და იყო სიტყუაჲ უფლისაჲ ჩემდა მომართ და თქუა.
ძეო კაცისაო, წინაწარმეტყუელებდ წინაწარმეტყუელთა მიმართ ისრაჱლისათა, წინაწარმეტყუელებდ, და არქუ მათ. ისმინეთ სიტყუაჲ უფლისაჲ.
ამას იტყჳს უფალი უფალი; ვაჲ რომელნი ეგე წინაწარმეტყუელებენ გულისაგან თჳსისა, და ყოვლადვე არა რას ჰხედვენ;
ვითარცა მელნი უდაბნოსა ზედა, წინაწარმეტყუელნი შენნი, ისრაჱლ.
არა დაადგინნეს სიმტკიცით, და შეკრიბეს სამწყსოჲ სახლსა ისრაჱლისასა, არა აღდგეს, რომელნი <იგი> იტყოდეს; დღესა უფლისასა,
რომელნი ჰხედვიდეს ტყუვილსა, და იმისნიდეს მისნობასა ამაოსა; რომელნი იგი იტყჳან, იტყჳს უფალი, და უფალმან არა მოავლინნა იგინი, და იწყეს აღდგინებად სიტყუასა.
ანუ არა ტყუვილისა სიტყუაჲ იხილეთ, და მისნობაჲ ამაოჲ სთქუთ.
ამისთჳს არქუ მათ. ამას იტყჳს უფალი უფალი; ამისთჳს რამეთუ სიტყუანი თქუენნი ტყუვილ არიან, და მისნობანი თქუენნი ამაო, ამისთჳს აჰა ესერა მე თქუენ ზედა, იტყჳს უფალი.
და განვირთხა ჴელი ჩემი წინაწარმეტყუელთა მათ ზედა, რომელნი ჰხედვენ ტყუვილსა, და იტყჳან ამაოსა. სწავლასა ერისა ჩემისასა არა იყვნენ იგინი, არცა წიგნსა სახლისა ისრაჱლისასა დაიწერნენ, და ქუეყანასა ისრაჱლისასა არა შევიდენ, და ცნან რამეთუ მე ვარ უფალი.
ამისთჳს რამეთუ ერი ჩემი შეაცთუნეს, და იტყოდეს; მშჳდობაჲ, მშჳდობაჲ, და არა არს მშჳდობაჲ. ესე აშენებს კედელსა, და ესენი გოზენ მას, უკუეთუ დაეცეს,
არქუ მგოზელთა მათ, ვითარმედ დაეცეს, და იყოს წჳმაჲ წარმრღუნელი, და მოვჰსცნე ლოდნი კლდისა მყარისანი შესამტკიცელთა მისთა, და დაეცეს; და ქარი, რომელმან აღიღოს, და განსთქდეს.
და აჰა დაეცა კედელი, და არა გრქუან თქუენ, სადა არს ნაგოზი იგი თქუენი, რომელი განჰგოზეთ.
ამისთჳს ამას იტყჳს უფალი უფალი; დავსცე ქარი, რომელმან აღიღოს გულის-წყრომით, და წჳმაჲ რღუნისაჲ იყოს რისხვითა ჩემითა, და ლოდნი კლდისა მყარისანი Page of ms. J: B68r მოვავლინნე/ რისხვითა ჩემითა მათ ზედა აღსასრულად.
და დავარღჳო კედელი იგი, რომელი განჰგოზეთ, და დაეცეს. და დავდვა იგი ქუეყანასა ზედა, და გამოჩნდეს საფუძველი მისი. დაეცეს, და მოესრულოს მხილებით, და სცნათ რამეთუ მე ვარ უფალი.
და აღვსრულო რისხვაჲ ჩემი კედელსა მას ზედა, და მგოზელთა მისთა ზედა, და დაეცეს, და გარქუ თქუენ; არა არს კედელი იგი, არცა მგოზელნი მისნი არიან.
წინაწარმეტყუელ<ნი> ისრაჱლისა <რომელნი> წინაწარმეტყუელებენ იჱრუსალემისა მიმართ, და რომელნი ჰხედვენ მშჳდობასა მისსა, და მშჳდობაჲ არა იყოს, იტყჳს უფალი უფალი.
და შენ, ძეო კაცისაო, განიმტკიცე პირი შენი ასულთა მიმართ ერისა შენისათა, რომელნი იგი წინაწარმეტყუელებენ გულისაგან მათისა. წინაწარმეტყუელებდ მათ მიმართ,
და არქუ, ამას იტყჳს უფალი უფალი; ვაჲ რომელნი შეაკერვენ სასთაულსა ყოველსა ქუეშჱ იდაყუსა ჴელისასა, და რომელნი იქმან სადგმელებსა ყოველსა თავსა ყოვლისა ჰასაკისასა, გარდაქცევად სულთა. სულნი გარდაიქცეს ერისა ჩემისანი, და სულთა შეეწეოდეს,
და შემაგინებდეს მე ერისა მიმართ ჩემისა მჭელისა ერთისათჳს ქრთილისა, და პატრისათჳს პურისა, მოკლვად სულისა, რომელთაჲ არა ჯერ იყო სიკუდილი, და შეწევნად სულისა, რომელთაჲ არა ჯერ იყო ცხოვრებაჲ, რომელთა გამო იტყჳთ თქუენ ერისა მიმართ მსმენელისა ამაოთა სიტყუათა.
ამისთჳს ამას იტყჳს უფალი ძალთაჲ; აჰა ესერა მე სასთაულთა მათ მიმართ თქუენთა, სადა იგი თქუენ შეკრებდით მუნ სულთა, და განვხეთქო იგი მკლავთაგან თქუენთა, და განვავლინნე სულნი იგი მათნი განბნევად.
და განვხეთქო სადგმელები თქუენი, და ვიჴსნე ერი ჩემი ჴელთაგან თქუენთა, და არა იყვნენ იგინა ჴელთა შინა თქუენთა შეკრებად, და სცნათ რამეთუ მე ვარ უფალი.
ამისთჳს რამეთუ გარდააქცევდით სულსა მართლისასა, და მე არა გარდავაქცევდ მას, და განაძლიერებდით ჴელთა უშჯულოჲსათა Page of ms. J: B68v ყოვლადვე არა მოქცევად გზისა მისისა გან/ უკეთურისა, რაჲთამცა ცხოვნდა იგი.
ამისთჳს ტყუვილი არა იხილოთ, და მისნობასა არა იმისნვიდეთ, და ვიჴსნე ერი ჩემი ჴელთაგან თქუენთა, და სცნათ რამეთუ მე ვარ უფალი უფალი.;
