TITUS
Otfrid von Weissenburg, Evangelienbuch
Part No. 49
Previous part

Chapter: 16  
p. 65r    

XVI. DE VIII BEATITUDINIBUS.


Verse: 1     "Sálig birut ir árme   \   in thiu thaz múat iz wolle,
Verse: 2     in thiu ir thie ármuati   \   githúltet io mit gúati;
Verse: 3     Wanta íuer ist, ih sagen iu tház,   \   thaz hímilrichi hóhaz,
Verse: 4     thiu wúnna joh ouh mánag guat;   \   bi thiu mag sih fréwen íuer múat. --
Verse: 5     Sálige thie mílte   \   joh muates mámmunte,
Verse: 6     thie iro múates waltent   \   joh brúaderscaf giháltent;
Verse: 7     Búent sie in wára   \   érda filu mára;
Verse: 8     ther híar then bú biwirbit,   \   er íamer thar nirstirbit. --
Verse: 9     Sálig sint zi gúate   \   thie rózegemo múate,
Verse: 10     wanta in firtílot thaz sér   \   dróst filu mánager;
Verse: 11     Joh gifréwit in thaz múat   \   hárto filu mánag guat,
Verse: 12     firtílot in thia smérza   \   joh rózagaz hérza. --
Verse: 13     Gúataliches wáltent,   \   thie thurst joh húngar thultent,
Verse: 14     thie io thes réhtes gingent,   \   joh thárazua githíngent;
Verse: 15     Sie werdent étheswanne   \   mit sétị es filu fólle,
Verse: 16     thaz gúates sie ginúagon   \   éigun unz in éwon. --
Verse: 17     Salig thie ármherze,   \   joh thie ármu wihti smérze,
Verse: 18     then múat zi thiu gigánge   \   thaz iro léid sie irbarme;


p. 65v    


Manuscript page: 65v 
Verse: 19     Sie quement scíoro ana nót   \   thár man in ginádot,
Verse: 20     thar man gihéilit iro múat   \   joh filu líebes giduat. --
Verse: 21     Iu ist sálida giméinit   \   in thiu ir herza réinaz eigit;
Verse: 22     ir sculut mit súlichen óugon   \   selbon drúhtin scowon;
Verse: 23     Ir scúlut io thes gigáhen,   \   mit súlichụ íuih náhen,
Verse: 24     mit réinidon ginuagen   \   zi drúhtine íuih fúagen. --
Verse: 25     Thie frídusame ouh sálig,   \   thie in herzen ni éigun niheinaz wíg,
Verse: 26     mit thíu sie thaz giweizent,   \   sie gotes kínd heizent;
Verse: 27     Got gíbit in zi lónon   \   then selbon námon sconon,
Verse: 28     joh dúit in thaz gimúati   \   mit thes námen guati. --
Verse: 29     Sálig thie in nóti   \   thultent árabeiti,
Verse: 30     then man bi íro guati   \   duit ofto wídarmuati;
Verse: 31     Sie wérdent filu riche   \   in themo hohen hímilriche,
Verse: 32     in thíu sie iz iogilícho   \   firdragen fráwalicho.
Verse: 33     Ni dúet iu iz ouh zi rúachon,   \   oba iu thie líuti flúachon;
Verse: 34     íu quimit sálida thiu mer   \   thaz síe so ahtent íuer.
Verse: 35     Thanne se zéllent thuruh mih   \   al úbil anan íuih
Verse: 36     (thaz ni híluh íuih):   \   thaz líegent siẹ ál thuruh mih.
Verse: 37     Blíthet íuih múates   \   joh harto fréwet íuih thes,
Verse: 38     íu ist in hímile thuruh tház   \   mihil lón garawaz.
Verse: 39     Iro ánon ouh so dátun,   \   thero fórasagono áhtun;


p. 66r    


Manuscript page: 66r 
Verse: 40     bi thiu ni lázet iu iz in wár   \   wesan hárto filu suar.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.