TITUS
White Yajur-Veda: Vajasaneyi-Samhita (Madhyandina)
Part No. 12
Previous part

Paragraph: 12 

Verse: 1 
Sentence: a    दृ॑शा॒नो रु॒क्म उ॒र्व्या व्य॑द्यौद्दु॒र्मर्ष॒मायुः॑ श्रि॒ये रु॑चा॒नः ।
Sentence: b    अ॒ग्निर॒मृतो॑ अभव॒द्वयो॑भि॒र्यदे॑नं द्यौर्ज॒नय॑त्सु॒रेताः॑ ।।

Verse: 2 
Sentence: a    नक्तो॒षासा॒ सम॑नसा॒ विरू॑पे धा॒पये॑ते॒ शिशु॒मेकँ॑ समी॒ची ।
Sentence: b    द्यावा॒क्षामा॑ रु॒क्मो अ॒न्तर्वि भा॑ति दे॒वा अ॒ग्निं धा॑रयन्द्रविणो॒दाः ।।

Verse: 3 
Sentence: a    विश्वा॑ रू॒पाणि॒ प्रति॑ मुञ्चते क॒विः प्रासा॑वीद्भ॒द्रं द्वि॒पदे॒ चतु॑ष्पदे ।
Sentence: b    वि नाक॑मख्यत्सवि॒ता वरे॒ण्यो नु॑ प्र॒याण॑मु॒षसो॒ वि रा॑जति ।।

Verse: 4 
Sentence: a    सु॑प॒र्णो॑ सि ग॒रुत्माँ॑स्त्रि॒वृत्ते॒ शिरो॑ गाय॒त्रं चक्षु॑र्बृहद्रथन्त॒रे पक्षौ ।
Sentence: b    स्तोम॑ आ॒त्मा छन्दाँ॒स्यङ्गा॑नि॒ यजूँ॑षि॒ नाम॑ ।
Sentence: c    साम॑ ते त॒नूर्वा॑मदे॒व्यं य॑ज्ञाय॒ज्ञियं॒ पुच्छं॒ धिष्ण्याः॑ श॒पाः ।
Sentence: d    सु॑प॒र्णो॑ सि ग॒रुत्मा॒न्दिवं॑ गच्छ॒ स्वः॑ पत ।।

Verse: 5 
Sentence: a    विष्णोः॒ क्रमो॑ सि सपत्न॒हा गा॑य॒त्रं छन्द॒ आ रो॑ह पृथि॒वीमनु॒ वि क्र॑मस्व ।
Sentence: b    विष्णोः॒ क्रमो॑ स्यभिमाति॒हा त्रै॑ष्टुभं॒ छन्द॒ आ रो॑हा॒न्तरि॑क्ष॒मनु॒ वि क्र॑मस्व ।
Sentence: c    विष्णोः॒ क्रमो॑ स्यरातीय॒तो ह॒न्ता जाग॑तं॒ छन्द॒ आ रो॑ह॒ दिव॒मनु॒ वि क्र॑मस्व ।
Sentence: d    विष्णोः॒ क्रमो॑ सि शत्रूय॒तो ह॒न्तानु॑ष्टुभं॒ छन्द॒ आ रो॑ह॒ दिशो नु॒ वि क्र॑मस्व ।।

Verse: 6 
Sentence: a    अक्र॑न्दद॒ग्नि स्त॒नय॑न्निव द्यौः॒ क्षामा॒ रेरि॑हद्वी॒रुधः॑ सम॒ञ्जन् ।
Sentence: b    स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः ।।

Verse: 7 
Sentence: a    अग्ने॑ भ्यावर्तिन्न॒भि मा॒ नि व॑र्त॒स्वायु॑षा॒ वर्च॑सा प्र॒जया॒ धने॑न ।
Sentence: b    स॒न्या मे॒धया॑ र॒य्या पोषे॑ण ।।

Verse: 8 
Sentence: a    अग्ने॑ अङ्गिरः श॒तं ते॑ सन्त्वा॒वृतः॑ स॒हस्रं॑ त उपा॒वृतः॑ ।
Sentence: b    अधा॒ पोष॑स्य॒ पोषे॑ण॒ पुन॑र्नो न॒ष्टमा कृ॑धि॒ पुन॑र्नो र॒यिमा कृ॑धि ।।

Verse: 9 
Sentence: a    पुन॑रू॒र्जा नि व॑र्तस्व॒ पुन॑रग्न इ॒षायु॑षा ।
Sentence: b    पुन॑र्नः पा॒ह्यँह॑सः ।।

Verse: 10 
Sentence: a    स॒ह र॒य्या नि व॑र्त॒स्वाग्ने॒ पिन्व॑स्व॒ धार॑या ।
Sentence: b    वि॒श्वप्स्न्या॑ वि॒श्वत॒स्परि॑ ।।

Verse: 11 
Sentence: a    आ त्वा॑हार्षम॒न्तर॑भूर्ध्रु॒वस्ति॒ष्ठावि॑चाचलिः ।
Sentence: b    विश॑स्त्वा॒ सर्वा॑ वाञ्छन्तु॒ मा त्वद्रा॒ष्ट्रमधि॑ भ्रशत् ।।

Verse: 12 
Sentence: a    उदु॑त्त॒मं व॑रुण॒ पाश॑म॒स्मदवा॑ध॒मं वि म॑ध्य॒मँ श्र॑थाय ।
Sentence: b    अथा॑ व॒यमा॑दित्य व्र॒ते तवाना॑गसो॒ अदि॑तये स्याम ।।

Verse: 13 
Sentence: a    अग्रे॑ बृ॒हन्नु॒षसा॑मू॒र्ध्वो अ॑स्थान्निर्जग॒न्वान्तम॑सो॒ ज्योति॒षागा॑त् ।
Sentence: b    अ॒ग्निर्भा॒नुना॒ रुश॑ता॒ स्वङ्ग॒ आ जा॒तो विश्वा॒ सद्मा॑न्यप्राः ।।

Verse: 14 
Sentence: a    हँ॒सः शु॑चि॒षद्वसु॑रन्तरिक्ष॒सद्धोता॑ वेदि॒षदति॑थिर्दूरोण॒सत् ।
Sentence: b    नृ॒षद्व॑र॒सदृ॑त॒सद्व्यो॑म॒सद॒ब्जा गो॒जा ऋ॑त॒जा अ॑द्रि॒जा ऋ॒तम् ।
Sentence: c    बृ॒हत् ।।

Verse: 15 
Sentence: a    सीद॒ त्वं मा॒तुर॒स्या उ॒पस्थे॒ विश्वा॑न्यग्ने व॒युना॑नि वि॒द्वान् ।
Sentence: b    मै॑नां॒ तप॑सा॒ मार्चिषा॒भिशो॑चीर॒न्तर॑स्याँ शु॒क्रज्यो॑ति॒र्वि भा॑हि ।।

Verse: 16 
Sentence: a    अ॒न्तर॑ग्ने रु॒चा त्वमु॒खायाः॒ सद॑ने॒ स्वे ।
Sentence: b    तस्या॒स्त्वँ हर॑सा॒ तप॒न्जात॑वेदः शि॒वो भ॑व ।।

Verse: 17 
Sentence: a    शि॒वो भू॒त्वा मह्य॑मग्ने॒ अथो॑ सीद शि॒वस्त्वम् ।
Sentence: b    शि॒वः कृ॒त्वा दिशः॒ सर्वाः॒ स्वं योनि॑मि॒हास॑दः ।।

Verse: 18 
Sentence: a    दि॒वस्परि॑ प्रथ॒मं ज॑ज्ञे अ॒ग्निर॒स्माद्द्वि॒तीयं॒ परि॑ जा॒तवे॑दाः ।
Sentence: b    तृ॒तीय॑म॒प्सु नृ॒मणा॒ अज॑स्र॒मिन्धा॑न एनं जरते स्वा॒धीः ।।

Verse: 19 
Sentence: a    वि॒द्मा ते॑ अग्ने त्रे॒धा त्र॒याणि॑ वि॒द्मा ते॒ धाम॒ विभृ॑ता पुरु॒त्रा ।
Sentence: b    वि॒द्मा ते॒ नाम॑ पर॒मं गुहा॒ यद्वि॒द्मा तमुत्सं॒ यत॑ आज॒गन्थ॑ ।।

Verse: 20 
Sentence: a    स॑मु॒द्रे त्वा॑ नृ॒मणा॑ अ॒प्स्व॒न्तर्नृ॒चक्षा॑ ईधे दि॒वो अ॑ग्न॒ ऊध॑न् ।
Sentence: b    तृ॒तीये॑ त्वा॒ रज॑सि तस्थि॒वाँस॑म॒पामु॒पस्थे॑ महि॒षा अ॑वर्धन् ।।

Verse: 21 
Sentence: a    अक्र॑न्दद॒ग्नि स्त॒नय॑न्निव द्यौः॒ क्षामा॒ रेरि॑हद्वी॒रुधः॑ सम॒ञ्जन् ।
Sentence: b    स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः ।।

Verse: 22 
Sentence: a    श्री॒णामु॑दा॒रो ध॒रुणो॑ रयी॒णां म॑नी॒षाणां॒ प्रार्प॑णः॒ सोम॑गोपाः ।
Sentence: b    वसुः॑ सू॒नुः सह॑सो अ॒प्सु राजा॒ वि भा॒त्यग्र॑ उ॒षसा॑मिधा॒नः ।।

Verse: 23 
Sentence: a    विश्व॑स्य के॒तुर्भुव॑नस्य॒ गर्भ॒ आ रोद॑सी अपृणा॒ज्जाय॑मानः ।
Sentence: b    वी॒डुं चि॒दद्रि॑मभिनत्परा॒यञ्जना॒ यद॒ग्निमय॑जन्त॒ पञ्च॑ ।।

Verse: 24 
Sentence: a    उ॒शिक्पा॑व॒को अ॑र॒तिः सु॑मे॒धा मर्त्ये॑ष्व॒ग्निर॒मृतो॒ नि धा॑यि ।
Sentence: b    इय॑र्ति धू॒मम॑रु॒षं भरि॑भ्र॒दुच्छु॒क्रेण॑ शो॒चिषा॒ द्यामिन॑क्षन् ।।

Verse: 25 
Sentence: a    दृ॑शा॒नो रु॒क्म उ॒र्व्या व्य॑द्यौद्दु॒र्मर्ष॒मायुः॑ श्रि॒ये रु॑चा॒नः ।
Sentence: b    अ॒ग्निर॒मृतो॑ अभव॒द्वयो॑भि॒र्यदे॑नं द्यौर्ज॒नय॑त्सु॒रेताः॑ ।।

Verse: 26 
Sentence: a    यस्ते॑ अ॒द्य कृ॒णव॑द्भद्रशोचे पू॒पं दे॑व घृ॒तव॑न्तमग्ने ।
Sentence: b    प्र तं न॑य प्रत॒रं वस्यो॒ अच्छा॒भि सु॒म्नं दे॒वभ॑क्तं यविष्ठ ।।

Verse: 27 
Sentence: a    आ तं भ॑ज सौश्रव॒सेष्व॑ग्न उ॒क्थौ॑क्थ॒ आ भ॑ज श॒स्यमा॑ने ।
Sentence: b    प्रि॒यः सूर्ये॑ प्रि॒यो अ॒ग्ना भ॑वा॒त्युज्जा॒तेन॑ भि॒नद॒दुज्जनि॑त्वैः ।।

Verse: 28 
Sentence: a    त्वाम॑ग्ने॒ यज॑माना॒ अनु॒ द्यून्विश्वा॒ वसु॑ दधिरे॒ वार्या॑णि ।
Sentence: b    त्वया॑ स॒ह द्रवि॑णमि॒च्छमा॑ना व्र॒जं गोम॑न्तमु॒शिजो॒ वि व॑व्रुः ।।

Verse: 29 
Sentence: a    अस्ता॑व्य॒ग्निर्न॒राँ सु॒शेवो॑ वैश्वान॒र ऋषि॑भिः॒ सोम॑गोपाः ।
Sentence: b    अ॑द्वे॒षे द्यावा॑पृथि॒वी हु॑वेम॒ देवा॑ ध॒त्त र॒यिम॒स्मे सु॒वीर॑म् ।।

Verse: 30 
Sentence: a    स॒मिधा॒ग्निं दु॑वस्यत घृतैर्बोधय॒ताति॑थिम् ।
Sentence: b    आस्मि॑न्ह॒व्या जु॑होतन ।।

Verse: 31 
Sentence: a    उदु॑ त्वा॒ विश्वे॑ दे॒वा अग्ने॒ भर॑न्तु॒ चित्ति॑भिः ।
Sentence: b    स नो॑ भव शि॒वस्त्वँ सु॒प्रती॑को वि॒भाव॑सुः ।।

Verse: 32 
Sentence: a    प्रेद॑ग्ने॒ ज्योति॑ष्मान्याहि शि॒वेभि॑र॒र्चिभि॒ष्ट्वम् ।
Sentence: b    बृ॒हद्भि॑र्भा॒नुभि॒र्भास॒न्मा हिँ॑सीस्त॒न्वा॑ प्र॒जाः ।।

Verse: 33 
Sentence: a    अक्र॑न्दद॒ग्नि स्त॒नय॑न्निव द्यौः॒ क्षामा॒ रेरि॑हद्वी॒रुधः॑ सम॒ञ्जन् ।
Sentence: b    स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः ।।

Verse: 34 
Sentence: a    प्रप्रा॒यम॒ग्निर्भ॑र॒तस्य॑ शृण्वे॒ वि यत्सूर्यो॒ न रोच॑ते बृ॒हद्भाः ।
Sentence: b    अ॒भि यः पू॒रुं पृत॑नासु तस्थौ दी॒दाय दैव्यो॒ अति॑थिः शि॒वो नः॑ ।।

Verse: 35 
Sentence: a    आपो॑ देवीः॒ प्रति॑ गृभ्णीत॒ भस्मै॒तत्स्यो॒ने कृ॑णुध्वँ सुर॒भा लो॒के ।
Sentence: b    तस्मै॑ नमन्तां॒ जन॑यः सु॒पत्नी॑र्मा॒तेव॑ पु॒त्रं बि॑भृता॒प्स्वे॑नत् ।।

Verse: 36 
Sentence: a    अ॒प्स्व॑ग्ने॒ सधि॒ष्टव सौषधी॒रनु॑ रुध्यसे ।
Sentence: b    गर्भे॒ सन्जा॑यसे॒ पुनः॑ ।।

Verse: 37 
Sentence: a    गर्भो॑ अ॒स्योष॑धीनां॒ गर्भो॒ वन॒स्पती॑नाम् ।
Sentence: b    गर्भो॒ विश्व॑स्य भू॒तस्याग्ने॒ गर्भो॑ अ॒पाम॑सि ।।

Verse: 38 
Sentence: a    प्र॒सद्य॒ भस्म॑ना॒ योनि॑म॒पश्च॑ पृथि॒वीम॑ग्ने ।
Sentence: b    सँ॒सृज्य॑ मा॒तृभि॒ष्ट्वं ज्योति॑ष्मा॒न्पुन॒रास॑दः ।।

Verse: 39 
Sentence: a    पुन॑रा॒सद्य॒ सद॑नम॒पश्च॑ पृथि॒वीम॑ग्ने ।
Sentence: b    शेषे॑ मा॒तुर्यथो॒पस्थे॒ न्तर॑स्याँ शि॒वत॑मः ।।

Verse: 40 
Sentence: a    पुन॑रू॒र्जा निव॑र्तस्व॒ पुन॑रग्न इ॒षायु॑षा ।
Sentence: b    पुन॑र्नः पा॒ह्यँह॑सः ।।

Verse: 41 
Sentence: a    स॒ह र॒य्या नि व॑र्त॒स्वाग्ने॒ पिन्व॑स्व॒ धार॑या ।
Sentence: b    वि॒श्वप्स्न्या॑ वि॒श्वत॒स्परि॑ ।।

Verse: 42 
Sentence: a    बोधा॑ मे अ॒स्य वच॑सो यविष्ठ॒ मँहि॑ष्ठस्य॒ प्रभृ॑तस्य स्वधावः ।
Sentence: b    पीय॑ति त्वो॒ अनु॑ त्वो गृणाति व॒न्दारु॑ष्टे त॒न्वं॑ वन्दे अग्ने ।।

Verse: 43 
Sentence: a    स बो॑धि सू॒रिर्म॒घवा॒ वसु॑पते॒ वसु॑दावन् ।
Sentence: b    यु॑यो॒ध्य॒स्मद्द्वेषाँ॑सि ।
Sentence: c    वि॒श्वक॑र्मणे॒ स्वाहा॑ ।।

Verse: 44 
Sentence: a    पुन॑स्त्वादि॒त्या रु॒द्रा वस॑वः॒ समि॑न्धतां॒ पुन॑र्ब्र॒ह्माणो॑ वसुनीथ यज्ञैः ।
Sentence: b    घृ॒तेन॒ त्वं त॒न्वं॑ वर्धयस्व स॒त्याः स॑न्तु॒ यज॑मानस्य॒ कामाः॑ ।।

Verse: 45 
Sentence: a    अपे॑त॒ वी॑त॒ वि च॑ सर्प॒तातो॒ ये त्र॒ स्थ पु॑रा॒णा ये च॒ नूत॑नाः ।
Sentence: b    अदा॑द्य॒मो॑ व॒सानं॑ पृथि॒व्या अक्र॑न्नि॒मं पि॒तरो॑ लो॒कम॑स्मै ।।

Verse: 46 
Sentence: a    सं॒ज्ञान॑मसि ।
Sentence: b    का॑म॒धर॑णम् ।
Sentence: c    मयि॑ ते काम॒धर॑णं भूयात् ।
Sentence: d    अ॒ग्नेर्भस्मा॑स्य॒ग्नेः पुरी॑षमसि ।
Sentence: e    चित॑ स्थ परि॒चित॑ ऊर्ध्व॒चितः॑ श्नयध्वम् ।।

Verse: 47 
Sentence: a    अ॒यँ सो अ॒ग्निर्यस्मि॒न्त्सोम॒मिन्द्रः॑ सु॒तं द॒धे ज॒ठरे॑ वावशा॒नः ।
Sentence: b    स॑ह॒स्रिणं॒ वाज॒मत्यं॒ न सप्तिँ॑ सस॒वान्त्सन्त्स्तू॑यसे जातवेदः ।।

Verse: 48 
Sentence: a    अग्ने॒ यत्ते॑ दि॒वि वर्चः॑ पृथि॒व्यां यदोष॑धीष्व॒प्स्वा य॑जत्र ।
Sentence: b    येना॒न्तरि॑क्षमु॒र्वा॑त॒तन्थ॑ त्वे॒षः स भा॒नुर॑र्ण॒वो नृ॒चक्षाः॑ ।।

Verse: 49 
Sentence: a    अग्ने॑ दि॒वो अर्ण॒मच्छा॑ जिगा॒स्यच्छा॑ दे॒वाँ ऊ॑चिषे॒ धिष्ण्या॒ ये ।
Sentence: b    या रो॑च॒ने प॒रस्ता॒त्सूर्य॑स्य॒ याश्चा॒वस्ता॑दुप॒तिष्ठ॑न्त॒ आपः॑ ।।

Verse: 50 
Sentence: a    पु॑री॒ष्या॑सो अ॒ग्नयः॑ प्राव॒णेभिः॑ स॒जोष॑सः ।
Sentence: b    जु॒षन्तां॑ य॒ज्ञम॒द्रुहो॑ नमी॒वा इषो॑ म॒हीः ।।

Verse: 51 
Sentence: a    इडा॑मग्ने पुरु॒दँसँ॑ स॒निं गोः श॑श्वत्त॒मँ हव॑मानाय साध ।
Sentence: b    स्यान्नः॑ सू॒नुस्तन॑यो वि॒जावाग्ने॒ सा ते॑ सुम॒तिर्भू॑त्व॒स्मे ।।

Verse: 52 
Sentence: a    अ॒यं ते॒ योनि॑रृ॒त्वियो॒ यतो॑ जा॒तो अरो॑चथाः ।
Sentence: b    तं जा॒नन्न॑ग्न॒ आ रो॒हाथा॑ नो वर्धया र॒यिम् ।।

Verse: 53 
Sentence: a    चिद॑सि॒ तया॑ दे॒वत॑याङ्गिर॒स्वद्ध्रु॒वा सी॑द ।
Sentence: b    प॑रि॒चिद॑सि॒ तया॑ दे॒वत॑याङ्गिर॒स्वद्ध्रु॒वा सी॑द ।।

Verse: 54 
Sentence: a    लो॒कं पृ॑ण छि॒द्रं पृ॒णाथो॑ सीद ध्रु॒वा त्वम् ।
Sentence: b    इ॑न्द्रा॒ग्नी त्वा॒ बृह॒स्पति॑र॒स्मिन्योना॑वसीषदन् ।।

Verse: 55 
Sentence: a    ता अ॑स्य॒ सूद॑दोहसः॒ सोमँ॑ श्रीणन्ति॒ पृश्न॑यः ।
Sentence: b    जन्म॑न्दे॒वानां॒ विश॑स्त्रि॒ष्वा रो॑च॒ने दि॒वः ।।

Verse: 56 
Sentence: a    इन्द्रं॒ विश्वा॑ अवीवृधन्त्समु॒द्रव्य॑चसं॒ गिरः॑ ।
Sentence: b    र॒थीत॑मँ र॒थीनां॒ वाजा॑नाँ॒ सत्प॑तिं॒ पति॑म् ।।

Verse: 57 
Sentence: a    समि॑तँ॒ सं क॑ल्पेथाँ॒ सम्प्रि॑यौ रोचि॒ष्णू सु॑मन॒स्यमा॑नौ ।
Sentence: b    इष॒मूर्ज॑म॒भि सं॒वसा॑नौ ।।

Verse: 58 
Sentence: a    सं वां॒ मनाँ॑सि॒ सं व्र॒ता समु॑ चि॒त्तान्याक॑रम् ।
Sentence: b    अग्ने॑ पुरीष्याधि॒पा भ॑व॒ त्वं न॒ इष॒मूर्जं॒ यज॑मानाय धेहि ।।

Verse: 59 
Sentence: a    अग्ने॒ त्वं पु॑री॒ष्यो॑ रयि॒मान्पु॑ष्टि॒माँ अ॑सि ।
Sentence: b    शि॒वाः कृ॒त्वा दिशः॒ सर्वाः॒ योनि॑मि॒हास॑दः ।।

Verse: 60 
Sentence: a    भव॑तं नः॒ सम॑नसौ॒ सचे॑तसावरे॒पसौ॑ ।
Sentence: b    मा य॒ज्ञँ हिँ॑सिष्टं॒ मा य॒ज्ञप॑तिं जातवेदसौ शिवौ भवतम॒द्य नः॑ ।।

Verse: 61 
Sentence: a    मा॒तेव॑ पु॒त्रं पृ॑थि॒वी पु॑री॒ष्य॑म॒ग्निँ स्वे योना॑वभारु॒खा ।
Sentence: b    तां विश्वै॑र्देवैरृ॒तुभिः॑ संविदा॒नः प्र॒जाप॑तिर्वि॒श्वक॑र्मा॒ वि मु॑ञ्चतु ।।

Verse: 62 
Sentence: a    असु॑न्वन्त॒मय॑जमानमिच्छ स्ते॒नस्ये॒त्यामन्वि॑हि॒ तस्क॑रस्य ।
Sentence: b    अ॒न्यम॒स्मदि॑च्छ॒ सा त॑ इ॒त्या नमो॑ देवि निरृते॒ तुभ्य॑मस्तु ।।

Verse: 63 
Sentence: a    नमः॒ सु ते॑ निरृते तिग्मतेजो य॒स्मयं॒ वि चृ॑ता ब॒न्धमे॒तम् ।
Sentence: b    य॒मेन॒ त्वं य॒म्या सं॑विदा॒नोत्त॒मे ना॒के अधि॑ रोहयैनम् ।।

Verse: 64 
Sentence: a    यस्या॑स्ते घोर आ॒सन्जु॒होम्ये॒षां ब॒न्धाना॑मव॒सर्ज॑नाय ।
Sentence: b    यां त्वा॒ जनो॒ भूमि॒रिति॑ प्र॒मन्द॑ते॒ निरृ॑तिं त्वा॒हं परि॑ वेद वि॒श्वतः॑ ।।

Verse: 65 
Sentence: a    यं ते॑ दे॒वी निरृ॑तिराब॒बन्ध॒ पाशं॑ ग्री॒वास्व॑विचृ॒त्यम् ।
Sentence: b    तं ते॒ वि ष्या॒म्यायु॑षो॒ न मध्या॒दथै॒तं पि॒तुम॑द्धि॒ प्रसू॑तः ।
Sentence: c    नमो॒ भूत्यै॒ येदं च॒कार॑ ।।

Verse: 66 
Sentence: a    नि॒वेश॑नः सं॒गम॑नो॒ वसु॑नां॒ विश्वा॑ रू॒पाभि च॑ष्टे॒ शची॑भिः ।
Sentence: b    दे॒व इ॑व सवि॒ता स॒त्यध॒र्मेन्द्रो॒ न त॑स्थौ सम॒रे प॑थी॒नाम् ।।

Verse: 67 
Sentence: a    सीरा॑ युञ्जन्ति क॒वयो॑ यु॒गा वि त॑न्वते॒ पृथ॑क् ।
Sentence: b    धीरा॑ दे॒वेषु॑ सूम्न॒या ।।

Verse: 68 
Sentence: a    यु॒नक्त॒ सीरा॒ वि यु॒गा त॑नुध्वं कृ॒ते योनौ॑ वपते॒ह बीज॑म् ।
Sentence: b    गि॒रा च॑ श्रु॒ष्टिः सभ॑रा॒ अस॑न्नो॒ नेदी॑य॒ इत्सृ॒ण्यः॑ प॒क्वमेया॑त् ।।

Verse: 69 
Sentence: a    शु॒नँ सु पाला॒ वि कृ॑षन्तु॒ भूमिँ॑ शु॒नं की॒नाशा॑ अ॒भि य॑न्तु वाहैः ।
Sentence: b    शुना॑सीरा ह॒विषा॒ तोश॑माना सुपिप्प॒ला ओष॑धीः कर्तना॒स्मे ।।

Verse: 70 
Sentence: a    घृ॒तेन॒ सीता॒ मधु॑ना॒ सम॑ज्यतां॒ विश्वै॑र्देवै॒रनु॑मता म॒रुद्भिः॑ ।
Sentence: b    ऊर्ज॑स्वती॒ पय॑सा॒ पिन्व॑माना॒स्मान्त्सी॑ते॒ पय॑सा॒भ्या व॑वृत्स्व ।।

Verse: 71 
Sentence: a    लाङ्ग॑लं॒ पवी॑रवत्सु॒शेवँ॑ सोम॒पित्स॑रु ।
Sentence: b    तदुद्व॑पति॒ गामविं॑ प्रप॒र्व्यं॑ च॒ पीव॑रीं प्र॒स्थाव॑द्रथ॒वाह॑नम् ।।

Verse: 72 
Sentence: a    कामं॑ कामदुघे धुक्ष्व मि॒त्राय॒ वरु॑णाय च ।
Sentence: b    इन्द्रा॑या॒श्विभ्यां॑ पू॒ष्णे प्र॒जाभ्य॒ ओष॑धीभ्यः ।।

Verse: 73 
Sentence: a    वि मु॑च्यध्वमघ्न्या देवयाना॒ अग॑न्म॒ तम॑सस्पा॒रम॒स्य ज्योति॑रापाम ।।

Verse: 74 
Sentence: a    स॒जूरब्दो॒ अय॑वोभिः स॒जूरु॒षा अरु॑णीभिः स॒जोष॑साव॒श्विना॒ दँसो॑भिः स॒जूः सूर॒ एत॑शेन स॒जूर्वै॑श्वान॒र इड॑या घृ॒तेन॒ स्वाहा॑ ।।

Verse: 75 
Sentence: a    या ओष॑धीः॒ पूर्वा॑ जा॒ता दे॒वेभ्य॑स्त्रियु॒गं पु॒रा ।
Sentence: b    मनै॒ नु ब॒भ्रूणा॑म॒हँ श॒तं धामा॑नि स॒प्त च॑ ।।

Verse: 76 
Sentence: a    श॒तं वो॑ अम्ब॒ धामा॑नि स॒हस्र॑मु॒त वो॒ रुहः॑ ।
Sentence: b    अधा॑ शतक्रत्वो यू॒यमि॒मं मे॑ अग॒दं कृ॑त ।।

Verse: 77 
Sentence: a    ओष॑धीः॒ प्रति॑ मोदध्वं॒ पुष्प॑वतीः प्र॒सूव॑रीः ।
Sentence: b    अश्वा॑ इव स॒जित्व॑रीर्वी॒रुधः॑ पारयि॒ष्ण्वः॑ ।।

Verse: 78 
Sentence: a    ओष॑धी॒रिति॑ मातर॒स्तद्वो॑ देवी॒रुप॑ ब्रुवे ।
Sentence: b    स॒नेय॒मश्वं॒ गां वास॑ आ॒त्मानं॒ तव॑ पूरुष ।।

Verse: 79 
Sentence: a    अ॑श्व॒त्थे वो॑ नि॒षद॑नं प॒र्णे वो॑ वस॒तिष्कृ॒ता ।
Sentence: b    गो॒भाज॒ इत्किला॑सथ॒ यत्स॒नव॑थ॒ पूरु॑षम् ।।

Verse: 80 
Sentence: a    यत्रौ॑षधीः स॒मग्म॑त॒ राजा॑नः॒ समि॑ताविव ।
Sentence: b    विप्रः॒ स उ॑च्यते भि॒षग्र॑क्षो॒हामी॑व॒चात॑नः ।।

Verse: 81 
Sentence: a    अ॑श्वाव॒तीँ सो॑माव॒तीमू॒र्जय॑न्ती॒मुदो॑जसम् ।
Sentence: b    आवि॑त्सि॒ सर्वा॒ ओष॑धीर॒स्मा अ॑रि॒ष्टता॑तये ।।

Verse: 82 
Sentence: a    उच्छुष्मा॒ ओष॑धीनां॒ गावो॑ गो॒ष्ठादि॑वेरते ।
Sentence: b    धनँ॑ सनि॒ष्यन्ती॑नामा॒त्मानं॒ तव॑ पूरुष ।।

Verse: 83 
Sentence: a    इष्कृ॑ति॒र्नाम॑ वो मा॒ताथो॑ यू॒यँ स्थ॒ निष्कृ॑तीः ।
Sentence: b    सी॒राः प॑त॒त्रिणी॑ स्थन॒ यदा॒मय॑ति॒ निष्कृ॑थ ।।

Verse: 84 
Sentence: a    अति॒ विश्वाः॑ परि॒ष्ठा स्ते॒न इ॑व व्र॒जम॑क्रमुः ।
Sentence: b    ओष॑धीः॒ प्राचु॑च्यवु॒र्यत्किं च॑ त॒न्वो॒ रपः॑ ।।

Verse: 85 
Sentence: a    यदि॒मा वा॒जय॑न्न॒हमोष॑धी॒र्हस्त॑ आद॒धे ।
Sentence: b    आ॒त्मा यक्ष्म॑स्य नश्यति पु॒रा जी॑व॒गृभो॑ यथा ।।

Verse: 86 
Sentence: a    यस्यौ॑षधीः प्र॒सर्प॒थाङ्ग॑म्ङ्गं॒ परु॑ष्परुः ।
Sentence: b    ततो॒ यक्ष्मं॒ वि बा॑धध्व उ॒ग्रो म॑ध्यम॒शीरि॑व ।।

Verse: 87 
Sentence: a    सा॒कं य॑क्ष्म॒ प्रप॑त॒ चाषे॑ण किकिदी॒विना॑ ।
Sentence: b    सा॒कं वात॑स्य॒ ध्राज्या॑ सा॒कं न॑श्य नि॒हाक॑या ।।

Verse: 88 
Sentence: a    अ॒न्या वो॑ अ॒न्याम॑वत्व॒न्यान्यस्या॒ उपा॑वत ।
Sentence: b    ताः सर्वाः॑ संविदा॒ना इ॒दं मे॒ प्राव॑ता॒ वचः॑ ।।

Verse: 89 
Sentence: a    याः प॒लिनी॒र्या अ॑प॒ला अ॑पु॒ष्पा याश्च॑ पु॒ष्पिणीः॑ ।
Sentence: b    बृह॒स्पति॑प्रसूता॒स्ता नो॑ मुञ्च॒न्त्वँह॑सः ।।

Verse: 90 
Sentence: a    मु॒ञ्चन्तु॑ मा शप॒थ्या॒दथो॑ वरु॒ण्या॑दु॒त ।
Sentence: b    अथो॑ य॒मस्य॒ पड्वी॑शा॒त्सर्व॑स्माद्देवकिल्वि॒षात् ।।

Verse: 91 
Sentence: a    अ॑व॒पत॑न्तीरवदन्दि॒व ओष॑धय॒स्परि॑ ।
Sentence: b    यं जी॒वम॒श्नवा॑महै॒ न स रि॑ष्याति॒ पूरु॑षः ।।

Verse: 92 
Sentence: a    या ओष॑धीः॒ सोम॑राज्ञीर्ब॒ह्वीः श॒तवि॑चक्षणाः ।
Sentence: b    तासा॑मसि॒ त्वमु॑त्त॒मारं॒ कामा॑य॒ शँ हृ॒दे ।।

Verse: 93 
Sentence: a    या ओष॑धीः॒ सोम॑राज्ञी॒र्विष्ठि॑ताः पृथि॒वीमनु॑ ।
Sentence: b    बृह॒स्पति॑प्रसूता अस्यै॒ सं द॑त्त वी॒र्य॑म् ।।

Verse: 94 
Sentence: a    याश्चे॒दमु॑पशृ॒ण्वन्ति॒ याश्च॑ दू॒रं परा॑गताः ।
Sentence: b    सर्वाः॑ सं॒गत्य॑ वीरुधो स्यै॒ सं द॑त्त वी॒र्य॑म् ।।

Verse: 95 
Sentence: a    मा वो॑ रिषत्खनि॒ता यस्मै॑ चा॒हं खना॑मि वः ।
Sentence: b    द्वि॒पाच्चतु॑ष्पाद॒स्माकँ॒ सर्व॑मस्त्वनातु॒रम् ।।

Verse: 96 
Sentence: a    ओष॑धयः॒ सम॑वदन्त॒ सोमे॑न स॒ह राज्ञा॑ ।
Sentence: b    यस्मै॑ कृ॒णोति॑ ब्राह्म॒णस्तँ रा॑जन्पारयामसि ।।

Verse: 97 
Sentence: a    ना॑शयि॒त्री ब॒लास॒स्यार्श॑स उप॒चिता॑मसि ।
Sentence: b    अथो॑ श॒तस्य॒ यक्ष्मा॑णां पाका॒रोर॑सि॒ नाश॑नी ।।

Verse: 98 
Sentence: a    त्वां ग॑न्ध॒र्वा अ॑खनँ॒स्त्वामिन्द्र॒स्त्वां बृह॒स्पतिः॑ ।
Sentence: b    त्वामो॑षधे॒ सोमो॒ राजा॑ वि॒द्वान्यक्ष्मा॑दमुच्यत ।।

Verse: 99 
Sentence: a    सह॑स्व मे॒ अरा॑तीः॒ सह॑स्व पृतनाय॒तः ।
Sentence: b    सह॑स्व॒ सर्वं॑ पा॒प्मानँ॒ सह॑मानास्योषधे ।।

Verse: 100 
Sentence: a    दी॒र्घायु॑स्त ओषधे खनि॒ता यस्मै॑ च त्वा॒ खना॑म्य॒हम् ।
Sentence: b    अथो॒ त्वं दी॒र्घायु॑र्भू॒त्वा श॒तव॑ल्शा॒ वि रो॑हतात् ।।

Verse: 101 
Sentence: a    त्वमु॑त्त॒मास्यो॑षधे॒ तव॑ वृ॒क्षा उप॑स्तयः ।
Sentence: b    उप॑स्तिरस्तु॒ सो॒ स्माकं॒ यो अ॒स्माँ अ॑भि॒दास॑ति ।।

Verse: 102 
Sentence: a    मा मा॑ हिँसीज्जनि॒ता यः पृ॑थि॒व्या यो वा॒ दिवँ॑ स॒त्यध॑र्मा॒ व्यान॑ट् ।
Sentence: b    यश्चा॒पश्च॒न्द्राः प्र॑थ॒मो ज॒जान॒ कस्मै॑ दे॒वाय॑ ह॒विषा॑ विधेम ।।

Verse: 103 
Sentence: a    अ॒भ्या व॑र्तस्व पृथिवि य॒ज्ञेन॒ पय॑सा स॒ह ।
Sentence: b    व॒पां ते॑ अ॒ग्निरि॑षि॒तो अ॑रोहत् ।।

Verse: 104 
Sentence: a    अग्ने॒ यत्ते॑ शु॒क्रं यच्च॒न्द्रं यत्पू॒तं यच्च॑ य॒ज्ञिय॑म् ।
Sentence: b    तद्दे॒वेभ्यो॑ भरामसि ।।

Verse: 105 
Sentence: a    इष॒मूर्ज॑म॒हमि॒त आद॑मृ॒तस्य॒ योनिं॑ महि॒षस्य॒ धारा॑म् ।
Sentence: b    आ मा॒ गोषु॑ विश॒त्वा त॒नूषु॒ जहा॑मि से॒दिमनि॑रा॒ममी॑वाम् ।।

Verse: 106 
Sentence: a    अग्ने॒ तव॒ श्रवो॒ वयो॒ महि॑ भ्राजन्ते अ॒र्चयो॑ विभावसो ।
Sentence: b    बृह॑द्भानो॒ शव॑सा॒ वाज॑मु॒क्थ्यं॒ दधा॑सि दा॒शुषे॑ कवे ।।

Verse: 107 
Sentence: a    पा॑व॒कव॑र्चाः शु॒क्रव॑र्चा॒ अनू॑नवर्चा॒ उदि॑यर्षि भा॒नुना॑ ।
Sentence: b    पु॒त्रो मा॒तरा॑ वि॒चर॒न्नुपा॑वसि पृ॒णक्षि॒ रोद॑सी उ॒भे ।।

Verse: 108 
Sentence: a    ऊर्जो॑ नपाज्जातवेदः सुश॒स्तिभि॒र्मन्द॑स्व धी॒तिभि॑र्हि॒तः ।
Sentence: b    त्वे इषः॒ सं द॑धु॒र्भूरि॑वर्पसश्चि॒त्रोत॑यो वा॒मजा॑ताः ।।

Verse: 109 
Sentence: a    इ॑र॒ज्यन्न॑ग्ने प्रथयस्व ज॒न्तुभि॑र॒स्मे रायो॑ अमर्त्य ।
Sentence: b    स द॑र्श॒तस्य॒ वपु॑षो॒ वि रा॑जसि पृ॒णक्षि॑ सान॒सिं क्रतु॑म् ।।

Verse: 110 
Sentence: a    इ॑ष्क॒र्तार॑मध्व॒रस्य॒ प्रचे॑तसं॒ क्षय॑न्तँ॒ राध॑सो म॒हः ।
Sentence: b    रा॒तिं वा॒मस्य॑ सु॒भगां॑ म॒हीमिषं॒ दधा॑सि सान॒सिँ र॒यिम् ।।

Verse: 111 
Sentence: a    ऋ॒तावा॑नं महि॒षं वि॒श्वद॑र्शतम॒ग्निँ सु॒म्नाय॑ दधिरे पु॒रो जनाः॑ ।
Sentence: b    श्रुत्क॑र्णँ स॒प्रथ॑स्तमं त्वा गि॒रा दै॑व्यं॒ मानु॑षा यु॒गा ।।

Verse: 112 
Sentence: a    आ प्या॑यस्व॒ समे॑तु ते वि॒श्वतः॑ सोम॒ वृष्ण्य॑म् ।
Sentence: b    भवा॒ वाज॑स्य संग॒थे ।।

Verse: 113 
Sentence: a    सं ते॒ पयाँ॑सि॒ समु॑ यन्तु॒ वाजाः॒ सं वृष्ण्या॑न्यभिमाति॒षाहः॑ ।
Sentence: b    आ॒प्याय॑मानो अ॒मृता॑य सोम दि॒वि श्रवाँ॑स्युत्त॒मानि॑ धिष्व ।।

Verse: 114 
Sentence: a    आ प्या॑यस्व मदिन्तम॒ सोम॒ विश्वे॑भिरँ॒शुभिः॑ ।
Sentence: b    भवा॑ नः सु॒श्रव॑स्तमः॒ सखा॑ वृ॒धे ।।

Verse: 115 
Sentence: a    आ ते॑ व॒त्सो मनो॑ यमत्पर॒माच्चि॑त्स॒धस्था॑त् ।
Sentence: b    अग्ने॒ त्वांका॑मया गि॒रा ।।

Verse: 116 
Sentence: a    तुभ्यं॒ ता अ॑ङ्गिरस्तम॒ विश्वाः॑ सुक्षि॒तयः॒ पृथ॑क् ।
Sentence: b    अग्ने॒ कामा॑य येमिरे ।।

Verse: 117 
Sentence: a    अ॒ग्निः प्रि॒येषु॒ धाम॑सु॒ कामो॑ भू॒तस्य॒ भव्य॑स्य ।
Sentence: b    स॒म्राडेको॒ वि रा॑जति ।।



Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.