Ա́ՅՍ ԵՆ ԱՆՈՒԱՆՔ ՈՐԴՒՈՑՆ իսրայէլի մտելոցն յեգիպտոս հանդերձ յակոբաւ հարբն իւրեանց իւրաքանչիւր ըստ համօրէն տանց իւրեանց մտանէին։
ռոբէն. շմաւոն. ղեւի. յուդա.
իսաքար. զաբուղոն. եւ բենիամին։
դան. եւ նեփթաղիմ. գագ. եւ ասեր։
Եւ էին ա(մենայ)ն ոգիք ելեալք ՛ի յակոբայ, եւթանասուն եւ հինգ ոգի։ եւ յովսէփ էր յեգիպտոս։
Վախճանեցաւ յովսէփ՝ եւ ա(մենայ)ն եղբարք նորա, եւ ա(մենայ)ն ազգն այն։
եւ որդիքն իսրայէլի աճեցին եւ յոռացան. բազմանային եւ զօրանային յոյժ. զի բազմացուցանէր զն(ո)ս(ա) երկիրն։
Եկաց ա́յլ թագաւոր՝ որ ո́չ գիտէր զյովսէփ։
եւ ասէ ցազգն իւր. ահա ազգ որդւոցն ի(սրաէ)լի մե́ծ է զօրութ(եամ)բ, եւ զօրանա́յ քան զմեզ։
Արդ՝ եկայք հնարեսցուք ինչ նոցա. գուցէ՝ բազմանայցեն. եւ յորժամ դիպեսցի մեզ պատերազմ, յաւելուցուն եւ ն(ո)ք(ա) ՛ի թշնամիսն. եւ մարտուցեալ ընդ մեզ, ելանիցեն յերկրէ աստի։
Եւ կացո́յց ՛ի վերայ ն(ո)ց(ա) գործավարս, զի չարչարեսցեն զնոսա ՛ի գործ։ եւ շինեցին քաղաքս ամուրս փարաւոնի, զփիդոն, եւ զռամեսէ, եւ զովն՝ որ է արեգ քաղաք։
Եւ որչափ ճնշէին զնոսա, այնչափ առաւե́լ բազմանային եւ զօրանային յոյժ։
Եւ գարշեցուցանէին եգիպտացիքն զորդիսն ի(սրաէ)լի։ եւ յաղթահարէին եգիպտացիքն զորդիսն ի(սրաէ)լի բռնութ(եամ)բ։
եւ կեղէին զկեանս նոցա ՛ի գործ խիստ կաւոյ եւ աղիւսարկի, եւ յա(մենայ)ն գործ դաշտաց. ըատ ա(մենայ)ն գործոյ իւրեանց՝ որով ծառայեցուցանէին զնոսա բռնութ(եամ)բ։
Եւ խօսեցա́ւ արքայն եգիպտացւոց ընդ ծնուցիչսն եբրայեցւոց. ընդ միում որում անուն էր սեփովրա, եւ անուն երկրորդին փուա.
եւ ասէ. յորժամ ծնուցանիցէք զկանայս եբրայեցիս, եւ իցեն մե́րձ ՛ի ծնունդս. թէ արո́ւ իցէ՝ սպանջի́ք զնա, եւ թէ էգ՝ ապրեցուցանիջիք։
Եւ երկեա́ն ծնուցիչքն յա(ստուծո)յ. եւ ո́չ արարին՝ որպէս եւ հրաման ետ ն(ո)ց(ա) արքային եգիպտացւոց. եւ ապրեցուցանէին զարուսն։
Կոչեա́ց արքայն եգիպտացւոց զծնուցիչսն՝ եւ ասէ ցնոսա. զի՞ է զի արարէք զիրս զայնոսիկ եւ ապրեցուցէք զարուս։
Եւ ասեն ծնուցիչքն ցփարաւոն. ո́չ իբրեւ զկանայս եգիպտացիսն եբրայեցիքն։ քանզի նա́խ ծնանին մինչ չե́ւ մտեալ առ նոսա մանկաբարձաց։ եւ ծնանէին։
Եւ բարի առնէր ա(ստուա)ծ մանկաբարձացն։ եւ բազմանայր յոյժ ժողովուրդն, եւ զօրանայր յոյժ։
Յորմէհետէ երկեան մանկաբարձքն յա(ստուծո)յ, արարին իւրեանց տունս։
Հրամա́ն ետ փարաւոն ա(մենայ)ն ժողովրդեան իւրում, եւ ասէ. զա(մենայ)ն արու որ ծնանիցի եբրայեցւոց, ՛ի գե́տ ընկեսջիք, եւ զա(մենայ)ն էգ՝ ապրեցուցանիջիք։
