და იყო რაჟამს დააცადა იერემია სიტყუად ყოვლისა მიმართ ერისა ყოველთა სიტყუათა უფლისა ღმრთისა მათისათა, რომელ მოავლინა უფალმან; ღმერთმან მათა ყოვლისა ამისთჳს სიტყჳსა,
და თქუა აზარია, ძემან იოსესმან, და იონან, ძემან კარესმან, და ყოველთა კაცთა ამპარტავანთა, რომელთა ჰრქუეს იერემიას, ევედრე ჩუენთჳს უფალსა, მიუგეს იერემიას და ჰრქუეს, ცილსა იტყჳ შენ, არა მოგავლინა შენ უფალმან ღმერთმან ჩუენმან ჩუენდა, და გრქუა შენ, ვითარმედ ნუ შეხუალთ ეგჳპტედ დაშჱნებად მუნ,
არამედ ბარუქ, ძჱ ნერისი, განგარისხებს შენ ჩუენდა მომართ, რაჲთა მიგუცნე ჩუენ ჴელთა ქალდეველთასა, მოკლვად ჩუენდა და წარწყმედად ჩუენდა ბაბილონს.
და არა ერჩდა იონან, ძჱ კარესი, და ყოველნი მთავარნი ძლიერებისანი და ყოველი ერი ჴმასა უფლისასა დაშჱნებად ქუეყანასა იუდაჲსსა.
და წარტყუენნა იონან, ძემან კარესმან, და ყოველთა მთავართა ძლიერებისათა ყოველნი ნეშტნი იუდაჲსნი, რომელნი მოქცეულ იყვნეს ყოველთაგან ნათესავთა, სადა იგი განბნეულ იყვნეს მუნ, დაშჱნებად ქუეყანასა იუდაჲსსა,
მამები და დედები და ყრმები და ერი და ასულნი მეფისანი, და კაცები იგი, რომელ დაუტევა ნაბუზარდან მატაკარანმან გოდოლია<ჲ>ს თანა, ძისა აქიკამისა, ძისა საფანისა, და იერემია წინაწარმეტყუელი, და გარქე, ძჱ ნერისი.
და შევიდეს ეგჳპტედ, რამეთუ არა ისმინეს ჴმაჲ უფლისაჲ, და მივიდეს ვიდრე ტაფნადმდე.
და იყო სიტყუაჲ უფლისაჲ იერემიაჲს<ა> მიმართ ტაფნას შინა, და ჰრქუა;
მოიხუენ შენ ქვანი დიდნი, და დამალენ იგინი სამალველსა ალიზსა Page of ms. J: B32r შინა წინაშე კართა სახლისა/ ფარაოჲსა, წინაშე თუალთა ძეთა იუდაჲსთა.
და არქუ მათ; ესრე თქუა უფალმან ძალთამან, ღმერთმან ისრაჱლისამან, აჰა ესერა მე მოვავლინო და მოვიყვანო ნაბუქოდონოსორ, მეფჱ ბაბილოვნისაჲ, მონაჲ ჩემი, და დაიდგას საყდარი მისი ზედა ქვათა მაგათ, რომელ დაჰმალენ, და დადვას საჭურველი მისი მაგათ ზედა, და აღიღოს საჭურველი მაგათგან.
და შემოვიდეს და მოსრას ქუეყანაჲ ეგჳპტისაჲ, რომელნი სიკუდილად სიკუდილსა, და რომელნი ტყუეობად ტყუეობასა, და რომელნი <მახჳლად> მახჳლსა, და აღუდვას ცეცხლი სახლებსა ღმერთთა ეგჳპტელთასა.
და მოწუნეს იგინი, და წარტყუენნეს იგინი, და განტისნოს ქუეყანაჲ ეგჳპტისაჲ, ვითარცა განტისნის მწყემსმან სამოსელი თჳსი, და განვიდის მშჳდობით.
და შემუსრნეს სუეტნი მზის ქალაქისანი, რომელ არიან ენონს, და სახლნი ღმერთთა მათთანი დაწუნეს ცეცხლითა.;
