TITUS
Otfrid von Weissenburg, Evangelienbuch
Part No. 42
Previous part

Chapter: 9  
p. 53v    

IX. SPIRITALITER.


Verse: 1     Thísu selba rédina   \   theih zálta nu hiar óbana,
Verse: 2     bréitit siu sih hárto   \   géistlichero wórto;
Verse: 3     Thoh wíll ih es mit wíllen   \   hiar étheswaz irzéllen,
Verse: 4     thaz wír ni werden éinon   \   thero goumano ádeilon,
Verse: 5     Thes wázares gisméken   \   joh wir then séns intheken,
Verse: 6     thaz frowon lídi thine   \   fon themo héilegen wine.
Verse: 7     Fernémet sar in ríhti,   \   thaz Krist ther brútigomo si,
Verse: 8     joh drúta sine in lánte   \   zi theru brúti ginante,
Verse: 9     Thier in hímilkamaru   \   irfúllit io mit gámanu
Verse: 10     blídliches múates   \   joh éwiniges gúates.
Verse: 11     Zéllu ih thir ouh hiar tház   \   bi thiu stéininun fáz:
Verse: 12     hérza iz sint gidígano   \   thero gotes drútthegano.
Verse: 13     Siu sint ínnana hól,   \   héileges giscríbes fol,


p. 54r    


Manuscript page: 54r 
Verse: 14     mit thiu sie únsih iagilícho   \   drenkent fráwalicho
Verse: 15     (Lútaran brúnnon   \   so scénkent sịẹ uns mit wúnnon;
Verse: 16     skal iz géistlichaz sín,   \   so skénkent sịẹ uns then gúatan win);
Verse: 17     Widar thiu ouh thánne   \   thie man firnément alle;
Verse: 18     so múgun sie mit rúachon   \   uns ságen in then búachon.
Verse: 19     Séhsu sint thero fázzo,   \   tház thu es weses wízo,
Verse: 20     thaz wórolt ist gidéilit,   \   in séhsu giméinit.
Verse: 21     Irsúachist thu thiu wúntar   \   inti ellu wóroltaltar,
Verse: 22     erzélist thu ouh thia gúati,   \   waz íagilicher dáti:
Verse: 23     Tharana maht thu irthénken,   \   mit brúnnen thih gidrénken,
Verse: 24     gifréwen ouh thie thíne   \   mit géistlichemo wíne.
Verse: 25     Ih zéllu thir in alawár:   \   luzil dránk ih es thar,
Verse: 26     lúzil ih es móhta   \   joh górag es gismákta;
Verse: 27     Ni thúhta mih theih quámi   \   thar sulih wín wari,
Verse: 28     odo io in ínheimon   \   zi súazeren goumon.
Verse: 29     Nu wíll ih hiar gizéllen,   \   ein bílidi ginénnen,
Verse: 30     thaz thaz firstántnissi   \   uns allen líhtera si.
Verse: 31     Druhtin kós imo einan wíni   \   untar wóroltmenigi,
Verse: 32     mán filu mári,   \   thaz er sin drút wari.
Verse: 33     Gibót thaz er irslúagi   \   (in thiu wás imo ginúagi)
Verse: 34     in ópheres wísun   \   sinan éinigan sun


p. 54v    


Manuscript page: 54v 
Verse: 35     In bérge thẹ er mo zéinti;   \   thaz er nan thára léitti,
Verse: 36     es ílti sar in gáhi,   \   thera líubi ni sáhi.
Verse: 37     In ímo er suazo lébeta,   \   zi hérzen er mo klébeta,
Verse: 38     wárd er mo ouh zi rúame   \   in sinemo áltduame.
Verse: 39     Wárd imo ouh thaz wúntar   \   zi skonen éron gidan,
Verse: 40     theiz wúrti ubar wórolt lut,   \   thaz er bi réhte was sin drut.
Verse: 41     Fúart er sar tho thárasun   \   then sélbon sinan drútsun;
Verse: 42     wólt er sar mit wíllen   \   thaz sin gibót irfullen.
Verse: 43     Thaz kínd thaz druag thaz wítu mit,   \   joh er iz hábeta furi niwíht,
Verse: 44     er fon thes fáter henti   \   tho thar dót wurti.
Verse: 45     Er avur wídorort ni wánt,   \   er er nan fásto gibant;
Verse: 46     er suórgata thero wórto,   \   bi thiu skéint er iz so hárto;
Verse: 47     In then álteri er nan légita,   \   so drúhtin imo ságeta,
Verse: 48     thia liabun séla sina   \   ufin thia wítavina;
Verse: 49     Jóh es ouh ni dualti,   \   suntar nan firbránti,
Verse: 50     er al irfúlti thuruh nót,   \   so druhtin sélbo gibot.
Verse: 51     So er thaz suért thenita,   \   ther éngil imo háreta,
Verse: 52     er híaz inan irwíntan;   \   thaz kínd lag thar gibúntan.
Verse: 53     Quád, er sih inthábeti,   \   ouh wíht imo ni dároti;
Verse: 54     joh tház er iz firbári,   \   quad, thar ginúag wari;
Verse: 55     In thíu, quad, wari fóllon   \   zi erkénnenne mánnon,


p. 55r    


Manuscript page: 55r 
Verse: 56     thaz er gót forahta,   \   tho er súlih werk wórahta;
Verse: 57     Joh sínero wórto   \   er hórta filu hárto,
Verse: 58     tho er in súlih thing gigíang,   \   so nah zi hérzen gifiang.
Verse: 59     Ein scaf er stántan gisah,   \   thaz was zem ópphere gimah;
Verse: 60     er sáh iz thar wérnon   \   in brámon mit then hórnon.
Verse: 61     Thaz gifíang er tho sár   \   inti oppherota iz góte thar:
Verse: 62     wéhsal gimúati   \   bi sines súnes guati!
Verse: 63     So wer thiz firnéman wolle:   \   héra losen sie álle;
Verse: 64     joh hérazua thénke,   \   thaz súazo er sih gidrénke.
Verse: 65     Drahto io zi gúate   \   so waz thir gót gibiate;
Verse: 66     ilị iz io irfúllen   \   mit míhilemo wíllen;
Verse: 67     Bilido ío filu frám   \   thesan héilegon man:
Verse: 68     so drínkist thu io mit wíllen   \   thes lúteren brunnen.
Verse: 69     Wil thu iz kléinor reken,   \   in wíne gisméken:
Verse: 70     fon Kríste scalt thu iz zéllen,   \   gisteist thu tház irwéllen.
Verse: 71     Lis sélbo, theih thir rédion,   \   in sínen evangélion,
Verse: 72     thar lísist thu io zi nóti   \   so sámalicho dáti.
Verse: 73     Láng ist iz zi ságanne,   \   wio iz químit al zisámane;
Verse: 74     iz mág man thoh irrénton   \   mit kúrzlichen wórton.
Verse: 75     Firnim in álawari,   \   thaz got ther fáter wari,
Verse: 76     joh thaz kínd eino   \   Krístan bizéino;


p. 55v    


Manuscript page: 55v 
Verse: 77     Then er zi tóde salta   \   bi únsih, sos er wólta,
Verse: 78     noh themo éinigen ni leip,   \   io so Páulus giscréip;
Verse: 79     Wio er sélbo druag thaz krúzi,   \   tho er thúlta thaz wízi,
Verse: 80     joh irstarp tháre   \   in thes cruces áltare;
Verse: 81     Ther líchamo iz thúlta,   \   thaz gótnissi ni wólta,
Verse: 82     sélb so untar génen thár   \   ward thaz wéhsal gidan.
Verse: 83     Háftetun thie ármon   \   in thes crúces hórnon,
Verse: 84     thie líuti inan thar námun,   \   so sélb thie selbun brámun;
Verse: 85     Sie háftun nan mit wúnton   \   bi únsen suaren súnton,
Verse: 86     joh hóntun nan bi hérton   \   mit iro scéltworton.
Verse: 87     Firnim in thésa wisun   \   thaz ih thir zálta bi then sún:
Verse: 88     ni drunki thu ío in war mín   \   alabéziron win.
Verse: 89     Ni tharft es dróf duellen;   \   wil thu alla wórolt zellen,
Verse: 90     sus máht thih al bithénken,   \   in zụá wisun drénken.
Verse: 91     Thaz giscríp in ríhti   \   irfúlli thu io mit máhti:
Verse: 92     so kúalist thu thih ófto   \   mit brunnen rédihafto;
Verse: 93     Joh húgi filu hárto   \   thero géistlichero wórto:
Verse: 94     so drenkist dráhta thine   \   mit frónisgemo wine.
Verse: 95     Thiu fáz thiu namun lídes   \   zuéi odo thríu mez,
Verse: 96     thaz thu námis in thin múat,   \   wio thie héilegun duent;
Verse: 97     Sie scribent fáter joh then sún   \   zi héiligeru wísun,


p. 56r    


Manuscript page: 56r 
Verse: 98     sumes óuh, so thu wéist,   \   then selbon héiligon géist.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.