TITUS
Edda
Part No. 32
Previous part

Song: Hm. 
Strophe: 1 
(HAMÐISMÁL.)


Verse: 1    Sprutto á tái tregnar íðir,
Verse: 2    groti álfa in glýstǫmo;
Verse: 3    ár um morgin manna bǫlva
Verse: 4    sútir hveriar sorg um qveyqva.

Strophe: 2 
Verse: 1    Vara þat nú né í gær,
Verse: 2    þat hefir langt liðit síðan,
Verse: 3    er fát fornara, fremr var þat hálfo,
Verse: 4    er hvatti Guðrún, Giúca borin,
Verse: 5    sono sína unga at hefna Svanhildar.

Strophe: 3 
Verse: 1    "Systir var yccor Svanhildr um heitin,
Verse: 2    sú er Iormunreccr ióm um traddi,
Verse: 3    hvítom oc svortom, á hervegi,
Verse: 4    grám, gangtǫmom Gotna hrossom.

Strophe: 4 
Verse: 1    Eptir er ycr þrungit þióðkonunga,
Verse: 2    lifið einir ér þátta ættar minnar.

Strophe: 5 
Verse: 1    Einstoð em ec orðin sem ǫsp í holti,
Verse: 2    fallin at frondom sem fura at qvisti,
Verse: 3    vaðin at vilia sem viðr at laufi,
Verse: 4    þá er in qvistscoða kømr um dag varman."

Strophe: 6 
Verse: 1    Hitt qvað þá Hamðir, inn hugomstóri:
Verse: 2    "Lítt myndir þú þá, Guðrún, leyfa dáð Hǫgna,
Verse: 3    er þeir Sigurð svefni ór vǫcþo,
Verse: 4    saztu á beð, enn banar hlógo.

Strophe: 7 
Verse: 1    Bocr vóro þínar, inar bláhvíto,
Verse: 2    ofnar vǫlondom, fluto í vers dreyra.
Verse: 3    Svalt þá Sigurðr, saztu yfir dauðom,
Verse: 4    glýia þú né gáðir, Gunnarr þér svá vildi.

Strophe: 8 
Verse: 1    Atla þóttiz þú stríða at Erps morði
Verse: 2    oc at Eitils aldrlagi, þat var þér enn verra;
Verse: 3    svá scyldi hverr ǫðrom veria til aldrlaga
Verse: 4    sverði sárbeito, at sér né stríddit."

Strophe: 9 
Verse: 1    Hitt qvað þá Sǫrli - svinna hafði hann hyggio -:
Verse: 2    "Vilcat ec við móður málom scipta;
Verse: 3    orðz þiccir enn vant ycro hváro:
Verse: 4    hvers biðr þú nú, Guðrún, er þú at gráti né færat?

Strophe: 10 
Verse: 1    Broðr grát þú þína oc buri svása,
Verse: 2    niðia náborna, leidda nær rógi;
Verse: 3    ocr scaltu oc, Guðrún, gráta báða,
Verse: 4    er hér sitiom feigir á mǫrom, fiarri munom deyia."

Strophe: 11 
Verse: 1    Gengo ór garði, gorvir at eiscra,
Verse: 2    liðo þá yfir, ungir, úrig fioll,
Verse: 3    mǫroni húnlenzcom, morðz at hefna.

Strophe: 14 
Verse: 1    Þá qvað þat Erpr eino sinni
Verse: 2    - mærr um léc á mars baki -:
Verse: 3    "Illt er blauðom hal brautir kenna."
Verse: 4    Kóðo harðan mioc hornung vera.

Strophe: 12 
Verse: 1    Fundo á stræti stórbrǫgðóttan:
Verse: 2    "Hvé mun iarpscammr ocr fultingia?"

Strophe: 13 
Verse: 1    Svaraði inn sundrmoðri, svá qvaz veita mundo
Verse: 2    fulting frondom, sem fótr ǫðrom.
Verse: 3    "Hvat megi fótr foti veita,
Verse: 4    né holdgróin hǫnd annarri?"

Strophe: 15 
Verse: 1    Drógo þeir ór scíði scíðiiárn,
Verse: 2    mækis eggiar, at mun flagði;
Verse: 3    þverðo þeir þrótt sinn at þriðiungi,
Verse: 4    léto mǫg ungan til moldar hníga.

Strophe: 16 
Verse: 1    Scóco loða, scálmir festo,
Verse: 2    oc goðbornir smugo í guðvef.

Strophe: 17 
Verse: 1    Fram lágo brautir, fundo vástígo
Verse: 2    oc systor son sáran á meiði,
Verse: 3    vargtré vindkǫld vestan boiar;
Verse: 4    trýtti æ trǫno hvǫt, títt varat biðia.

Strophe: 18 
Verse: 1    Glaumr var í hǫllo, halir ǫlreifir,
Verse: 2    oc til Gota ecci gerðot heyra,
Verse: 3    áðr halr hugfullr í horn um þaut.

Strophe: 19 
Verse: 1    Segia fóro Iormunrecci,
Verse: 2    at sénir vóro seggir und hiálmom:
Verse: 3    "Roðit ér um ráð! ríkir ero komnir,
Verse: 4    fyr mátcom hafið ér mǫnnom mey um tradda."

Strophe: 20 
Verse: 1    Hló þá Iormunreccr, hendi drap á kampa,
Verse: 2    beiddiz at brǫngo, bǫðvaðiz at víni;
Verse: 3    scóc hann scǫr iarpa, sá á sciold hvítan,
Verse: 4    lét hann sér í hendi hvarfa ker gullit.

Strophe: 21 
Verse: 1    "Sæll ec þá þottomc, ef ec siá knætta
Verse: 2    Hamði oc Sǫrla í hǫllo minni;
Verse: 3    buri mynda ec þá binda með boga strengiom,
Verse: 4    góð born Giúca, festa á gálga."

Strophe: 22 
Verse: 1    Hitt qvað þá Hróðrglǫð, stóð uf hléðom,
Verse: 2    mæfingr mælti við mǫg þenna:
Verse: 3    "Þvíat þat heita, at hlýðigi myni;
Verse: 4    mega tveir menn einir tío hundruð Gotna
Verse: 5    binda eða beria í borg inni há?"

Strophe: 23 
Verse: 1    Styrr varð í ranni, stucco ǫlscálir,
Verse: 2    í blóði bragnar lágo, komið ór briósti Gotna.

Strophe: 24 
Verse: 1    Hitt qvað þá Hamðir, inn hugomstóri:
Verse: 2    "Æstir, Iormunreccr, occarrar qvámo,
Verse: 3    broðra sammoðra, innan borgar þinnar.
Verse: 4    Fotr sér þú þína, hǫndom sér þú þínom,
Verse: 5    Iormunreccr, orpit í eld heitan."

Strophe: 25 
Verse: 1    Þá hraut við inn reginkunngi,
Verse: 2    baldr í brynio, sem biorn hryti:
Verse: 3    "Grýtið ér á gumna, allz geirar né bíta,
Verse: 4    eggiar né iárn, Iónacrs sono."

Strophe: 26 
Verse: 1    Hitt qvað þá Hamðir, inn hugomstóri:
Verse: 2    "Bǫl vanntu, bróðir, er þú þann belg leystir,
Verse: 3    opt ór þeim belg bǫll ráð koma."

Strophe: 27 
Verse: 1    "Hug hefðir þú, Hamðir, ef þú hefðir hyggiandi;
Verse: 2    mikils er á mann hvern vant, er manvitz er."

Strophe: 28 
Verse: 1    "Af væri nú haufuð, ef Erpr lifði,
Verse: 2    bróðir occarr inn bǫðfrocni, er við á braut
Verse: 3    vágom,
Verse: 4    verr inn vígfrocni - hvǫttomc at dísir -,
Verse: 5    gumi inn gunnhelgi -gorðomz at vígi -.

Strophe: 29 
Verse: 1    Ecci hygg ec ocr vera úlfa domi,
Verse: 2    at vit mynim siálfir um sacaz,
Verse: 3    sem grey norna, þau er gráðug ero
Verse: 4    í auðn um alin.

Strophe: 30 
Verse: 1    Vel hǫfom við vegit, stǫndom á val Gotna,
Verse: 2    ofan, eggmóðom, sem ernir á qvisti;
Verse: 3    góðs hǫfom tírar fengið, þott scylim nú eða í gær deyia,
Verse: 4    qveldlífir maðr ecci eptir qvið norna."

Strophe: 31 
Verse: 1    Þar fell Sǫrli at salar gafli,
Verse: 2    enn Hamðir hné at húsbaki.

Verse: 3    Þetta ero kǫlluð Hamðismál in forno.




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.