Page of ms. P: 295V პავლე და სილოანე და ტიმოთე ეკლესიათა ღმრთისა მიერ ამისა და უფლისა ჩუენისა იესუ ქრისტჱსა;
მადლობაჲ გჳღირს ღმრთისა მარადის თქუენთჳს, ძმანო, ვითარცა-იგი ღირს არს, რამეთუ უმეტესად აღორძნდების სარწმუნოებაჲ ეგე თქუენი და აღემატების სიყუარული ეგე კაცად-კაცადისა თქუენისაჲ ურთიერთას,
ვითარმედ ჩუენცა ვიქადით ურთიერთას თქუენთჳს ეკლესიათა მოთმინებისა მაგის თქუენისა და სარწმუნოებისა და ყოველთა მათ შინა დევნათა თქუენთა და ჭირთა, რომელთა თავს-იდებდით
სახედ სამართლისა სასჯელისა ღმრთისასა, რაჲთა ღირს იქმნნეთ თქუენ სასუფეველსა, რომლისათჳსცა გევნების.
უკუეთუ სამართალ არს ღმერთის მიერ მაჭირვებელთა თქუენთა ჭირი,
და თქუენ, ჭირვეულთა, ლხინი ჩუენ თანა დღესა მას უფლისა ჩუენისა იესუ ქრისტჱსსა გამოჩინებასა ზეცით ანგელოზთა თანა ძრიელებითა მისითა,
ცეცხლითა ალისაჲთა მიგებად შურისა, რომელთა-იგი არა იციან ღმერთი და რომელნი-იგი არა დაემორჩილნეს სახარებასა უფლისა ჩუენისა იესუ ქრისტჱსსა.
რომელთა სასჯელი მიჰჴადოს, ტანჯვაჲ იგი საუკუნოჲ პირისაგან უფლისა და დიდებისაგან ძლიერებისა მისისა,
რაჟამს მოვიდეს დიდებად წმიდათა მისთა თანა და საკჳრველებად ყოველთა მორწმუნეთა მისთა, რამეთუ სარწმუნო იქმნა Page of ms. P: 296R წამებაჲ ჩუენი თქუენდა მიმართ მას დღესა შინა,
რომელსა ვილოცევდ თქუენთჳს, რაჲთა ღირს-გყვნეს თქუენ ღმერთმან ჩინებითა მით და აღგავსნეს თქუენ ყოვლითა სათნოებითა სახიერებისაჲთა და საქმითა სარწმუნოებისაჲთა და ძალითა,
რაჲთა იდიდოს სახელი უფლისა ჩუენისა იესუ ქრისტესი თქუენ შორის და თქუენ მიერ მადლითა მით ღმრთისაჲთა და უფლისა ჩუენისა იესუ ქრისტჱსითა.
