და იყო რაჟამს გამოიპყრა იჱრუსალემი წელსა მეცხრესა სედეკია, მეფისა იუდაჲსსა, თთუესა მეათესა, მოვიდა ნაბუქოდონოსორ, მეფჱ ბაბილოვნისაჲ, და ყოველი ძალი მისი იჱრუსალემსა ზედა, და ჰბრძოდეს მას.
და მეათერთმეტესა წელსა სედეკიაჲ<ს>სა, თთუესა მეოთხესა, ცხრასა თთჳსასა, შეიტეხეს ქალაქსა.
და შეჴდეს ყოველნი მთავარნი მეფისა ბაბილოვნისანი, და დასხდეს ბჭესა მას საშუალსა, ნერგელ სარასარ სამაგად და ნაბუსარ სექქიმ ლაფსარის ნერგელ სარასარ და რაბამაქ, და ყოველნი შემდგომნი მთავარნი მეფისა ბაბილოვნ<ელ>თაჲსანი.
და იყო რაჟამს იხილნა იგინი სედეკია, მეფემან იუდაჲსმან, და ყოველთა კაცთა მბრძოლთა, ივლტოდეს, და გამოჴდეს ღამჱ ქალაქით გზით მტილისაჲთ სამეუფოჲთ ბჭით, რომელ იყო საშუალ ორთა ზღუდეთა, და განჴდეს გზად უდაბნოისად.
და დევნა უყო ძალმან ქალდეველთამან უკუანა მათსა, და შეეწია სედეკიას არაბუთს შინა იერიქოჲსასა, და შეიპყრეს იგი, და მოიყვანეს Page of ms. J: B28r წინაშე ნა/ბუქოდონოსორ, მეფისა ბაბილოვნისა, დებლათად ქუეყანასა ემათისასა, და ეტყოდა მას მშჯავრ.
და მოწყჳდნა მეფემან ბაბილოვნისამან ძენი სედეკიაჲსნი დებლათას შინა წინაშე თუალთა მისთა, და ყოველნი აზნაურნი იუდაჲსნი მოწყჳდნა მეფემან ბაბილოვნისამან.
და თუალნი სედეკიაჲსნი აღმოჰჴადნა, და შეკრა იგი ბორკილითა რვალისაჲთა, რაჲთა მიიყვანონ იგი ბაბილოვნდ.
და სახლნი მეფისანი და სახლები ერისაჲ მოწუეს ქალდეველთა ცეცხლითა, და ზღუდე იჱრუსალემისაჲ დაარღუეს.
და სხუაჲ იგი ერი, რომელ დაშთომილ იყო ქალაქსა შინა, და მეოტნი იგი, რომელ ჴელთ-ესხნეს მას,
და ნეშტნი იგი ერისანი, რომელ განრინებულ იყვნეს, წარტყუენნა ნაბუზარდან მატაკარანმან ბაბილონდ, ხოლო ერისა მის გლახაკნი, რომელთა არა რაჲ აქუნდა, დაუტევნა ნაბუზარდან მატაკარანმან ქუეყანასა მას იუდაჲსსა, და სცა მათ ვენაჴები და სარწყული მას დღესა შინა.
და ამცნო ნაბუქუდონოსორ, მეფემან ბაბილონისამან, ნაბუზარდანს მატაკარანსა იერემიაჲსთჳს, და ჰრქუა.
მოიყვანე იგი და ყვენ თუალნი შენნი მას ზედა, და ნუ უყოფ მას რასავე ბოროტსა, არამედ ვითარცა გრქუას შენ, ეგრეცა ყავ მისთჳს.
და მიავლინა ნაბუზარდან მატაკარა<ნ>მან და ნაბუსარ სექქიმ ლაფსარის ნერგელ სარასარ ჰრაბამაქ და ყოველთა მდიდართა მეფისა ბაბილოვნისათა,
და მოუწოდეს და მოიყვანეს იერემია ეზოჲთ საპყრობილისაჲთ, და მისცეს იგი გოდოლიაჲსა, ძისა აქიკამისა, ძისა საფანისა, და განიყვანეს იგი აფესდ, და დაჯდა იგი მუნ შორის ერსა.
და იერემიაჲსა მიმართ იყო სიტყუაჲ უფლისაჲ, ოდეს იგი შეყენებულ და იყო ეზოსა მას საპყრობილისასა, და ჰრქუა;
მივედ და არქუ აბდიმელექს ეთიოპელსა, ესრე თქუა უფალმან ძალთამან, ღმერთმან ისრაჱლისამან, აჰა ესერა მე მომაქუს სიტყუაჲ ჩემი ქალაქსა/ Page of ms. J: B28v ამას ზედა ბოროტებად, და არა კეთილად, და იყვნენ იგინი წინაშე პირსა შენსა ამას დღესა შინა, თქუა უფალმან.
და არა მიგცე შენ ჴელთა კაცთასა, რომელთათჳს გეშინის შენ პირისაგან მათისა,
რამეთუ განრინებით განგარინო შენ, და მახჳლითა არა დაეცე შენ, და იყოს სული შენი შენდა მოპოვნებულ, რამეთუ მესევდი მე, თქუა უფალმან.;
