Koṭoxun oša Isus Galileyinane taraney. Iudeyina isä tene taysay, šoṭaynaḳ ki, iudeyxoy kalaṭoġon \ Šoṭo bespseynaḳ yaq̇ṭun qä͑vesay.
Iudeyxoy Paǯe axsibay ə͑śalayinšebaksay. *
Iz vičimoġon Isusa piṭun: "Memiin č̣eri Iudeyina taki ki, Vi šagirdxonal Vi biq̇ala äšurxo aḳeq̇aṭun.
Axəri Iču čalxesṭuna čaləšakala amdaren hiḳḳala č̣äṗḳin tene bon. Hun moṭoġo bsanusa - taki, Va dünyänä čalxesṭa".
Šoṭay vičimuxal Iču ve͑ teney.
Ṭe vädä Isusen šoṭoġo pine: "Bezi vaxṭ hälä ṗaṗitene, vä͑ynaḳ isä här vaxṭ uyġune.
Dünyänen vä͑x nifrätbes tene bakon, ama Za nifrätebsa, šoṭaynaḳ ki, Zu šoṭay ämälxoy šär baksunaz ćoyel č̣evḳsa.
Vä͑n takinan axsibaya, Zu isä Bezi vaxṭ hari nu ṗaṗsuna görä me axsibaya tez taġal".
Isusen me äyitmoġo pi Galileyinane čurpi.
Ama Iz vičimux axsibaya taciṭuxun oša Ičal č̣äṗḳin, Iču amdarxo aḳesṭinut taneci axsibaya.
Iudeyxoy kalaṭoġon axsibaya Isusa qä͑vṭunsay. Šoṭoġon "me amdar maya?" pi xavarṭun haq̇say.
Ǯamaati arane Šoṭay barada gele exlätxone taysay. Bäziṭoġon "šaaṭ amdare", ṭe sunṭoġon isä "tää, ǯamaatane fereṭsṭa" nexṭuniy.
Ama iudeyxoy kalaṭoġoy q̇ə͑yexun \ šuḳḳalen Šoṭay barada qay tene exlätpsay
Axsibayi qə͑yo č̣ovakiṭuxun oša Isus *xrama baci zombsane burqi.
Iudeyxoy kalaṭoġon määṭṭäl mandi piṭun: "Me Amdaren maśḳal ḳaltenepe, hetäre baksa ki, savadlune?"
Isusenal šoṭoġo ǯoġabe tadi: "Bezi zombsun Zaxun tene, Za Yaq̇abiṭuxune.
Šiin Šoṭay čureġalṭu bex ṗaṗespsun čuresasa, šoṭin Bezi zombsuni Buxaʒ́uġoxun baksuna yoxsa Zu Zaxun upsuna avabakale.
Ičuxun exlätṗalṭin ičeynaḳe tärif qä͑vesa, ama Iču Yaq̇abiṭaynaḳ tärif qä͑veġala Amdar serine, Šoṭosṭa äfči butene.
Moiseyen vä͑x ḳanune tadi, ketär tene? Ama ef sayǯäṭin me ḳanuna tene ämälbsa! Tenesa Za heṭaynaḳnan bespsun čuresa?"
Ǯamaaten ǯoġabe tadi: "Hun ḳän äyite? Šina Va bespsun čuresa?"
Isusen šoṭoġo pine: "Zu täk sa möǯüzäz bi, vä͑n bito moṭo määṭṭälnan mandi.
Moiseyen vä͑ynaḳ sünnätbsuni ḳanunane laxi (düze, me ädät Moiseyaxun tää, ef bavoġoxun-kalboġoxune eysa), vä͑nal ef ġarmoġo lap *Šamaṭ ġineyal bafṭayin sünnätnanbsa. *
*Šamaṭ ġine Moiseyi ḳanun maq̇an \ pozmišaki pi ġarmoġo sünnätnanbsa, ama *Šamaṭ ġine amdari dirisṭ bädänä q̇olaybsuna görä Bezi loxol ef äǯuġone biq̇sa? *
Piin aḳalṭu ma divanbanan, düz divanbanan".
Ṭe vädä yerusalimluġoy bäziṭoġon piṭun: "Me amdara teṭun qä͑vesay ki bespseynaḳ?
Be͑ġanan, moṭin qay exlätebsa, ama iču sa äyit teṭun nexe. Bärkä kalaṭoġon Šoṭay hägigiyal Xrisṭos baksunaṭun avabake?
Ama me amdari mayin baksuna avayan, Xrisṭos eġaṭan isä Šoṭay mayin baksuna šuḳḳalen tene avabakal".
Šoṭaynaḳal Isusen *xrama zombaṭan osṭaar pine: "Hägigiyal Za čalnanxsa? Bezi mayin eysunal avanan? Ama Zu Zaxun tez hare, Za Seri Bakalṭine yaq̇abe. Vä͑n Šoṭo tenan čalxsa,
Zu isä Šoṭo čalezxsa, šoṭaynaḳ ki, Šoṭay ṭo͑o͑xunez hare, Šoṭine Za yaq̇abe".
Me äyitmoġo görä Isusa biq̇sunṭun čureci, ama šuḳḳal Šoṭo tene lafṭi, šoṭaynaḳ ki, Iz vaxṭ hälä tene ṗaṗey.
Ama ǯamaati gelo Šoṭo ve͑ney. Šoṭoġon nexṭuniy: "Xrisṭos eġaṭan me amdaren aḳesṭiṭuxun gele möǯüzälü niśanxo aḳesṭale ki?"
*Fariseyxon ǯamaati Isusi barada ḳä upsuna iṭunbaksay. Šoṭo göräl \ samǯi be͑yinśxon q̇a *fariseyxon Šoṭo biq̇seynaḳ *xrame q̇aroolčiġoṭun yaq̇abi.
Isusen pine: "Samal vaxṭ Zu vä͑xun bakoz, oša isä Za Yaq̇abiṭay ṭo͑ġo͑l taġoz.
Vä͑n Za qä͑veci tenan bä͑ġä͑bal, Zu bakala galal eyes tenan bakal".
Ṭe vädä iudeyxon ičoġoy arane piṭun: "Me Amdar maya taġale ki, Šoṭo teyan bä͑ġä͑bal? Greḳxoy arane bakala iudeyxo taci zombale?
"Vä͑n Za qä͑veci tenan bä͑ġä͑bal, Bezi bakala galal vä͑n eyes tenan bakon" äyiten ḳä upsune čuresa?"
Axsibayi axərənǯi, än vaǯib ġine Isusen hayzeri osṭaar pine: "Šu xenezane, Bezi ṭo͑ġo͑l hari u͑ġe͑q̇an. *
ω͑vel Camurxon uḳala ḳinäḳ, Za ve͑ bakala amdari bošṭan yäšäyinšesṭala xene oqurxo barale". *
Moṭo Iču ve͑ bakalxoy oša haq̇ala Urufi baradane nexey. Uruf isä hälä tene tadecey, šoṭaynaḳ ki, Isus hälä tene e͑qecey, Iz c̣iyal tene alabakey.
Ǯamaati aranexun sa hemaran me äyitmoġo ibaki "mo, hägigiyal, beš yaq̇be͑ġi *xavarečale" piṭun. *
Sa hemaran "Mo *Xrisṭose" piṭun, ama bäziṭoġon nexṭuniy: "Ḳä? Xrisṭos Galileyinaxune eysa?
ω͑vel Came boš tene camece ki, Xrisṭos Davidi näsiläxun, šoṭay yäšäyinši Beṭlexem \ ayizexun eġale?" *
Metärluġen, Isusi barada ǯamaati arane ǯöy-ǯöy fikirxone buy.
Bäziṭoġon Šoṭo biq̇sunṭun čureci, ama šuḳḳal Šoṭo laftenedi.
Moṭoxun oša *xrame q̇aroolčiyox samǯi be͑yinśxoy q̇a *fariseyxoy ṭo͑ġo͑lṭun qaybaki. Šoṭoġonal q̇aroolčiġoxun "šoṭo heṭaynaḳ tenan ečeri?" pi xavarṭun haq̇i.
Q̣aroolčiġon ǯoġabṭun tadi: "Häysäṭinäl ciriḳ sal sa amdaren metär tene äyitṗey".
*Fariseyxon šoṭoġo piṭun: "Šoṭin vä͑xal fereṭedi?
Be͑yn kalaṭoġoxun soġo nääl sa *farisey Šoṭo ve͑nebaki?
Ama ḳanuna nu avabakala vä͑xlariḳ savadsuzxoy loxol Buxaʒ́uġoy läänäte hare!"
Ičoġoy aranexun sunṭin, moṭoxun be͑ś Isusi ṭo͑ġo͑l hari Niḳodimen * isä šoṭoġo pine:
"Beši ḳanuna görä, sa amdara u͑mu͑xlaxinut, šoṭay ḳä bsuna avabakinut divanbsun düzgüne ki?"
Šoṭoġon Niḳodima piṭun: "Bärkä hunal Galileyinaxunnu? Camurxo ḳalḳayin, anḳon ki, xavarečal Galileyinaxun tene eġal".
Moṭoxun oša här soġo iz ḳoyane taci.
