სიტყუაჲ რომელი იყო იერემიაჲსა მიმართ უფლისა მიერ, შემდგომად ოდეს იგი წარავლინა ნაბუზარდან მატაკარანმან დებლათაჲთ, რამეთუ წარიყვანა იგი კრული ჴელთ-ბორკილითა შორის ყოვლისა ნატყუენავისა იჱრუსალემისაჲსა და იუდაჲსა, რომელნი წარჰყვანდეს ბაბილოვნდ.
და მოიყვანა ნაბუზარდან იერემია, და ჰრქუა მას; უფალმან ღმერთმან შენმან ბრძანა ძჳრი ესე ამას ადგილსა ზედა, და ამას ქალაქსა მოავლინა;
და ყო უფალმან ვითარცა თქუა, რამეთუ შესცოდეს მას, და არა ისმინეთ ჴმისა მისისაჲ, და გეყო თქუენ <სიტყუაჲ> ესე.
და აწ აჰა ესერა განგჴსენ შენ დღეს ჴელთ-ბორკილთა მაგათგან, რომელ იყვნეს ჴელთა შინა შენთა, და კეთილ თუ არს წინაშე შენსა მოსლვაჲ ჩემ თანა ბაბილონდ, მოვედ, და ვყვნე თუალნი ჩემნი შენ ზედა.
და თუ არა ჯერ გიჩს წინაშე თუალთა შენთა მოსლვად ჩემ თანა ბაბილონდ, დადეგ, და აჰა ესერა ყოველი ქუეყანაჲ წინაშე შენსა არს. სადაცა კეთილ არს, და სადაცა ჯერ არს მისლვად შენდა, მუნ მიგუალე; და ვიდრე წარსლვადმდე ჩემდა, ვიდოდე შენ და მიიქეც გოდოლიაჲსა, ძისა აქიკამისა, ძისა საფანისა, რომელ დაადგინა მეფემან ბაბილოვნისამან ქუეყანასა იუდაჲსსა, და დაეშჱნე შენ მის თანა შორის ერსა შენსა. უკუეთუ არა ყოველი კეთილი წინაშე შენსა რომელიცნ გთნავს, მას; შეუდეგ, და სცა მას მატაკარანმან საგზალი და ნიჭი, და წარავლინა იგი.
და მივიდა იერემია გოდოლიაჲსა, ძისა აქიკამისა, მასჱფათდ, და დაჯდა მის თანა შორის ერისა მისისა, რომელ დაშთომილ იყვნეს ქუეყანასა მას.
და ესმა ყოველთა მთავართა მის ძალისათა, რომელ იყვნეს ველსა შინა, მათ და ძალსა მას მათსა, რამეთუ დაადგინა მეფემან ბაბილოვნისამან გოდოლია, ძჱ Page of ms. J: B29r აქიკამისი, ქუეყანასა მას, და რამეთუ შეევედრა მამები/ და დედები <მათი> და ერი მრავალი გლახაკთაგანნი ქუეყანისაგანნი, რომელ არა წარტყუენნა ბაბილონდ,
და მოვიდეს გოდოლიაჲსა მასჱფათდ ისმაელ, ძჱ ნათანისი, <და იონან, ძჱ კარიაჲსი>, და სარეა, ძჱ ნათემისი, და ძენი უფეთისნი მეთუფათიტელისანი, იგინი და კაცნი მათნი.
და ეფუცა მათ გოდოლია, ძჱ აქიკამისი, ძისა საფანისი, და ჰრქუა, ნუ გეშინის თქუენ პირისაგან მონათა ქალდეველთასა; დაეშჱნენით ქუეყანასა ამას, და უქმოდეთ მეფესა ბაბილოვნისასა, და უმჯობჱს იყოს თქუენდა.
და აჰა ესერა მე დავჯდე მასჱფათს შინა დადგომად წინაშე პირსა ქალდეველთასა, რომელნიცა მოვიდენ თქუენ ზედა, და თქუენ დაიკრიბეთ ღჳნოჲ, იფქლი და ხილი, და იკრიბეთ ზეთი ჭურჭერთა თქუენთა, და დაეშჱნენით ქალაქთა თქუენთა, რომელ გეპყრნეს.
და ყოველნი ჰურიანი, რომელნი იყვნეს ქუეყანასა მას მოაბის<ა>სა და ძეთა ამონისთა და იდუმიას, და რომელნი იყვნეს ყოველსა ქუეყანასა, ესმა რამეთუ დაუტევა მეფემან ბაბილოვნისამან ნეშტი ჰურიასტანსა, და რამეთუ დაადგინა მათ ზედა გოდოლია, ძჱ აქიკამისი, ძისა საფანისი, მოიქცეს ჰურიანი ყოველთაგან ადგილთა, სადა მიმოდაბნეულ იყვნეს.
და მოვიდეს ქუეყანად იუდაჲსა გოდოლიაჲსა მასეფათდ, და შეიკრიბეს ღჳნოჲ და ხილი დიდ ძალი ფრიად.
და იონან, ძჱ კარესი, და ყოველნი მთავარნი ძალისანი, რომელ იყვნეს ველსა ზედა, მოვიდეს გოდოლიაჲსა მასჱფათად.
და ჰრქუეს გოდოლიას, უკუეთუ უწყებით უწყი, რამეთუ ბელია, მეფემან ძეთა ამონისთამან, მოავლინა შენდა ისმაელ, ძჱ ნათანისი, მოკლვად შენდა, და არა ჰრწმენა მათი გოდოლიას, ძესა აქიკამის<ს>ა.
და იონან, ძემან კარესმან, მიუგო გოდოლიას ფარულად მასჱფათას შინა, და ჰრქუა; წარვიდე მე აწ, და მოვკლა ისმაელ, ძჱ ნათანისი, და ნუმცა ვინ აგრძნობს, ნუ უკუე მო-სადა-მე-გკლას შენ, და Page of ms. J: B29v განიბნინენ ყოველნი ესე ჰურიანი რომელნი შემოკრებულ/ არიან შენდა, და წარწყმდენ ნეშტნი იგი იუდაჲსნი.
და ჰრქუა გოდოლია, ძემან აქიკამისმან, იონანს, ძესა კარესსა, ნუ სადა ჰყოფ შენ სიტყუასა მაგას, რამეთუ ცილსა იტყჳ შენ ისმაელისთჳს.
