Page of ms. P: 258R ... სიტყუაჲ ღმრთისაჲ იყო მესამესა წელსა ელიაჲსა მიმართ და ჰრქუა: რაჲსა ხარ შენ, ელია, აქა?
[და ჰრქუა ელია]: შემშურდა შური უფლისა ყოვლისა-მპყრობელისაჲ, რამეთუ დაგიტევეს შენ ძეთა ისრაჱლისათა, საკურთხეველნი შენნი დაარღჳნეს, წინაჲსწარ -მეტყუელნი შენნი მოწყჳდნეს მახჳლითა და ეძიებენ სულსაცა ჩემსა მიღებად.
და ჰრქუა: გამოხჳდე შენ ხვალე და დასდგე შენ მთასა მაგას წინაშე ღმრთისა. და აჰა უფალი წარვიდოდის, და ქარი დიდი ძრიელი, რომელი დაარღუევდეს მთათა და შეჰმუსრვიდეს კლდეთა წინაშე უფლისა; და არა ქარსა მას [შინა] უფალი; და შემდგომად ქარისა მის - ძრვაჲ; და არა ძრვასა მას [შინა] უფალი;
და შემდგომად ძრვისა მის - ცეცხლი, და არა ცეცხლსა მას [შინა] უფალი. და შემდგომად ცეცხლისა მის - ჴმაჲ ნიავისა წულილისაჲ. და მაშინღა - უფალი.
და იყო, ვითარცა ესმა ელიას, დაიფარა პირი მისი ხალენითა, გამოვიდა და დგა ქუეყანასა მას თანა. და აჰა იყო მისა ჴმაჲ და ჰრქუა: რაჲსა ხარ შენ, ელია, აქა?
და თქუა ელია: შემშურდა მე შური უფლისა ყოვლისა-მპყრობელისაჲ, რამეთუ დაუტევეს აღთქუმაჲ შენი ძეთა ისრაჱლისათა, საკურთხეველნი შენნი დაამჴუნეს, წინაჲსწარმეტყუელნი შენნი მოწყჳდნეს მახჳლითა და ეძიებენ სულსაცა ჩემსა მიღებად.
და ჰრქუა მას უფალმან: წარვედ და მიიქეც გზასა შენსა და მიხჳდე გზასა მას უდაბნოჲსასა დამასკით კერძო და სცხო აზაელს მეფედ ასურასტანსა ზედა;
და იუს, ძესა ნამესისსა, სცხო მეფედ ისრაჱლსა ზედა; და ელისეს, ძესა საპატისსა, სცხო წინაჲსწარმეტყუელად შენ წილ.
და იყოს, რომელი განერეს მახჳლსა აზაელისსა, Page of ms. P: 258V მოკლას იგი იუ, და რომელი განერეს მახჳლსა იუჲსსა, მოკლას იგი ელისე.
და დაუტეო შენ ისრაჱლისაგანი შჳდ ათასი მამაკაცი ყოველთა, რომელთა არა შეუდრეკიან მუჴლნი მათნი ბაალისა, და ყოველი პირი, რომელთა არა თაყუანის -უცემიეს მას.
