TITUS
Edda
Part No. 26
Previous part

Song: Gdhr.II 
Strophe: 1 
GUÐRÚNARQVIÐA (ǪNNOR).


Verse: 1    Mær var ec meyia, móðir mic foddi,
Verse: 2    biort, í búri, unna ec vel broðrom;
Verse: 3    unz mic Giúki gulli reifði,
Verse: 4    gulli reifði, gaf Sigurði.

Strophe: 2 
Verse: 1    Svá var Sigurðr uf sonom Giúca,
Verse: 2    sem væri gronn laucr ór grasi vaxinn,
Verse: 3    eða hiortr hábeinn um hvǫssom dýrom,
Verse: 4    eða gull glóðrautt af grá silfri.

Strophe: 3 
Verse: 1    Unz mér fyrmunðo mínir broðr,
Verse: 2    at ec ætta ver ǫllom fremra;
Verse: 3    sofa þeir né máttoð né of sacar doma,
Verse: 4    áðr þeir Sigurð svelta létoð.

Strophe: 4 
Verse: 1    Grani rann at þingi, gnýr var at heyra,
Verse: 2    enn þá Sigurðr siálfr eigi kom;
Verse: 3    ǫll vóro sǫðuldýr sveita stoccin,
Verse: 4    oc of vanið vási und vegondom.

Strophe: 5 
Verse: 1    Gecc ec grátandi við Grana roða,
Verse: 2    úrughlýra, ió frá ec spialla;
Verse: 3    hnipnaði Grani þá, drap í gras hǫfði;
Verse: 4    iór þat vissi: eigendr né lifðot.

Strophe: 6 
Verse: 1    Lengi hvarfaðac, lengi hugir deilduz,
Verse: 2    áðr ec of frægac fólcvorð at gram.

Strophe: 7 
Verse: 1    Hnipnaði Gunnarr, sagði mér Hǫgni
Verse: 2    frá Sigurðar sárom dauða:
Verse: 3    "Liggr of hǫggvinn fyr handan ver
Verse: 4    Gothorms bani, of gefinn úlfom.

Strophe: 8 
Verse: 1    Líttu þar Sigurð á suðrvega!
Verse: 2    þá heyrir þú hrafna gialla,
Verse: 3    ǫrno gialla, æzli fegna,
Verse: 4    varga þióta um veri þínom."

Strophe: 9 
Verse: 1    "Hví þú mér, Hǫgni, harma slíca,
Verse: 2    vilia laussi, vill um segia?
Verse: 3    þitt scyli hiarta hrafnar slíta
Verse: 4    víð lǫnd yfir, enn þú vitir manna."

Strophe: 10 
Verse: 1    Svaraði Hǫgni sinni eino,
Verse: 2    trauðr góðs hugar, af trega stórom:
Verse: 3    "Þess áttu, Guðrún, groti at fleiri,
Verse: 4    at hiarta mitt hrafnar slíti."

Strophe: 11 
Verse: 1    Hvarf ec ein þaðan, annspilli frá,
Verse: 2    á við, lesa varga leifar;
Verse: 3    gerðiga ec hiúfra né hǫndom slá,
Verse: 4    né kveina um sem konor aðrar,
Verse: 5    þá er sat soltin um Sigurði.

Strophe: 12 
Verse: 1    Nótt þótti mér niðmyrcr vera,
Verse: 2    er ec sárla satc yfir Sigurði;
Verse: 3    úlfar þóttomz ǫllo betri,
Verse: 4    ef þeir léti mic lífi týna
Verse: 5    eða brendi mic sem birkinn við.

Strophe: 13 
Verse: 1    Fór ec af fialli fimm dogr talið,
Verse: 2    unz ec hǫll Hálfs, háva, þecþac.

Strophe: 14 
Verse: 1    Sat ec með Þóro siau misseri,
Verse: 2    dotr Háconar, í Danmorco;
Verse: 3    hon mér at gamni gullbócaði
Verse: 4    sali suðrona oc svani dansca.

Strophe: 15 
Verse: 1    Hǫfðo við á scriptom, þat. er scatar léco,
Verse: 2    oc á hannyrðom hilmis þegna,
Verse: 3    randir rauðar, recca Húna,
Verse: 4    hiordrót, hiálmdrót, hilmis fylgio.

Strophe: 16 
Verse: 1    Scip Sigmundar scriðo frá landi,
Verse: 2    gyltar grímor, grafnir stafnar;
Verse: 3    byrðo við á borða, þat er þeir bǫrðuz,
Verse: 4    Sigarr oc Siggeirr, suðr á Fióni.

Strophe: 17 
Verse: 1    Þá frá Grímildr, gotnesc kona,
Verse: 2    hvat ec væra hyggiuð;
Verse: 3    hon brá borða oc buri heimti,
Verse: 4    þrágiarnliga, þess at spyria,
Verse: 5    hverr vildi son systor bota,
Verse: 6    eða ver veginn vildi gialda.

Strophe: 18 
Verse: 1    Gerr léz Gunnarr gull at bióða,
Verse: 2    sacar at bota, oc iþ sama Hǫgni;
Verse: 3    hon frétti at því, hverr fara vildi
Verse: 4    vigg at sǫðla, vagn at beita,
Verse: 5    hesti ríða, hauki fleygia,
Verse: 6    ǫrom at scióta af ýboga.

Strophe: 19 
Verse: 1    Valdarr Dǫnom með Iarizleifi,
Verse: 2    Eymóðr þriði með Iarizscári;
Verse: 3    inn gengo þá, iofrom líkir,
Verse: 4    Langbarðz liðar, hǫfðo loða rauða,
Verse: 5    screyttar brynior, steypta hiálma,
Verse: 6    scálmom girðir, hǫfðo scarar iarpar.

Strophe: 20 
Verse: 1    Hverr vildi mér hnossir velia,
Verse: 2    hnossir velia oc hugat mæla,
Verse: 3    ef þeir mætti mér margra súta
Verse: 4    trygðir vinna, né ec trúa gerðac.

Strophe: 21 
Verse: 1    Forði mér Grímildr full at drecca,
Verse: 2    svalt oc sárlict, né ec sacar munðac;
Verse: 3    þat var um aukit urðar magni,
Verse: 4    svalkǫldom sæ oc sonardreyra.

Strophe: 22 
Verse: 1    Vóro í horni hvers kyns stafir
Verse: 2    ristnir oc roðnir - ráða ec né máttac -,
Verse: 3    lyngfiscr langr, lanz Haddingia
Verse: 4    ax óscorit, innleið dýra.

Strophe: 23 
Verse: 1    Vóro þeim bióri bǫl mǫrg saman,
Verse: 2    urt allz viðar oc acarn brunninn,
Verse: 3    umdǫgg arins, iðrar blótnar,
Verse: 4    svíns lifr soðin, þvíat hon sacar deyfði.

Strophe: 24 
Verse: 1    Enn þá gleymðo, er getið hǫfðo,
Verse: 2    ǫll iofurs iórbiúg í sal;
Verse: 3    qvómo konungar fyr kné þrennir,
Verse: 4    áðr hon siálfa mic sótti at máli.

Strophe: 25 
Verse: 1    "Gef ec þér, Guðrún, gull at þiggia,
Verse: 2    fiolð allz fiár, at þinn fǫður dauðan,
Verse: 3    hringa rauða, Hlǫðvés sali,
Verse: 4    ársal allan, at iofur fallinn.

Strophe: 26 
Verse: 1    Húnscar meyiar, þær er hlaða spioldom
Verse: 2    oc gora gull fagrt, svá at þér gaman þicci;
Verse: 3    ein scaltu ráða auði Buðla,
Verse: 4    gulli gǫfguð oc gefin Atla."

Strophe: 27 
Verse: 1    "Vilc eigi ec með veri ganga
Verse: 2    né Brynhildar bróður eiga;
Verse: 3    samir eigi mér, við son Buðla
Verse: 4    ætt at auca né una lífi."

Strophe: 28 
Verse: 1    "Hirðaðu hǫlðom heiptir gialda,
Verse: 2    þvíat vér hǫfom valdit fyrri;
Verse: 3    svá scaltu láta, sem þeir lifi báðir,
Verse: 4    Sigurðr oc Sigmundr, ef þú sono foðir."

Strophe: 29 
Verse: 1    "Máca ec, Grímildr, glaumi bella
Verse: 2    né vígrisins vánir telia,
Verse: 3    síz Sigurðar sárla drucco
Verse: 4    hrægífr, Huginn hiartblóð saman."

Strophe: 30 
Verse: 1    "Þann hefi ec allra ættgǫfgastan
Verse: 2    fylki fundit, oc framarst necqvi;
Verse: 3    hann scaltu eiga, unz þic aldr viðar,
Verse: 4    verlaus vera, nema þú vilir þenna."

Strophe: 31 
Verse: 1    "Hirða þú bióða bǫlvafullar,
Verse: 2    þrágiarnliga, þær kindir mér!
Verse: 3    Hann mun Gunnar grandi beita
Verse: 4    oc ór Hǫgna hiarta slíta.
Verse: 5    Muncað ec letia, áðr lífshvatan
Verse: 6    eggleics hvǫtuð aldri næmic."

Strophe: 32 
Verse: 1    Grátandi Grímildr greip við orði,
Verse: 2    er burom sínom bǫlva vætti
Verse: 3    oc mǫgom sínom meina stórra:

Strophe: 33 
Verse: 1    "Lǫnd gef ec enn þér, lýða sinni,
Verse: 2    Vínbiorg, Valbiorg, ef þú vill þiggia;
Verse: 3    eigðu um aldr þat oc uni, dóttir!"

Strophe: 34 
Verse: 1    "Þann mun ec kiósa af konungom
Verse: 2    oc þó af niðiom nauðig hafa;
Verse: 3    verðr eigi mér verr at ynði,
Verse: 4    né bǫl broðra at bura scióli."

Strophe: 35 
Verse: 1    Senn var á hesti hverr drengr lítinn,
Verse: 2    enn víf valnesc hafit í vagna;
Verse: 3    vér siau daga svalt land riðom,
Verse: 4    enn aðra siau unnir kníðom.
Verse: 5    Enn ina þriðio siau þurt land stigom.

Strophe: 36 
Verse: 1    Þar hliðverðir hárar borgar
Verse: 2    grind upp luco, áðr í garð riðom.

Strophe: 37 
Verse: 1    Vacþi mic Atli, enn ec vera þóttomz
Verse: 2    full illz hugar at frondr dauða.

Strophe: 38 
Verse: 1    "Svá mic nýliga nornir vekia,
Verse: 2    vílsinnis spá vildi at ec réða;
Verse: 3    hugða ec þic, Guðrún, Giúca dóttir,
Verse: 4    læblǫndnom hior leggia mic í gognom."

Strophe: 39 
Verse: 1    "Þat er fyr eldi, er iárn dreyma,
Verse: 2    fyr dul oc vil drósar reiði;
Verse: 3    mun ec þic við bǫlvi brenna ganga,
Verse: 4    lícna oc læcna, þótt mér leiðr sér."

Strophe: 40 
Verse: 1    "Hugða ec hér í túni teina fallna,
Verse: 2    þá er ek vildigac vaxna láta,
Verse: 3    rifnir með rótom, roðnir í blóði,
Verse: 4    bornir á becci, beðit mic at tyggva.

Strophe: 41 
Verse: 1    Hugða ec mér af hendi hauca fliúga,
Verse: 2    bráða lausa, bǫlranna til;
Verse: 3    hiorto hugða ec þeira við hunang tuggin,
Verse: 4    sorgmóðs sefa, sollin blóði.

Strophe: 42 
Verse: 1    Hugða ec mér af hendi hvelpa losna,
Verse: 2    glaums andvana, gylli báðir;
Verse: 3    hold hugða ec þeira at hræom orðit,
Verse: 4    nauðigr nái nýta ec scyldac."

Strophe: 43 
Verse: 1    "Þar muno seggir um soing doma
Verse: 2    oc hvítinga hǫfði næma;
Verse: 3    þeir muno feigir fára nátta
Verse: 4    fyr dag litlo dróttom bergia."

Strophe: 44 
Verse: 1    "Læga ec síðan - né ec sofa vildac -
Verse: 2    þrágiarn í kǫr; þat man ec gorva."




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.