TITUS
Edda
Part No. 27
Previous part

Song: Gdhr.III 
Strophe: 1 
Capitulum.


Verse: 2    Herkia hét ambót Atla; hon hafði verið frilla hans.
Verse: 3    Hon sagði Atla, at hon hefði séð Þióðrec oc Guðrúno bæði
Verse: 4    saman. Atli var þá allókátr. Þá qvað Guðrún:


GUÐRÚNARQVIÐA (IN ÞRIÐIA).


Verse: 1    "Hvat er þér, Atli? æ, Buðla sonr,
Verse: 2    - er þér hryggt í hug; hví hlær þú æva?
Verse: 3    hitt myndi oðra iorlom þiccia,
Verse: 4    at við menn mæltir ok mic sæir."

Strophe: 2 
Verse: 1    "Tregr mic þat, Guðrún, Giúca dóttir:
Verse: 2    mér í hǫllo Herkia sagði,
Verse: 3    at þit Þióðrecr undir þaki svæfit
Verse: 4    oc léttliga líni verðiz."

Strophe: 3 
Verse: 1    "Þér mun ec allz þess eiða vinna,
Verse: 2    at inom hvíta helga steini,
Verse: 3    at ec við Þióðmars son þatki áttac,
Verse: 4    er vorð né verr vinna knátti.

Strophe: 4 
Verse: 1    Nema ec hálsaða heria stilli,
Verse: 2    iofur óneisinn, eino sinni;
Verse: 3    aðrar vóro ocrar spekior,
Verse: 4    er við hǫrmug tvau hnígom at rúnom.

Strophe: 5 
Verse: 1    Hér kom Þióðrecr með þriá togo,
Verse: 2    lifa þeir né einir, þriggia tega manna;
Verse: 3    hrincto mic at broðrom oc at brynioðom,
Verse: 4    hrincto mic at ǫllom haufuðniðiom.

Strophe: 6 
Verse: 1    Sentu at Saxa, sunnmanna gram!
Verse: 2    hann kann helga hver vellanda."

Strophe: 7 
Verse: 1    Siau hundruð manna í sal gengo,
Verse: 2    áðr qvæn konungs í ketil toki.

Strophe: 8 
Verse: 1    "Kemra nú Gunnarr, kalliga ec Hǫgna,
Verse: 2    sécca ec síðan svása broðr;
Verse: 3    sverði myndi Hǫgni slícs harms reca,
Verse: 4    nú verð ec siálf fyr mic synia lýta."

Strophe: 9 
Verse: 1    Brá hon til botz biortom lófa,
Verse: 2    oc hon up um tóc iarcnasteina:
Verse: 3    "Sé nú seggir - sycn em ec orðin,
Verse: 4    heilagliga -, hvé siá hverr velli."

Strophe: 10 
Verse: 1    Hló þá Atla hugr í briósti,
Verse: 2    er hann heilar sá hendr Guðrúnar:
Verse: 3    "Nú scal Herkia til hvers ganga,
Verse: 4    sú er Guðrúno grandi vænti."

Strophe: 11 
Verse: 1    Sáat maðr armlíct, hverr er þat sáat,
Verse: 2    hvé þar á Herkio hendr sviðnoðo;
Verse: 3    leiddo þá mey í mýri fúla,
Verse: 4    svá þá Guðrún sinna harma.




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.