აღგამაღლო შენ, ღმერთო ჩემო და მეუფეო ჩემო, და ვაკურთხო სახელი შენი უკუნისამდე და უკუნითი უკუნისამდე.
ყოველსა დღესა გაკურთხევდე შენ და ვაქო სახელი შენი უკუნისამდე და უკუნითი უკუნისამდე.
დიდ არს უფალი, ქებულ ფრიად, და სიმდიდრისა მისისაჲ არა არს დასასრულ.
ნათესავი და ნათესავნი აქებდენ საქმეთა შენთა და ძლიერებანი შენნი მიუთხრნენ.
დიდად შუენიერებასა დიდებისა სიწმიდისა შენისასა იტყოდიან, საკჳრველებათა შენთა უთხრობდენ.
ძალი საშინელებათა შენთაჲ წართქუან და სიმდიდრესა შენსა მიუთხრობდენ.
ჴსენებაჲ მრავლისა სიტკბოებისა შენისაჲ აღმოთქუან და სიმართლითა შენითა იხარებდენ.
შემწყნარებელ და მოწყალე უფალი, სულგრძელ და დიდად მოწყალე.
ტკბილ არს უფალი ყოველთა მიმართ, და წყალობანი მისნი ყოველთა ზედა საქმეთა მათთა.
აღგიარებენ შენ, უფალო, ყოველნი საქმენი შენნი, და წმიდანი შენნი გაკურთხევენ შენ.
დიდებაჲ სუფევისა შენისაჲ წართქუან და ძალსა შენსა უთხრობდენ,
რაჲთა ცნან ძეთა კაცთა ძლიერებაჲ შენი და დიდებაჲ დიდად შუენიერებისა სუფევისა შენისაჲ.
სუფევაჲ შენი სუფევა არს ყოველსა ზედა უკუნისამდე, და უფლებაჲ შენი ყოველსა შორის თესლსა და თესლსა.
სარწმუნო არს უფალი ყოვლითა სიტყჳთა მისითა და მართალ არს იგი ყოვლითა საქმითა მისითა, დაამტკიცნის უფალმან ყოველნი დაცემადნი და აღჰმართნის დაცემულნი .
თუალნი ყოველთანი შენ გესვენ, და შენ მოსცე საზრდელი მათი ჟამსა.
აღამაღლო ჴელი შენი და განაძღნე ყოველნი სიტკბოებითა ნებისა შენისაჲთა.
მართალ არს უფალი ყოველთა გზათა მისთა, წმიდა არს იგი ყოვლითა საქმითა მისითა.
ახს უფალი ყოველთა, რომელნი ჰხადიან მას, და ყოველნი რომელნი ჰხადიან მას ჭეშმარიტებით.
ნებაჲ მოშიშთა მისთა[ჲ] ყოს უფალმან, ლოცვანი მათნი ისმინნეს და აცხოვნნეს იგინი.
დაიცვნეს უფალმან ყოველნი მოყუარენი მისნი და ყოველნი ცოდვილნი მოსრნეს.
ქებულებასა უფლისასა იტყოდის პირი ჩემი, და აკურთხევდეს ყოველი ჴორციელი სახელსა წმიდასა მისსა უკუნისამდე და უკუნითი უკუნისამდე.
