TITUS
Edda
Part No. 29
Previous part

Song: Akv. 
Strophe: 0 
(Dauði Atla.)


Verse: 1    Guðrún, Giúca dóttir, hefndi broðra sinna, svá sem
Verse: 2    frægt er orðit: hon drap fyrst sono Atla, enn eptir drap
Verse: 3    hon Atla oc brendi hǫllina oc hirðina alla. Um þetta er
Verse: 4    siá qviða ort.


Strophe: 1 
ATLAQVIÐA IN GRONLENZCA.


Verse: 1    Atli sendi ár til Gunnars
Verse: 2    kunnan segg at ríða, Knéfrǫðr var sá heitinn;
Verse: 3    at gǫrðom kom hann Giúca oc at Gunnars hǫllo,
Verse: 4    becciom aringreypom oc at bióri svásom.

Strophe: 2 
Verse: 1    Drucco þar dróttmegir - enn dyliendr þǫgðo-
Verse: 2    vín í valhǫllo, vreiði sáz þeir Húna;
Verse: 3    kallaði þá Knéfrǫðr kaldri rǫddo,
Verse: 4    seggr inn suðroni - sat hann á becc hám -:

Strophe: 3 
Verse: 1    "Atli mic hingat sendi ríða ørindi,
Verse: 2    mar inom mélgreypa, Myrcvið inn ókunna,
Verse: 3    at biðia yðr, Gunnarr, at iþ á becc komit,
Verse: 4    með hiálmom aringreypom, at sokia heim Atla.

Strophe: 4 
Verse: 1    Scioldo knegoð þar velia oc scafna asca,
Verse: 2    hiálma gullroðna oc Húna mengi,
Verse: 3    silfrgylt sǫðulklæði, serki valrauða,
Verse: 4    dafar, darraða, drǫsla mélgreypa.

Strophe: 5 
Verse: 1    Vǫll léz ycr oc mundo gefa víðrar Gnitaheiðar,
Verse: 2    af geiri giallanda oc af gyltom stǫfnom,
Verse: 3    stórar meiðmar oc staði Danpar,
Verse: 4    hrís þat iþ mora, er meðr Myrcvið kalla."

Strophe: 6 
Verse: 1    Hǫfði vatt þá Gunnarr oc Hǫgna til sagði:
Verse: 2    "Hvat ræðr þú ocr, seggr inn ori, allz við slíct heyrom?
Verse: 3    gull vissa ec ecci á Gnitaheiði,
Verse: 4    þat er við ættima annat slíct.

Strophe: 7 
Verse: 1    Siau eigo við salhús, sverða full,
Verse: 2    hverio ero þeira hiolt ór gulli;
Verse: 3    minn veit ec mar beztan, enn mæki hvassastan,
Verse: 4    boga beccsoma, enn brynior ór gulli,
Verse: 5    hiálm oc sciold hvítastan, kominn ór hǫll Kiárs;
Verse: 6    einn er minn betri, enn sé allra Húna."

Strophe: 8 
Verse: 1    "Hvat hyggr þú brúði bendo, þá er hon ocr
Verse: 2    baug sendi,
Verse: 3    varinn váðom heiðingia? hygg ec, at hon vornuð
Verse: 4    byði;
Verse: 5    hár fann ec heiðingia ríðit í hring rauðom:
Verse: 6    ylfscr er vegr occarr, at ríða ørindi."

Strophe: 9 
Verse: 1    Niðiargi hvǫtto Gunnar né náungr annarr,
Verse: 2    rýnendr né ráðendr, né þeir er ríkir vóro;
Verse: 3    qvaddi þá Gunnarr, sem konungr scyldi,
Verse: 4    mærr, í mioðranni, af móði stórom:

Strophe: 10 
Verse: 1    "Rístu nú, Fiornir, láttu á flet vaða
Verse: 2    greppa gullscálir með gumna hǫndom!

Strophe: 11 
Verse: 1    Úlfr mun ráða arfi Niflunga,
Verse: 2    gamlir granverðir, ef Gunnars missir,
Verse: 3    birnir blacfiallir bíta þreftǫnnom,
Verse: 4    gamna greystóði, ef Gunnarr né kømrað."

Strophe: 12 
Verse: 1    Leiddo landrǫgni lýðar óneisir,
Verse: 2    grátendr, gunnhvata, ór garði Húna;
Verse: 3    þá qvað þat inn ori erfivorðr Hǫgna:
Verse: 4    "Heilir farit nú oc horscir, hvars ycr hugr teygir!"

Strophe: 13 
Verse: 1    Fetom léto frocnir um fioll at þyria
Verse: 2    marina mélgreypo, Myrcvið inn ókunna;
Verse: 3    hristiz ǫll Húnmǫrc, þar er harðmóðgir fóro,
Verse: 4    ráco þeir vannstyggva vǫllo algrona.

Strophe: 14 
Verse: 1    Land sá þeir Atla oc liðsciálfar diúpar,
Verse: 2    Bicca greppa standa á borg inni há,
Verse: 3    sal um suðrþióðom, sleginn sessmeiðom,
Verse: 4    bundnom rǫndom, bleicom scioldom,
Verse: 5    dafar, darraða; enn þar dracc Atli
Verse: 6    vín í valhǫllo; verðir sáto úti,
Verse: 7    at varða þeim Gunnari, ef þeir hér vitia qvomi
Verse: 8    með geiri giallanda at vekia gram hildi.

Strophe: 15 
Verse: 1    Systir fann þeira snemst, at þeir í sal qvómo,
Verse: 2    broðr hennar báðir, bióri var hon lítt druccin:
Verse: 3    "Ráðinn ertu nú, Gunnarr, hvat muntu, rícr, vinna
Verse: 4    við Húna harmbrǫgðom? hǫll gacc þú ór snemma!

Strophe: 16 
Verse: 1    Betr hefðir þú, bróðir, at þú í brynio forir,
Verse: 2    sem hiálmom aringreypom, at siá heim Atla;
Verse: 3    sætir þú í sǫðlom sólheiða daga,
Verse: 4    nái nauðfǫlva létir nornir gráta,
Verse: 5    Húna scialdmeyiar hervi kanna,
Verse: 6    enn Atla siálfan létir þú í ormgarð koma;
Verse: 7    nú er sá ormgarðr ycr um fólginn."

Strophe: 17 
Verse: 1    "Seinað er nú, systir, at samna Niflungom,
Verse: 2    langt er at leita lýða sinnis til,
Verse: 3    of rosmofioll Rínar, recca óneissa."

Strophe: 18 
Verse: 1    Fengo þeir Gunnar oc í fiotur setto,
Verse: 2    vinir Borgunda, oc bundo fastla.

Strophe: 19 
Verse: 1    Siau hió Hǫgni sverði hvǫsso,
Verse: 2    enn inom átta hratt hann í eld heitan;
Verse: 3    svá scal frocn fiándom veriaz,
Verse: 4    sem Hǫgni varði hendr Gunnars.

Strophe: 20 
Verse: 1    Frágo frocnan, ef fior vildi,
Verse: 2    Gotna þióðann, gulli kaupa.

Strophe: 21 
Verse: 1    "Hiarta scal mér Hǫgna í hendi liggia,
Verse: 2    blóðuct, ór briósti scorið baldriða,
Verse: 3    saxi slíðrbeito, syni þióðans."

Strophe: 22 
Verse: 1    Scáro þeir hiarta Hialla ór briósti,
Verse: 2    blóðuct, oc á bióð lǫgðo oc báro þat fyr Gunnar.

Strophe: 23 
Verse: 1    Þá qvað þat Gunnarr, gumna dróttinn:
Verse: 2    "Hér hefi ec hiarta Hialla ins blauða,
Verse: 3    ólíct hiarta Hǫgna ins frocna,
Verse: 4    er mioc bifaz, er á bióði liggr;
Verse: 5    bifðiz hálfo meirr, er í briósti lá."

Strophe: 24 
Verse: 1    Hló þá Hǫgni, er til hiarta scáro
Verse: 2    qvicqvan kumblasmið, klecqva hann sízt hugði;
Verse: 3    blóðuct þat á bióð lǫgðo oc báro fyr Gunnar.

Strophe: 25 
Verse: 1    Mærr qvað þat Gunnarr, geir-Niflungr:
Verse: 2    "Hér hefi ec hiarta Hǫgna ins frocna,
Verse: 3    ólíct hiarta Hialla ins blauða,
Verse: 4    er lítt bifaz, er á bióði liggr,
Verse: 5    bifðiz svági mioc, þá er í briósti lá.

Strophe: 26 
Verse: 1    Svá scaltu, Atli, augom fiarri,
Verse: 2    sem munt meniom mínom verða;
Verse: 3    er und einom mér ǫll um fólgin
Verse: 4    hodd Niflunga: lifira nú Hǫgni.

Strophe: 27 
Verse: 1    Ey var mér týia, meðan við tveir lifðom,
Verse: 2    nú er mér engi, er ec einn lific;
Verse: 3    Rín scal ráða rógmálmi scatna,
Verse: 4    sú in áskunna, arfi Niflunga,
Verse: 5    í veltanda vatni lýsaz valbaugar,
Verse: 6    heldr enn á hǫndom gull scíni Húna bornom."

Strophe: 28 
Verse: 1    "ùqvið ér hvélvǫgnom! haptr er nú í bǫndom."

Strophe: 29 
Verse: 1    Atli inn ríki reið Glaum mǫnom,
Verse: 2    sleginn rógþornom, sifiungr þeira;
Verse: 3    Guðrún sigtíva
Verse: 4    varnaði við tárom, vaðin í þyshǫllo.

Strophe: 30 
Verse: 1    "Svá gangi þér, Atli, sem þú við Gunnar áttir
Verse: 2    eiða opt um svarða oc ár of nefnda,
Verse: 3    at sól inni suðrhǫllo oc at Sigtýs bergi,
Verse: 4    hǫlqvi hvílbeðiar oc at hringi Ullar."

Strophe: 28 
Verse: 1    Oc meirr þaðan menvorð bituls,
Verse: 2    dólgrǫgni, dró til dauðs scócr.

Strophe: 31 
Verse: 1    Lifanda gram lagði í garð,
Verse: 2    þann er scriðinn var, scatna mengi,
Verse: 3    innan ormom; enn einn Gunnarr,
Verse: 4    heiptmóðr, hǫrpo hendi kníði.
Verse: 5    Glumðo strengir; svá scal gulli
Verse: 6    frocn hringdrifi við fira halda.

Strophe: 32 
Verse: 1    Atli lét lanz síns á vit
Verse: 2    ió eyrscán aptr frá morði;
Verse: 3    dynr var í garði, drǫslom of þrungit,
Verse: 4    vápnsǫngr virða, vóro af heiði komnir.

Strophe: 33 
Verse: 1    Út gecc þá Guðrún, Atla í gogn,
Verse: 2    með gyltom kálki, at reifa giold rǫgnis:
Verse: 3    "Þiggia knáttu, þengill, í þinni hǫllo
Verse: 4    glaðr at Guðrúno gnadda niflfarna."

Strophe: 34 
Verse: 1    Umðo ǫlscálir Atla, vínhǫfgar,
Verse: 2    þá er í hǫll saman Húnar tǫlðuz,
Verse: 3    gumar gransíðir, gengo inn hvárir.

Strophe: 35 
Verse: 1    Scævaði þá in scírleita, veigar þeim at bera,
Verse: 2    afkár dís, iofrom, oc ǫlkrásir valði,
Verse: 3    nauðug, neffǫlom, enn níð sagði Atla:

Strophe: 36 
Verse: 1    "Sona hefir þinna, sverða deilir,
Verse: 2    hiorto hrædreyrug við hunang of tuggin;
Verse: 3    melta knáttu, móðugr, manna valbráðir,
Verse: 4    eta at ǫlkrásom, oc í ǫndugi at senda.

Strophe: 37 
Verse: 1    Kallaraðu síðan til kniá þinna
Verse: 2    Erp né Eitil, ǫlreifa tvá;
Verse: 3    séraðu síðan í seti miðio
Verse: 4    gullz miðlendr geira scepta,
Verse: 5    manar meita né mara keyra."

Strophe: 38 
Verse: 1    Ymr varð á becciom, afkárr sǫngr virða,
Verse: 2    gnýr und guðvefiom, gréto born Húna,
Verse: 3    nema ein Guðrún, er hon æva grét
Verse: 4    broðr sína berharða oc buri svása,
Verse: 5    unga, ófróða, þá er hon við Atla gat.

Strophe: 39 
Verse: 1    Gulli seri in gaglbiarta,
Verse: 2    hringom rauðom reifði hon húskarla;
Verse: 3    scǫp lét hon vaxa, enn scíran málm vaða,
Verse: 4    æva flióð ecci gáði fiarghúsa.

Strophe: 40 
Verse: 1    Óvarr Atli, móðan hafði hann sic druccit,
Verse: 2    vápn hafði hann ecci, varnaðit hann við Guðrúno;
Verse: 3    opt var sá leicr betri, þá er þau lint scyldo
Verse: 4    optarr um faðmaz fyr ǫðlingom.

Strophe: 41 
Verse: 1    Hon beð broddi gaf blóð at drecca,
Verse: 2    hendi helfússi, oc hvelpa leysti;
Verse: 3    hratt fyr hallar dyrr, oc húskarla vacþi,
Verse: 4    brandi, brúðr, heitom; þau lét hon giold broðra.

Strophe: 42 
Verse: 1    Eldi gaf hon þá alla, er inni vóro
Verse: 2    oc frá morði þeira Gunnars komnir vóro ór Myrc-heimi;
Verse: 3    forn timbr fello, fiarghús ruco,
Verse: 4    bor Buðlunga, brunno oc scialdmeyiar
Verse: 5    inni, aldrstamar, hnigo í eld heitan.

Strophe: 43 
Verse: 1    Fullrott er um þetta; ferr engi svá síðan
Verse: 2    brúðr í brynio broðra at hefna;
Verse: 3    hon hefir þriggia þióðkonunga
Verse: 4    banorð borið, biort, áðr sylti.




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.