Page of ms. L: _ Page of ms. P: 309V მე, პავლე, გლოცავ თქუენ სიმშჳდითა და სახიერებითა ქრისტჱსითა, რომელი პირისპირ მდაბალ თქუენ შორის და შორით ვიკადრებ თქუენდა მიმართ.
ხოლო გლოცავ, ნუ პირისპირ ვიკადრო სასოებით, გინა შე-რაჲმე-ვჰრაცხო კადრებად მათ ზედა, რომელთა ვჰგონიეთ ჩუენ ჴორციელად მავალნი.
ჴორციელადღა თუ ვიქცევით, არამედ არა ჴორციელად განწესებულ ვართ,
რამეთუ საჭურველი იგი განწესებისა მის ჩუენისაჲ არა ჴორციელად არს, არამედ ძრიელ ღმრთისა მიერ დასარღუეველად ძნელოანთა, გულისსიტყუათა დავარღუევთ.
და ყოველსა სიმაღლესა, რომელი აღმაღლებულ არს მეცნიერებასა ზედა ღმრთისასა, წარმოვსტყუენავთ ყოველსა ცნობასა მორჩილებად ქრისტჱსა,
და განმზადებულად გუაქუს შურის-გებად ყოვლისავე მისთჳს ურჩებისა, რაჟამს აღესრულოს თქუენი ეგე მორჩილებაჲ.
