და მივიდეს ყოველნი მთავარნი ძლიერებისანი, იონან, ძჱ კარესი და იეზორია, ძჱ ანანიაჲსი, და აზარია ძჱ იოსჱსი, და ყოველი ერი კნინითგან მი-დიდამდე,
და ჰრქუეს იერემიას წინაწარმეტყუელსა; შეგივრდინ წყალობაჲ ჩუენი წინაშე პირსა შენსა, და ილოცე ჩუენთჳს უფლისა მიმართ ღმრთისა შენისა ნეშტთა ამათთჳს, რამეთუ დავშთით მცირედნი მრავალთაგან, ვითარცა ეგე თუალნი შენნი გუხედვენ ჩუენ.
და გჳთხარნ ჩუენ უფალმან ღმერთმან შენმან გზაჲ, რომელსა ვიდოდით, და სიტყუაჲ, რომელ ვყოთ.
და ჰრქუა მათ იერემია წინაწარმეტყუელმან; მესმა, აჰა ესერა მე ვილოცო უფლისა მიმართ ღმრთისა ჩემისა მსგავსად სიტყუათა თქუენთა, და იყოს, სიტყუაჲ, რომელ მრქუას მე უფალმან, გითხრა თქუენ, და არა დავმალო თქუენგან სიტყუაჲ.
და ჰრქუეს მთავართა მათ იერემიას, იყავნ უფალი ჩუენ შორის მოწამჱ მართალ და სარწმუნო, რამეთუ ყოვლითა სიტყჳთა, რომლითა მოგავლინოს შენ უფალმან ღმერთმან შენმან ჩუენდა, ეგრეცა ვყოთ.
გინა თუ კეთილად გინა თუ ბოროტად, ჴმაჲ უფლისა ღმრთისა ჩუენისაჲ, რომლისა მიგავლინებთ შენ მისსა, ვისმინოთ, რაჲთა უმჯობჱს იყოს ჩუენდა, რამეთუ ვისმინოთ ჴმისა უფლისა ღმრთისა ჩუენისა.
და იყო შემდგომად ათისა დღისა, იყო სიტყუაჲ უფლისაჲ იერემიაჲსა მიმართ,
და მოუწოდა იერემია იონანს, ძესა კარესსა, და მთავართა მათ ძლიერებისათა, რომელ იყვნეს მის თანა, და ყოველსა ერსა კნინითგან მი-დიდადმდე,
და ჰრქუა მათ; ესრე თქუა უფალმან, ღმერთმან ისრაჱლისამან,
რომელსა იგი მიმავლინეთ მე, დათხევად წყალობისა თქუენისა წინაშე მისსა, უკუეთუ დასხდომით დასხდეთ ქუეყანასა ამას, აღგაშჱნნე თქუენ, და არა დაგარღჳნე, და გნერგნე თქუენ, და არა აღგფხურნე, რამეთუ დაცხრომილ ვარ ბოროტებისაგან, რომელ ვთქუ ყოფად თქუენდა.
ნა გეშინის პირისაგან მეფისა ბაბილოვნისაჲსა, რომლისაგან თქუენ Page of ms. J: B31r გეშინის, პირისაგან მისისა ნუ გეშინინ, თქუა უფალმან,/ რამეთუ მე თქუენ თანა ვარ, განრინებად თქუენდა, და ჴსნად თქუენდა ჴელისაგან მისისა.
და გცე თქუენ წყალობაჲ, და შეგიწყალნე თქუენ, და მიგაქცინე თქუენ ქუეყანად თქუენდა.
და თუ სთქუათ თქუენ, ვითარმედ არა დავსხდეთ ჩუენ ქუეყანასა ამას, და არა ვისმინოთ ჴმაჲ უფლისა ღმრთისა ჩუენისაჲ, და სთქუათ არა,
არამედ ქუეყანად ეგჳპტედ შევიდეთ, და არღარა ვიხილოთ ბრძოლაჲ, და ჴმაჲ ნესტჳსაჲ არა გუესმეს, და პურითა არა გუმშიოდის, და მუნ დავეშჱნნეთ.
ამისთჳს ისმინენით სიტყუანი უფლისანი, ნეშტთა ჰურიასტანისათა, ესრეთ იტყჳს უფალი; უკუეთუ თქუენ მიიქცინეთ პირნი თქუენნი ეგჳპტედ კერძო, და შეხჳდეთ დაშენებად მუნ.
და იყოს მახჳლი იგი, რომლისათჳს გეშინის თქუენ პირისაგან მისისა, გპოვნეს თქუენ ეგჳპტეს შინა, და სიყმილმან, რომლისათჳს სიტყუაჲ აღგითქუამს თქუენ სი<ვ>ლტოლად პირისაგან მისისა, გეწიოს თქუენ ეგჳპტეს შინა, და მუნ მოსწყდეთ თქუენ.
და იყვნენ ყოველნი იგი კაცნი, რომელთა დასხნეს პირნი მათნი შესლვად ეგჳპტედ და დაშჱნებად მუნ, მოაკლდენ მახჳლითა, სიყმილითა და სიკუდილითა; და არღარა ვინ იყოს მათი რომელი განერეს ძჳრთაგან, რომელ მე მოვავლინო მათ ზედა.
რამეთუ ესრე იტყჳს უფალი ძალთაჲ ღმერთი ისრაჱლისაჲ; ვითარცა დავაწთვე რისხვაჲ ჩემი და გულის-წყრომაჲ ჩემი მკჳდრთა ზედა იჱრუსალემისათა, ეგრე დაგწუთეს გულის-წყრომაჲ ჩემი თქუენ ზედა, რომელნი შეხუალთ ეგჳპტედ; და იყვნეთ უგზო და საწუნელ და საწყეველ და საყუედრელ, და არღარა იხილოთ მერმე ადგილი ესე.
ესრე თქუა უფალმან ნეშტთა ზედა იუდაჲსთა, ნუ შეხუალთ ეგჳპტედ; აწ უწყებით უწყოდეთ, რამეთუ მე გიწამებ თქუენ დღეს,
რამეთუ ძჳრი ჰქმნეთ თავთა თქუენთა ზედა, და ინანდეთ, რამეთუ თქუენ მიმავლინეთ მე უფლისა ღმრთისა ჩუენისა, და სთქუთ; ილოცე ჩუენთჳს უფლისა მიმართ ღმრთისა ჩუენისა, და ყოველი რაჲცა გრქუას შენ უფალმან ღმერთმან, ეგრეცა გჳთხარ ჩუენ, და ვყოთ;/ Page of ms. J: B31v და გითხარ თქუენ,
და არა ისმინათ ჴმისა უფლისა ღმრთისა თქუენისაჲ ყოვლისა სიტყჳსა თჳს, რომლისათჳს მომავლინა მე თქუენდა.
და აწ უწყებულ იყვენით, რამეთუ მახჳლითა და სიყმილითა და სიკუდილითა მოაკლდეთ ადგილსა მას, რომელსა თქუენ ჰზრახავთ მისლვად და დამკჳდრებად მუნ.
