Արդ աղէ կարդա́, թէ ոք տայցէ՞ քեզ ձայն, կամ թէ զոք ՛ի հրեշտակաց սրբոց տեսցե՞ս։
Քանզի եւ զանզգամ սպանանէ բարկութի(ւն), եւ զմոլորեալն մեռուցանէ նախանձ։
Նա՝ ես տեսի անզգամաց արմա́տս ձգեալ, այլ վաղվաղակի հարան յարկք նոցա։
Հեռի́ լիցին որդիք ն(ո)ց(ա) ՛ի փրկութ(են)է. կողկողեսցին առ դրունս վատթարաց, եւ ո́չոք իցէ որ փրկիցէ։
Զի զոր նոքայն ժողովեցին՝ արդա́րք կերիցեն, եւ նոքա մի́ եղիցին ապրեալք ՛ի չարեաց. ծծեսցի́ զորութի(ւն) ն(ո)ց(ա)։
Զի ո́չ եթէ յերկրէ ելանիցէ աշխատու(թ)ի(ւն), եւ ո́չ ՛ի լերանց բուսանիցին ցաւք։
Այլ մա́րդ աշխատութ(եամ)բ ծնանի. ծա́գք արծուեաց ՛ի բարձո́ւնս թռչին։
Բայց սակայն ես խնդրեցից ՛ի տ(եառն)է, եւ զտ(է)ր զամենեցո́ւն իշխանն կարդացից։
Որ առնէ զմեծամեծս եւ զանքնինս, եւ զփառաւորս եւ զհրեշտակերտս որոց ո́չ գոյ թիւ։
Որ տա́յ ամձրեւ յերկիր, առաքէ́ զջուրս ՛ի ներքո́յ երկնից։
Որ առնէ զխոնարհս ՛ի բարձունս, եւ կանգնէ զկորուսեալս։
Եւ փոփոխէ զխորհուրդս խորամանգաց, եւ ո́չ գործեսցեն ձեռք ն(ո)ց(ա) զճշմարտու(թ)ի(ւն)։
Որ հասանէ́ իմաստնոց հանճարով, եւ զխորհուրդս բազմանիւթաց յիմարեցոյց։
՛Ի տուէ́ պատահիցէ ն(ո)ց(ա) խաւար, եւ ՛ի միջօրէի իբրեւ ՛ի գիշերի́ խարխափեսցեն։ Սատակեսցին պատերազմաւ.
եւ աղքատն ապրեսցի ՛ի ձեռանէ հզօրին։
Եղիցի́ յոյս տկարի. բերա́ն անիրաւի խցցի։
Երանեա́լ է մարդ զոր յանդիմանեաց տ(է)ր ՛ի վ(ե)ր(այ) երկրի. եւ ՛ի խրատուէ́ ամենակալին մի́ հրաժարեսցես։
Զի նա́ ցաւեցուցանէ, եւ միւսանգամ անդրէն հաստատէ. եհար՝ եւ ձե́ռք ն(ո)ր(ա) բժշկեցին։
Վեցիցս ՛ի վշտա́ց փրկեսցէ զքեզ, եւ յեւթներորդումն ո́չ մերձեսցի առ քեզ չար։
՛Ի սովի՝ փրկեսցէ́ զքեզ ՛ի մահուանէ։ ՛ի պատերազմի ՛ի ձեռաց երկաթոյ արձակեսցէ́ զքեզ։
՛Ի տանջանաց լւզուի՝ ծածկեսցէ զքեզ. եւ մի́ երկիցես ՛ի չարեաց եկելոց ՛ի վ(ե)ր(այ) քո։
զանիրաւս եւ զանօրէնս արհամարհեսցես։ ՛Ի գազանաց վայրենեաց ո́չ երկիցես։
զի ընդ քարինս վայրի դաշինք քո. եւ գազանք վայրենիք խաղաղասցին ընդ քեզ։
Ապա գիտասցես թէ խաղաղու(թ)ի(ւն) է տան քո, եւ բնակու(թ)ի(ւն) յարկի́ քոյ մի́ վրիպեսցի։
Եւ ծանիցես զի բազում է զաւա́կ քո. եւ որդիք քո եղիցին իբրեւ զբանջար վայրի։
Եւ երթիցես ՛ի գերեզման իբրեւ զցորեան հասեալ ՛ի ժամանակի հնձեալ, կամ իբրեւ զշիղջ կալոյ ՛ի ժամանակի ամփոփեալ։
Ահաւասիկ զայս ա́յսպէս քննեցաք. ա́յս է զոր լուաքն։ բայց դու գիտասջի́ր յանձն քո զինչ գործեցեր։
