Չուեա́ց իսրայէլ ինքն՝ եւ ա(մենայ)ն որ ինչ իւր էր. եւ եկն ՛ի ջրհորն երդման. եւ մատոյց պատարա́գ ա(ստուծո)յ հօր իւրոյ իսահակայ։
Խօսեցա́ւ ա(ստուա)ծ ընդ ի(սրաէ)լի ՛ի տեսլեան գիշերոյ. եւ ասէ. յակո́բ յակոբ։ եւ նա́ ասէ. ո՞վ ես։
Ասէ՝ ե́ս եմ ա(ստուա)ծ հարցն քոց. մի́ երկնչիր իջանել յեգիպտոս, զի յազգ մե́ծ արարից զքեզ անդ։
ե́ս իջից ընդ քեզ յեգիպտոս, եւ ես հանից զքեզ ՛ի սպառ. եւ յովսէփ դիցէ զձեռս իւր ՛ի վերայ աչաց քոց։
Յարեա́ւ յակոբ ՛ի ջրհորոյ անտի երդման. եւ առին որդիքն իսրայէլի զյակոբ հայրն իւրեանց. եւ զկազմա́ծ, եւ զկանայս իւրեանց, ՛ի սայլսն զոր առաքեաց յովսէփ առնուլ զնա։ եւ առեալ զինչս իւրեանց.
եւ զա(մենայ)ն ստացուածս զոր ստացան յերկրին քանանացւոց, մտին յեգիպտոս յակոբ եւ ա(մենայ)ն զաւակ նորա ընդ նմա։
Որդիք նորա, եւ որդիք որդւոց ն(ո)ր(ա) ընդ նմա. դստերք ն(ո)ր(ա), եւ դստերք դստերաց ն(ո)ր(ա)։ եւ զա(մենայ)ն զաւակ իւր ած յեգիպտոս։
Եւ ա́յս են անուանք որդւոցն ի(սրաէ)լի որ մտին յեգիպտոս։ Յակոբ եւ որդիք իւր։ անդրանիկ յակոբու՝ Ռոբէն։
Եւ որդիք ռոբինի՝ ենոք, եւ փաղղուս, սարսոն, եւ քարմի։
Եւ որդիք Շմաւոնի, յամուէլ, եւ յամին, եւ ահովդ, եւ յաքին, եւ սահառ, եւ սաւուղ որդի քանանացւոյն։
Եւ որդիք Ղեւեայ, գեթսոն, եւ կահաթ, եւ մերարի։
Եւ որդիք Յուդայի՝ էր, եւ աւնան, եւ սելովմ, եւ փարէս, եւ զարա։ եւ մեռան էր եւ աւնան յերկրին քանանացւոց։ եւ եղեն որդիք փարեսի՝ ասրովմ, եւ յամուէլ։
Եւ որդիք Իսաքարայ, թովղա, եւ փուդ, եւ յասուբ, եւ զամամ։
Եւ որդիք Զաբուղոնի, սերեդ, եւ աղղոն, եւ էէլ։
Սոքա են որդիք լիայ՝ զոր ծնաւ յակոբ ՛ի միջագետս ասորւոց. եւ զդինա դուստր ն(ո)ր(ա)։ ա(մենայ)ն ոգիք ուստերք եւ դստերք երեսուն եւ երեք։
Եւ որդիք Գադայ, սափոն, եւ մեդիս, եւ սաւնիա, եւ թաւսոբամ, եւ այեգիս, եւ արոյէլիս, եւ արիէլիս։
Եւ սոքա են որդիք Ասերայ, յեմնա, եւ յէուսա, եւ յէուլ, եւ բարիա, եւ սարա քոյր ն(ո)ց(ա)։ եւ որդիք բարիայ՝ քոբոր, եւ մեղքիէլ։
Սոքա են որդիք զելփայ, զոր ետ լաբան լիայ դստերն իւրում։ որ ծնաւ զսոսա յակոբայ, վեշտասա́ն որդիս։
Եւ որդիք ռաքելայ կնոջ յակոբայ՝ յովսէփ, եւ բենիամին։
Եւ եղեն որդիք Յովսեփայ յերկրին եգիպտացւոց, զորս ծնաւ նմա ասանէթ դուստր պետափրեայ քրմի արեգ քաղաքի. զմանասէ եւ զեփրեմ։ Եւ եղեն որդիք մանասէի զոր ծնաւ նմա հարճն ասորի, զմաքիր. եւ եւ մաքիր ծնաւ զգաղաադ։ Եւ որդիք եփրեմի եղբօրն մանասէի, սուտաղաամ, եւ տաամ. եւ որդի սուտաղաամայ, եդեմ։
Եւ որդիք Բենիամինի՝ բաղա, եւ բոքոր, եւ ասբեէ. եւ եղեն որդիք բաղայ գէէրա, եւ նէէման, եւ անաքիս, եւ ռովս, եւ մամփիմ, եւ ոփիմին։ եւ գեերա ծնաւ զարադ։
Սոքա են որդիք ռաքելի՝ զոր ծնաւ յակոբայ. ա(մենայ)ն ոգիք ութ եւ տասն։
Եւ որդիք Դանայ՝ ասոմ։
Եւ որդիք Նեփթաղեմի, ասիէլ, եւ գովնի, եւ ասաար, եւ սիլիմ։
Սոքա են որդիք բալլայ՝ զոր ետ լաբան ռաքելի դստեր իւրում. եւ ծնաւ զսոսա յակոբայ. ամենեքին ոգիք եւթն։
Եւ ա(մենայ)ն ոգիք որ մտին ընդ յակոբայ յեգիպտոս. որ ելեալ էին յերանաց ն(ո)ր(ա), առանց կանանց որդւոցն յակոբայ, ա(մենայ)ն ոգիք վաթսուն եւ վեց.
Եւ որդիք յովսեփայ որ եղեն նմա յեգիպտոս, ոգիք երկու։ Եւ ա(մենայ)ն ոգիք տանն յակոբու՝ որ մտին յեգիպտոս եւթանասուն եւ հինգ։
Եւ զյուդա յառաջագոյն առաքեաց առ յովսէփ, գա́լ նմա ընդ առաջ զքաջաց քաղաքաւն, յերկիրն ռամեսա. եւ ինքն եկն յերկիրն գեսեմ։
Կազմեաց յովսէփ զկառս իւր, եւ ել ը(նդ) առաջ ի(սրաէ)լի հօր իւրոյ, զքաջաց քաղաքաւն։ եւ իբրեւ յանդիման եղեւ նմա՝ անկա́ւ ՛ի վերայ պարանոցի ն(ո)ր(ա), եւ ելաց ՛ի լալիւն մեծ։
Եւ ասէ ի(սրա)էլ ցյովսէփ. մեռա́յց այսուհետեւ. որովհետեւ տեսի զերեսս քո՝ զի տակաւին կենդանի́ ես.
Եւ ասէ յովսէփ ցեղբարս իւր՝ եւ ցտուն հօր իւրոյ. երթայց պատմեցի́ց փարաւոնի, եթէ եղբա́րք իմ եւ տուն հօր իմոյ որ էին յերկիրն քանանացւոց, եկի́ն առիս։
եւ արք հովիւք են, եւ արք խաշնադարմա́նք են, եւ զանասուն, եւ զարջառ, եւ զա(մենայ)ն ինչ իւրեանց ածին այսր։
Արդ՝ եթէ կոչիցէ զձեզ փարաւոն՝ եւ ասիցէ, զի՞նչ գործ է ձեր.
ասասջիք եթէ արք խաշնադարմանք եմք ծառայք քո ՛ի մանկու(թեն)է մինչեւ ցայժմ. եւ մեք եւ հարք մեր։ զի բնակիցէք յերկրին գեսեմ։ զի գարշելի́ է եգիպտացւոց՝ ա(մենայ)ն հովիւ խաշանց։
