TITUS
Otfrid von Weissenburg, Evangelienbuch
Part No. 48
Previous part

Chapter: 15  
p. 64r    

XV. FAMA EXIIT QUOD IN GALILAEAM VENIT.


Verse: 1     Fúar tho druhtin thánana   \   sid tho thérera redina,


p. 64v    


Manuscript page: 64v 
Verse: 2     sid tho thémo thinge   \   zi themo héiminge.
Verse: 3     Es máru wort tho quámun   \   so wit so Sýri warun,
Verse: 4     so wít so Galiléa bifiang;   \   ther liut ingégin aller gíang;
Verse: 5     Thaz mári ward ouh mánagfalt   \   ubar Júdeono lant,
Verse: 6     ubar líuti manage,   \   thie fúarun al zisámane.
Verse: 7     Sie gérotun al bi mánne   \   inan zi rínanne,
Verse: 8     joh sih zen sínen guatin   \   io étheswaz gifúagtin.
Verse: 9     Thie bráhtun imo ingégini   \   síechero manno ménigi,
Verse: 10     bifangan mit úmmahtin   \   joh míssilichen súhtin;
Verse: 11     Sie héilt er sos er móhta,   \   thio súntạ ouh thána fluhta,
Verse: 12     leh in líb inti gúat   \   joh harto fráwalichaz múat.
Verse: 13     So er thó gisah thia ménigi   \   al quéman imo ingégini,
Verse: 14     mit ougon blíden er sie intfíang   \   joh úfan einan bérg giang.
Verse: 15     So druhtin sélbo thar gisáz   \   (thes uns íamer ist thiu báz,
Verse: 16     wir iamer blíde in wara   \   súlichera léra!):
Verse: 17     Tho gíangun thie gisuáson   \   náhor, so sie múasun,
Verse: 18     liob héreron mine,   \   thie júngoron sine.
Verse: 19     Indét er tho then sinan múnd,   \   theist íamer ubar wórolt kund,
Verse: 20     tharínne lag, so er wésta,   \   dreso díurista.
Verse: 21     Bigónd er thaz tho spénton   \   sínes selbes wórton,
Verse: 22     det er then líutin mit thiu dróst,   \   then júngoron thoh zi hérost:


p. 65r    


Manuscript page: 65r 
Verse: 23     Síe bigan er scówon   \   fráwalichen óugon,
Verse: 24     grúazt er sie zi gúate   \   sus suáslichemo múate:


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.