Moṭoxun samal vädä oša Isus Yerusalima, iudeyxoy sa axsibayane taci.
Ṭiya Eġeli darvazin ṭo͑ġo͑l, iz härrämine qo seyvan bakala, äbraniġoy muzin Beṭzada uḳala sa hovuze buy.
Šoṭay qo seyvaneyal gele azariyoxe basḳey: ḳać̣i, axsaġ saal ṗaraličen duġi amdarxo. *
Ṭeṭiya otuz muġ usenin azari bakala sa amdare buy.
Isusen me amdari basksuna aḳi, hamal šoṭay gele vaxṭaxun azari baksuna avabaki šoṭoxun xavare haq̇i: "Q̣olaybaksun \ čurensa?"
Azarinen Isusa ǯoġabe tadi: "Bez *aġa, bezi ṭo͑ġo͑l sa amdar tene bu ki, xene galgalḳala vädine za hovuza badane. Zu ṗaṗamin q̇eräzo zaxun be͑ś ṭeṭiya banesa".
Isusen šoṭo pine: "Hayza, vi döšäyä exṭa, tarapa!"
Ṭe amdaral haṭe saad q̇olayebaki, iz döšäyä exṭi taranepi. \ Ṭe ġi *Šamaṭ ġiney.
Koṭo göräl iudeyxoy kalaṭoġon q̇olaybaki amdara piṭun: "Ġe *Šamaṭ ġine, döšäyä tašṭun va q̇adaġane". *
Ṭe amdaren šoṭoġo ǯoġabe tadi: "Za q̇olaybi Amdaren za "döšäyä exṭa, tarapa" pine".
Šoṭoxun xavarṭun haq̇i: "P̣oy va "exṭa, tarapa" pi amdar šuva?"
Ama q̇olaybaki amdaren Šoṭay šu baksuna tene avay, šoṭaynaḳ ki, Isus ṭeṭiya bakala ǯamaati arane aćeney.
Samal oša Isusen *xrama ṭe amdara bä͑ġä͑bi pine: "Be͑ġa, hun q̇olayenbaki, saal günax äš ma biq̇a ki, vi bel ene pis äš maq̇an hari".
Q̣olaybaki išq̇arenal taci iču q̇olaybi ṭe Amdari Isus baksuna iudeyxoy kalaṭoġo avabakesedi.
Moṭoxun oša iudeyxoy kalorox Isusa biq̇suni loxolṭun biti, šoṭaynaḳ ki, me äšurxo *Šamaṭ ġinene bsay.
Ama Isusen šoṭoġo pine: "Bezi Bavan ġeyin ġinal ciriḳ äšebsa, Zuval äšezbsa".
Metärluġen, iudeyxoy kalorox Isusa bespsuni loxol samalal geleṭun \ biti, šoṭaynaḳ ki, Isusen sayǯä *Šamaṭ ġina tene pozmišey, hamal Buxaʒ́uġoy Iz Bava baksuna upsunen Iču Buxaʒ́uġoxun barabare hesabbsay
Ama Isusen šoṭoġo pine: "Serina, serinaz vä͑x nex: Ġaren Iz Bavay ḳä bsuna nu aḳayin, Ičuxun sa šey tene bon. Iz Bavan ḳä bayin, Ġarenal šoṭone bsa.
Šoṭaynaḳ ki, Bavan Iz Ġara čuresa, Ičin bala här šeya Šoṭo aḳesesṭa. Bavan koṭoxunal kala äšurxo aḳesṭale, vä͑nal mat mandalnan.
Bavan ṗuriṭoġo be͑yinbi šoṭoġo yäšäyinš tadi ḳinäḳ Ġarenal Ičin čureġalṭoġo yäšäyinše tasṭa.
Bavan šuḳḳala divantenebsa, ama divanbsuni exṭiyärä Iz Ġarane tade ki,
bitoṭin Bava hörmätbala ḳinäḳ Iz Ġaral hörmätq̇anbi. Iz Ġara hörmätnubalṭin Šoṭo yaq̇abi Baval hörmättenebsa.
Serina, serinaz vä͑x nex: Bezi piṭoġo u͑mu͑xlaxi Za Yaq̇abiṭu ve͑ amdareynaḳ hämišäluġ yäšäyinše bu. Šo pis q̇äraren tene divanbakal, šoṭaynaḳ ki, šo ene bisunaxun yäšäyinšä č̣ovaneki.
Serina, serinaz vä͑x nex: iz vädä enesa, šo ene hari ṗaṗene; ṗuriṭoġon Buxaʒ́uġoy Ġare säsä ibakalṭun, ibakiyoroxal yäšäyinšalṭun.
Šoṭaynaḳ ki, Bavay \ Ičusṭa yäšäyinš bakala ḳinäḳ Iz Ġaral Ičusṭa yäšäyinš baksune tadi.
Divanbsuni exṭiyäräl Šoṭone tadi, šoṭaynaḳ ki, Šo *Amdari Ġare.
Moṭo mat ma mandanan, šoṭaynaḳ ki, ṭetär sa vädäne eysa ki, *gärämzoġo basḳiyorox bito Šoṭay säsä ibaki gärämzoġoxun č̣eġalṭun.
Šaaṭluġ biyorox yäšäyinšbseynaḳ be͑yinbakalṭun, pisluġ biyorox isä divanbaki pis q̇ärar haq̇seynaḳ be͑yinbakalṭun. *
Zu Bez exṭiyären hiḳḳal bes batezkon. Bavan Za pi ḳinäḳez divanbsa, Bezi č̣evḳala q̇äraral düzgüne, šoṭaynaḳ ki, Bezi čureġalṭu tez bsa, Za Yaq̇abiṭay čureġalṭuz bsa.
Ägär Zu Bezi barada šahidluġbayiz, Bezi šahidluġ seri tene bakon.
Ama Bezi barada šahidluġbalo q̇eräzone. Šoṭay šahidluġi seri baksunal avazu.
Vä͑n Ioani ṭo͑ġo͑l amdarnan yaq̇abi, šoṭay bi šahidluġal serine. *
Bezi amdarxoy šahidluġa ehṭiyäǯ butene, moṭoġo sayǯä ef čarḳeseynaḳez nex.
Ioan boḳala saal išiġ sakala sa čiraġ ḳinäḳey, vä͑nal samal vädä šoṭay išiġa mu͑q baksunnan čureci.
Ama Zasṭa Ioani Bezi barada bi \ šahidluġaxun üsṭün šahidluġe bu. Bezi Bavan Za tapšurbi äšurxo bex ṗaṗespseynaḳ Bezi bala me äšurxon ičan Bez barada šahidluġebsa. Šoṭoġon Bezi Bavay täräfäxun yaq̇abaksunane aḳesṭa.
Za yaq̇abala Bavan Ičinal Bezi barada šahidluġebsa. Vä͑n sal sa vädä Šoṭay säsä tenan ibake, Ičuval tenan aḳe. *
Šoṭay äyitäl vä͑sṭa tene yäšäyinšbsa, šoṭaynaḳ ki, Šoṭin yaq̇abi Amdara tenan ve͑.
Vä͑n ω͑vel Camurxo diggätlü ḳalpi fikirnanbsa ki, šoṭoġon vä͑x hämišäluġ yäšäyinš tadale. Ama ω͑vel Camurxonal Bezi baradaṭun šahidluġbsa.
Vä͑n isä yäšäyinš haq̇seynaḳ Bez bać̣anexun eysun tenan čuresa.
Amdarxoy tärifä Bezi ehṭiyäǯ butezax.
Ama vä͑x čalezxsa: vä͑sṭa Buxaʒ́uġo čuresun butene.
Zu Bavay c̣iyenez hare, vä͑n isä Za q̇abultenanbsa. Ama soġo hayzeri iz c̣iyen eġayin, šoṭo q̇abulnanbon.
Vä͑n amdarxoxun eġala tärifänan qä͑vesa, täk bakala Buxaʒ́uġoxun eġala tärifä tää. Šoṭo göräl Buxaʒ́uġo bakala ve͑luġ vä͑xun ä͑xile!
Fikirmabanan ki, Zu vä͑x Bavay be͑ś taxsərkär booz. Vä͑x taxsərkär balo ef umudbakala Moiseye.
Ägär vä͑n Moiseya ve͑bakinaniy, Zaal ve͑nanbakoy, šoṭaynaḳ ki, šoṭin Bez baradane campe.
Ama šoṭay \ campiṭoġo tenan ve͑baksasa, Bezi äyitmoġo hetär ve͑bakalnan?"
