ვაჲ რომელნი იგი შთახუალთ ეგჳპტეს შეწევნად, რომელნი ცხენებსა ესავთ და ეტლებსა, რამეთუ არს მრავალ ეტლებ, და მჴედარი მრავალ ფრიად, და არა იყვნეს მოსავ წმიდისა მიმართ ისრაჱლისა, და უფალი არა გამოიძიეს.
და რამეთუ თავადი ბრძენ არს, მოავლინა მათ ზედა ბოროტი, და სიტყუაჲ მისი არა შეურაცხ იქმნეს, და აღდგეს სახლთა ზედა კაცთა უკეთურთასა, და სასოებასა მას მათსა ზედა ცუდსა,
ეგჳპტელსა კაცსა და არა ღმერთსა, ცხენთა ჴორცთა, რომელთაგან არა არს შეწევნაჲ, ხოლო უფალმან მოაწიოს ჴელი მისი მათ ზედა, და დაშურენ შემწენი იგი, და ერთბამად ყოველნი წარწყმდენ.
რამეთუ ესრე მრქუა მე უფალმან, ვითარცა რაჲ იზახის ლომმან, გინა ლეკუმან ლომისამან ნადირსა ზედა, რომელი შეიპყრის და იყჳრის მას ზედა, ვიდრემდე აღავსნეს მთანი ჴმამან მისმან, და განკრთენ მრავალნი გულის-წყრომისაგან მისისა, და შეძრწუნდენ. ეგრე გარდამოჴდეს უფალი ყოვლისა-მპყრობელი განწყობად მთასა ზედა სიონსა, და მთათა ზედა მისთა.
ვითარცა მფრინ<ვ>ელი მფრინვალჱ, ეგრე შეეწიოს უფალი ძალთაჲ იჱრუსალემსა, შეეწიოს და განარინოს იგი, და შეიწყნაროს და გარდამოჴდეს, და იჴსნას. Page of ms. J: A63r
მოიქეცით რომელნი ეგე ღრმასა ზრახვასა/ ზრახავთ და უშჯულოსა, ძენი ისრაჱლისანი.
რამეთუ მას დღესა შინა გამოიხუნენ კაცთა ჴელით-ქმნულნი მათნი ვეცხლისანი, და ოქროჲსანი, რომელ ქმნნეს ჴელთა მათთა,
და დაეცეს ასურ არა მახჳლითა მამაკაცისაჲთა, არცა მახჳლი კაცისაჲ შეშჭამდეს: და ივლტოდის არა პირისაგან მახჳლისა, და ჭაბუკნი მისნი იყვნენ მოუძლურებულ, რამეთუ კლდესა შეეყენნენ, ვითარცა ღობესა. რამეთუ რომელი ივლტოდის შეიპყრას, და მოუძლურდეს. და რომელი იგი განსთქრებოდის, ძლევასა მიეცეს.
და მიეცნენ ძლევასა სივლტოლისასა მთავარნი მათნი, თქუა უფალმან. რომელსა აქუს ცეცხლი სიონით, და საჴუმილი იგი იჱრუსალემით, და რომელნი ივლტოდიან ძლევასა მიეცნენ. ,
