და იყო თთუესა მეშჳდესა მოვიდა ისმაელ, ძჱ ნათანისი, ძისა ელისამაჲსი, ნათესავისაგან მეუფეთაჲსა, და მონანი მეფისანი და ათი კაცი მის თანა, გოდოლიაჲსა, ძისა აქიკამისა, მასეფთად; და ჭამეს მის თანა პური მასეფთას შინა.
და აღდგა ისმაელ, ძჱ ნათანისი, და ათნი იგი კაცნი მისთანანი, და სცეს გოდოლიას, ძესა აქიკამის<ს>ა, ძისა საფანისა, მახჳლითა, და მოკლეს იგი, რომელ დაედგინა მეფესა ბაბილოვნისასა ქუეყანასა მას ზედა.
და ყოველნი ჰურიანი, რომელნი იყვნეს გოდოლიაჲს თანა მასეფთას შინა, და ყოველნი ქალდეველნი, რომელ იპოვნეს მუნ <და> კაცნი <იგი> მბრძოლნი, მოწყჳდნა ისმაელ.
და იყო მეორესა დღესა, ოდეს მოკლა ისმაელ გოდოლია, და კაცმან არა აბრძნა,
და მოვიდეს კაცნი სექემით და სალემით და სამარიაჲთ ოთხმეოცნი <კაცნი> წუერ-ყჳნულნი და კუართ-დაპებულნი და მგლოვარენი, და შესაწირავი და გუნდრუკი, აქუნდა ჴელთა შინა მათთა, მიღებად სახლად უფლისა.
და გამოვიდა ისმაელ, ძჱ ნათანისი, წინამიგებებად მათა მასეფათით, და ვიდოდა სლვით და ტიროდა; და იყო რაჟამს მიეახლა მათ, ჰრქუა მათ; შევედით გოდოლიაჲსა, ძისა აქიკამისა.
და იყო რაჟამს შევიდეს იგინი შოვა ქალაქსა, მოწყჳდნა იგინი ისმაელ, და შთასთხინა იგინი ჯურღმულსა მან და კაცთა მათ მისთანათა.
და ათნი კაცნი იპოვნეს მუნ, და ჰრქუეს ისმაელს, ნუ და მოგუწყუდი ჩუენ, რამეთუ არიან ჩუენნი საფასენი ქრთილი და ზეთი და თაფლი, და გარე-წარჴდა მათ, და არა მოწყჳდნა იგინი შორის ძმათა მათთა.
ხოლო ჯურღმული იგი, რომელსა შთააბნია ისმაელ ყოველი მძორები მათ კაცთაჲ, რომელნი Page of ms. J: B30r მოსრნა გოდო/ლიას თანა, ჯურღმული დიდ არს, რომელ იგი ქმნა მეფემან ასა პირისაგან ბაასა, მეფისა ისრაჱლისა. ესე აღავსო ისმაელ წყლულებითა.
და მიაქცია ისმაელ ყოველი ერი ტყუედ, რომელ დაშთომილ იყო მასეფთას შინა, და ასულნი მეფისანი, რომელნი დაეტევნეს ნაბუზარდანს მატაკარანსა გოდოლიაჲს თანა, ძისა აქიკამისა, და აღიმსთო ისმაელ, ძემან ნათანისმან, და წარვიდა წიაღ ძეთა ამონისთა.
და ესმა იონანს, ძესა კარესსა, და ყოველთა მთავართა ძალისათა, რომელ იყვნეს მის თანა, ყოველი ესე ძჳრი, რომელ ქმნა ისმაელ, ძემან ნათანისმან.
და შეიკრიბეს ყოველი ერი მათი, და აღემზადნეს ბრძოლად, და დევნა უყვეს ისმაელს, ძესა ნათანისსა, და პოვეს იგი წყალსა ზედა დიდსა გაბაონს შინა.
და იყო რაჟამს იხილა ყოველმან ერმან, რომელ წარჰყვანდა ისმაელს, იონან, ძჱ კარესი, და ყოველნი მთავარნი ძლიერებისანი მის თანა,
განიხარეს, და უკუ-მოიქცა ყოველი ერი, რომელ წარტყუენა ისმაელ მასჱფათით, და მოიქცეს, და მოვიდეს იონანისა, ძისა კარესისა.
ხოლო ისმაელ, ძე ნათანისი, განერა რვითა კაცითა პირისაგან იონანისა, და მივიდა ძეთა ამონისთა.
და უკმოიღო იონან, ძემან კარესმან, და ყოველთა მთავართა ძლიერებისათა, რომელ იყვნეს მის თანა, ნეშტი ერისაჲ მის, რომელ უკმოიქცინეს ისმაელისგან, ძისა ნათანისა, შემდგომად მოკლვისა გოდოლიაჲსა, ძისა აქიკამისა, [რომელ მის თანა მოწყდეს] ძლიერნი კაცნი ბრძოლასა შინა, რომელ უკმოიქცინეს გაბაონით ნაშტნი იგი და დედები და საჭურისნი.
და წარვიდეს და დადგეს ქუეყანასა ბეროთქამაამისასა ბეთლემით კერძო წარსლვად და შთასლვად ეგჳპტედ
პირისაგან ქალდეველთაჲსა, რამეთუ შეიშინეს პირისაგან მათისა, რამეთუ მოკლა ისმაელ გოდოლია, ძჱ აქიკამისი, რომელ დაადგინა მეფემან Page of ms. J: B30v ბაბილოვნისამან/ ქუეყანასა მას. ,
