TITUS
Otfrid von Weissenburg, Evangelienbuch
Part No. 50
Previous part

Chapter: 17  
p. 66r    

XVII. VOS ESTIS SAL TERRAE, ET: VOS ESTIS LUX MUNDI.


Verse: 1     Ir bírut mihil wérda   \   salz therera érda,
Verse: 2     íueraz giráti   \   scal salzan wóroltdati;
Verse: 3     Tház sie mit then wúnton   \   nirfúlen in then súnton,
Verse: 4     noh mit thémo meine   \   ni werden zi áz eine;
Verse: 5     Ir síe, sọ ih íuih héize,   \   gidúet mir filu súaze,
Verse: 6     joh io mír in múate   \   sie líubet zi gúate.
Verse: 7     Oba iz zi thíu wirdit,   \   thaz thaz sálz firwirdit:
Verse: 8     wer fíndit untar mánne,   \   mit wiu man gisálze iz thanne?
Verse: 9     Zi wíhtu iz sid ni hílfit,   \   ni si tház man iz firwírfit;
Verse: 10     zi thíu ist iz thoh gimúati,   \   theiz dréten thar thie líuti.
Verse: 11     Ir birut óuh ubar thaz   \   in lioht scínantaz
Verse: 12     in thesemo érdringe,   \   thaz worolt írri ni ge.
Verse: 13     Nist búrg thaz sih gibérge,   \   thiu sténtit ufan bérge,
Verse: 14     in hóhemo nólle,   \   thoh siz gérno wolle.
Verse: 15     Ni brénnit man ouh thuruh tház   \   giwísso sinaz líohtfaz,
Verse: 16     tház er iz biwélze,   \   mit múttu bistúrze;
Verse: 17     Suntar thés gihelfe,   \   thaz er iz irhéffe
Verse: 18     úfan hohaz kérzistal,   \   thaz iz líuhte ubar al.
Verse: 19     Sáma ni mag iz wérdan,   \   tház ir sit gibórgan;


p. 66v    


Manuscript page: 66v 
Verse: 20     ófan weset thrato   \   íues selbes dáto!
Verse: 21     Ni liuhte líoht íuer,   \   man íuih lóbon thes thiu mér,
Verse: 22     odo man thío mehti   \   zéllen íu zi kréfti;
Verse: 23     Suntar thie siu scówon,   \   sih fora góte frowon,
Verse: 24     joh góte thero wérko   \   mánnilih githánko!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.