TITUS Texts: Tetraevangelium e codice Adisi

TITUS
Tetraevangelium e codice Adisi: Part No. 47

Chapter: 3

Verse: 1

მეათხუთმეტესა წელსა უფლებასა ტიბერია კეისრისასა, მსაჯულებასა პონტიელისა პილატჱსსა ჰურიასტანსა ზედა და მეოთხისა* მის ჴელმწიფებისა გალილეელთა ზედა ჰეროდესსა და ფილიპეს, ძმისა მისისა, მეოთხისა* მის ჴელმწიფისა ტურელთა და ტრაქონელთა სოფელსა მას და მეოთხისა მის ჴელმწიფისა ლუსანიაჲსა აბი( )ლენელთა ზედა,

Verse: 2

და მღდელთ-მოძღურებასა მას ანაჲსსა და კაჲაფაჲსსა იყო სიტყუაჲ უფლისაჲ იოვანეს ზედა, ძესა* ზაქარიაჲსსა, უდაბნოსა მას.

Verse: 3

და მოვიდა გარემო ყოველსა მას სოფლებსა იორდანისასა, ქადაგებდა ნათლის-ცემასა სინანულისასა მისატევებელად (ცოდვათა)*,

Verse: 4

ვითარცა წერილ არს წიგნსა სიტყუათა ესაჲა წინაწარმეტყუელისათა: ჴმაჲ მღაღადებელისაჲ უდაბნოსა ზედა: განჰმზადეთ გზაჲ უფლისაჲ და წრფელ ყვენით ალაგნი მისნი.

Verse: 5

ყოველი ჴევნები აღმოივსოს, და ყოველნი მთანი და ბორცუნი დამდაბლდენ, და იყვნენ ძნელოვანნი ადვილად და ღჳრღლოვანნი გზად წრფელად.

Verse: 6

და იხილოს ყოველმან ჴორციელმან მაცხოვარებაჲ ღმრთისაჲ.

Verse: 7

ხ~ ეტყოდა ერსა მას, გამომავალსა ნათლის-ღებად მისგან: ნაშობნო იქედნეთანო, ვინ გასწავა თქუენ სივლტოლაჲ რისხვისა მისგან მომავალისა?

Verse: 8

ყავთ ამიერითგან ნაყოფი ღირსი სინანულისაჲ და ნუღარა იტყჳთ, ვითარმედ: არს მამად ჩუენდა აბრაამი. ამას გეტყჳ თქუენ, რამეთუ შემძლებელ არს ღმერთი აღდგინებად ქვათა ამათგან ნაშობად აბრაამისა.

Verse: 9

რამეთუ აწვე ცული ძირთა თანა ხეთასა ძეს; ყოველმან ხემან რომელმან არა გამოიღოს ნაყოფი კეთილი, მოეკუეთოს და ცეცხლსა დაედვას.

Verse: 10

და ჰკითხვიდა მას ერი იგი და ეტყოდეს: და რაჲ-მე ვყოთ?

Verse: 11

მიუგო და ჰრქუა მათ: რომელსა აქუნდეს ორი სამოსელი, მიეცინ ერთი მას, რომელსა არა აქუნდეს; და რომელსა აქუნდეს საზრდელი, ეგრევე მსგავსად ყავნ.

Verse: 12

მოვიდეს მისა მეზუერენიცა ნათლის-ღებად და ჰრქუეს მას: მოძღუარ, ჩუენ რაჲ ვყოთ?

Verse: 13

ხოლო მან ჰრქუა: ნურას უფროჲს განწესებულისა თქუენისა იქმთ.

Verse: 14

ჰკითხვიდეს მას ერად განწესებულნიცა* იგი და ეტყოდეს: და რაჲ-მე ვყოთ? და მან ჰრქუა მათ: ნუვის აჭირვებთ, ნუცა ცილსა შესწამებთ და კმა გეყავნ როჭიკი თქუენი.

Verse: 15

და ვითარცა მოელოდა ერი იგი და განიზრახვიდეს ყოველნი გულთა მათთა იოჰანესთჳს, ნუუკუე იგი არს ქრისტე*,

Verse: 16

მიუგო ყოველთა და ეტყოდა: მე ნათელს-გცემ თქუენ წყლითა; მოვალს უძლიერესი ჩემსა, რომლისა არა ვარ ღირს ჴამლთა მისთა ტჳრთვად; მან ნათელს-გცეს თქუენ სულითა წმიდითა და ცეცხლითა,

Verse: 17

რომლისა ნიჩაბი ჴელთა შინა მისთა, განწმიდოს კალოჲ მისი და შეკრიბოს იფქლი საუნჯესა თჳსსა, ხოლო ბზე დაწუას ცეცხლითა უშრეტითა.

Verse: 18

და ფრიად სხუასაცა მრავალსა ჰლოცვიდა და ახარებდა ერსა მას.

Verse: 19

ხოლო ჰეროდე ოთხთა საბრძანებელთა მთავარსა, რამეთუ ამხილებდა მას ჰეროდიასთჳს, ცოლისა ძმისა მისისა, და ყოვლისა მისთჳს, რომელი ქმნა ბოროტი ჰეროდე,

Verse: 20

შესძინა ესეცა მას ყოველსა თანა და შეაყენა იოვანე საპყრობილესა.

Verse: 21

და იყო ნათლის-ღებასა მას ყოვლისა ერისასა და იესუცა ნათელ-იღო და ილოცვიდა, განეხუნეს ცანი,

Verse: 22

და გარდამოჴდა სული წმიდაჲ ჴორციელითა ხილვითა ვითარცა ტრედი მის ზედა, და ჴმაჲ იყო ზეცით და თქუა: შენ ხარ ძჱ* ჩემი საყუარელი, შენ სათნო-გიყავ.

Verse: 23

და თავადსა იესუს ეწყო ოდენ მეოცდაათესა წელსა, რომელი საგონებელ იყო ძედ იოსებისა, იაკობისა, ელისა,

Verse: 24

მატთანისა, ლევისა, მელქისა, იანჱსა, იოსეფისა,

Verse: 25

მატათისა, ამოსისა, ნაუმისა, ესლისა, ნაგჱსა,

Verse: 26

მაათისა, მატათისა, სემეისა, იოსეფისა, იუდაჲსა,

Verse: 27

ოანნაჲსა, რჱსა(ჲსა), ზორობაბელისა, (ს)ალათიელისა, (ნე)რისა,

Verse: 28

მელქისა, ადდისა, კო(სა)მისა, ელმო(და)დისა*, ჱ(რისა),

Verse: 29

იესუჲსა, ე(ლი)აზარისა, იო(რა)მისა, მატათ(ი)სა, ლევისა,

Verse: 30

სჳმეონისა, იუდაჲსა, იოსეფისა, იონანისა, ელიაკიმისა,

Verse: 31

მელეაჲსა, მენანისა, მატთანისა, ნათანისა, დავითისა,

Verse: 32

იესესა, იობედისა, ბოოსისა, სალმონისა, ნაასონისა,

Verse: 33

ამინადაბისა, არამისა, ადმეაჲსა, არნეაჲსა, ესრომისა, ფარეზისა, იუდაჲსა,

Verse: 34

იაკობისა, ისაკისა, აბრაამისა, თარაჲსა, ნაქორისა,

Verse: 35

სირუქისა, რაგავისა, ფალექისა, ებერისა, სალაჲსა,

Verse: 36

კაინანისა, არფაქსადისა, სემისა*, ნოჱსა, ლამექისა,

Verse: 37

მათუსალაჲსა, ენუქისა, იარედისა, მალილელისა, კაინანისა,

Verse: 38

ენოსისა, სჱთისა, ადამისა და ღმრთისა*.

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.