და ვიხილე, და აჰა ესერა ზედა სამყაროსა მას, რომელი ზედა კერძო Page of ms. J: B64v თავსა მის ქერობინისასა, ვითარცა ლოდი საფირონისაჲ მსგავსი/ საყდრისაჲ მათ ზედა.
და ჰრქუა კაცსა მას, რომელსა ემოსა სამოსელი იგი; შევედ საშუვალ ეტლის-თუალთა, რომელნი არიან ქუეშჱ კერძო ქერობინთა, და აღივსე მჭელი შენი ნაკუერცხალითა ცეცხლისაჲთა შორის ქერობინთა, და განაბნიე ქალაქსა ზედა, და შევიდა იგი წინაშე ჩემსა.
და ქერობინი დგა მარჯუენით კერძო ტაძრისა მის, შესლვასა მას მის კაცისასა, და ღრუბელმან აღავსო ეზოჲ იგი შინაგანი.
და აღიმაღლა დიდებამან უფლისამან ქერობინთა მათგან უსართულოსა მას ტაძრისასა. და აღავსო ღრუბელმან [!] სახლი იგი, და ეზოჲ იგი აღივსო ნათლითა დიდებისა უფლისაჲთა.
და ჴმაჲ ფრთეთა ქერობინთაჲ მათ ისმოდა ვიდრე ეზოდმდე შინაგანად, ვითარცა ჴმაჲ ღმრთისაჲ სადაჲსაჲ, იტყჳნ რაჲ.
და იყო ვითარ იგი უბრძანებდა კაცსა მას, რომელსა ემოსა სამოსელი წმიდაჲ, და ჰრქუა; მოიდე ცეცხლი შორის ეტლის-თუალთა მათ შორის ქერობინთასა, და შევიდა და დადგა მახლობელად ეტლის-თუალთა მათ.
და განირთხა ჴელი თჳსი შორის ცეცხლსა მას, რომელი იყო შინაგან ქერობინთა მათ, და მოიღო და მისცა ჴელთა კაცსა მას, რომელსა ემოსა სამოსელი იგი წმიდაჲ. და მოიღო და გამოვიდა.
და ვიხილენ ქერობინნი იგი, და მსგავსებაჲ ჴელთა კაცისათაჲ ქუეშჱ ფრთეთა მათთა.
და ვიხილე, და აჰა ესერა ეტლის-თუალნი ოთხნი დგეს მახლობელად ქერობინთა მათ. ეტლის-თუალი ერთი მახლობელად ქერობინისა ერთისა, და პირი იგი ეტლის-თუალთაჲ მათ ვითარცა პირი ქვისა ანთრაკისაჲ.
და პირნი მათნი ერთ მსგავსება ოთხთაჲვე, ვითარცა სახედ არნ ეტლის-თუალი ეტლის-თუალსა შინა,
და სლვასა მას მათსა ოთხკერძოვე ვიდოდეს, არა გარე-შეიქცეოდეს Page of ms. J: B65r სლვასა მას მათსა, რამეთუ ადგილსა მას ვიდრეცა/ მიიხილის ერთკერძომან მან პირველმან ვლენედ, და არა გარე-შეიქციან სლვასა მათსა.
ზურგნი მათნი და ჴელნი მათნი და ფრთენი მათნი, და ეტლის-თუალნი იგი სავსე იყვნეს თუალებითა გარემო ოთხთავე მათ ეტლის-თუალთა;
ხოლო ეტლის-თუალთა მათ ეწოდა გელგელ, ვითარცა იგი მესმა მე,
და ქერობინნი ესე იყვნენ იგი ცხოველნი, რომელნი ვიხილენ მდინარესა მას ქობარისასა.
სლვასა მას ქერობინთასა <ვლენედ> ეტლის-თუალნიცა იგი, და ესენი მახლობელად მათსა, და აღპყრობასა მას ქერობინთასა ფრთეთა მათთა სიმაღლედ ქუეყანით, არა გარე-შეიქცეოდეს ეტლის-თუალნი იგი მათგან.
დგომასა მას მათსა დგანედ, და აღმაღლებასა მას ქერობინთასა, აღმაღლდიან ეტლის-თუალნიცა იგი მათ თანა, რმეთუ სული ცხოვრებისაჲ იყო მათ თანა.
და გამოვიდა დიდებაჲ უფლისაჲ ტაძრისა მისგან, და აღჴდა ზედა ქერობინთა მათ,
და აღიმაღლნეს ქერობინთა ფრთენი მათნი, და აღმაღლდეს ქუეყანით წინაშე ჩემსა, გამოსლვასა მას მათსა, და ეტლის-თუალნი იგი მახლობელად მათსა; დადგეს წინაშე კარსესა მას ბჭისა მის სახლისა უფლისასა წინაშესა, და დიდებაჲ ღმრთისა ისრაჱლისაჲ იყო მათ ზედა, ზედა კერძო,
ესე იგი არს, ცხოველთა მათ, რომელ იგი ვიხილენ ქუეშჱ ღმრთისა ისრაჱლისასა, მდინარესა მას ქობარისასა, და ვცან რამეთუ ქერობინი არს,
ოთხი პირი ერთსა, და მსგავსებაჲ ჴელთა კაცისათაჲ ქუეშჱ კერძო ფრთეთა მათთა.
და ხილვაჲ პირთა მათთაჲ, ესე იგი პირები არს, რომელ იგი ვიხილე ქუეშჱ დიდებისა ღმრთისა ისრაჱლისასა, მდინარესა მას ზედა ქობარისასა, და ესენი თითოეული წინაშე პირსა თჳსსა ვიდოდეს.;
