Page of ms. J: B44r და ესე სიტყუანი მის წიგნისანი, რომელ დაწართა ბარუქ, ძემან ნერისმან, ძისა მაასესმან, ძისა სედეკიაჲსმან, ძისა ასადესმან, ძისა ქელკიაჲსმან, ბაბილონს შინა.
წელსა მას მეოთხესა, მეშჳდესა თთუესა, ჟამსა, რომელსა წარიღეს ქალდეველთა იჱრუსალემი, და მოწუეს იგი ცეცხლითა.
და აღმოუკითხნა ბარუქჱ სიტყუანი ესე ამის წიგნისანი ყურთა იექონიაჲსთა, ძისა იოაკიმისთა, მეფისა იუდაჲსთა, და ყურთა ყოვლისა ერისათა, რომელნი მოვიდოდეს მის წიგნისა,
და ყურთა ძლიერთასა და ძეთა მეფისათა, და ყურთა მოხუცებულთასა, და ყურთა ყოვლისა ერისათა, კნინითგან ვიდრე დიდადმდე ყოველთა დამკჳდრებულთა ბაბილონისათა მდინარესა ზედა სუდსა.
და ტიროდეს და იმარხვიდეს და ილოცვიდეს წინაშე უფლისა;
და შეკრიბეს ვეცხლი რაოდენ შემძლებელ იყო კაცად-კაცადისა ჴელი,
და მიუძღუანეს იჱრუსალემს იოაკიმს, ძესა ქელკიაჲსა, ძისა სალომისა, მღდელსა, და სხუათა მღდელთა, და ყოვლისა მიმართ ერისა, რომელნი იპოვნეს მათ თანა იჱრუსალემს შინა,
რაჟამს მოიღო მან ჭურჭერი სახლისა უფლისაჲ, რომელ იგი წარიღეს ტაძრისა მისგან, მიქცევად მისა ქუეყანად იუდაჲსა მეათესა სიუანისასა, ჭურჭერი ვეცხლისაჲ, რომელ ქმნა სედეკია, ძემან იოსიაჲსმან, მეფემან იუდაჲსმან,
შემდგომად წარტყუენვისა მის ნაბუქოდონოსორ, მეფისა ბაბილოვნისაჲსა, ოდეს წარტყუენა იჱრუსალემით იექონია და მთავარნი მისნი და შემწირველნი და ჴელოვანნი და მდიდარნი და ერი ქუეყანისაჲ, და შეიყვანნა იგინი ბაბილონდ.
და თქუეს; აჰა ესერა მიგიძღუანეთ თქუენ ვეცხლი, და იყიდეთ ვეცხლითა შესაწირავი თქუენი ცოდვათათჳს, <და> გუნდრუკი, და ყავთ მანანაჲ, და შეწირეთ საკურთხეველსა ზედა უფლისა ღმრთისა ჩუენისასა.
და ილოცეთ ცხორებაჲ ნაბუქოდონოსორ, მეფისა ბაბილონისაჲ, და Page of ms. J: B45v ცხორებაჲ ბალტ/ასარისი, ძისა მისისაჲ, რაჲთა იყვნენ დღენი მათნი ვითარცა დღენი ცისანი ქუეყანასა ზედა,
<და> რაჲთა გუცეს ჩუენ უფალმან ძალი, და განგჳნათლნეს თუალნი ჩუენნი, რაჲთა ვცხომდებოდით საგრილსა ქუეშჱ ნაბუქოდონოსორ, მეფისა ბაბილოვნისასა, და საგრილსა ქუეშჱ ბალტასარისსა, ძისა მისისასა, და ვჰმონოთ მათ მრავალ დღჱ, და ვჰპოვოთ მადლი წინაშე მათსა.
და ილოცეთ ჩუენთჳს უფლისა მიმართ ღმრთისა ჩუენისა, რამეთუ შევსცოდეთ უფალსა ღმერთსა ჩუენსა, და არა უკუნ-იქცა გულის-წყრომაჲ უფლისაჲ და რისხვაჲ მისი ჩუენგან ვიდრე მო-აქა-დღედმდე.
და წარიკითხოთ წიგნი ესე, რომელ მიგიძღუანეთ თქუენ, აღსაარებად სახლსა შინა უფლისასა დღესა უქმელებისასა, და დღეთა შინა ჟამთასა.
და სთქუათ; უფალსა ღმერთსა ჩუენსა სიმართლჱ, ხოლო პირთა თქუენთა სირცხჳლი, ვითარცა ესე დღეს კაცთა იუდაჲსთა და მკჳდრთა იჱრუსალემისათა,
და მეფეთა ჩუენთა, და მთავართა ჩუენთა, და მღდელთა ჩუენთა, და წინაწარმეტყუელთა ჩუენთა, და მამათა ჩუენთა წინაშე უფლისა.
რამეთუ ურჩ ვექმნენით მას,
და არა ვისმინეთ ჴმაჲ უფლისა ღმრთისა ჩუენისაჲ, სლვად ბრძანებათა უფლისათა, რომელ მოგუცა ჩუენ წინაშე პირსა ჩუენსა.
რამეთუ მიერ დღითგან, ოდე[ს] გამოიყვანნა მამანი ჩუენნი ქუეყანით ეგჳპტით და მო-აქა-დღედმდე, ვიყვენით ურჩ უფლისა ღმრთისა ჩუენისა და ვერიდებოდეთ, რაჲთამცა არა ვისმინეთ მისი,
და გუეწია ჩუენ ძჳრი და წყევაჲ, რომელ ამცნო უფალმან მოსეს მონასა თჳსსა, დღესა მას, რომელსა გამოიყვანნა მამანი ჩუენნი ეგჳპტით, მოცემად ჩუენდა ქუეყანაჲ, რომლისაგან გამოსდის სძჱ და თაფლი, ვითარცა ესე დღეს.
და არა ვისმინეთ ჴმაჲ უფლისა ღმრთისა ჩუენისაჲ ყოველთაგან <სიტყუათა> წინაწარმეტყუელთასა, რომელ მოავლინნა ჩუენდა;
და ვიდოდეთ კაცად-კაცადი გონებასა გულისა თჳსისა უკეთურისასა მსახურებად ღმერთთა უცხოთა, ყოფად ბოროტისა წინაშე თუალთა უფლისა ღმრთისა ჩუენისათა.
