Page of ms. P: 297R ამისთჳს, ძმანო, ჩინებისა მის ზეცისა ზიარნო, განიცადეთ მოციქული იგი და ზეცისა მღდელთმოძღუარი აღსაარებისა თქუენისაჲ, იესუ,
რომელი სარწმუნო არს შემოქმედისა თჳსისა, ვითარცა მოსე ყოველსა სახლსა ზედა.
რამეთუ უმრავლჱსსა დიდებასა ესე ღირს-იყო უფროჲს მოსესა, ვითარცა-იგი უფროჲსი პატივი Page of ms. P: 297V აქუს სახლისა მის მაშჱნებელსა;
ყოველივე სახლი აღეშჱნის ვისგანვე; ხოლო ყოველივე ღმრთისაგან აღშჱნებულ არს.
და მოსეცა სარწმუნო იყო ყოველსა ზედა სახლსა მისსა, ვითარცა მოწამჱ სარწმუნოდ თქუმულთაჲ მათ.
ხოლო ქრისტჱ -- ვითარცა ძჱ სახლსა ზედა მისსა; ვითარცა სახლნი ვართ, უკუეთუ კადრებაჲ იგი სიქადული სასოებისაჲ აღსასრულადმდე მტკიცედ შევიკრძალოთ.
Page of ms. P: 359V ეკრძალენით, ძმანო, ნუუკუე იყოს ვისმე თქუენ შორის გული უკეთური ურწმუნოებისაჲ, განდგომილი ღმრთისაგან ცხოველისა,
არამედ ნუგეშინის-სცემდით დღითი დღე თავთა თჳსთა, ვითარცა-ესე დღეს ჰრქჳან, რაჲთა არა გან-ვინმე-ფიცხნეს თქუენგანი საცთურითა მით ცოდვისაჲთა.
რამეთუ თანაზიარ ქრისტჱსა ვიქმნენით, უკუეთუ დასაბამი იგი ძრიელებისაჲ აღსასრულადმდე მტკიცედ შევიკრძალოთ.
ხოლო რომელი-იგი თქჳს: დღეს თუ ჴმისა მისისაჲ ისმინოთ, ნუ განიფიცხებთ გულთა თქუენთა, ვითარცა-იგი განმწარებასა მას.
რამეთუ ესმა ვიეთმე და განამწარეს, არამედ არა ყოველთა, რომელნი გამოვიდეს ეგჳპტით მოსჱს მიერ.
ვიეთნი იგი მოიწყინნა ორმეოც წელ? ანუ არა რომელთა-იგი შესცოდეს, რომელთა-იგი ძუალები დაცჳვა უდაბნოსა ზედა?
ვით ეფუცა არაშესლვად განსასუენებელსა Page of ms. P: 384R [მ]ისსა? არამე ურჩთა მათ?
და ვხედავთ, რამეთუ ვერ შეუძ[ლეს] შესლვად ურწმუნოებისაგან.
