TITUS
White Yajur-Veda: Vajasaneyi-Samhita (Madhyandina)
Part No. 33
Previous part

Paragraph: 33 
Verse: 1 
Sentence: a    अ॒स्याजरा॑सो द॒माम॒रित्रा॑ अ॒र्चद्धू॑मासो अ॒ग्नयः॑ पाव॒काः ।
Sentence: b    श्वि॑ती॒चयः॑ श्वा॒त्रासो॑ भुर॒ण्यवो॑ वन॒र्षदो॑ वा॒यवो॒ न सोमाः॑ ।।

Verse: 2 
Sentence: a    हर॑यो धु॒मके॑तवो॒ वात॑जूता॒ उप॒ द्यवि॑ ।
Sentence: b    यत॑न्ते॒ वृथ॑ग॒ग्नयः॑ ।।

Verse: 3 
Sentence: a    यजा॑ नो मि॒त्रावरु॑णा॒ यजा॑ दे॒वाँ ऋ॒तं बृ॒हत् ।
Sentence: b    अग्ने॒ यक्षि॒ स्वं दम॑म् ।।

Verse: 4 
Sentence: a    यु॒क्ष्वा हि दे॑व॒हूत॑माँ॒ अश्वाँ॑ अग्ने र॒थीरि॑व ।
Sentence: b    नि होता॑ पू॒र्व्यः स॑दः ।।

Verse: 5 
Sentence: a    द्वे विरू॑पे चरतः॒ स्वर्थे॑ अ॒न्यान्या॑ व॒त्समुप॑ धापयेते ।
Sentence: b    हरि॑र॒न्यस्यां॒ भव॑ति स्व॒धावा॑ञ्छु॒क्रो अ॒न्यस्यां॑ ददृशे सु॒वर्चाः॑ ।।

Verse: 6 
Sentence: a    अ॒यमि॒ह प्र॑थ॒मो धा॑यि धा॒तृभि॒र्होता॒ यजि॑ष्ठो अध्व॒रेष्वीड्यः॑ ।
Sentence: b    यमप्न॑वानो॒ भृग॑वो विरुरु॒चुर्वने॑षु चि॒त्रं वि॒भ्वं॑ वि॒शेवि॑शे ।।

Verse: 7 
Sentence: a    त्रीणि॑ श॒ता त्री स॒हस्रा॑ण्य॒ग्निं त्रिँ॒शच्च॑ दे॒वा नव॑ चासपर्यन् ।
Sentence: b    अौ॑क्षन्घृतै॒रस्तृ॑णन्ब॒र्हिर॑स्मा॒ आदिद्धोता॑रं॒ न्य॑सादयन्त ।।

Verse: 8 
Sentence: a    मू॒र्धानं॑ दि॒वो अ॑र॒तिं पृ॑थि॒व्या वै॑श्वान॒रमृ॒त आ जा॒तम॒ग्निम् ।
Sentence: b    क॒विँ स॒म्राज॒मति॑थिं॒ जना॑नामा॒सन्ना पात्रं॑ जनयन्त दे॒वाः ।।

Verse: 9 
Sentence: a    अ॒ग्निर्वृ॒त्राणि॑ जङ्घनद्द्रविण॒स्युर्वि॑प॒न्यया॑ ।
Sentence: b    समि॑द्धः शु॒क्र आहु॑तः ।।

Verse: 10 
Sentence: a    विश्वे॑भिः सो॒म्यं मध्वग्न॒ इन्द्रे॑ण वा॒युना॑ ।
Sentence: b    पिबा॑ मि॒त्रस्य॒ धाम॑भिः ।।

Verse: 11 
Sentence: a    आ यदि॒षे नृ॒पतिं॒ तेज॒ आन॒ट्शुचि॒ रेतो॒ निषि॑क्तं द्यौर॒भीके॑ ।
Sentence: b    अ॒ग्निः शर्ध॑मनव॒द्यं युवा॑नँ स्वा॒ध्यं॑ जनयत्सू॒दय॑च्च ।।

Verse: 12 
Sentence: a    अग्ने॒ शर्ध॑ मह॒ते सौ॑भगाय॒ तव॑ द्यु॒म्नान्यु॑त्त॒मानि॑ सन्तु ।
Sentence: b    सं जा॑स्प॒त्यँ सु॒यम॒मा कृ॑णुष्व शत्रूय॒ताम॒भि ति॑ष्ठा॒ महाँ॑सि ।।

Verse: 13 
Sentence: a    त्वाँ हि म॒न्द्रत॑ममर्कशोकैर्ववृ॒महे॒ महि॑ नः॒ श्रोष्य॑ग्ने ।
Sentence: b    इन्द्रं॒ न त्वा॒ शव॑सा दे॒वता॑ वा॒युं पृ॑णन्ति॒ राध॑सा॒ नृत॑माः ।।

Verse: 14 
Sentence: a    त्वे अ॑ग्ने स्वाहुत प्रि॒यासः॑ सन्तु सू॒रयः॑ ।
Sentence: b    य॒न्तारो॒ ये म॒घवा॑नो॒ जना॑नामू॒र्वान्दय॑न्त॒ गोना॑म् ।।

Verse: 15 
Sentence: a    श्रु॒धि श्रु॑त्कर्ण॒ वह्नि॑भिर्देवैरग्ने स॒याव॑भिः ।
Sentence: b    आ सी॑दन्तु ब॒र्हिषि॑ मि॒त्रो अ॑र्य॒मा प्रा॑त॒र्यावा॑णो अध्व॒रम् ।।

Verse: 16 
Sentence: a    विश्वे॑षा॒मदि॑तिर्य॒ज्ञिया॑नां॒ विश्वे॑षा॒मति॑थि॒र्मानु॑षाणाम् ।
Sentence: b    अ॒ग्निर्दे॒वाना॒मव॑ आवृणा॒नः सु॑मृडी॒को भ॑वतु जा॒तवे॑दाः ।।

Verse: 17 
Sentence: a    म॒हो अ॒ग्नेः स॑मिधा॒नस्य॒ शर्म॒ण्यना॑गा मि॒त्रे वरु॑णे स्व॒स्तये॑ ।
Sentence: b    श्रेष्ठे॑ स्याम सवि॒तुः सवी॑मनि॒ तद्दे॒वाना॒मवो॑ अ॒द्या वृ॑णीमहे ।।

Verse: 18 
Sentence: a    आप॑श्चित्पिप्यु स्त॒र्यो॒ न गावो॒ नक्ष॑न्नृ॒तं ज॑रि॒तार॑स्त इन्द्र ।
Sentence: b    या॒हि वा॒युर्न नि॒युतो॑ नो॒ अच्छा॒ त्वँ हि धी॒भिर्दय॑से॒ वि वाजा॑न् ।।

Verse: 19 
Sentence: a    गाव॒ उपा॑वताव॒तं म॒ही य॒ज्ञस्य॑ र॒प्सुदा॑ ।
Sentence: b    उ॒भा कर्णा॑ हिर॒ण्यया॑ ।।

Verse: 20 
Sentence: a    यद॒द्य सूर॒ उदि॒ते ना॑गा मि॒त्रो अ॑र्य॒मा ।
Sentence: b    सु॒वाति॑ सवि॒ता भगः॑ ।।

Verse: 21 
Sentence: a    आ सु॒ते सि॑ञ्चत॒ श्रियँ॒ रोद॑स्योरभि॒श्रिय॑म् ।
Sentence: b    र॒सा द॑धीत वृष॒भम् ।।

Verse: 22 
Sentence: a    आ॒तिष्ठ॑न्तं॒ परि॒ विश्वे॑ अभूष॒ञ्छ्रियो॒ वसा॑नश्चरति॒ स्वरो॑चिः ।
Sentence: b    म॒हत्तद्वृष्णो॒ असु॑रस्य॒ नामा वि॒श्वरू॑पो अ॒मृता॑नि तस्थौ ।।

Verse: 23 
Sentence: a    प्र वो॑ म॒हे मन्द॑माना॒यान्ध॒सो र्चा॑ वि॒श्वान॑राय विश्वा॒भुवे॑ ।
Sentence: b    इन्द्र॑स्य॒ यस्य॒ सुम॑खँ॒ सहो॒ महि॒ श्रवो॑ नृ॒म्णं च॒ रोद॑सी सप॒र्यतः॑ ।।

Verse: 24 
Sentence: a    बृ॒हन्निदि॒ध्म ए॑षां॒ भूरि॑ श॒स्तं पृ॒थुः स्वरुः॑ ।
Sentence: b    येषा॒मिन्द्रो॒ युवा॒ सखा॑ ।।

Verse: 25 
Sentence: a    इन्द्रेहि॒ मत्स्यन्ध॑सो॒ विश्वे॑भिः सोम॒पर्व॑भिः ।
Sentence: b    म॒हाँ अ॑भि॒ष्टिरोज॑सा ।।

Verse: 26 
Sentence: a    इन्द्रो॑ वृ॒त्रम॑वृणो॒च्छर्ध॑नीतिः॒ प्र मा॒यिना॑ममिना॒द्वर्प॑णीतिः ।
Sentence: b    अह॒न्व्यँ॑समु॒शध॒ग्वने॑ष्वा॒विर्धेना॑ अकृणोद्रा॒म्याणा॑म् ।।

Verse: 27 
Sentence: a    कुत॒स्त्वमि॑न्द्र॒ माहि॑नः॒ सन्नेको॑ यासि सत्पते॒ किं त॑ इ॒त्था ।
Sentence: b    सं पृ॑च्छसे समरा॒णः शु॑भानैर्वो॒चेस्तन्नो॑ हरिवो॒ यत्ते॑ अ॒स्मे ।
Sentence: c    म॒हाँ इन्द्रो॒ य ओज॑सा ।
Sentence: d    क॒दा च॒न स्त॒रीर॑सि ।
Sentence: e    क॒दा च॒न प्र यु॑च्छसि ।।

Verse: 28 
Sentence: a    आ तत्त॑ इन्द्रा॒यवः॑ पनन्ता॒भि य ऊ॒र्वं गोम॑न्तं॒ तितृ॑त्सान् ।
Sentence: b    स॑कृ॒त्स्वं॒ ये पु॑रुपु॒त्रां म॒हीँ स॒हस्र॑धारां बृह॒तीं दुदु॑क्षन् ।।

Verse: 29 
Sentence: a    इ॒मां ते॒ धियं॒ प्र भ॑रे म॒हो म॒हीम॒स्य स्तो॒त्रे धि॒षणा॒ यत्त॑ आन॒जे ।
Sentence: b    तमु॑त्स॒वे च॑ प्रस॒वे च॑ सास॒हिमिन्द्रं॑ दे॒वासः॒ शव॑सामद॒न्ननु॑ ।।

Verse: 30 
Sentence: a    वि॒भ्राड्बृ॒हत्पि॑बतु सो॒म्यं मध्वायु॒र्दध॑द्य॒ज्ञप॑ता॒ववि॑ह्रुतम् ।
Sentence: b    वात॑जूतो॒ यो अ॑भि॒रक्ष॑ति॒ त्मना॑ प्र॒जाः पु॑पोष पुरु॒धा वि रा॑जति ।।

Verse: 31 
Sentence: a    उदु॒ त्यं जा॒तवे॑दसं दे॒वं व॑हन्ति के॒तवः॑ ।
Sentence: b    दृ॒शे विश्वा॑य॒ सूर्यँ॒ स्वाहा॑ ।।

Verse: 32 
Sentence: a    येना॑ पावक॒ चक्ष॑सा भुर॒ण्यन्तं॒ जनाँ॒ अनु॑ ।
Sentence: b    त्वं व॑रुण॒ पश्य॑सि ।।

Verse: 33 
Sentence: a    दै॑व्यावध्वर्यू॒ आ ग॑तँ॒ रथे॑न॒ सूर्य॑त्वचा ।
Sentence: b    मध्वा॑ य॒ज्ञँ सम॑ञ्जाथे ।
Sentence: c    तं प्र॒त्नथा॑ ।
Sentence: d    अ॒यं वे॒नः ।
Sentence: e    चि॒त्रम्दे॒वाना॑म् ।।

Verse: 34 
Sentence: a    आ न॒ इडा॑भिर्वि॒दथे॑ सुश॒स्ति वि॒श्वान॑रः सवि॒ता दे॒व ए॑तु ।
Sentence: b    अपि॒ यथा॑ युवानो॒ मत्स॑था नो॒ विश्वं॒ जग॑दभिपि॒त्वे म॑नी॒षा ।।

Verse: 35 
Sentence: a    यद॒द्य कच्च॑ वृत्रहन्नु॒दगा॑ अ॒भि सू॑र्य ।
Sentence: b    सर्वं॒ तदि॑न्द्र ते॒ वशे॑ ।।

Verse: 36 
Sentence: a    त॒रणि॑र्वि॒श्वद॑र्शतो ज्योति॒ष्कृद॑सि सूर्य ।
Sentence: b    विश्व॒मा भा॑सि रोच॒नम् ।।

Verse: 37 
Sentence: a    तत्सूर्य॑स्य देव॒त्वं तन्म॑हि॒त्वं म॒ध्या कर्तो॒र्वित॑तँ॒ सं ज॑भार ।
Sentence: b    य॒देदयु॑क्त ह॒रितः॑ स॒धस्था॒दाद्रात्री॒ वास॑स्तनुते सि॒मस्मै॑ ।।

Verse: 38 
Sentence: a    तन्मि॒त्रस्य॒ वरु॑णस्याभि॒चक्षे॒ सूर्यो॑ रू॒पं कृ॑णुते॒ द्योरु॒पस्थे॑ ।
Sentence: b    अ॑न॒न्तम॒न्यद्रुश॑दस्य॒ पाजः॑ कृ॒ष्णम॒न्यद्ध॒रितः॒ सं भ॑रन्ति ।।

Verse: 39 
Sentence: a    बण्म॒हाँ अ॑सि सूर्य॒ बडा॑दित्य म॒हाँ अ॑सि ।
Sentence: b    म॒हस्ते॑ स॒तो म॑हि॒मा प॑नस्यते॒ द्धा दे॑व म॒हाँ अ॑सि ।।

Verse: 40 
Sentence: a    बट्सू॑र्य॒ श्रव॑सा म॒हाँ अ॑सि स॒त्रा दे॑व म॒हाँ अ॑सि ।
Sentence: b    म॒ह्ना दे॒वाना॑मसु॒र्यः॑ पु॒रोहि॑तो वि॒भु ज्योति॒रदा॑भ्यम् ।।

Verse: 41 
Sentence: a    श्राय॑न्त इव॒ सूर्यं॒ विश्वेदिन्द्र॑स्य भक्षत ।
Sentence: b    वसू॑नि जा॒ते जन॑मान॒ ओज॑सा॒ प्रति॑ भा॒गं न दी॑धिम ।।

Verse: 42 
Sentence: a    अ॒द्या दे॑वा॒ उदि॑ता॒ सूर्य॑स्य॒ निरँह॑सः पिपृ॒ता निर॑व॒द्यात् ।
Sentence: b    तन्नो॑ मि॒त्रो वरु॑णो मामहन्ता॒मदि॑तिः॒ सिन्धुः॑ पृथि॒वी उ॒त द्यौः॑ ।।

Verse: 43 
Sentence: a    आ कृ॒ष्णेन॒ रज॑सा॒ वर्त॑मानो निवे॒शय॑न्न॒मृतं॒ मर्त्यं॑ च ।
Sentence: b    हि॑र॒ण्यये॑न सवि॒ता रथे॒ना दे॒वो या॑ति॒ भुव॑नानि॒ पश्य॑न् ।।

Verse: 44 
Sentence: a    प्र वा॑वृजे सुप्र॒या ब॒र्हिरे॑षा॒मा वि॒श्पती॑व॒ बीरि॑ट इयाते ।
Sentence: b    वि॒शाम॒क्तोरु॒षसः॑ पू॒र्वहू॑तौ वा॒युः पू॒षा स्व॒स्तये॑ नि॒युत्वा॑न् ।।

Verse: 45 
Sentence: a    इ॑न्द्रवा॒यू बृह॒स्पतिं॑ मि॒त्राग्निं पू॒षणं॒ भग॑म् ।
Sentence: b    आ॑दि॒त्यान्मारु॑तं ग॒णम् ।।

Verse: 46 
Sentence: a    वरु॑णः प्रावि॒ता भु॑वन्मि॒त्रो विश्वा॑भिरू॒तिभिः॑ ।
Sentence: b    कर॑तां नः सु॒राध॑सः ।।

Verse: 47 
Sentence: a    अधि॑ न इन्द्रेषां॒ विष्णो॑ सजा॒त्या॑नाम् ।
Sentence: b    इ॒ता मरु॑तो॒ अश्वि॑ना ।
Sentence: c    तं प्र॒त्नथा॑ ।
Sentence: d    अ॒यं वे॒नः ।
Sentence: e    ये दे॒वासः॑ ।
Sentence: f    आ न॒ इडा॑भिः ।
Sentence: g    विश्वे॑भिः सो॒म्यं मधु॑ ।
Sentence: h    ओमा॑सश्चर्षणीधृतः ।।

Verse: 48 
Sentence: a    अग्न॒ इन्द्र॒ वरु॑ण॒ मित्र॒ देवाः॒ शर्धः॒ प्र य॑न्त॒ मारु॑तो॒त वि॑ष्णो ।
Sentence: b    उ॒भा नास॑त्या रु॒द्रो अध॒ ग्नाः पू॒षा भगः॒ सर॑स्वती जुषन्त ।।

Verse: 49 
Sentence: a    इ॑न्द्रा॒ग्नी मि॒त्रावरु॒णादि॑तिँ॒ स्वः॑ पृथि॒वीं द्यां म॒रुतः॒ पर्व॑ताँ अ॒पः ।
Sentence: b    हु॒वे विष्णुं॑ पू॒षणं॒ ब्रह्म॑ण॒स्पतिं॒ भगं॒ नु शँसँ॑ सवि॒तार॑मू॒तये॑ ।।

Verse: 50 
Sentence: a    अ॒स्मे रु॒द्रा मे॒हना॒ पर्व॑तासो वृत्र॒हत्ये॒ भर॑हूतौ स॒जोषाः॑ ।
Sentence: b    यः शँस॑ते स्तुव॒ते धायि॑ प॒ज्र इन्द्र॑ज्येष्ठा अ॒स्माँ अ॑वन्तु दे॒वाः ।।

Verse: 51 
Sentence: a    अ॒र्वाञ्चो॑ अ॒द्या भ॑वता यजत्रा॒ आ वो॒ हार्दि॒ भय॑मानो व्ययेयम् ।
Sentence: b    त्राध्वं॑ नो देवा नि॒जुरो॒ वृक॑स्य॒ त्राध्वं॑ क॒र्ताद॑व॒पदो॑ यजत्राः ।।

Verse: 52 
Sentence: a    विश्वे॑ अ॒द्य म॒रुतो॒ विश्व॑ ऊ॒ती विश्वे॑ भवन्त्व॒ग्नयः॒ समि॑द्धाः ।
Sentence: b    विश्वे॑ नो दे॒वा अव॒सा ग॑मन्तु॒ विश्व॑मस्तु॒ द्रवि॑णं॒ वाजो॑ अ॒स्मे ।।

Verse: 53 
Sentence: a    विश्वे॑ देवाः शृणु॒तेमँ हवं॑ मे॒ ये अ॒न्तरि॑क्षे॒ य उप॒ द्यवि॒ ष्ठ ।
Sentence: b    ये अ॑ग्निजि॒ह्वा उ॒त वा॒ यज॑त्रा आ॒सद्या॒स्मिन्ब॒र्हिषि॑ मादयध्वम् ।।

Verse: 54 
Sentence: a    दे॒वेभ्यो॒ हि प्र॑थ॒मं य॒ज्ञिये॑भ्यो मृत॒त्वँ सु॒वसि॑ भा॒गमु॒त्तंअम् ।
Sentence: b    आदिद्दा॒मानँ॑ सवित॒र्व्यू॑र्णुषे नूची॒ना जी॑वि॒ता मानु॑षेभ्यः ।।

Verse: 55 
Sentence: a    प्र वा॒युमच्छा॑ बृह॒ती म॑नी॒षा बृ॒हद्र॑यिं वि॒श्ववा॑रँ रथ॒प्राम् ।
Sentence: b    द्यु॒तद्या॑मा नि॒युतः॒ पत्य॑मानः क॒विः क॒विमि॑यक्षसि प्रयज्यो ।।

Verse: 56 
Sentence: a    इन्द्र॑वायू इ॒मे सु॒ता उप॒ प्रयो॑भि॒राग॑तम् ।
Sentence: b    +इन्द॑वो वामु॒शन्ति॒ हि ।।

Verse: 57 
Sentence: a    मि॒त्रँ हु॑वे पू॒तद॑क्षं॒ वरु॑णं च रि॒शाद॑सम् ।
Sentence: b    धियं॑ घृ॒ताचीँ॒ साध॑न्ता ।।

Verse: 58 
Sentence: a    दस्रा॑ यु॒वाक॑वः सु॒ता नास॑त्या वृ॒क्तब॑र्हिषः ।
Sentence: b    आ या॑तँ रुद्रवर्तनी ।
Sentence: c    तं प्र॒त्नथा॑ ।
Sentence: d    अ॒यं वे॒नः ।।

Verse: 59 
Sentence: a    वि॒दद्यदी॑ स॒रमा॑ रु॒ग्णमद्रे॒र्महि॒ पाथः॑ पू॒र्व्यँ स॒ध्र्य॑क्कः ।
Sentence: b    अग्रं॑ नयत्सु॒पद्यक्ष॑राणा॒मच्छा॒ रवं॑ प्रथ॒मा जा॑न॒ती गा॑त् ।।

Verse: 60 
Sentence: a    न॒हि स्पश॒मवि॑दन्न॒न्यम॒स्माद्वै॑श्वान॒रात्पु॑रए॒तार॑म॒ग्नेः ।
Sentence: b    एमे॑नमवृधन्न॒मृता॒ अम॑र्त्यं वैश्वान॒रं क्षै॑त्रजित्याय दे॒वाः ।।

Verse: 61 
Sentence: a    उ॒ग्रा वि॑घ॒निना॒ मृध॑ इन्द्रा॒ग्नी ह॑वामहे ।
Sentence: b    ता नो॑ मृडात ई॒दृशे॑ ।।

Verse: 62 
Sentence: a    उपा॑स्मै गायता नरः॒ पव॑माना॒येन्द॑वे ।
Sentence: b    अ॒भि दे॒वाँ इय॑क्षते ।।

Verse: 63 
Sentence: a    ये त्वा॑हि॒हत्ये॑ मघव॒न्नव॑र्ध॒न्ये शा॑म्ब॒रे ह॑रिवो॒ ये गवि॑ष्टौ ।
Sentence: b    ये त्वा॑ नू॒नम॑नु॒मद॑न्ति॒ विप्राः॒ पिबे॑न्द्र॒ सोमँ॒ सग॑णो म॒रुद्भिः॑ ।।

Verse: 64 
Sentence: a    जनि॑ष्ठा उ॒ग्रः सह॑से तु॒राय॑ म॒न्द्र ओजि॑ष्ठो बहु॒लाभि॑मानः ।
Sentence: b    अव॑र्ध॒न्निन्द्रं॑ म॒रुत॑श्चि॒दत्र॑ मा॒ता यद्वी॒रं द॒धन॒द्धनि॑ष्ठा ।।

Verse: 65 
Sentence: a    आ तू न॑ इन्द्र वृत्रहन्न॒स्माक॑म॒र्धमा ग॑हि ।
Sentence: b    म॒हान्म॒हीभि॑रू॒तिभिः॑ ।।

Verse: 66 
Sentence: a    त्वमि॑न्द्र॒ प्रतू॑र्तिष्व॒भि विश्वा॑ असि॒ स्पृधः॑ ।
Sentence: b    अ॑शस्ति॒हा ज॑नि॒ता वि॑श्व॒तूर॑सि॒ त्वं तू॑र्य तरुष्य॒तः ।।

Verse: 67 
Sentence: a    अनु॑ ते॒ शुष्मं॑ तु॒रय॑न्तमीयतुः क्षो॒णी शिशुं॒ न मा॒तरा॑ ।
Sentence: b    विश्वा॑स्ते॒ स्पृधः॑ श्नथयन्त म॒न्यवे॑ वृ॒त्रं यदि॑न्द्र॒ तूर्व॑सि ।।

Verse: 68 
Sentence: a    य॒ज्ञो दे॒वानां॒ प्रत्ये॑ति सु॒म्नमादि॑त्यासो॒ भव॑ता मृड॒यन्तः॑ ।
Sentence: b    आ वो॒ र्वाची॑ सुम॒तिर्व॑वृत्या॒दँहो॑श्चि॒द्या व॑रिवो॒वित्त॒रास॑त् ।।

Verse: 69 
Sentence: a    अद॑ब्धेभिः सवितः पा॒युभि॒ष्ट्वँ शि॒वेभि॑र॒द्य परि॑ पाहि नो॒ गय॑म् ।
Sentence: b    हिर॑ण्यजिह्वः सुवि॒ताय॒ नव्य॑से॒ रक्षा॒ माकि॑र्नो अ॒घशँ॑स ईशत ।।

Verse: 70 
Sentence: a    प्र वी॑र॒या शुच॑यो दद्रिरे वामध्व॒र्युभि॒र्मधु॑मन्तः सु॒तासः॑ ।
Sentence: b    वह॑ वायो नि॒युतो॑ या॒ह्यच्छा॒ पिबा॑ सु॒तस्यान्ध॑सो॒ मदा॑य ।।

Verse: 71 
Sentence: a    गाव॒ उपा॑वताव॒तं म॒ही य॒ज्ञस्य॑ र॒प्सुदा॑ ।
Sentence: b    उ॒भा कर्णा॑ हिर॒ण्यया॑ ।।

Verse: 72 
Sentence: a    काव्य॑योरा॒जाने॑षु॒ क्रत्वा॒ दक्ष॑स्य दुरो॒णे ।
Sentence: b    रि॒शाद॑सा स॒धस्थ॒ आ ।।

Verse: 73 
Sentence: a    दै॑व्यावध्वर्यू॒ आ ग॑तँ॒ रथे॑न॒ सूर्य॑त्वचा ।
Sentence: b    मध्वा॑ य॒ज्ञँ सम॑ञ्जाथे ।
Sentence: c    तं प्र॒त्नथा॑ ।
Sentence: d    अ॒यं वे॒नः ।।

Verse: 74 
Sentence: a    ति॑र॒श्चीनो॒ वित॑तो र॒श्मिरे॑षाम॒धः स्वि॑दा॒सी३दु॒परि॑ स्विदासी३त् ।
Sentence: b    रे॑तो॒धा आ॑सन्महि॒मान॑ आसन्त्स्व॒धा अ॒वस्ता॒त्प्रय॑तिः प॒रस्ता॑त् ।।

Verse: 75 
Sentence: a    आ रोद॑सी अपृण॒दा स्व॑र्म॒हज्जा॒तं यदे॑नम॒पसो॒ अधा॑रयन् ।
Sentence: b    सो अ॑ध्व॒राय॒ परि॑ णीयते क॒विरत्यो॒ न वाज॑सातये॒ चनो॑हितः ।।

Verse: 76 
Sentence: a    उ॒क्थेभि॑र्वृत्र॒हन्त॑मा॒ या म॑न्दा॒ना चि॒दा गि॒रा ।
Sentence: b    आ॑ङ्गूषैरा॒विवा॑सतः ।।

Verse: 77 
Sentence: a    उप॑ नः सू॒नवो॒ गिरः॑ शृ॒ण्वन्त्व॒मृत॑स्य॒ ये ।
Sentence: b    सु॑मृडी॒का भ॑वन्तु नः ।।

Verse: 78 
Sentence: a    ब्रह्मा॑णि मे म॒तयः॒ शँ सु॒तासः॒ शुष्म॑ इयर्ति॒ प्रभृ॑तो मे॒ अद्रिः॑ ।
Sentence: b    आ शा॑सते॒ प्रति॑ हर्यन्त्यु॒क्थेमा हरी॑ वहत॒स्ता नो॒ अच्छ॑ ।।

Verse: 79 
Sentence: a    अनु॑त्त॒मा ते॑ मघव॒न्नकि॒र्नु न त्वावाँ॑ अस्ति दे॒वता॒ विदा॑नः ।
Sentence: b    न जाय॑मानो॒ नश॑ते॒ न जा॒तो यानि॑ करि॒ष्या कृ॑णु॒हि प्र॑वृद्ध ।।

Verse: 80 
Sentence: a    तदिदा॑स॒ भुव॑नेषु॒ ज्येष्ठं॒ यतो॑ ज॒ज्ञ उ॒ग्रस्त्वे॒षनृ॑म्णः ।
Sentence: b    स॒द्यो ज॑ज्ञा॒नो नि रि॑णाति॒ शत्रू॒ननु॒ यं विश्वे॒ मद॒न्त्यूमाः॑ ।।

Verse: 81 
Sentence: a    इ॒मा उ॑ त्वा पुरूवसो॒ गिरो॑ वर्धन्तु॒ या मम॑ ।
Sentence: b    पा॑व॒कव॑र्णाः॒ शुच॑यो विप॒श्चितो॒ भि स्तोमै॑रनूषत ।।

Verse: 82 
Sentence: a    यस्या॒यं विश्व॒ आर्यो॒ दासः॑ शेवधि॒पा अ॒रिः ।
Sentence: b    ति॒रश्चि॑द॒र्ये रु॒शमे॒ परी॑रवि॒ तुभ्येत्सो अ॑ज्यते र॒यिः ।।

Verse: 83 
Sentence: a    अ॒यँ स॒हस्र॒मृषि॑भिः॒ सह॑स्कृतः समु॒द्र इ॑व पप्रथे ।
Sentence: b    स॒त्यः सो अ॑स्य महि॒मा गृ॑णे॒ शवो॑ य॒ज्ञेषु॑ विप्र॒राज्ये॑ ।।

Verse: 84 
Sentence: a    अद॑ब्धेभिः सवितः पा॒युभि॒ष्ट्वँ शि॒वेभि॑र॒द्य परि॑ पाहि नो॒ गय॑म् ।
Sentence: b    हिर॑ण्यजिह्वः सुवि॒ताय॒ नव्य॑से॒ रक्षा॒ माकि॑र्नो अ॒घशँ॑स ईशत ।।

Verse: 85 
Sentence: a    आ नो॑ य॒ज्ञं दि॑वि॒स्पृशं॒ वायो॑ या॒हि सु॒मन्म॑भिः ।
Sentence: b    अ॒न्तः प॒वित्र॑ उ॒परि॑ श्रीणा॒नो॒ यँ शु॒क्रो अ॑यामि ते ।।

Verse: 86 
Sentence: a    इ॑न्द्रवा॒यू सु॑सं॒दृशा॑ सु॒हवे॒ह ह॑वामहे ।
Sentence: b    यथा॑ नः॒ सर्व॒ इज्जनो॑ नमी॒वः सं॒गमे॑ सु॒मना॒ अस॑त् ।।

Verse: 87 
Sentence: a    ऋध॑गि॒त्था स मर्त्यः॑ शश॒मे दे॒वता॑तये ।
Sentence: b    यो नू॒नं मि॒त्रावरु॑णाव॒भिष्ट॑य आच॒क्रे ह॒व्यदा॑तये ।।

Verse: 88 
Sentence: a    आ या॑त॒मुप॑ भूषतं॒ मध्वः॑ पिबतमश्विना ।
Sentence: b    दु॒ग्धं पयो॑ वृषणा जेन्यावसू॒ मा नो॑ मर्धिष्ट॒मा ग॑तम् ।।

Verse: 89 
Sentence: a    प्रै॑तु॒ ब्रह्म॑ण॒स्पतिः॒ प्र दे॒व्ये॑तु सू॒नृता॑ ।
Sentence: b    अच्छा॑ वी॒रं नर्यं॑ प॒ङ्क्तिरा॑धसं दे॒वा य॒ज्ञं न॑यन्तु नः ।।

Verse: 90 
Sentence: a    च॒न्द्रमा॑ अ॒प्स्व॒न्तरा सु॑प॒र्णो धा॑वते दि॒वि ।
Sentence: b    र॒यिं पि॒शंगं॑ बहु॒लं पु॑रु॒स्पृहँ॒ हरि॑रेति॒ कनि॑क्रदत् ।।

Verse: 91 
Sentence: a    दे॒वंदे॑वं॒ वो व॑से दे॒वंदे॑वम॒भिष्ट॑ये ।
Sentence: b    दे॒वंदे॑वँ हुवेम॒ वाज॑सातये गृ॒णन्तो॑ दे॒व्या धि॒या ।।

Verse: 92 
Sentence: a    दि॒वि पृ॒ष्टो अ॑रोचता॒ग्निर्वै॑श्वान॒रो बृ॒हन् ।
Sentence: b    क्ष्मया॑ वृधा॒न ओज॑सा॒ चनो॑हितो॒ ज्योति॑षा बाधते॒ तमः॑ ।।

Verse: 93 
Sentence: a    इन्द्रा॑ग्नी अ॒पादि॒यं पूर्वागा॑त्प॒द्वती॑भ्यः ।
Sentence: b    हि॒त्वी शिरो॑ जि॒ह्वया॒ वाव॑द॒च्चर॑त्त्रिँ॒शत्प॒दा न्य॑क्रमीत् ।।

Verse: 94 
Sentence: a    दे॒वासो॒ हि ष्मा॒ मन॑वे॒ सम॑न्यवो॒ विश्वे॑ सा॒कँ सरा॑तयः ।
Sentence: b    ते नो॑ अ॒द्य ते अ॑प॒रं तु॒चे तु नो॒ भव॑न्तु वरिवो॒विदः॑ ।।

Verse: 95 
Sentence: a    अपा॑धमद॒भिश॑स्तीरशस्ति॒हाथेन्द्रो॑ द्यु॒म्न्याभ॑वत् ।
Sentence: b    दे॒वास्त॑ इन्द्र स॒ख्याय॑ येमिरे॒ बृह॑द्भानो॒ मरु॑द्गण ।।

Verse: 96 
Sentence: a    प्र व॒ इन्द्रा॑य बृह॒ते मरु॑तो॒ ब्रह्मा॑र्चत ।
Sentence: b    वृ॒त्रँ ह॑नति वृत्र॒हा श॒तक्र॑तु॒र्वज्रे॑ण श॒तप॑र्वणा ।।

Verse: 97 
Sentence: a    अ॒स्येदिन्द्रो॑ वावृधे॒ वृष्ण्यँ॒ शवो॒ मदे॑ सु॒तस्य॒ विष्ण॑वि ।
Sentence: b    अ॒द्या तम॑स्य महि॒मान॑मा॒यवो नु॑ ष्टुवन्ति पू॒र्वथा॑ ।
Sentence: c    इ॒मा उ॑ त्वा ।
Sentence: d    यस्या॒यम् ।
Sentence: e    अ॒यँ स॒हस्र॑म् ।
Sentence: f    ऊ॒र्ध्व ऊ॒ षु णः॑ ।।


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.