და მიავლინნეს მისა მოციქულნი სიტყჳთა მშჳდობისაჲთა და ჰრქუეს:
აჰა ესერა, ჩუენ, მონანი ნაბუქოდონოსორისნი, მეფისა დიდისანი, წინაშე შენსა ვართ, მიმსახურენ ჩუენ, ვითარცა სათნო არს წინაშე შენსა.
აჰა ესერა, საყოფელნი ჩუენნი და მკჳდრნი მათ შინა მონანი შენნი არიან და ყოველნი ველნი საიფქლენი და სამწყსონი ჩუენნი და მროწეულნი და ყოველნი ბანაკნი ანგროვანთა ჩუენთანი წინაშე შენსა არიან და იჴმიე იგი, ვითარცა სათნო არს შენდა,
მოვედ და დაიპყრენ იგინი, ვითარცა გნებავს.
და მივიდეს კაცნი იგი ოლომფორნესა და უთხრნეს Page of ms. O: 513r მას სიტყუანი ესე.
და გარდამოვიდა ზღჳსკიდედ იგი და ყოველი ერი მისი და მოიცვნა ქალაქნი მათნი. და წარმოიყვანნა მათგან კაცნი ძლიერნი ბრძოლად.
და მათ შეიწყნარეს იგი და ყოველი სოფლები მათი გჳრგჳნებითა და მძნობრებითა და ბობღნებითა.
და დაარღჳნეს ყოველნი საზღვარნი მათნი და მოკაფეს ყოველი სერტყები მათი. რამეთუ მოცემულ იყო მისა ბრძანებაჲ მოსრვად ყოველთა კერპთა ქუეყანისათა, რაჲთა მას ხოლო, ნაბუქოდონოსორს, ჰმსახურებდენ ყოველნი ნათესავნი და ყოველნი ენანი, და ტომები მათი ჰხადოდიან მას ღმერთად უმსახურებელობითა მათითა.
და მოვიდა წინაშე პირსა ეზრიქოჲსასა მახლობელად დოთიასა, რომელ არს წინაშე პრიონსა დიდსა იდუსეაჲსასა.
და დაიბანაკეს შორის გებესა და სკუთოპოლისსა, რომელ არს გებანა, და იყო მუნ თუე ერთ, რაჲთა შეიკრიბოს მუნ ყოველი გუნდი ძლიერებისა მისისაჲ.
და ესმა ძეთა ისრაჱლისათა, რომელნი მკჳდრ იყვნეს ჰურიასტანს, ყოველი, რომელი ქმნა ოლომფორნე ნათესავთა მიმართ ქუეყანისათა და ერისთავმან მან ნაბუქოდონოსორისმან, მეფისა ასურასტანისამან, და ვითარ სახედ წარმოტყუენა ყოველი ბაგინები მათი და მისცნა იგინი განსარყუნელად.
და შეეშინა ფრიად პირისა მისისაგან და იერუსალჱმისათჳს, ტაძრისა უფლისა ღმრთისა მათისა, შეძრწუნებულ იყვნეს,
რამეთუ მაშინ ოდენ აღმოსრულ იყვნეს ტყუეობისაგან და ჭურჭელი და საკურთხეველი და ტაძარი იგი შეგინებულებისაგან მაშინ ოდენ განწმედილ იყო.
Page of ms. O: 513v და წარავლინეს ძეთა ისრაჱლისათა ყოველთა საზღვართა სამარიაჲსათა და კონაჲსათა და ბეროჲსათა და ბელმენისათა და იერიქოჲსათა და ქობაჲსათა და ეორად და ღელეთა იერუსალემისათა.
და დაიპყრნეს ყოველნი თავნი მთათანი მაღალთანი და მოზღუდეს დაბნები მათი და დაიდვეს საზრდელი მათ შინა განმზადებად ბრძოლისა, რამეთუ ახლოდ-ღა მომკილ იყო ყანები მათი.
და მიწერა იოვაკიმ მღდელმან დიდმან, რომელი იყო მათ დღეთა შინა იერუსალჱმს, მკჳდრთა ბეტოლაჲსათა და ბეტომის თემისათა (რომელ არს წინაშე ესრექონსა, პირისპირ ველსა მას, რომელ არს წინაშე დოთაიმსა მასადანითგან წინაშე პირსა ბრიონისასა),
და ჰრქუა: შეიპყრენით აღსავალნი მთათანი, რამეთუ მიერ იყო შესავალი ჰურიასტანდ და ადვილ იყო დაყენებაჲ მათი მოსლვად, რამეთუ იწრო იყო აღმოსავალი იგი ვითარ ორისა კაცისა.
და ყვეს ეგრე ძეთა ისრაჱლისათა, ვითარცა უბრძანა მათ იოვაკიმ მღდელმან დიდმან და მოხუცებულთა ყოველთა ერისა ისრაჱლისათა, რომელნი იყვნეს იერუსალჱმს.
და ღაღად-ყო ყოველმან ისრაჱლმან ღმრთისა მიმართ გულსმოდგინებითა დიდითა და დაიმდაბლნეს მარხვითა სულნი მათნი
მათ და დედათა მათთა (9) და ჩჩჳლთა მათთა და საცხოვარამდე მათა. და ყოველმან მწირმან და სასყიდლით დადგინებულმან და ვეცხლით მოფარდულმან მათმან მოირტყეს ძაძაჲ წელთა მათთა,
და ყოველმან მამაკაცმან და დედაკაცმან და ყრმათა, რომელნი მკჳდრ იყვნეს Page of ms. O: 514r იერუსალჱმს, დაცჳვეს წინაშე ტაძრისა მის და ნაცარი გარდაისხეს თავთა მათთა და განიპყრნეს ძაძანი მათნი წინაშე უფლისა.
და საკურთხეველსა ძაძაჲ შეჰმოსეს (10) და ღაღად-ყვეს ღმრთისა მიმართ ისრაჱლისა ერთბამად ყოვლითა გულითა, რაჲთა არა მიეცნენ ჩჩჳლნი მათნი მისატაცებელად და ცოლნი მათნი წარსატყუენველად, ქალაქნი სამკჳდრებელისა მათისანი - განსარყუნელად და სიწმიდე _ შეგინებად და საყუედრელად და მოსაცხრომელად წარმართთა.
და შეისმინა უფალმან ჴმისა მათისაჲ და იხილა ჭირი მათი, და იმარხვიდა ერი იგი ყოველსა ჰურიასტანსა მრავალთა დღეთა და იერუსალჱმს წინაშე სიწმიდეთა უფლისა ყოვლისა მპყრობელისათა.
და იოვაკიმ მღდელი დიდი და ყოველნი, რომელნი დგეს წინაშე უფლისა, მღდელნი და მსახურნი უფლისანი, (17) ძაძითა შემოსილნი წელთა მათთა, და შესწირვიდეს მსხუერპლთა მათთა ზედაჲსზედა და ლოცვასა და ნეფსით მისაცემელთა ერისათა,
და ნაცარი გარდაესხა ვარშამაგთა მათთა. (16) და ღაღადებდეს უფლისა მიმართ ყოვლითა გულითა მათითა და ყოვლითა ძალითა კეთილად მოხედვისათვის უფლისა მიერ ყოველსა ზედა სახლსა ისრაჱლისასა.
