დასაბამსა მეფობისა სედეკია მეფისასა იყო სიტყუაჲ ესე ელამისთჳს.
სიტყუაჲ რომელი იყო უფლისა მიერ იერემია წინაწარმეტყუელისა მიმართ ყოველთა ზედა წარმართთა ეგჳპტისა, კალსა ზედა ფარაო ნექაოჲსსა, მეფისა ეგჳპტისასა, რომელი იყო მდინარესა ეზდა ევფრატსა ქარმის შინა, რომელი იგი მოკლა ნაბუქოდონოსორ, მეფემან ბაბილოვნისამან, წელსა მეოთხესა იოაკიმისსა, Page of ms. J: B34v ძისა იოსიაჲსსა, მეფისა იუდაჲსსა.
აღიღეთ საჭურველი და ფარი, და მო/ვედით ბრძოლად,
დაასხენ<ი>თ ჰუნეთა თქუენთა; აღემჴედრენით მჴედარნი, შთაიცუთ ჯაჭუები თქუენი, და დაიდგთ ჩაფხუტები თქუენი; წარმოიღეთ ჰორლები თქუენი.
რაჲსათჳს ესენი შეძრწუნდებიან და ივლტიან უკუმარო, რამეთუ ძლიერნი მათნი მოისრნან. ვლტოლით ივლტოდეს და არა მოიქცეს შეცვულნი გარემოჲს, თქუა <უფალმან>.
ნუ ივლტინ მალჱ, და ნუ განერებინ ძლიერი ჩრდილოჲთ კერძო; ევფრატსა <ზედა მოუძლურდენ და დაეცნენ>.
ვინ არს ესე, რომელი ვითარცა მდინარჱ აღმოვალს, და ვითარცა მდინარენი ღელვიდენ წყალნი მისნი.
ეგჳპტჱ ვითარცა მდინარჱ აღდგეს, და <ვითარცა მდინარენი> აღიძრნენ ღელვანი მისნი, და თქუა; აღვიდე და დავფარო ქუეყანაჲ, და წარვწყმიდო ქალაქი და მკჳდრნი მისნი.
აღსხედით ჰუნებსა, განმზადეთ ეტლები; გამოვედით, მბრძოლნი ეთიოპელნი, <და> ლჳბიელნი ჭურვილნი, <და> ლუდ<ი>ელნი; აღვედით, გარდააცუთ მშჳლდსა.
და დღჱ იგი უფლისა ღმრთისა ჩუენისაჲ, დღჱ შურის-ძიაბისაჲ შურის-გებად მტერთა მისთა, შეჭამნეს მახჳლმან და განძღეს და დაითროს სისხლითა მათითა, რამეთუ შეწირვაჲ არს უფლისა საბაოთისაჲ ქუეყანასა ჩრდილოჲსასა მდინარესა ზედა ე<ვ>ფრატსა.
აღვედ გალაადდ, და აღიღე მკურის-კევი ქალწულისათჳს ასულისა ეგჳპტისა; ცუდად განამრავლე კურნებაჲ შენი. სარგებელ არა არს შენდა.
ესმა წარმართთა ჴმაჲ შენი, და ღაღადებითა შენითა აღივსო ქუეყანაჲ, რამეთუ <მბრძოლი> მბრძოლისა მიმართ მოუძლურდა, ერთბამად დაეცნეს ორნი ვე.
რომელ თქუა უფალმან პირითა იერემიაჲს წინაწარმეტყუელისაჲთა მოსლვისათჳს ნაბუქოდონოსორ, მეფისა ბაბილონისა, დამოსრვად ქუეყანაჲ ეგჳპტისაჲ.
მიუთხართ ეგჳპტედ და სასმენელ ყავთ მაგდალონდ, და ამცენ<ი>თ მემფეს და ტაფნას. არქუთ, აღდეგ და განიმზადე თავი შენი, <რამეთუ შეჭამა მახჳლმან მროწეული შენი>.
რამეთუ ივლტოდა ზუარაკი იგი შენი რჩეული, ვერ დადგა, რამეთუ უფალმან დაჰჴსნა იგი. Page of ms. J: B35r
და სიმრავლე მისი მოუძლურდა და დაეცა./ კაცად-კაცადი მოყუსისა მიმართ თჳსისა იტყოდა და თქუა; აღვდგეთ და მივიქცეთ ერად ჩუენდა და ქუეყანად სოფლისა ჩუენისა პირისაგან მახჳლისა წარმართთაჲსა.
უწოდეთ სახელი ფარაო, მეფესა ეგჳპტისასა, <სა>ჵნ ებირთა მოეთ, ჟამი მოიწია;
ცხოველ ვარ მე, იტყჳს უფალი, მეუფჱ ძალთა<ჲ> სახელი მისი, რამეთუ ვითარცა არს თაბორი შორის მთათა, და კარმელი შორის ზღუასა შინა, ეგრეთ მოვიდეს.
ჭურჭერი ტყუეობისაჲ იქმენ შენდად, მკჳდრმან ასულისა ეგჳპტისამან, რამეთუ მემფი განსარყუნელად იყოს, და ერქუას მას ვაჲ არა-ყოფისაგან მკჳდრთა მისთაჲსა.
დიაკეული შუენიერი ეგჳპტჱ; მტევებარნი ჩრდილოჲთ მოვიღეს მის ზედა,
და მორეწ<ე>ნი მისნი ვითარცა ზუარაკნი მართებულნი მუნ შინა, რამეთუ იგინიცა უკუნ-იქცეს, და ივლტოდეს ერთბამად, ვერ დადგეს, რამეთუ დღჱ წარწყმედისაჲ მოიწია მათ ზედა და ჟამი შურის-გებისაჲ მათისაჲ.
ჴმაჲ მათი ვითარცა გუელისა მსტჳნვარისაჲ, რამეთუ მქჳშასა შინა ვიდოდიან; ცულოსანნი მოუჴდენ მას.
ვითარცა მკაფელნი ხისანი მოკაფეთ მაღნარი მისი, იტყჳს უფალი ღმერთი, რამეთუ არღარა ელხინოს, მრავალ არს უფროჲს მკალისა, და არა არს რიცხჳ მათი.
ჰრცხუენა ასულსა ეგჳპტისასა, მიეცა ჴელთა ერისა ჩრდილოჲსათა, თქუა უფალმან ძალთამან, ღმერთმან ისრაჱლისამან.
აჰა ესერა მე შური მოვაგო ამოსს, ძესა მისსა, ფარაოჲს ზედა, და ღმერთთა ზედა მისთა, და მოსავთა ზედა მათთა.
და მივსცნე იგინი ჴელთა მეძიებელთა სულისა მათისათა, და ჴელთა ნაბუქოდონოსორ, მეფისა ბაბილოვნისათა, და ჴელთა მონათა მისთასა, ამისა შემდგომად დაყუდნეს მსგავსად დღეთა მათ პირველთა, თქუა უფალმან.
ხოლო შენ ნუ გეშინინ, მონაო ჩემო იაკობ, ნუცა შესძრწუნდები, ისრაჱლ, რამეთუ აჰა ესერა მე გიჴსნე შენ შორით და ნათესავი შენი ქუეყანისაგან ტყუეობისა Page of ms. J: B35v მათისაჲსა, და მოიქცეს იაკობ და დაეყუდოს;/ და დაიძინოს და არღარა ვინ იყოს მაჭირვებელ მისა.
და შენ ნუ გეშინინ, მონაო ჩემო იაკობ, თქუა უფალმან, რამეთუ მე შენ თანა ვარ, რამეთუ ვყო აღსასრული ყოველთათჳს ნათესავთა, რომელთა მიმართ მიგავლინო შენ მუნ, ხოლო შენი არა ვყო მოკლება, და განგსწავლო შენ განკითხვით, და უბრა<ლ>ოებით არავე უბრალო გყო შენ.;
