და ვითარ წარჴდა შაფათი იგი, მარიამ მაგდანელმან და მარიამ იაკობისმა* და სალომე იყიდეს ნელსაცხებელი, რაჲთამცა მო[ვი]დეს და სცხეს მა[ს].
Verse: 2
და მსთუად გა[ნ]თიად ერთშაფათსა მას მოვიდეს სამარესა მას ზედა აღმოსლვასა ოდენ მზისასა
Verse: 3
და იტყოდეს ურთიერთას: ვინ-მე გარდაგჳგორვოს ჩუენ ლოდი იგი კარისა მისგან სამარისაჲსა?
Verse: 4
და მიხედეს და იხილეს, რამეთუ გარდაგორვებულ იყო ლოდი იგი, რამეთუ დიდ იყო ფრიად.
Verse: 5
და შევიდეს სამარესა მას, იხილეს ჭაბუკი ერთი, მჯდომარე მარჯუენით კერძო, რომელ მოსილ იყო სამოსლითა სპეტაკითა, და დაუკჳრდა*.
Verse: 6
და მან ჰრქუა მათ: ნუ გეშინინ! იესუს* ეძიებთ ნაზორეველსა, რომელ ჯუარ-ცუმულ არს; აღდგა, არა აქა არს. იხილეთ ეგერა ადგილი მისი, სადა დადვეს იგი.
Verse: 7
და მივედით და არქუთ მოწაფეთა მისთა და პეტრეს, ვითარმედ: წარგიძღჳს თქუენ გალილეად, და მუნ იხილოთ იგი, ვითარცა გრქუა თქუენ.
Verse: 8
და ვითარ ესმა ესე, გამოვიდეს და ივლტოდეს მიერ სამარით, რამეთუ შეშინებულ იყვნეს და დაკჳრვებულ და არავის უთხრეს, რამეთუ ეშინოდა.
Verse: 9*
ხოლო აღდგა განთიად პირველსა მას შაბათისასა და ეჩუენა პირველად მარიამს მაგდანელსა*, რომლისაგან განსრულ იყო შჳდი ეშმაკი.
Verse: 10*
იგი წარვიდა და უთხრა მის თანა მოყუასთა მათ*, რომელნი ეგლოვდეს* და ტიროდეს.
Verse: 11*
ხოლო მათ რაჲ ესმა, რამეთუ ცხოველ არს და ეჩუენა მას, და მათ არა ჰრწმენა.
Verse: 12*
ამისა შემდგომად ორთა მათგანთა სლვასა შინა გამოეცხადა* სხჳთა ხატითა, მი-რაჲ-ვიდოდეს დაბასა*.
Verse: 13*
და იგინი მოვიდეს და უთხრეს სხუათა მათ, და არცა მათი ჰრწმენა.
Verse: 14*
უკუანაჲსკნელ მსხდომარეთა მათ ათერთმეტთა ეჩუენა და აყუედრა ურწმუნოვებაჲ* მათი და გულ-ფიცხელობაჲ მათი, რამეთუ რომელთა იხილეს იგი* აღდგომილი, მათი არა ჰრწმენა.
Verse: 15*
და ჰრქუა მათ: წარვედით ყოველსა სოფელსა და ქადაგეთ სახარებაჲ ესე ყოველსა დაბადებულსა.
Verse: 16*
რომელსა ჰრწმენეს და ნათელ-იღოს, ცხოვნდეს*, და რომელსა არა ჰრწმენეს, დაისაჯოს.
Verse: 17*
ხოლო სასწაული მორწმუნეთა მათ ესე თანა-უვიდოდის: სახელითა ჩემითა ეშმაკთა განასხმიდენ*, ენათა ახალთა იტყოდიან.
Verse: 18*
გუელთა შეიპყრობდენ; და ღათუ სასიკუდინჱ* სუან, არარაჲ ავნოს მათ; სნეულთა ზედა ჴელი დასდვან და განცოცხლდენ.
Verse: 19*
ხოლო შემდგომად სიტყჳსა მის მისისა მათა მიმართ*, აღმაღლდა ზეცად და დაჯდა მარჯუენით ღმრთისა.
Verse: 20*
ხოლო იგინი გამოვიდეს და ქადაგებდეს ყოველსა ქუეყანასა უფლისა შეწევნითა და სიტყჳსა* მის დამტკიცებითა მისა მიმართ, რომელნი-იგი შეუდგეს მათ სასწაულნი.
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
