და წელსა მეათრვამეტესა, ოცდაორსა პირველისა მის თჳსასა იყო სიტყუაჲ სახლსა შინა ნაბუქოდონოსორისსა შურისგებად ყოვლისა ქუეყანისა, ვითარცა-იგი იტყოდა.
და მოუწოდა ყოველთა მსახურთა მისთა და ყოველთა დიდ-დიდთა მისთა და დადვა მათ თანა საიდუმლოჲ ზრახვისა მისისაჲ. და იყო, ვითარცა აღასრულა ყოველი უკეთურებისა ზრახვაჲ პირისაგან მისისა მის ქუეყანისათჳს.
და მათ განაწესეს მოწყუედად ყოვლისა ქუეყანისა, რომელნი არა ერჩდეს სიტყუათა პირისა მისისათა.
და იყო, ვითარცა აღასრულნა ზრახვანი მისნი, სიტყჳთ მოუწოდა ნაბუქოდონოსორ, მეფემან ასურასტანისამან, ოლომფორნეს, ერისთავსა ძლიერებისა მისისასა, რომელი შემდგომი იყო მისი, და ჰრქუა მას:
ამას იტყჳს მეფჱ დიდი, ყოვლისა ქუეყანისაჲ უფალი: აჰა ესერა, შენ განხჳდე პირისაგან ჩემისა და განიყვანნე კაცნი, მოსავნი ძალისა მათისანი, და მკჳრცხლთაჲ ას ოცი ათასი კაცი და სიმრავლჱ ჰუნეთა და მჴედართაჲ - თორმეტი ბევრი.
და განვედ შენ წყობად ყოველსა ქუეყანასა მზის დასავალისასა, რამეთუ ურჩ ექმნნეს სიტყუათა პირისა ჩემისათა;
და უთხარ მათ, რაჲთა განმიმზადონ მე ქუეყანაჲ და წყალი, რამეთუ Page of ms. O: 511v განვალ მე გულისწყრომითა ჩემითა მათ ზედა. და დავფარო მე პირი ყოვლისა ქუეყანისაჲ ფერჴითა ერისა ჩემისაჲთა და მივსცნე იგინი მათ აღსაჭრელად.
და წყლულებითა მათითა აღივსნენ ღელენი მათნი და ყოველი ჴევნები მათი, და მდინარენი წარჰრღუნიდენ მკუდართა მათთა და აღივსნენ იგინი,
და წარმოვიღო ტყუე მათი კიდეთა ქუეყანისათა,
ხოლო შენ განვედ და წინაჲსწარ დამიპყრენ ყოველნი საზღვარნი მათნი და მოგცნედ შენ თავნი მათნი, და დამიმარხენ მე იგინი დღედმდე მხილებისა მათისა.
ხოლო რომელნი არა გერჩდენ, ნუ ერიდებინ თუალი შენი მიცემად მათა სიკუდილსა და აღჭრასა ყოვლისა ქუეყანისასა,
რამეთუ ცხოველ ვარ მე და ძალი სუფევისა ჩემისაჲ. ვითარცა ვიტყოდე, ეგრეცა ვ[ყო] ესე ყოველი ჴელითა ჩემითა,
და შენ არა გარდაჰჴდე ერთსაცა სიტყუასა უფლისა შენისასა, არამედ აღსრულებით აღასრულნე, ვითარცა გიბრძანე შენ, და ნუ ჰყოვნი ყოფად მისა.
და გამოვიდა ოლომფორნე პირისაგან უფლისა თჳსისა, და მოუწოდა ყოველთა ძლიერთა და წინამძღუართა და მთავრებსა და ზედამდგომელთა ერისა ასურეთისათა.
და აღრაცხა რჩეული კაცი მბრძოლად, ვითარცა უბრძანა მას უფალმან მისმან, ათორმეტი ბევრი მჴედარი და მოისარი ორი ბევრი და ორ ათასი.
და განაწესნა იგინი ვითარცა სახედ სიმრავლჱ მბრძოლისაჲ და განაწყვის.
და მოასხა აქლემები და ჯორები Page of ms. O: 512r და ვირები, ჭურჭერთა მათთათჳს სიმრავლჱ ფრიადი, და ზროხაჲ და ცხოვარი და თხაჲ საზრდელად მათა, რომლისაჲ არა იყო რიცხჳ;
და საგზალი ყოველსა კაცსა სიმრავლედ, ოქროჲ და ვეცხლი სახლისაგან სამეუფოჲსა მრავალი ფრიად.
და გამოვიდა ნინევით იგი და ყოველი ძალი მისი სლვად და წინაგანსლვად მეფისა ნაბუქოდონოსორისა დაფარვად ყოველი პირი ქუეყანისაჲ მზის დასავალით კერძო ეტლებითა და მჴედრებითა და მკჳრცხლითა რჩეულითა.
და მრავალი ნართავი ერი თანა გამოერთო მათ სიმრავლითა, ვითარცა მკალი და ვითარცა ქჳშაჲ ზღჳსაჲ სიმრავლჱ მათი, რამეთუ არა იყო რიცხჳ სიმრავლისა მათისაჲ.
და განვიდეს ნინევით გზასა სამისა დღისასა პირსა წინაშე ველისა მის ბეკთილათისასა მახლობელად მთასა მას ზენა კერძო კილიკიასა.
და წარიყვანა ყოველი ერი მისი მკჳრცხლი და მჴედარი და ეტლები და წარვიდა მიერ მთად კერძო.
და მოსრნა ფოდელნი და ლუდიელნი; და წარმოტყუენნა ყოველნი ძენი ჰრაასისნი და ძენი ისმაელისნი, რომელნი მკჳდრ იყვნეს წინაშე პირსა უდაბნოჲსასა სამხრით კერძო ქუეყანისა მის ქელონისსა და ქალდეველთაჲსა.
და განვლო ეფრატი და განვლო შუვამდინარჱ და დაარღჳნა ქალაქნი მაღალნი ჴევით კერძო აბრონესა ვიდრე მოსლვადმდე ზღუად დიდად.
და დაიპყრნა საზღვარნი კილიკიაჲსანი/ Page of ms. O: 512v და მოსრა ყოველი, რომელი წინა-აღუდგა მას, და მიიწია ვიდრე საზღვრადმდე იაფეთისა სამხრით წინაშე პირსა არაბიაჲსასა.
და მოიცვნა ყოველნი ძენი მადიამისანი და მოწუა ყოველი კარვები მათი და წარმოიღო ნატყუენავი მათი.
და შემოვიდა ველად დამასკისა დღეთა იფქლის მკისათა და მოწუა ყოველი ყანები მათი და ველები მათი განრყუნა და ჰანგრავანები მათი და სამწყსოჲ და მროწეული მისცა განსარყუნელად და ქალაქნი მათნი წარმოტყუენნა და ყანობირი მათი განაბნია და მოსრა ყოველი ჭაბუკი მათი პირითა მახჳლისაჲთა.
და დაეცა შიში და ძრწოლაჲ მისი მკჳდრთა ზღჳსკიდისათა, რომელნი იყვნეს სიდონს და ტჳროსს და მკჳდრთა სურისათა და მიერ კერძო მისა და მკჳდრთა იამნიაჲსათა და მკჳდრთა აზოტისათა და გაზათა, ასკალონისათა, და შეეშინა ფრიად.
