Եւ եթէ լինիցի հակառակութի(ւն) ՛ի մէջ մարդկան, մատիցեն յատեան եւ դատեսցին. եւ արդարացուսցեն զարդարն, եւ պարտաւորեսցե́ն զամպարիշտն։
Եւ եղիցի եթէ արժանի իցէ գանի ամպարիշտն, նստուսցեն զնա առաջի դատաւորացն, եւ հարցե́ն զնա առաջի ն(ո)ց(ա) ըստ ամպարշտու(թ)ե(ան) ն(ո)ր(ա)՝
թուով քառասո́ւն. եւ այլ մի́ յաւելուցուն. ապա թէ յաւելուցուն հարկանել զնա աւելի́ քան զայն, անարգութի(ւն) լիցի եղբօրն քում առաջի քո։
Մի́ կապեսցես զցռուկ եզին կալոտւոյ։
Եւ եթէ բնակեսցեն եղբարք ՛ի միասին, եւ մեռանիցի մի ոք ՛ի նոցանէ, եւ զաւակ ո́չ իցէ ն(ո)ր(ա). մի́ լինիցի կին մեռելոյն արտաքոյ ա́ռն ումեք՝ որ մերձաւոր չիցէ́ նորա. այլ եղբայր ա́ռն իւրոյ մտցէ առ նա, եւ առցէ զնա ի́ւր կնութե(ան). եւ բնակեսցէ́ ընդ նմա։
եւ եղիցի մանուկն որ ծնանիցի՝ հաստատեալ յանո́ւն վախճանելոյն. եւ մի́ ջնջեսցի անուն ն(ո)ր(ա) յի(սրա)էլէ։
Ապա թէ ո́չ կամիցի այրն առնուլ զկին եղբօր իւրոյ, ելցէ́ կինն ՛ի դո́ւռն անդր առ ծերակոյտն՝ եւ ասասցէ. ո́չ կամի եղբայր առն իմոյ կանգնել զանուն եղբօր իւրոյ ՛ի մէջ ի(սրաէ)լի։
Եւ կոչեսցեն զնա ծերակոյտ քաղաքին իւրոյ, եւ խօսեսցին ընդ նմա. եւ նա կացցէ եւ ասիցէ, ո́չ կամիմ առնուլ զդա։
Եւ մատուցեալ կին եղբօր ն(ո)ր(ա) առաջի ծերոցն, հանցէ զկօշիկ մի յոտանէ ն(ո)ր(ա). եւ թքցէ́ ը(նդ) երեսս ն(ո)ր(ա), եւ պատասխանի́ տուեալ ասասցէ. ա́յսպէս արասցեն առն, որ ո́չ շինիցէ զտուն եղբօր իւրոյ։
Եւ կոչեսցի անուն ն(ո)ր(ա) ՛ի մէջ ի(սրաէ)լի տո́ւն բոկացելոյ։
Եւ եթէ կռուեսցին արք ընդ միմեանս, այր ը(նդ) եղբօ́ր իւրում. եւ մատուցեալ կին միոյ ՛ի նոցանէ թափել զայր իւր ՛ի ձեռաց այնորիկ որ հարկանիցէն զնա, եւ ձգեալ զձեռն բո́ւռն հարկանիցէ զերկուորեաց ն(ո)ր(ա).
հատցե́ս զձեռն, եւ մի́ խնաեյսցէ ՛ի նա ակն քո։
Մի́ լինիցի յամանի քում կշիռ եւ կշիռ, մեծ կամ փոքր։
եւ մի́ լինիցի ՛ի տան քում չափ եւ չափ, մեծ կամ փոքր։
Կշիռ ստո́յգ եւ արդա́ր եղիցի քեզ. եւ չա́փ ստոգյ եւ արդար եղիցի քեզ. զի բազմօրեա́յ եղիցս ՛ի վ(ե)ր(այ) երկրին զոր տ(է)ր ա(ստուա)ծ քո տացէ քեզ ՛ի ժառանգու(թ)ի(ւն)։
զի պիղծ է տ(եառ)ն ա(ստուծո)յ քում ա(մենայ)ն որ առնէ զայն, եւ ա(մենայ)ն որ առնէ զանիրաւութի(ւն)։
Յո́ւշ լիցի քեզ զոր արա́րն քեզ ամաղէկ ՛ի ճանապարհի ելանելոյն քոյ յեգիպտոսէ.
զի́արդ ընդդէմ եկաց քեզ ՛ի ճանապարհին՝ եւ կրկատեա́ց զվերջն քո, եւ զաշխատեալսն զկնի քո, եւ դու քաղցեալ եւ աշխատեալ էիր. եւ ո́չ երկեաւ յա(ստուծո)յ։
Եւ եղիցի յորժամ հանգուցանիցէ զքեզ տ(է)ր ա(ստուա)ծ քո յա(մենայ)ն թշնամեաց քոց որ շուրջ զքե́ւ իցեն յերկրին զոր տ(է)ր ա(ստուա)ծ քո տացէ քեզ վիճակա́ւ ՛ի ժառանգու(թ)ի(ւն), ջնջեսցե́ս զանուն ամաղեկայ ՛ի ներքոյ երկնից, եւ մի́ մոռասցիս։
