Page of ms. O: 509v წელსა მეათორმეტესა მეფობასა ნაბუქოდონოსორისსა, რომელი მეფობდა ასურასტანს, ქალაქსა დიდსა ნინევეს, დღეთა არფაქსადისთა, რომელი მეფობდა ხოჟასტანელთა ზედა ეგბატანს,
და მოადგა გარემო მისა ზღუდჱ ლოდთაგან თლილთა, სიგრძჱ სამ წყრთა და სივრცჱ ექუს წყრთა. და იყო სიმაღლჱ ზღუდისაჲ მის წყრთითა სამეოცდაათ და სივრცჱ მისი _ ერგასის წყრთა.
და გოდოლნი მისნი აღჰმართნა ბჭეთა მისთა ზედა ას წყრთა და სივრცჱ მისი დააფუძნა სამეოცსა წყრთასა ზედა.
Page of ms. O: 510r და ქმნნა ბჭენი მისნი ბჭენი აღმართებულნი, სიმაღლჱ სამეოც და ათ წყრთა და სივრცჱ მისი ორმეოც წყრთა გამოსავალად ერისა ძლიერთა მისთათჳს და ეტლებისა და განწესებულთა მკჳრცხლთა მისთათჳს.
და ყო ბრძოლაჲ მათ დღეთა შინა ნაბუქოდონოსორ, მეფემან ასურასტანელთამან, მეფისა თანა არფაქსადისა ველსა მას ზედა, ესე იგი არს საზღვართა რაგავისთა.
და შეემთხჳნეს მას ბრძოლად ყოველნი მკჳდრნი ევფრატისანი და ტიგრისისანი და ჳდასპესანი და ველისა არეოქისანი, რომელნი არიან მეფისა ელჳმელთაჲსაჲ, და შეკრბა თესლები მრავალი განწყობად ძეთა ქელეოდისთა.
და წარავლინა ნაბუქოდონოსორ, მეფემან ასურასტანისამან, ყოველთა მიმართ მკჳდრთა სპარსეთისათა და ყოველთა მკჳდრთა მზის დასავალისათა და მკჳდრთა კილიკიაჲსათა და დამასკისათა და ლიბანისათა და ყოველთა დამკჳდრებულთა წინაშე პირსა ზღჳსკიდისასა,
და თესლებსა კარმელისათა და ზენა გალილეაჲსა და დიდისა ველისა ისდრიმისაჲ,
და მკჳდრთა სამარიაჲსათა და ქალაქთა მისთა წიაღ იორდანესა და ვიდრე იერუსალჱმადმდე და ბეტანედ და მდინარედ ეგჳპტისად და ტაფნად და ჰრამისედ,
და ყოველსა ქუეყანასა გესემისასა ვიდრე მოსლვადმდე ზემო ტანეოსსა და მემფიოსსა და ყოველთა მკჳდრთა ეგჳპტისათა ვიდრე მოსლვადმდე Page of ms. O: 510v საზღვართა ეთიოპისათა.
და განაქარვეს ყოველთა მკჳდრთა ქუეყანისათა სიტყუაჲ ნაბუქოდონოსორ, მეფისაჲ ასურასტანისაჲ, და არა შეერთნეს მას ბრძოლასა მას, რამეთუ არა ეშინოდა მისა, არამედ იყო იგი წინაშე მათსა, ვითარცა ერთი კაცი სწორი და გარეწარაქცინეს მოციქულნი მისნი ცალიერნი გინებითა წინაშე პირსა მისსა.
და განრისხნა ნაბუქოდონოსორ ყოველსა მას ქუეყანასა ზედა ფრიად და ფუცა საყდარსა და სუფევასა თჳსსა; უკუეთუ არა შური ვიძიო ყოველთა საზღვართა კილიკიაჲსათა და დამასკისა და ასურეთისა მოწყუედად მახჳლითა მისითა და ყოველთა მკჳდრთა მოაბისათა და ძეთა ამონისთა და ყოველსა იუდასა და ყოველთა ეგჳპტისათა ვიდრე მოსლვადმდე საზღვართა ორთა ზღუათასა.
და ეწყო თჳსითა ერითა მეფესა არფაქსადს, მეფესა ხუჟიკეთისასა, წელსა მეათჩჳდმეტესა და განძლიერდა ბრძოლასა მისსა და მოიქცია ყოველი არფაქსადისი ერი და ყოველი ცხენები მისი და ყოველი ეტლები მისი.
და ეუფლა ქალაქებსა მისსა და მიიწია ვიდრე ეგბატანადმდე; სადა დაიპყრა გოდოლი იგი მისი და წარმოტყუენნა უბანნი მისნი და სამკაული მისი დადვა საყუედრელად მისა.
და წარმოიყვანა არფაქსად და ჰოროლსა აღაცუა იგი მთათა ზედა რაგავისთა, და ლახურებითა თჳსითა მოსრა ვიდრე დღენდელად დღედმდე.
და მოიქცა იგი Page of ms. O: 511r [მ]ათ თანა ნინევედ და ყოველი განწყობილი მისი და ყოველი ნადი მისი და სიმრავლჱ ერისა მბრძოლისაჲ დიდძალი ფრიად და იყო მუნ უზრუნველ იგი და ყოველი ერი მისი ას ოც დღე.
