ოც და ერთის წლის იყო სედეკია, რაჟამს დადგა იგი მეფედ, და ათერთმეტ/ Page of ms. O: 306v წელ მეფობდა იგი იჱრუსალემს შინა, და სახელი დედისა მისისაჲ ამიტალ, ასული იერემიაჲსი, ლობეთით.
და ყო მან ბოროტი წინაშე თუალთა უფლისათა, ვითარცა იოვაკიმ ყო.
რამეთუ გულის-წყრომაჲ უფლისაჲ იყო] / Page of ms. O: Page of ms. J: B43r იჱრუსალემისათჳს <და იუდაჲსთჳს> ვიდრე არა განსთხინა იგინი პირისაგან მისისა, და განდგა სედეკია მეფისაგან ბაბილოვნისა.
და იყო წელსა მას მეცხრესა, თთუესა მეათესა, ათსა თთჳსასა, მეუფებასა სედეკიაჲსსა, მოვიდა ნაბუქოდონოსორ, მეფჱ ბაბილონისაჲ, და ყოველი ძალი მისი იჱრუსალემსა ზედა, და ზღუდის ზღუდე აქმნეს მას გამოთლილითა ქვითა გარემოჲს.
და მიიწია ქალაქი იგი იწროებად ვიდრე ათერთმეტ წლადმდე მეფისა სედეკიაჲსა.
თთუესა მეოთხესა, ცხრასა თთჳსასა, განძლიერდა სიყმილი ქალაქსა შინა, და არღარა იყო პური ერისათჳს ქუეყანისაჲსა.
და ვერ დამდგომ იქმნა ქალაქი იგი, და ყოველნი მბრძოლნი ივლტოდეს, და გამოვიდა მეფჱ და ყოველი ერი მისი ღამჱ ქალაქით გზით ბჭისაჲთ საშუვალ ზღუდესა და ზღუდის ზღუდესა, რომელ იყო მტილსა ოდენ სამეუფოსა გარემო, და ქალდეველნი იყვნეს გარემოჲს ქალაქსა.
და წარვიდეს იგინი გზასა არაბიაჲსასა, და დევნა უყო ძალმან ქალდეველთამან უკუანა მეფისა,
და ეწინეს მეფესა სედეკიას წიაღ იერიქოჲსა უდაბნოსა, და ყოველნი მონანი მისნი განიბნინეს, და შეიპყრეს მეფჱ სედეკია, და მოიყვანეს მეფისა ბაბილონისა დებლათად ქუეყანასა ემათისასა, და ეტყოდა ნაბუქოდონოსორ მეფჱ საშჯელით სედეკიას.
და მოწყჳდნა მეფემან ბაბილონისამან ძენი სედეკიაჲსნი წინაშე თუალთა მისთა, და ყოველნი მთავარნი იუდაჲსნი მოწყჳდნა დებლათას შინა.
და თუალნი სედეკიაჲსნი აღმოჰშრიტნა, და შეკრა იგი ბორკილითა, და მიიყვანა იგი მეფემან ბაბილოვნისამან ბაბილონდ, და მისცა იგი სახიდ საფქველისად ვიდრე დღედმდე სიკუდილისა მისისა.
და მეხუთესა თთუესა, ათსა თთჳსასა, ესე წელი მეათცხრამეტჱ ნაბუქოდონოსორ, მეფისა ბაბილონისაჲ, მოვიდა ნაბუზარდან მატაკარანი წინაშე-მდგომელი მეფისა ბაბილოვნისაჲ იჱრუსალემდ.
და მოწუა ტაძარი იგი უფლისაჲ და სახლი მეფისაჲ, და Page of ms. J: B43v ყოველი სახლები ქალაქისაჲ/ და ყოველი ტაძრები დიდდიდები მოწუა ცეცხლითა.
და ყოველი ზღუდჱ იჱრუსალემისაჲ გარემოჲს დაარღჳა ძალმან ქალდეველთამან, რომელ იყო მატაკარანისა მის თანა.
ხოლო დავრდომილნი იგი ერისანი, და ნეშტი იგი ერი, რომელ დაშთომილ იყო ქალაქსა შინა, და მეოტნი იგი, რომელ შეუცჳვეს მეფესა ბაბილონისასა, და ნეშტი იგი ერისაჲ წარტყუენა ნაბუზარდან მატაკარანმან.
ხოლო უპოვარნი იგი ქუეყანისანი დაუტევნა ნაბუზარდან მატაკარანმან ვენაჴის-მოქმედად,
და სუეტნი იგი რვალისანი, რომელ იყვნეს სახლსა შინა უფლისასა, და სუეტ-დასადგომელნი, და ზღუაჲ იგი რვალისაჲ, რომელ იყო სახლსა შინა უფლისასა, შემუსრეს ქალდეველთა, და წარიღეს ყოველი იგი რვალი ბაბილონდ.
და პატივნი და აღსაპყრობელნი და გჳრგჳნ<ნ>ი და სიავნი და ფეშხუემები და ფუცხუები და ყოველი ჭურჭერი რვალისაჲ, რომლითა ჰმსახურებდეს, წარიღეს, და სასაკუმევლები და ვეხნები,
და საპფუთნი და მასმაროთნი და საწურველნი და სასანთლენი და სფარნი და ჭაშაკები, რომელ იყო ოქროჲსაჲ და ვეცხლისაჲ წარიღო ყოველი მატაკარანმან მან.
და სუეტთა ორთაჲ და ზღჳსა ერთისაჲ და ზუარაკთა ათორმეტთა რვალისათაჲ, რომელ იყვნეს ზღუასა მას ქუეშჱ, რომელ ქმნნა სოლომონ მეფემან სახლსა შინა უფლისასა. არა იყო სასწორ მის რვალისა ყოველთა მათ ჭურჭერთა,
და სუეტთაჲ, ოც და ათხუთმეტ წყრთა იყო სიმაღლჱ სუეტისაჲ მის ერთისაჲ, და საბელი ათორმეტისა წყრთისაჲ გარემო შე-ოდენ-სწულებოდა მას, და იყო სიზრქჱ მისი ოთხთით გარემოჲს,
და სუეტის-თავნი მათ ზედა რვალისანი, და სიმაღლჱ სუეტის-თავისაჲ მის ერთისაჲ ხუთ წყრთა, და კანკელი <და> მროწეულები სუეტის-თავსა ზედა გარემოჲს ყოველი რვალისაჲ; ეგრევე მსგავსად ამისა იყო სუეტსა მას მეორესა რვაჲ მროწეული წყრთად წყრთად Page of ms. J: B44r ათთა მათ წყრთათა.
და იყო ყოველი იგი მროწეულები ოთხმეოც და ათექუსმეტ ერთ კერძო ხოლო, და იყო ყოველი იგი მროწეულები ას კანკელსა მას ზედა გარემოჲს.
და წარიყვანა მატაკარანმან მან სარეა, მღდელი იგი მთავარი, და სოფონია, მღდელი შემდგომი, და სამნი იგი კართ-მცველნი.
და ქალაქისაგან წარიყვანა საჭურისი ერთი, რომელ ზედა-მდგომელ იყო კაცთა მათ მბრძოლთა, და შჳდნი კაცნი სახელოანნი წინაშენი მეფისანი, რომელ იპოვნეს ქალაქსა შინა, და მწიგნობარი იგი მთავარი ძლიერთაჲ, რომელ მწიგნობრებდა ყოველსა ერსა ქუეყანისასა, და სამეოცი კაცი ერისაგან მის ქუეყანისაჲსა, რომელ იპოვნეს მას ქალაქსა შინა.
და წარიყვანა ნაბუზარდან მატაკარანმან, და მიიყვანნა იგინი მეფისა ბაბილოვნისა დებლ<ა>თად.
და სცა მათ, და მოწყჳდნა იგინი მეფემან ბაბილოვნისამან დებლათას შინა შუეყანასა ემათისასა, და წარ<ი>ტყუენა იუდაჲ ქუეყანისაგან თჳსისა.
და ერი ესე, რომელ წარტყუენა ნაბუქოდონოსორ მეფემან წელსა მას მეშჳდესა ჰურიათაჲ სამ ათას ოც და გ̂.
და წელსა მას მეათრვამეტესა ნაბუქოდონოსორისსა წარტყუენა იჱრუსალემით რვაას ოც და ათორმეტი სული.
და წელსა მას ოც და მესამესა ნაბუქოდონოსორისსა წარტყუენა ნაბუზარდან მატაკარანმან ჰურიათაჲ შჳდას ორმეოც და ხუთ სული, და იყო ყოველი იგი სულები ოთხ ათას და ექუსას.
და იყო ოც და მეათჩჳდმეტესა წელსა წარტყუენვასა იოაკიმისსა, მეფისა იუდაჲსსა, და მეათესა თთუესა, ოც და მეოთხესა თთჳსასა, უკუეცა თავი იოაკიმს, მეფესა იუდაჲსსა, ულამარდაქ, მეფემან ბაბილონისამან, წელსა მას, რომელსა დადგა იგი მეფედ, და გამოიყვანა იგი სახლით საპყრობილისაჲთ.
და ეტყოდა მას ტკბილად, და სცა მას საყდარი უზეშთაესი ყოველთა საყდართა მეფეთასა; რომელ იყვნეს მის თანა ბაბილონს შინა.
და უცვალა მას სამოსელი პყრობილებისა მისისაჲ, და ჭამდა პურსა წინაშე მისსა მარადის ყოველთა დღეთა მისთა, რაოდენ ცხომდა.
და შეაბა მას როჭიკი მარადის, და მოუვიდოდა მას მეფისაგან ბაბილოვნელთაჲსა დღითი დღედ მი-დღედმდე სიკუდილისად/ Page of ms. J: B44v ყოველთა დღეთა ცხორებისა მისისათა. .
