TITUS
Edda
Part No. 33
Previous part

Song: Bdr. 
Strophe: 1 
(BALDRS DRAUMAR.)


Verse: 1    Senn vóro æsir allir á þingi
Verse: 2    oc ásynior allar á máli,
Verse: 3    oc um þat réðo, ríkir tívar,
Verse: 4    hví væri Baldri ballir draumar.

Strophe: 2 
Verse: 1    Upp reis Óðinn, alda gautr,
Verse: 2    oc hann á Sleipni sǫðul um lagði;
Verse: 3    reið hann niðr þaðan Niflheliar til,
Verse: 4    motti hann hvelpi, þeim er ór helio kom.

Strophe: 3 
Verse: 1    Sá var blóðugr um brióst framan,
Verse: 2    oc galdrs fǫður gó um lengi;
Verse: 3    fram reið Óðinn, foldvegr dunði,
Verse: 4    hann kom at hávo Heliar ranni.

Strophe: 4 
Verse: 1    Þá reið Óðinn fyr austan dyrr,
Verse: 2    þar er hann vissi vǫlo leiði;
Verse: 3    nam hann vittugri valgaldr qveða,
Verse: 4    unz nauðig reis, nás orð um qvað:

Strophe: 5 
Verse: 1    "Hvat er manna þat, mér ókunnra,
Verse: 2    er mér hefir aukit erfit sinni?
Verse: 3    var ec snivin snióvi oc slegin regni
Verse: 4    oc drifin dǫggo, dauð var ec lengi."

Strophe: 6 
Verse: 1    "Vegtamr ec heiti, sonr em ec Valtams;
Verse: 2    segðu mér ór helio - ec man ór heimi -:
Verse: 3    hveim ero beccir baugom sánir,
Verse: 4    flet fagrliga flóð gulli?"

Strophe: 7 
Verse: 1    "Hér stendr Baldri of brugginn mioðr,
Verse: 2    scírar veigar, liggr scioldr yfir,
Verse: 3    enn ásmegir í ofvæni.
Verse: 4    Nauðug sagðac, nú mun ec þegia."

Strophe: 8 
Verse: 1    "Þegiattu, vǫlva! þic vil ec fregna,
Verse: 2    unz alkunna, vil ec enn vita:
Verse: 3    hverr man Baldri at bana verða
Verse: 4    oc Óðins son aldri ræna?"

Strophe: 9 
Verse: 1    "Hǫðr berr hávan hróðrbarin þinig;
Verse: 2    hann man Baldri at bana verða
Verse: 3    oc Óðins son aldri ræna.
Verse: 4    Nauðug sagðac, nú mun ec þegia."

Strophe: 10 
Verse: 1    "Þegiattu, vǫlva! þic vil ec fregna,
Verse: 2    unz alkunna, vil ec enn vita:
Verse: 3    hverr man heipt Heði hefnt of vinna,
Verse: 4    eða Baldrs bana á bál vega?"

Strophe: 11 
Verse: 1    "Rindr berr Vála í vestrsǫlom,
Verse: 2    sá man Óðins sonr einnættr vega;
Verse: 3    hǫnd um þvær né hǫfuð kembir,
Verse: 4    áðr á bál um berr Baldrs andscota.
Verse: 5    Nauðug sagðac, nú mun ec þegia."

Strophe: 12 
Verse: 1    "Þegiattu, vǫlva! þic vil ec fregna,
Verse: 2    unz alkunna, vil ec enn vita:
Verse: 3    hveriar ro þær meyiar, er at muni gráta
Verse: 4    oc á himin verpa hálsa scautom?"

Strophe: 13 
Verse: 1    "Ertattu Vegtamr, sem ec hugða,
Verse: 2    heldr ertu Óðinn, aldinn gautr."
Verse: 3    "Ertattu vǫlva, né vís kona,
Verse: 4    heldr ertu þriggia þursa móðir."

Strophe: 14 
Verse: 1    "Heim ríð þú, Óðinn, oc ver hróðigr!
Verse: 2    Svá komit manna meirr aptr á vit,
Verse: 3    er lauss Loki líðr ór bǫndom
Verse: 4    oc ragna rǫc riúfendr koma."




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.