მაშინ მოჰხადა ტობია რაფაელს და ჰრქუა მას:
ძმაო აზარია, წარიბენ ამერ ორნი აქლემნი და ოთნნი მონანი და წარვედ ჰრაგად გაბაელისა, და მიეც მას ჴელით-წერილი ესე და მოიღე მისგან ვეცხლი იგი, და მოიყვანე იგიცა შენ თანა ქორწილსა ამას.
შენ იცი,
რამეთუ რაცხდეს მამაჲ ჩემი დღეთა, და უკუეთუ დავაყოვნოთ და დავაკლოთ დღე ერთ ოდენ, შეწუხნეს მამაჲ ჩემი. და ჰრაგუელ ფუცა არაგანტევ/ებაჲ Page of ms. J: 100v ჩემი ათოთხმეტ დღე, რაჲთა ვიყოფოდი მე მათ თანა და ვერ ჴელ-მეწიფების შეურაცხ-ყოფად ფიცი მისი.
მაშინ წარემართა რაფაელ და მონანი იგი მის თანა ჰრაგად და მივიდეს გაბაელისა და დაადგრეს მუნ. და მისცა რაფაელ ჴელით-წერილი იგი გაბაელს და მოუღო მას ვეცხლი იგი ყოველი. და აუწყა მას ტობიაჲსთჳს, ვითარმედ მოიყვანა მან ცოლად ასული ჰრაგუელისი და არს იგი მუნ. და ჰხადეს მასცა ქორწილსა მას. და აღდგა გაბაელ და მოიხუნა იგი და უჩუენნა ბეჭედნი. და აღრაცხეს ვეცხლი იგი და აჰკიდეს აქლემთა მათ და აღიმსთუეს განთიად.
და მოვიდეს ზოგად ქორწილსა მას ჰრაგუელისსა და პოეს ტობია ინაჴით-მჯდომარე. და აღ-თავ-იქცია ტობია და ამბორს-უყო გაბაელს. და მოიკითხა რაფაელცა. და თქუა გაბაელ: კურთხეულ არს ღმერთი, რომელმან მოგცა შენ მშჳდობაჲ, რამეთუ ძეჲ კაცისა სახიერისაჲ და კეთილისაჲ და ქველის-მოქმედისაჲ ხარი შენ. კურთხეულ იყავ შენ, და მამაჲ შენი და დედაჲ შენი; და კურთხეულ იყავნ ცოლი შენი, და მამაჲ მისი და დედაჲ მისი.
