Page of ms. P: 348R მაშინ ეტყოდა იესუ ერსა მას და მოწაფეთა მისთა
და ჰრქუა: საყდართა მოსჱსთა დასხდეს მწიგნობარნი და ფარისეველნი.
ყოველსა რომელსა გეტყოდიან თქუენ, დაიმარხეთ და ყავთ, საქმეთა მათთაებ ნუ იქმთ, [რამეთუ თქჳან და არა ყვიან], რამეთუ შეკრიან ტჳრთი მძიმჱ და ძნიად სატჳრთავი და დასდვიან მჴართა ზედა კაცთასა, ხოლო მათ თითითაცა მათითა შეძრვად არა უნებნ იგი.
ყოველთა საქმეთა მათთა იქმედ საჩუენებლად კაცთა; ფართო ყვიან კუბასტები მათი და გრძელ ყვიან ფესუები სამოსლისა მათისაჲ.
უყუარნ ზემოჯდომაჲ შესაკრებელსა შორისა მათსა
და პირველ მოკითხვაჲ უბანთა ზედა, და რაჲთამცა ერქუა კაცთაგან: მოძღუარ!
თქუენ ნუვის ხადით მოძღურით, რამეთუ ერთი არს მოძღუარი თქუენი -- ქრისტე, ხოლო თქუენ ყოველნი ძმანი ხართ.
და მამით ნუვის ხადით თქუენ ქუეყანასა ზედა, რამეთუ ერთი არს მამაჲ თქუენი, რომელ არს ცათა შინა.
ნუცა გერქუმინ თქუენ წინამძღუარ, რამეთუ ერთი არს წინამძღუარი თქუენი.
და რომელი დიდ იყოს თქუენ შორის, იყოს იგი თქუენდა მსახურ.
და რომელმან აიმაღლოს თავი თჳსი, იგი დამდაბლდეს; და რომელმან დაიმდაბლოს თავი თჳსი, იგი ამაღლდეს.
ვაჲ თქუენდა, მწიგნობარნო და ფარისეველნო ორგულნო, რომელნი შეშჭამთ სახლებსა ქურივთასა და მიზეზით განგრძნობილად ითხოვდით. ამისთჳს მიიღოთ უდიდჱსი სასჯელი.
ვაჲ თქუენდა, მწიგნობარნო და ფარისეველნო ორგულნო, რამეთუ დაჰჴაშთ სასუფეველი ცათაჲ წინაშე კაცთა; შე-არა-ხუალთ და შემავალთა არა უტევებთ შესლვად.
ვაჲ თქუენდა, მწიგნობარნო და ფარისეველნო ორგულნო, რამეთუ მიხუალთ ზღუასა და ჴმელსა, რაჲთა ჰყოთ ერთი ვინმე მწირ; და რაჟამს არნ, ჰყვით იგი ნაშობ გეჰენიისა ორ წილ თქუენსა.
ვაჲ თქუენდა, მწიგნობარნო და ფარისეველნო ორგულნო, რამეთუ სთქუთ: რომელმან ფუცოს ტაძარსა ამას, არარაჲ არს; ხოლო რომელმან ფუცოს ოქროსა მას ტაძრისასა, ჯერ-არს.
ცოფნო და ბრმანო, რომელი უფროჲს [არს]: ოქროჲ იგი ანუ ტაძარი, რომელი განსწმედს ოქროსა მას?
და სთქუთ: რომელმან ფუცის საკურთხეველსა, არარაჲ არს; ხოლო რომელმან ფუცოს შესაწირავსა, რომელ არს ზედა საკურთხეველსა მას, ჯერ-არს.
ცოფნო და ბრმანო, რომელი უფროჲს არს: შესაწირავი იგი ანუ საკურთხეველი, რომელი განსწნედს შესაწირავსა მას?
რომელმან ფუცოს საკურთხეველსა მას, ფუცავს [მას] და ყოველსა, რომელი-რაჲ არს მას ზედა.
რომელმან ფუცოს ტაძარსა მას, [ფუცავს მას] და რომელი დამკჳდრებულ არს მას შინა.
და რომელმან ფუცოს ცასა, ფუცავს საყდარსა ღმრთისასა და რომელი ზის მას ზედა.
Page of ms. P: 262V ვაჲ თქუენდა, მწიგნობარნო და ფარისეველნო ორგულნო, რამეთუ ათეულსა მიიღებთ პიტნაკისა და ცერეცოჲსა და ძირაკისასა. დაგიტევებიეს უმძიმჱსი შჯულისაჲ: სამართალი და წყალობაჲ. ესე ჯერ-იყო საქმედ და იგი არა დატევებად.
წინამძღუარნო ბრმანო, რომელნი სწურავთ ქურნაქსა და აქლემებსა შთანსთქამთ.
ვაჲ თქუენდა, მწიგნობარნო და ფარისეველნო ორგულნო, რამეთუ განსწმედთ გარეშესა სასუმლისასა და პარაქსიდისასა, ხოლო შინაგანნი თქუენნი სავსე არიან ნატაცებითა და არაწმიდებითა.
ფარისეველნო ბრმანო, განწმიდეთ პირველად შინაგანი იგი სასუმლისაჲ, რაჲთა გარეცა იგი მისი იყოს წმიდა.
ვაჲ თქუენდა, მწიგნობარნო და ფარისეველნო ორგულნო, რამეთუ მიმსგავსებულ ხართ საფლავთა განგოზილთა, რომელნი გარეშე ჩანედ წინაშე კაცთა შუენუერ, ხოლო შინაგან სავსე არიან ძუალებითა კაცთაჲთა და ყოვლითა არაწმიდებითა.
ეგრევე თქუენ ჰგონიეთ გარეშე კაცთა მართალ, ხოლო შინაგან სავსე ხართ ორგულებითა Page of ms. P: 263R და უშჯულოებითა.
ვაჲ თქუენდა, მწიგნობარნო და ფარისეველნო ორგულნო, რამეთუ აშჱნებთ საფლავთა წინაწარმეტყუელთასა და შეამკობთ საჴსენებელსა მართალთასა.
და სთქუთ: უკუეთუმცა ვიყვენით დღეთა მამათა ჩუენთასა, არამცა ვიყვენით მათ თანა ზიარ სისხლსა მას წინაწარმეტყუელთასა.
რამეთუ ამით სწამებთ, ვითარმედ ნაშობნი ხართ მკლველთა წინაწარმეტყუელთანი.
და თქუენცა აწ აღავსეთ სარწყული მამათა თქუენთაჲ.
გუელნო და ნაშობნო იქედნეთანო, ვითარ-მე განერნეთ სასჯელსა გეჰენიისასა?
Page of ms. P: 248R ამისთჳს აჰა ესერა მე მოვავლინენ თქუენდა წინაწარმეტყუელნი, ბრძენნი და მწიგნობარნი, და მათგანნი მოსწყჳდენით და ჯუარს-აცუენით [და მათგანნი ჰგუემნეთ] შესაკრებელთა შორის მათთა და სდევნიდით ქალაქითი ქალაქად,
რაჲთა მოიწიოს თქუენ ზედა ყოველი სისხლი, დათხეული ქუეყანასა ზედა, სისხლითგან აბელის მართლისაჲთ ვიდრე სისხლადმდე ზაქარიაჲსა, ძისა ბარუქისა, რომელი-იგი მოჰკალთ შორის ტაძრისა მის და საკურთხეველისა.
ამენ გეტყჳ თქუენ: მოიწიოს ესე ყოველი ნათესავსა ამას ზედა.
იერუსალჱმ, იერუსალჱმ, რომელმან მოსწყჳდენ წინაწარმეტყუელნი და ქვაჲ დაჰკრიბე მოვლინებულთა შენ ზედა, რაოდენგზის ვინებე შეკრებაჲ შვილთა შენთაჲ, ვითარცა შეიკრიბნის მფრინველმან მართუენი ქუეშე ფრთეთა თჳსთა, და არა ინებეთ!
აჰა ესერა დაუტეოთ თქუენ სახლი თქუენი ოჴრად.
ხოლო არღარა მიხილოთ მე ამიერითგან, ვიდრემდის სთქუათ: კურთხეულ არს მომავალი სახელითა უფლისაჲთა.
