სიტყუაჲ რომელი იყო იერემიაჲსა მიმართ უფლისა მიერ, დღეთა იოაკიმისთა, ძისა იოსიაჲსთა, მეფისა იუდაჲსთა, და თქუა.
მიგუალე სახლსა რექაბისსა, და მოუწოდე მათ, და შეიყვანენ იგინი სახლსა უფლისასა ერთსა ეზოთაგანსა, და ასუ მათ ღჳნოჲ.
და მოვიყვანე ეზონია, ძჱ იერემიაჲსი, ძჱ Page of ms. J: B22r ქაბაზისი, და ძმანი მისნი და ძენი მისნი, და ყოველი სახლი რექაბისი./
და შევიყვანენ სახლსა უფლისასა დალიჭსა ძეთა ანანიაჲსთა, ძისა გოდოლია<ჲ>სა კაცისა ღმრთისაჲსა, რომელ ახს სახლსა მთავართასა ზეშთა დალიჭსა მას მაასჱსსა, ძისა სელომისსა, რომელ სცვიდა კართა.
და დავდგი წინაშე პირსა <მათსა> ძეთა რექაბისთა ლაგჳნები სავსჱ ღჳნითა და სასუმლები, და ვარქუ მათ; სუთ ღჳნოჲ.
და თქუეს; ვერ ვსუათ ღჳნოჲ, რამეთუ იონადაბ, ძემან რექაბისმან, მამამან ჩუენმან, გუამცნო ჩუენ, და გურქუა; ნუ ჰსუამთ ღჳნოსა თქუენ და შვილნი თქუენნი მი-უკუნისამდე,
სახლებსა ნუ აშჱნებთ, და თესლსა ნუ სთესავთ, და ვენაჴებსა ნუ დაასხამთ, ნუცა <რაჲ> იყოფინ თქუენდა, და კარვებითა ეშჱნებოდეთ ყოველთა დღეთა თქუენთა, რაჲთა სცხომდეთ მრავალ დღჱ ქუეყანასა ზედა, რომელსა ხუალთ თქუენ.
და ვისმინეთ ჴმაჲ იონა<და>ბისი, მამისა ჩუენისაჲ, ყოველივე რაოდენიცა გუამცნო ჩუენ, რაჲთა არა ვსუათ ღჳნოჲ ყოველთა დღეთა ჩუენთა ჩუენ, და დედათა ჩუენთა, <და> ძეთა ჩუენთა, და ასულთა ჩუენთა,
რაჲთა არა ვიშჱნოთ სახლებ, და არა დავეშჱნნეთ მუნ, და ვენაჴი და ყანაჲ და თესლი არა ყოფილ არს ჩუენდა.
და შჱნ ვიყვენით კარვებითა, და ვისმინეთ და ვყავთ, რაოდენიცა გუამცნო ჩუენ იონადაბ, მამამან ჩუენმან.
და იყო რაჟამს აღმოჴდა ნაბუქოდონოსორ, მეფჱ ბაბილოვნისაჲ, ქუეყანასა ზედა; და ვთქუთ; მოვედით და აღვედით და შევიდეთ იჱრუსალემდ პირისაგან ქალდეველთაჲსა და ძალისაგან ასურასტანელთაჲსა, და დავეშჱნნეთ იჱრუსალემს შინა.
და იყო სიტყუაჲ უფლისაჲ ჩემდამო, და მრქუა;
ესრე თქუა უფალმან ძალთამან, ღმერთმან ისრაჱლისამან,
მიგუალე და არქუ კაცთა იუდაჲსთა და მკჳდრთა იჱრუსალემისათა; არღავე მიიღოთ სწავლაჲ სმენად სიტყუათა ჩემთაჲ, იტყჳს უფალი, დაამტკიცეს სიტყუაჲ ძეთა იონადაბისთა, ძისა რექაბისისაჲ, რომელ ამცნო შვილთა თჳსთა არა სუმად ღჳნისაჲ, და არა სუეს მო-აქა-დღედმდე, რამეთუ ისმინეს მცნებაჲ მამისა მათისაჲ. და მე Page of ms. J: B22v გეტყოდე თქუენ, აღვიმსთობდ და/ გეტყოდე თქუენ, და არა ისმინეთ ჩემი.
და მოვავლინენ <თქუენდა> მონანი ჩემნი წინაწარმეტყუელნი; აღვიმსთობდ და მივავლინებდ, და გეტყოდე თქუენ; მოიქეცით კაცად-კაცადი გზისაგან თჳსისა უკეთურისა, და უმჯობჱს ყვენით სლვანი თქუენნი, და ნუ მიხუალთ კუალსა ღმერთთა უცხოთასა მონებად მათა, და დაეშჱნენით ქუეყანასა ზედა, რომელ მიგეც თქუენ და მამათა თქუენთა. არა მოჰყავთ ყური თქუენი, და არა ისმინეთ ჩემი .
ძეთა იონადაბისთა, ძისა რექაბისთა, დაამტკიცეს მცნებაჲ მამისა მათისაჲ, რომელ ამცნო მათ, ხოლო ერმან ამან არა ისმინა ჩემი.
ამისთჳს ესრე თქუა უფალმან ძალთამან, ღმერთმან ისრაჱლისამან, აჰა ესერა მე მოვავლინებ იუდაჲს ზედა და მკჳდრთა ზედა იჱრუსალემისათა ძჳრსა, რომელ ვთქუ მათ ზედა ყოველი მის წილ, რამეთუ ვეტყოდე მათ, და არა ისმინეს ჩემი, უჴმობდი მათ, და არა ჴმა მიყვეს მე.
და სახლსა რექაბისსა არქუ, იერემია, ამისთჳს ესრე თქუა უფალმან ძალთამან, ღმერთმან ისრაჱლისამან, რამეთუ ისმინეს ძეთა იონადაბისთა, ძისა რექაბისთა, მცნებაჲ იონადაბისი, მამისა მათისაჲ, და დაიმარხნეს ყოველნი მცნებანი მისნი ყოფად ყოვლისა, რაჲცა ამცნო მათ მამამან მათმან.
ამისთჳს ესრე იტყჳს უფალი ძალთაჲ, ღმერთი ისრაჱლისაჲ; არა სადა მოაკლდეს კაცი ძეთა იონადაბისთაჲ, ძისა რექაბისისაჲ, მდგომარჱ წინაშე <პირსა> ჩემსა ყოველთა ღღეთა ქუეყანისათა.
