და მეუფებდა სედეკია, ძჱ იოსიაჲს მეფისაჲ, იექონიაჲს წილ, ძისა იოაკილისა, რომელი მეფჱ ყო ნაბუქონონოსორ მეფემან ბაბილონისამან, მეუფედ იუდასა ზედა.
და არა ისმინნა მან და მონათა მისთა და ერმან ქუეყან<ისა>მან Page of ms. J: B24v სიტყუანი/ უფლისანი, რომელ თქუნა იერემია წინაწარმეტყუელმან უფლისა მიერ.
და მიავლინა სედეკია მეფემან იოაქაზ, ძჱ სელჱმისი, და სოფონია, ძჱ მაასესი, მღდელი იერემიაჲსა წინაწარმეტყუელისა, და ჰრქუა; ილოცე ჩემთჳს უფლისა მიმართ, ღმრთისა ჩუენისა.
და იერემია შევიდოდა და გამოვიდოდა შორის ერისა მის, და არა მიიყვანენ იგი საპყრობილედ.
და ძალი ფარაოჲსი გამოჴდა ეგჳპტით, და ესმა ქალდეველთა, რომელნი აჭირვებდეს იჱრუსალემსა, სმენაჲ მათი, და წარვიდეს იჱრუსალემით.
და იყო სიტყუაჲ უფლისაჲ იერემიაჲსა მიმართ წინაწარმეტყუელისა, და ჰრქუა.
ესრე იტყჳს უფალი ძალთაჲ, ღმერთი ისრაჱლისაჲ; ესრე არქუ მეფესა იუდაჲსსა, რომელმან მოგავლინა შენ ჩემდა გამოძიებად; აჰა ესერა ძალი ფარაოჲსი, რომელ გამოსრულ არს შემწედ თქუენდა, უკუნ-იქცეს ქუეყანადვე მათა ქუეყანად ეგჳპტისად;
და მოიქცენ ქალდეველნი; ჰბრძონ ამას ქალაქსა, და დაიპყრან იგი და მოწუან იგი ცეცხლითა.
ესრე იტყჳს უფალი; ნუ ჰგონებთ სულითა თქუენითა, და იტყჳთ, ვითარმედ წარსლვით წარვიდენ ჩუენგან ქალდეველნი, რამეთუ არა სადა წარვიდენ იგინი.
არამედ მო-ღათუ-ჰსრათ ყოველი ძალი ქალდეველთაჲ, რომელნი გბრძვანან თქუენ, და და-ვინმე-შთენ კაცნი მოწყლულნი ამათგანნი, კაცად-კაცადი შუაგებსა შინა, იგინი აღდგენ და მოწუან ქალაქი ესე ცეცხლითა.
და იყო რაჟამს წარვიდა ძალი იგი ქალდეველთაჲ <იჱრუსალემით> პირისაგან ძალისა ფარაოჲსისა,
გამოვიდა იერემია იჱრუსალემით მისლვად ქუეყანად ბენიამენისა სყიდად მიერ პურისა შორის ერისა მისისა.
და მიიწია იგი ბჭესა ბენიამენისსა, და იყო მუნ კაცი ერთი, რომლისა დაადგრის, არუი, ძჱ სელემიაჲსი, ძისა ანანიაჲსი, და შეიპყრა იერემია წინაწარმეტყუელი, და ჰრქუა; ქალდეველთა მიმართ შენ ივლტი.
და ჰრქუა იერემია; ნაცილსა იტყჳ; არა Page of ms. J: B25r ქალდეველთა მიმართ ვივლტი მე. და არა ისმინა მისი, და შეიპყრა/ არუი იერემია, და შეიყვანა იგი წინაშე მთავართა.
და განუმწარდეს მთავარნი იგი იერემიას, და გუემეს იგი, და მისცეს იგი სახიდ საპყრობილისად სატანჯველად სახლსა იონათან მწიგნობრისასა, რამეთუ სახლი მისი საპყრობილჱ იყო, რამეთუ მოვიდა ერი სახლსა მას მღჳმისასა და ქერეთდ;
და შევიდა იერემია სახლსა მას მღჳმისასა შესაწყდომელსა, და დაჯდა მუნ მრავალ დღჱ.
და მიავლინა სედეკია მეფემან, და მოუწოდა იერემიას, და ჰკითხვიდა მას მეფჱ იგი სახლსა შინა იდუმალ, და ჰრქუა მას; არს თუ სიტყუაჲ უფლისაჲ. და თქუა იერემია; არს, და შენ ჴელთა მეფისა ბაბილოვნისათა , მიცემად ხარ.
და ჰრქუა იერემია წინაწარმეტყუელმან მეფესა სედეკიას; რაჲ შეგცოდე შენ და მონათა შენთა და ერსა ამას, რამეთუ თქუენ მიმეცით საპყრობილედ.
და სადა არიან წინაწარმეტყუელნი თქუენნი, რომელნი იგი გიწინაწარმეტყუელებდეს თქუენ და გეტყოდეს; არღარა მოვიდეს მეფჱ ბაბილოვნისაჲ თქუენ ზედა ქუეყანასა ამას.
და ისმინე ჩემი, გლოცავ შენ, უფალო მეუფეო, შეგივრდინ წყალობაჲ ესე ჩემი წინაშე პირსა შენსა, რაჲთა არა მიმაქციო მე სახლსა იონათან მწიგნობრისასა, რაჲთა არა მოვკუდე მუნ.
და უბრძანა მეფემან სედეკია, და შთააგდეს იგი სახლსა საპყრობილისასა, და სცემდეს მას ერთსა პურსა დღესა შინა გარეშე სადა ქმნიან, ვიდრემდის მოაკლდა პური ქალაქსა. და ჯდა იერემია ეზოსა მას შინა საპყრობილისასა.
