TITUS
Otfrid von Weissenburg, Evangelienbuch
Part No. 41
Previous part

Chapter: 8  
p. 52r    

VIII. NUPTIAE FACTAE SUNT.


Verse: 1     After thíu in war mín   \   so mohtun thrí daga sin;
Verse: 2     so thes thrítten dages sár   \   so wárd thiz thaz ih ságen thar.
Verse: 3     Úaptun thar thie líuti   \   eino brútloufti
Verse: 4     themo wírte joh theru brúti   \   in sáligeru zíti.
Verse: 5     Ni ward io in wóroltzitin,   \   thiu zisámane gihítin,
Verse: 6     thaz sih gésto guati   \   súlihhero rúamti.
Verse: 7     Thar was Kríst guater   \   joh sélba ouh thiu sin múater,


p. 52v    


Manuscript page: 52v 
Verse: 8     óuh man thara ládota   \   thie júngoron thier tho hábeta.
Verse: 9     Thiu hiun wárun filu fró,   \   giwerdan móhta siu es thó:
Verse: 10     sie habetun thár selbon Kríst,   \   ther álles blides fúrista ist.
Verse: 11     Thó zigiang thes lídes   \   joh brást in thar thes wínes;
Verse: 12     María thaz bihúgita,   \   joh Kríste si iz giságeta.
Verse: 13     "Ih scal thir ságen, min kínd,   \   then híon filu hébig thing,
Verse: 14     theih míthon ouh nu wésta:   \   thes wínes ist in brésta."
Verse: 15     Spráh tho zi iru súazo   \   ther ira sún zeizo
Verse: 16     sconen wórton ubar ál,   \   so sun zi múater scal:
Verse: 17     "Wib, ih zéllu thir ein,   \   waz drífit sulih zi úns zuein?
Verse: 18     ni quam min zít noh so frám,   \   theih óuge weih fon thír nam.
Verse: 19     Sar so tház irscínit,   \   waz mih fon thír rinit,
Verse: 20     so ist thir állan then dag   \   thaz hérza filu ríuag.
Verse: 21     Thaz thu zi mír nu quáti   \   inti eina klága es dati,
Verse: 22     mit gótkundlichen ráchon   \   scal man súlih machon."
Verse: 23     Thiu muater hórta thaz tho thár;   \   si wéssa thoh in álawar,
Verse: 24     thaz íru thiu sin gúati   \   nirzígi thes siu báti.
Verse: 25     Gibót si then sar gáhun   \   then thes lídes sahun,
Verse: 26     so wás so er in giquáti,   \   iz íagiliher dati.
Verse: 27     Thar stuantun wázarfaz,   \   so thár in lante sítu was,
Verse: 28     then mánnon sus iowánne   \   sih zi wásganne.


p. 53r    


Manuscript page: 53r 
Verse: 29     Thaz warun séhs kruagi;   \   zi thíu was thar ginúagi,
Verse: 30     tho zi thén rachon,   \   thio drúhtin wolta máchon.
Verse: 31     Thaz méz, wir ofto zéllen   \   joh séxtari iz nénnen --
Verse: 32     nam íagilih in redinu   \   thrízug stunton zéhinu
Verse: 33     Odo zuíro zéhanzug,   \   thes duent búah thar gihúgt;
Verse: 34     warun stéininu thiu fáz,   \   siu mohtun wéren thes thiu báz.
Verse: 35     Gibót tho selbo drúhtin,   \   siu wázares irfúltin;
Verse: 36     thaz dátun sie giwurtig   \   unz in óbanentig.
Verse: 37     Tho quád er thaz sie skánctin,   \   zi themo héresten sih wántin,
Verse: 38     ther thero thríosezzo   \   was fúristo gimazzo.
Verse: 39     Drank ér tho so nan lústa;   \   er wíht es thoh ni wésta,
Verse: 40     es wiht ni quám imo ouh in wán,   \   theiz was fon wázare gidan.
Verse: 41     Thie mán thoh thie thar scanktun,   \   iz fílu wola irkántun,
Verse: 42     theiz wazzar lútaraz was,   \   tho sie fúltun thiu vaz.
Verse: 43     Then wírt er thara ládota   \   joh zi ímo nan gihólota,
Verse: 44     sih harto wúntorota sin   \   bi then frónisgan win.
Verse: 45     "Ságe mir nu, friunt mín,   \   wio dati só bi then win,
Verse: 46     thih sus es nu inthábetos,   \   so lángo nan gispáratos?
Verse: 47     Gíbit giwelih mánno,   \   ther fríunta frewit gérno,
Verse: 48     (ih weiz, thu es ínnana bist)   \   then fúriston io sar zi érist.
Verse: 49     So thie mán sih thanne irwínnent   \   joh drúnkanen bigínnent:


p. 53v    


Manuscript page: 53v 
Verse: 50     so skenkit állan then dag   \   súlih sos iz wésan mag.
Verse: 51     Ja gispáratos avur thú   \   then guaton wín unz in nú!
Verse: 52     ih scál thir ouh nu ráchon,   \   ni drénk ih thes gimáchon."
Verse: 53     Thiz zéichan deta druhtin Kríst   \   ménnisgon zi érist,
Verse: 54     síd er hera in wórolt quam   \   joh mannes líchamon nam.
Verse: 55     Er óugta sina kráft thar   \   joh sina gúallichi, theist wár;
Verse: 56     tho gilóubtun ekordị éine   \   thie júngoron síne.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.