გუეშინოდენ უკუე, ნუსადა დატევებასა მას აღთქუმისა შესლვად განსასუენებელსა მისსა, ჰგონებდეს ვინმე დაკლებულ თავსა თჳსსა.
რამეთუ ვართ ჩუენ ხარებულ, ვითარცა იგინი, არამედ არარაჲ არგო მათ სიტყუამან სმენისამან, არა თანაშეეზავა რწმუნებაჲ მსმენელთა მათ.
ხოლო ჩუენ შევიდეთ განსასუენებელსა მას, მორწმუნენი ესე, ვითარცა-იგი თქუა: ვითარცა გფუცე რისხვითა ჩემითა, ვერ შევიდენ იგინი განსასუენებელსა ჩემსა. Page of ms. P: 384V და რამეთუ საქმენი იგი დასაბამითგან სოფლისაჲთ ქმნულ იყვნეს.
უთქუამს სადამე მეშჳდესა მისთჳს ესრჱთ: და განისუენა უფალმან დღესა მას მეშჳდესა ყოველთაგან საქმეთა მისთა.
ამისა შემდგომად კუალად იტყჳს: ვერ შევიდენ იგინი განსასუენებელსა ჩემსა.
რამეთუ და-ვიეთმე-აკლდების შესლვად მას შინა, და რომელ-იგი წინაჲსწარ ხარებულ იყვნეს, ვერ შევიდეს ურწმუნოებითა.
მერმე კუალად მასვე გამოაჩინებს დღესა დღეს დავითის მიერ, და იტყჳს, შემდგომად ესოდენისა ჟამისა, ვითარცა-იგი წინაჲსწარ თქუმულ არს: დღეს თუ ჴმისა მისისაჲ ისმინოთ, ნუ განიფიცხებთ გულთა თქუენთა.
უკუეთუმცა იესუ, ძემან ნავჱსმან, შეიყვანნა იგინი განსასუენებელსა მას, არამცა სხჳსა დღისათჳს ამის შემდგომად იტყჳს.
და-მე-აკლდებოდის შაბათობაჲ იგი ერსა ღმრთისასა?
რამეთუ რომელი-იგი შევიდა განსასუენებელსა Page of ms. P: 384V მისსა, მანცა განისუენა საქმეთა მისთაგან, ვითარცა თჳსთა მათგან ღმერთმან.
Page of ms. P: _ Page of ms. L: 593R ვისწრაფოთ უკუე შესლვად განსასუენებელსა მას. რაჲთა არა მასვე ვინმე სახესა შევარდეს ურწმუნოვებისასა.
რამეთუ ცხოელ არს სიტყუაჲ ღმრთისაჲ, შემწე და უმკუეთეს უფროის მახუილისა Page of ms. L: 593V ორპირისა: და მისწუთების ვიდრე განსაყოფლადმდე სამშუინველისა და სულისა, ნაწევართა და ტუინთა, და განმკითხველ ზრახვათა ფარულთა და გონებათა გულისათა.
არარაჲ არს დაბადებული დაფარულ წინაშე თუალთა მისთა, ყოველივე შიშუელ და ქედდადრეკილ არს წინაშე მისსა, რომლისათჳს არს სიტყუაჲ ესე.
მივის ჩუენ მღდელთმოძღუარი დიდი, რომელმან განვლნა ცანი, იესუ, ძჱ ღმრთისაჲ, შევიკრძალოთ აღსარებაჲ იგი.
რამეთუ არა ეგევითარი გუივის ჩუენ მღდელთმოძღუარი, რაჲთამცა ვერ შემძლებელი იყო [შეწყალებად უძლურებათა ჩუენთა, გამოცდილი] ყოვლითავე მსგავსებითა, თუინიერ ცოდვისა.
მოუჴდეთ განცხადებულად საყდართა მათ მადლისათა, რაჲთა მოვიღოთ წყალობაჲ და ვპოოთ მადლი ჟამსა შეწყნარებისასა.
