TITUS
Otfrid von Weissenburg, Evangelienbuch
Part No. 47
Previous part

Chapter: 14  
p. 61v    

XIV. JESUS FATIGATUS EX ITINERE.


Verse: 1     Sid tho thésen thingon   \   fuar Krist zen héimingon,
Verse: 2     in selbaz géwi sinaz;   \   thio buah nénnent uns tház.
Verse: 3     Thera férti er ward irmúait,   \   so ofto fárantemo duit;
Verse: 4     ni lazent thie árabeit es fríst   \   themo wárlicho mán ist.
Verse: 5     Fúar er thuruh Samáriam,   \   zị einera burg er thar tho quám,
Verse: 6     in themo ágileize   \   zi éinemo gisáze.
Verse: 7     Tho gisaz er múader,   \   so wir gizáltun hiar nu ér,
Verse: 8     bi einemo brúnnen   \   (thaz wir ouh púzzi nennen).
Verse: 9     Ther evangélio thar quit,   \   theiz móhti wesan séxta zit;
Verse: 10     theist dages héizesta   \   joh árabeito méista.
Verse: 11     Thie júngoron iro zílotun,   \   in kóufe in múas tho hóletun,
Verse: 12     tház sie thes giflízzin,   \   mit selben Kríste inbizzin. --
Verse: 13     Unz drúhtin thar saz éino,   \   so quam ein wíb thara thó,
Verse: 14     tház si thes gizíloti,   \   thes wázares gihóloti.
Verse: 15     "Wíb", quad er innan thés,   \   "gib mir thes drínkannes;
Verse: 16     wírd mir zi gifúare,   \   thaz íh mih nu gikúale!"
Verse: 17     "Wio mág thaz", quad si, "wérdan   \   (thu bist júdiisger mán,
Verse: 18     inti ih bin thésses thietes!),   \   thaz thú mir so gibíetes?"
Verse: 19     Thaz óffonot Johannes thár,   \   bi hiu si só quad in wár,


p. 62e    


Manuscript page: 62r 
Verse: 20     bi wíu si thaz so zélita,   \   thaz drínkan so firságeta:
Verse: 21     Wánta thio zua líuti   \   ni eigun múas gimúati
Verse: 22     wérgin zi iro mázze   \   in éinemo fázze.
Verse: 23     "Óba thu", quad er, "dátist,   \   thia gotes gíft irknátis,
Verse: 24     joh wér thih bitit thánne   \   ouh hiar zi drínkanne:
Verse: 25     Thu batis ínan odo sár,   \   er gábi thir in alawár
Verse: 26     zi líebe joh zi wúnnon   \   spríngentan brúnnon."
Verse: 27     "Ni hábes", quad si, "fró min,   \   fazzes wíht zi thiu heraín,
Verse: 28     thu herazúa gilepphes,   \   wiht thésses sar giscépphes.
Verse: 29     Waz mag ih zéllen thir ouh mér?   \   ther púzz ist filu díofer;
Verse: 30     war nimist thu thánne ubar tház   \   wazar flíazzantaz?
Verse: 31     Fúrira, wán ih, thu ni bíst   \   thanne únser fater Jácob ist;
Verse: 32     er dránk es, sọ ih thir zéllu,   \   joh sinu kínd ellu.
Verse: 33     Er wóla iz al bitháhta,   \   thaz er mit thíu nan wíhta,
Verse: 34     joh gáb uns ouh zi núzzi   \   thésan selbon púzzi."
Verse: 35     Quad unser drúhtin zi iru thó:   \   "firnim nu, wíb, theih rédino;
Verse: 36     firním thiu wórt ellu   \   thiu íh thir hiar nu zéllu.
Verse: 37     Ther thuruh thúrst githénkit,   \   thaz thésses brunnen drínkit,
Verse: 38     nist láng zi themo thínge,   \   nub ávur nan thúrst githuínge;
Verse: 39     Ther ávur untar mánnon   \   niuzit mínan brunnon,
Verse: 40     then íh imo thánne   \   gibu zi drínkanne:


p. 62v    


Manuscript page: 62v 
Verse: 41     Thúrst then mer ni thuíngit,   \   want er in ímo spríngit;
Verse: 42     ist imo kúali thrato   \   in éwon mámmonto."
Verse: 43     "Thu mohtis", quád siu, "einan rúam   \   joh ein gifúari mir gidúan,
Verse: 44     mit themo brúnnen, thu nu quíst,   \   mih wénegun gidránktist;
Verse: 45     Theih zes púzzes diufi   \   sus émmizen ni líafi,
Verse: 46     theih thuruh thíno guati   \   bimidi thio árabeiti."
Verse: 47     "Hólo", quad er, "sar zi érist   \   thinan gómman thar er íst;
Verse: 48     so zílot iuer héra sar:   \   ih zellu iu béthen thaz war."
Verse: 49     "Ih ni háben", quad siu, "in wár   \   wiht gómmannes sár."
Verse: 50     gab ántwurti gimúati   \   sínes selbes gúati:
Verse: 51     "Thu sprachi in wár nu so zám,   \   thú ni habes gómman;
Verse: 52     giwisso zéllu ih thir nú:   \   finfi hábotost thu jú.
Verse: 53     Then thu afur nú úabis   \   joh thir zi thíu liubis --
Verse: 54     want ér giwisso thín nist,   \   bi thiu spráchi thu so iz wár ist."
Verse: 55     "Min múat", quad si, "dúat mih wís,   \   thaz thu fórasago sís;
Verse: 56     thinu wórt nu zelitun,   \   thaz mán thir er ni ságetun.
Verse: 57     Unsere áltfordoron   \   thie bétotun hiar in bérgon;
Verse: 58     giwisso wán ih nu thés,   \   thaz thú hiar bita ouh súaches.
Verse: 59     Quédet ir ouh Júdeon nu,   \   thaz sí zi Hierosólimu
Verse: 60     stát filu ríchu   \   zi thiu gilúmpflichu!"
Verse: 61     "Wíb", quad er, "ih ságen thir,   \   thaz gilóubi thu mir:


p. 63r    


Manuscript page: 63r 
Verse: 62     quément noh thio zíti   \   ménnisgon bi nóti,
Verse: 63     Thaz ir noh híar noh ouh thár   \   ni betot then fáter, thaz ist wár.
Verse: 64     giwisso, ir bétot alla fríst   \   thaz iu únkundaz íst;
Verse: 65     Wir selbe béton avur thár   \   tház wir wizun álawar;
Verse: 66     wanta héil, so ih rédion,   \   thaz químit fon then Júdion.
Verse: 67     Thoh químit noh thera zíti fríst   \   joh óuh nu géginwertig íst,
Verse: 68     thaz bétont ware bétoman   \   then fater géistlicho frám;
Verse: 69     Want er súachit filu frám   \   thráto rehte bétoman,
Verse: 70     thaz sie nan géistlicho   \   béton iogilícho.
Verse: 71     Ther géist ther ist drúhtin   \   mit fílu hohen máhtin;
Verse: 72     mit wáru wilit ther gótes geist,   \   tház man inan béto meist."
Verse: 73     Sí nam gouma hárto   \   thero drúhtines wórto,
Verse: 74     joh kérta tho mit wórte   \   zi diafemo ántwurte.
Verse: 75     "Ein mán ist uns gihéizan   \   joh scal ouh Kríst heizan,
Verse: 76     uns duit sin kúnft noh wánne   \   thaz al zi wízanne,
Verse: 77     Irréchit uns sin gúati   \   allo théso dati,
Verse: 78     ouh scóno joh giríngo   \   mánagero thíngo."
Verse: 79     Gáb iru mit mílti   \   tho druhtin ántwurti:
Verse: 80     "thaz bin íh, giloubi mír,   \   ih hiar spríchu mit thír!"
Verse: 81     Tho quamun thie júngoron innan thes:   \   sie wuntar was thes thínges,
Verse: 82     sih wúntorotun harto   \   iro zueio wórto;


p. 63v    


Manuscript page: 63v 
Verse: 83     Thaz síh liaz thiu sin díuri   \   mit ótmuati so nídiri,
Verse: 84     thaz thaz éwiniga lib   \   lérta thar ein armaz wíb.
Verse: 85     So slíumo siu gihorta tház,   \   firwarf si sár io thaz fáz,
Verse: 86     ílta in thia búrg in   \   zen liutin, ságeta thiz al ín.
Verse: 87     "Quémet", quad si, "séhet then mán   \   ther mir thaz állaz brahta frám;
Verse: 88     mit wórton mir al zélita   \   so waz sih mit wérkon sitota,
Verse: 89     Scal iz Kríst sin, fro min?   \   ih spríchu bi then wánin;
Verse: 90     thaz selba spríchu ih bi thíu,   \   iz ist gilíh filu thíu.
Verse: 91     Bi then gidóugnen séginin   \   so thúnkit mih theiz megi sín;
Verse: 92     er ál iz untarwésta   \   thes míh noh io gilústa."
Verse: 93     Sie íltun tho bi mánne   \   fon theru búrg alle,
Verse: 94     íltun al bi gáhin,   \   tház sie nan gisáhin.
Verse: 95     Innan thés batun thár   \   thie júngoron then méistar,
Verse: 96     tház er thar gisázi   \   zi dágamuase inti ázi.
Verse: 97     Er quad, er múas habeti,   \   sos ér in thar tho ságeti,
Verse: 98     mit súazlichen gilústin,   \   thóh sies wiht ni wéstin.
Verse: 99     Ín quam tho in githáhti,   \   tház man imo iz bráhti,
Verse: 100     unz se odo wárun zi theru búrg   \   koufen iro nótthurft.
Verse: 101     "Min múas ist", quad er, "fóllo   \   mines fáter willo,
Verse: 102     theih émmizen irfúlle   \   so wáz sọ er selbo wólle.
Verse: 103     Ir quedet in álawari,   \   thaz mánodo sin noh fíari,


p. 64r    


Manuscript page: 64r 
Verse: 104     thaz thanne sí, so man quít,   \   reht árnogizit.
Verse: 105     Nu sehet, mit then óugon   \   biginnet úmbiscowon:
Verse: 106     nist ákar hiar in ríche,   \   nub ér zi thiu nu bléiche;
Verse: 107     Ni síe zi thiu sih máchon,   \   sos íh iu hiar nu ráchon,
Verse: 108     thaz frúma thie gibúra   \   fuaren in thia scúra.
Verse: 109     Ih sánta íuih árnon:   \   ir ni sátut tho thaz kórn,
Verse: 110     gíangut ir bi nóti   \   in ándererọ árabeiti."
Verse: 111     Gilóubta thero líuto   \   fílu thar tho thráto,
Verse: 112     thie thara zi ímo quamun,   \   thia léra firnámun.
Verse: 113     Gimuatfágota er tho ín,   \   was zuene dága thar mit ín;
Verse: 114     mílti sino ịz dátun,   \   so síe nan thar tho bátun.
Verse: 115     Gilóubta iro ouh tho in wára   \   fílu harto méra,
Verse: 116     wanta sin sélbes lera   \   thiu wás in harto méra.
Verse: 117     Spráchun sie tho blíde   \   zi thémo selben wíbe
Verse: 118     thiu erist thára in thia búrg   \   déta sina kúnft kund:
Verse: 119     "Ni gilóuben wir in wára   \   thuruh thia thína lera,
Verse: 120     nu uns thiu frúma irréimta,   \   thaz ér uns selbo zéinta;
Verse: 121     Nu wízun in álawari   \   thaz er ist héilari,
Verse: 122     thaz ér quam hera zi wórolti,   \   er ménnisgon ginériti."


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.