და იყო წელსა მეოთხესა იოაკიმისა, ძისა იოსიაჲსსა, მეფისა იუდაჲსსა, და იყო სიტყუაჲ უფლისაჲ ჩემდამო, და მრქუა;
მოიღე შენდად ქარტაჲ წიგნისაჲ, და დაწერენ მას ზედა ყოველნი სიტყუანი, რომელ გიბრძანენ შენ, ისრაჱლსა ზედა და იჱრუსალემსა და იუდასა ზედა და ყოველთა ზედა წარმართთა, რომლით დღითგანცა მე გეტყოდე შენ, დღეთაგან იოსია, მეფისა იუდაჲსისა, და ვიდრე აქა დღედმდე.
ისმინოს ხოლო თუ სახლმან იუდაჲსმან Page of ms. J: B23r ყოველი ესე ძჳრი, რომელსა ესე მე ვზრახავ ყოფად მათა, და მოიქცენ/ თითოეულად გზისაგან თჳსისა უკეთურისა, და მლხინებელ ვექმნე უშჯულოებათა მათთა და ცოდვათა მათთა.
და მოუწოდა იერემია ბარუქს, ძესა ნერისსა, და დაწერნა ბარუქ პირისაგან იერემიაჲსისა ყოველნი სიტყუანი უფლისანი, რომელ უბრძანნა მას, ქარტასა მას ზედა წიგნისასა.
და ამცნო იერემია ბარუქს, და ჰრქუა, მე მცვენ, და ვერ ჴელმეწიფების შესლვად სახლად უფლისა.
და შევედ, და აღმოიკითხე ამის წიგნისაჲ, რომელსა დაგიწერიან პირისაგან ჩემისა, სიტყუანი უფლისანი, ყურთა ერისათა, სახლსა შინა უფლისასა, დღეთა მარხვისათა, და ყურთა ყოვლისა იუდაჲსთა, რომელნი მოვლენან ქალაქებით მათით, <აღმოუკითხო მათ>.
შე-ხოლო-თუ-იწიროს ლოცვაჲ მათი წინაშე უფლისა, და მოიქცეს კაცად-კაცადი გზისაგან მათისა უკეთურისა, რამეთუ დიდ არს გულის-წყრომაჲ უფლისაჲ და რისხვაჲ, რომელ თქუა უფალმან ერსა ამას ზედა.
და იტყოდა ბარუქ, ძჱ ნერისი, ყოველსა, რომელ ამცნო მას იერემია წინაწარმეტყუელმან, აღმოკითხვად წიგნისა მისგან სიტყუათა უფლისათა, სახლსა შინა უფლისასა.
და იყო წელსა მეხუთესა იოაკიმისსა, ძისა იოსიაჲსა, მეფისა იუდაჲსა, თთუესა მეცხრესა, შეკრბეს მარხვად წინაშე უფლისა ყოველი ისრაჱლი, და ყოველი ერი მომავალი ქალაქებით იუდაჲსიო.
და იკითხვიდა ბარუქ წიგნსა მას შიდა სიტყუათა იერემიაჲსთა, სახლსა შინა უფლისასა, სახლსა შინა გამარიაჲსსა, ძისა საფანის მწიგნობრისასა, ეზოსა მას ზემო-კერძოსა, გარეშჱ ბჭეთა სახლისა უფლისათა ახალთა, ყურთა ყოვლისა ერისათა.
და ესმა მიქეას, ძესა გამარიაჲსსა, ძისა საფანისსა, ყოველნი სიტყუანი უფლისანი წიგნისა მისგან,
და შთავიდა იგი სახიდ მეფისა შესაკრებელსა მას მთავართასა <სახლსა მწიგნობრისასა>, და მუნ სხდეს ყოველნი მთავარნი, ელისამა მწიგნობარი, და დალეა, ძჱ სამეაჲსი, და ელდათან, ძჱ აქაბორისი, და გამარია, ძჱ საფანისი, და სადაკია, ძჱ ანანიაჲსი, და ყოველნი მთავარნი.
და მიუთხრნა მათ მიქეა ყოველნი სიტყუანი, რომელ ესმეს, აღმოკითხვასა ბარუქისსა Page of ms. J: B23v მის წიგნისაგან ყურთა/ ერისათა.
და მიავლინეს ყოველთა მთავართა ბარუქისა იუდი, ძჱ ნათანისი, ძისა სელემისი, ძისა ქუსიაჲსი, და ჰრქუეს, წიგნსა მაგას, რომელსა იკითხავ ყურთა ერისათა, მოიღე ჴელითა შენითა, და მოვედ; და მოიღო წიგნი ბარუქ, ძემან ნერისმან, ჴელითა თჳსითა, და შთავიდა მათა.
და ჰრქუეს მთავართა ბარუქს, კუალად აღმოიკითხე ყურთა ჩუენთა, და აღმოუკითხა ბარუქ ყურთა მათთა.
და იყო ვითარცა ესმა ყოველთა მთავართა ყოველნი იგი სიტყუანა, აზრახა კაცად-კაცადმან მოყუასსა თჳსსა, და ჰრქუეს ბარუქს, თხრობით მიუთხრნეთ მეფესა ყოველნი ესე სიტყუანი.
და ბარუქს ჰკითხეს და ჰრქუეს, <გჳთხარ>, ვინაჲ დასწერენ ყოველნი ესე სიტყუანი.
და თქუა ბარუქ; პირისაგან იერემიაჲსისა, რამეთუ მითხრობდა მე იგი ყოველთა ამათ სიტყუათა, და მე დავსწერდი წიგნსა ზედა მელანითა.
და ჰრქუეს ყოველთა მთავართა ბარუქს, წარვედ, და დაემალენით შენ და იერემია, და კაცმანმცა ნუ იცის სადა იყვნეთ.
და შევიდეს მთავარნი იგი <მეფისა> ეზოდ, და წიგნი იგი მისცეს მარხვად სახლსა ელისამა მწიგნობრისასა, და მიუთხრნეს მეფესა ყოველნი ესე სიტყუანი.
და მიავლინა მეფემან იუდი მოღებად წიგნისა მის, და მოიღო იუდი სახლით ელისამა მწერალისაჲთ, და აღმოუკითხა იუდი ყურთა მეფისათა, და ყურთა ყოველთა მთავართასა, რომელნი დგეს გარემო მეფისა.
და მეფჱ ჯდა სახლსა საზამთროსა თთუესა მეცხრესა, და კერაკნი საცეცხლენი დგეს წინაშე მისსა.
და იყო რაჟამს აღმოიკითხის იუდი სამი კეფი ანუ ოთხი, მოჰხიის მან სახეველითა მით მწიგნობრისაჲთა, და შთააგდის ცეცხლსა, რომელ იყო ბრძმედთა მათ ზედა, ვიდრე მო-არა-აკლდა წიგნსა მას ცეცხლსა მას შინა კერაკთასა.
და არა გამოიძიეს უფალი, და არცა დაიპეს სამოსელი მათი მეფემან და ყოველთა მონათა მისთა, რომელთა ესმეს სიტყუანი ესე.
ელდათან Page of ms. J: B24r და დალეა და გამარია/ ასმენდეს მეფესა, რაჲთამცა არა დაწუა წიგნი იგი; და არა ისმინა მათი,
და უბრძანა მეფემან იერემიელს, ძესა მეფისასა, და სარიას, ძესა ეზრიელისსა, და სელემიას ძესა აბიელისსა, შეპყრობაჲ ბარუქის მწიგნობრისაჲ და იერემიაჲს წინაწარმეტყუელისაჲ, და დაიმალნეს იგინი უფლისა მიერ.
და იყო სიტყუაჲ უფლისაჲ იერემიაჲსა მიმართ შემდგომად დაწუვისა მის, ოდეს დაწუა მეფემან წიგნი იგი, რომელსა წერილ იყვნეს ყოველნი ესე სიტყუანი, რომელ დაწერნა ბარუქჱ პირისაგან იერემიაჲ<სი>სა, და თქუა.
მერმე მოიღე შენ ქარტაჲ სხუაჲ, და დაწერენ ყოველნი იგი სიტყუანი, რომელნი იყვნეს ქარტასა მას შინა, რომელ დაწუნა იოაკიმ მეფემან იუდაჲსმან.
და იოაკიმს, მეფესა იუდაჲსსა, ჰრქუა; ესრე იტყჳს უფალი; შენ დასწუ წიგნი ესე, და სთქუ; ოად დასწერე წიგნი ესე. ამისთჳს შემოსლვით შემოვიდეს მეფჱ ბაბილოვნისაჲ, და განრყუნეს ქუეყანაჲ ესე, და მოაკლდეს მისგან კაცი და საცხოვარი.
რამეთუ ესრე თქუა უფალმან იოაკიმის ზედა, მეფისა იუდაჲსა; არღარა იყოს მისი მჯდომარჱ საყდარსა დავითისსა, და მძორი მისი დაგდებულ იყოს სიცხესა ქუეშჱ დდისასა და ნეფხვასა ღამისასა.
და ძიება ვყო მის ზედა, და ზედა თესლისა მისისა, და მონათა მისთა ზედა უშჯულოებათა მათთა თჳს; და მოვავლინო მათ ზედა და მკჳდრთა ზედა იჱრუსალემისათა და ქუეყანასა ზედა იუდაჲსსა ყოველი ძჳრი, რომელ ვთქუ მათ ზედა, რამეთუ არა ისმინეს ჩემი.
და მოიღო იერემია ქარტაჲ სხუაჲ, და მისცა ბარუქს, ძესა ნერისსა, მწიგნობარსა, და დაწერნა მას ზედა ბარუქჱ პირისაგან იერემიაჲსისა ყოველნი სიტყუანი მის წიგნისანი, რომელ დაწუა მეფემან იოაკიმ ცეცხლითა, და უფროჲს შეეძინნეს მას სიტყუანი უმრავლჱსნი მათსა.
