უცხოთესლთა ზედა, რომელ იყო სიტყუაჲ უფლისაჲ იერემიაჲსა მიმართ წინაწარმეტყუელისა უცხოთესლთა ზედა მოსრვისა წინა ფარაოჲსა გაზაჲსა.
ესრე იტყჳს უფალი; და აჰა ესერა წყალი აღმოჴდეს ჩრდილოჲთ, და იყოს მდინარედ წარმრღუნელად, და წარრღუნეს ქუეყანაჲ და სავსებაჲ მისი; ქალაქი და დამკჳდრებულნი მას შინა, და ღაღადებდენ კაცნი და გოდებდენ ყოველნი მკჳდრნი ქუეყანისანი,
ჴმისაგან წარმომართებისა მისისა, და საჭურველთაგან მისთა ძლიერთა, და ძრვისაგან ეტლთაჲსა და ჴმითა ურმის-თუალთა მისთაჲთა; არა მოიქცეს მამანი შვილთა ზედა მათთა დაჴსნისაგან ჴელთა მათთაჲსა.
დღესა მას მომავალსა წარწყმედად ყოველთა უცხოთესლთა, და განვრყუნე ტჳროსი და სიდონი, და ყოველნი ნეშტნი შემწეთა მათთანი, რამეთუ აღჴოცნეს უფალმან უცოთესლნი, რომელ დაშთომილ არიან ჭალაკთა შინა, <და> კაბადუკიას.
მოახს სიმტიერე გ<ა>ზასა ზედა, <და განვარდა ასკალონ>, და ნეშტნი იგი რომელ არიან აკიმს შინა ვიდრემდის შეჰკრბებოდით.
ვიდრემდის ჰკუეთდე, მახჳლო უფლისაო, ვიდრემდის არა დასცხრე კუალად ეგე ქარქაშსა შენსა.
განისუენე და <და>მშჳდენ, და უფალმან ამცნო მას ასკალონისათჳს, და რომელნი არიან ზღჳს-კიდესა, და ნეშტთა ზედა აღდგომად. ;
