॒तीची॒मा रो॑ह॒ जग॑ती त्वावतु वैरू॒पँ साम॑ सप्तद॒श स्तोमो॑ व॒र्षा ऋ॒तुः विड्द्रवि॑णम् ।।

Verse: 13 
Sentence: a    उदी॑ची॒मा रो॑हानु॒ष्टुप्त्वा॑वतु वैरा॒जँ सामै॑कविँ॒श स्तोमः॑ श॒रदृ॒तुः पलं॒ द्रवि॑णम् ।।

Verse: 14 
Sentence: a    ऊ॒र्ध्वामा रो॑ह प॒ङ्क्तिस्त्वा॑वतु शाक्वररैव॒ते साम॑नी त्रिणवत्रयस्त्रिँशौ॒ स्तोमौ॑ हेमन्तशिशि॒रावृ॒तू वर्चो॒ द्रवि॑णम् ।
Sentence: b    प्रत्य॑स्तं॒ नमु॑चेः॒ शिरः॑ ।।

Verse: 15 
Sentence: a    सोम॑स्य॒ त्विषि॑रसि॒ तवे॑व मे॒ त्विषि॑र्भूयात् ।
Sentence: b    मृ॒त्योः पा॑हि ।
Sentence: c    ओजो॑ सि॒ सहो॑ स्य॒मृत॑मसि ।।

Verse: 16 
Sentence: a    हिर॑ण्यरूपा उ॒षसो॑ विरो॒क उ॒भावि॑न्द्रा॒ उदि॑थः॒ सूर्य॑श्च ।
Sentence: b    आ रो॑हतं वरुण मित्र॒ गर्तं॒ तत॑श्चक्षाथा॒मदि॑तिं॒ दितिं॑ च ।
Sentence: c    मि॒त्रो॑ सि॒ वरु॑णो सि ।।

Verse: 17 
Sentence: a    सोम॑स्य त्वा द्यु॒म्नेना॒भिषि॑ञ्चाम्य॒ग्नेर्भ्राज॑सा॒ सूर्य॑स्य॒ वर्च॒सेन्द्र॑स्येन्द्रण॑ ।
Sentence: b    क्ष॒त्राणां॑ क्ष॒त्रप॑तिरे॒ध्यति॑ दि॒द्यून्पा॑हि ।।

Verse: 18 
Sentence: a    इ॒मं दे॑वा असुप॒त्नँ सु॑वध्वं मह॒ते क्ष॒त्राय॑ मह॒ते ज्यै॑ष्ठ्याय मह॒ते जान॑राज्या॒येन्द्र॑य॑ ।
Sentence: b    इ॒मम॒मुष्य॑ पु॒त्रम॒मुष्यै॑ पु॒त्रमस्यै वि॒श ए॒ष वो॑ मी॒ राजा॒ सोमो॒ स्माकं॑ ब्राह्म॒णानाँ॒ राजा॑ ।।

Verse: 19 
Sentence: a    प्र पर्व॑तस्य वृष॒भस्य॑ पृ॒ष्ठान्नाव॑श्चरन्ति स्व॒सिच॑ इया॒नाः ।
Sentence: b    ता आव॑वृत्रन्नध॒रागुद॑क्ता॒ अहिं॑ बु॒ध्न्य॒मनु॑ रीयमाणाः ।
Sentence: c    विष्णो॑र्वि॒कर्म॑णमसि ।
Sentence: d    विष्णो॒र्विक्रा॑न्तमसि ।
Sentence: e    विष्णोः॑ क्रा॒न्तम॑सि ।।

Verse: 20 
Sentence: a    प्रजा॑पते॒ न त्वदे॒तान्य॒न्यो विश्वा॑ रू॒पाणि॒ परि॒ ता ब॑भूव ।
Sentence: b    यत्का॑मास्ते जुहु॒मस्तन्नो॑ अस्तु ।
Sentence: c    अ॒यम॒मुष्य॑ पि॒तासाव॒स्य पि॒ता ।
Sentence: d    व॒यँ स्या॑म॒ पत॑यो रयी॒णाँ स्वाहा॑ ।
Sentence: e    रुद्र॒ यत्ते॒ क्रिवि॒ परं॒ नाम॒ तस्मि॑न्हु॒तम॑स्यमे॒ष्टम॑सि॒ स्वाहा॑ ।।

Verse: 21 
Sentence: a    इन्द्र॑स्य॒ वज्रो॑ सि ।
Sentence: b    मि॒त्रावरु॑णयोस्त्वा प्रशा॒स्त्रोः प्र॒शिषा॑ युनज्मि ।
Sentence: c    अव्य॑थायै त्वा स्व॒धायै॒ त्वारि॑ष्टो॒ अर्जु॑नः ।
Sentence: d    म॒रुतां॑ प्रस॒वेन॑ जय ।
Sentence: e    आपा॑म॒ मन॑सा ।
Sentence: f    समि॑न्द्रि॒येण॑ ।।

Verse: 22 
Sentence: a    मा त॑ इन्द्र ते व॒यं तु॑राषा॒डयु॑क्तासो अब्र॒ह्मता॒ विद॑साम ।
Sentence: b    तिष्ठा॒ रथ॒मधि॒ यं व॑ज्रह॒स्ता र॒श्मीन्दे॑व युवसे॒ स्वश्वा॑न् ।।

Verse: 23 
Sentence: a    अ॒ग्नये॑ गृ॒हप॑तये॒ स्वाहा॑ ।
Sentence: b    सोमा॑य॒ वन॒स्पत॑ये॒ स्वाहा॑ ।
Sentence: c    म॒रुता॒मोज॑से॒ स्वाहा॑ ।
Sentence: d    इन्द्र॑स्येन्द्रि॒याय॒ स्वाहा॑ ।
Sentence: e    पृथि॑वि मात॒र्मा मा॑ हिँसी॒र्मो अ॒हं त्वाम् ।।

Verse: 24 
Sentence: a    हँ॒सः शु॑चि॒षद्वसु॑रन्तरिक्ष॒सद्धोता॑ वेदि॒षदति॑थिर्दुरोण॒सत् ।
Sentence: b    नृ॒षद्व॑र॒सदृ॑त॒सद्व्यो॑म॒सद॒ब्जा गो॒जा ऋ॑त॒जा अ॑द्रि॒जा ऋ॒तं बृ॒हत् ।।

Verse: 25 
Sentence: a    इय॑द॒स्यायु॑र॒स्यायु॒र्मयि॑ धेहि॒ युङ्ङ॑सि॒ वर्चो॑ सि॒ वर्चो॒ मयि॑ धेहि ।
Sentence: b    ऊर्ग॒स्यूर्जं॒ मयि॑ धेहि ।
Sentence: c    इन्द्र॑स्य वां वीर्यकृ॒तो बा॒हू अ॑भ्यु॒पाव॑ हरामि ।।

Verse: 26 
Sentence: a    स्यो॒नासि॑ सु॒षदा॑सि ।
Sentence: b    क्ष॒त्रस्य॒ योनि॑रसि ।
Sentence: c    स्यो॒नामा सी॑द सु॒षदा॒मा सी॑द क्ष॒त्रस्य॒ योनि॒मा सी॑द ।।

Verse: 27 
Sentence: a    नि ष॑साद घृ॒तव्र॑तो॒ वरु॑णः प॒स्त्या॒स्वा ।
Sentence: b    साम्रा॑ज्याय सु॒क्रतुः॑ ।।

Verse: 28 
Sentence: a    अ॑भि॒भूर॑स्ये॒तास्ते॒ पञ्च॒ दिशः॑ कल्पन्ताम् ।
Sentence: b    ब्रह्मँ॒स्त्वं ब्रह्मा॑सि सवि॒तासि॑ स॒त्यप्र॑सवः ।
Sentence: c    वरु॑णो सि सत्यौजाः ।
Sentence: d    इन्द्रो॑ सि॒ विशौ॑जाः ।
Sentence: e    रु॒द्रो सि॑ सु॒शेवः॑ ।
Sentence: f    बहु॑कार॒ श्रेय॑स्कर॒ भूय॑स्कर ।
Sentence: g    इन्द्र॑स्य॒ वज्रो सि॒ तेन॑ मे रध्य ।।

Verse: 29 
Sentence: a    अ॒ग्निः पृ॒थुर्धर्म॑ण॒स्पति॑र्जुषा॒णो अ॒ग्निः पृ॒थुर्धर्म॑ण॒स्पति॒राज्य॑स्य वेतु॒ स्वाहा॑ ।
Sentence: b    स्वाहा॑कृताः॒ सूर्य॑स्य र॒श्मिबि॑र्यतध्वँ सजा॒तानां॑ मध्य॒मेष्ठ्या॑य ।।

Verse: 30 
Sentence: a    स॑वि॒त्रा प्र॑सवि॒त्रा सर॑स्वत्या वा॒चा त्वष्ट्रा॑ रूपैः पू॒ष्णा प॒शुभि॒रिन्द्रे॑णा॒स्मे बृह॒स्पति॑ना॒ ब्रह्म॑णा॒ वरु॑णेनौजसा॒ग्निना॒ तेज॑सा॒ सोमे॑न॒ राज्ञा॒ विष्णु॑ना दश॒म्या दे॒वत॑या॒ प्रसू॑तः॒ प्र स॑र्पामि ।।

Verse: 31 
Sentence: a    अ॒श्विभ्यां॑ पच्यस्व ।
Sentence: b    सर॑स्वत्यै पच्यस्व ।
Sentence: c    इन्द्रा॑य सु॒त्राम्णे॑ पच्यस्व ।
Sentence: d    वा॒युः पू॒तः प॒वित्रे॑ण प्र॒त्यङ्क्सोमो॒ अति॑स्रुतः ।
Sentence: e    इन्द्र॑स्य॒ युज्यः॒ सखा॑ ।।

Verse: 32 
Sentence: a    कु॒विद॒ङ्ग यव॑मन्तो व॒यं चि॒द्यथा॒ दान्त्य॑नुपू॒र्वं वि॒यूय॑ ।
Sentence: b    इ॒हेहै॑षां कृणुहि॒ भोज॑नानि॒ ये ब॒र्हिषो॒ नम॑उक्तिं॒ यज॑न्ति ।
Sentence: c    उ॑पया॒मगृ॑हीतो स्य॒श्विभ्यां॑ त्वा॒ सर॑स्वत्यै॒ त्वेन्द्रा॑य त्वा सु॒त्राम्णे॑ ।।

Verse: 33 
Sentence: a    व॒यँ सु॒राम॑मश्विना॒ नमु॑चावासु॒रे सचा॑ ।
Sentence: b    वि॑पिपा॒ना शु॑भस्पती॒ इन्द्रं॒ कर्म॑स्वावतम् ।।

Verse: 34 
Sentence: a    पु॒त्रमि॑व पि॒तरा॑व॒श्विनो॒भेन्द्रा॒वथुः॒ काव्यै॑र्दँ॒सना॑भिः ।
Sentence: b    यत्सु॒रामं॒ व्यपि॑बः॒ शची॑भिः॒ सर॑स्वती त्वा मघवन्नभिष्णक् ।।


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.