TITUS
Edda
Part No. 34
Previous part

Song: Rth. 
Strophe: 0 
(RÍGSÞULA.)


Verse: 1    Svá segia menn í fornom sǫgom, at einnhverr af ásom,
Verse: 2    sá er Heimdallr hét, fór ferðar sinnar oc fram með
Verse: 3    sióvarstrǫndo noccorri, kom at einom húsabo oc nefndiz Rígr.
Verse: 4    Eptir þeiri sǫgo er qvæði þetta:

Strophe: 1 
Verse: 1    Ár qváðo ganga gronar brautir
Verse: 2    ǫflgan oc aldinn, ás kunnigan,
Verse: 3    ramman oc rǫsqvan, Ríg stíganda.

Strophe: 2 
Verse: 1    Gecc hann meirr at þat miðrar brautar,
Verse: 2    kom hann at húsi, hurð var á gætti;
Verse: 3    inn nam at ganga, eldr var á gólfi;
Verse: 4    hión sáto þar, hár, at árni,
Verse: 5    Ái oc Edda, aldinfalda.

Strophe: 3 
Verse: 1    Rígr kunni þeim ráð at segia;
Verse: 2    meirr settiz hann miðra fletia,
Verse: 3    enn á hlið hvára hión salkynna.

Strophe: 4 
Verse: 1    Þá tóc Edda øcqvinn hleif,
Verse: 2    þungan oc þyccan, þrunginn sáðom;
Verse: 3    bar hon meirr at þat miðra scutla,
Verse: 4    soð var í bolla, setti á bióð;
Verse: 5    var kálfr soðinn, krása beztr;
Verse: 6    reis hann upp þaðan, réz at sofna.
Strophe: 5 
Verse: 1    Rígr kunni þeim ráð at segia;
Verse: 2    meirr lagðiz hann miðrar reccio,
Verse: 3    en á hlið hvára hión salkynna.

Strophe: 6 
Verse: 1    Þar var hann at þat þriár nætr saman;
Verse: 2    gecc hann meirr at þat miðrar brautar,
Verse: 3    liðo meirr at þat mánuðr nío.

Strophe: 7 
Verse: 1    Ióð ól Edda, ióso vatni
Verse: 2    hǫrvi svartan, héto Þræl.

Strophe: 8 
Verse: 1    Hann nam at vaxa oc vel dafna;
Verse: 2    var þar á hǫndom hroccit scinn,
Verse: 3    kropnir knúar,
Verse: 4    fingr digrir, fúllict andlit,
Verse: 5    lotr hryggr, langir hælar.

Strophe: 9 
Verse: 1    Nam hann meirr at þat magns um kosta,
Verse: 2    bast at binda, byrðar gørva;
Verse: 3    bar hann heim at þat hrís gerstan dag.

Strophe: 10 
Verse: 1    Þar kom at garði gengilbeina;
Verse: 2    aurr var á iliom, armr sólbrunninn,
Verse: 3    niðrbiúgt er nef, nefndiz Þír.

Strophe: 11 
Verse: 1    Miðra fletia meirr settiz hon;
Verse: 2    sat hiá henni sonr húss;
Verse: 3    roddo oc rýndo, reccio gørðo,
Verse: 4    Þræll oc Þír, þrungin dogr.

Strophe: 12 
Verse: 1    Born ólo þau, biuggo oc unðo;
Verse: 2    hygg ec, at héti Hreimr oc Fiósnir,
Verse: 3    Klúrr oc Kleggi, Kefsir, Fúlnir,
Verse: 4    Drumbr, Digraldi, Drǫttr oc Hǫsvir,
Verse: 5    Lútr oc Leggialdi; lǫgðo garða,
Verse: 6    acra tǫddo, unno at svínom,
Verse: 7    geita gætto, grófo torf.

Strophe: 13 
Verse: 1    Dotr vóro þær Drumba oc Kumba,
Verse: 2    Øcqvinkálfa oc Arinnefia,
Verse: 3    Ysia oc Ambát, Eikintiasna,
Verse: 4    Tǫtrughypia oc Trǫnobeina;
Verse: 5    þaðan ero komnar þræla ættir.

Strophe: 14 
Verse: 1    Gecc Rígr at þat réttar brautir,
Verse: 2    kom hann at hǫllo, hurð var á scíði;
Verse: 3    inn nam at ganga, eldr var á gólfi;
Verse: 4    hión sáto þar, heldo á sýslo.

Strophe: 15 
Verse: 1    Maðr telgði þar meið til rifiar;
Verse: 2    var scegg scapat, scǫr var fyrir enni,
Verse: 3    scyrto þrǫngva; scoccr var á gólfi.

Strophe: 16 
Verse: 1    Sat þar kona, sveigði rocc,
Verse: 2    breiddi faðm, bió til váðar.
Verse: 3    Sveigr var á hǫfði, smoccr var á bringo,
Verse: 4    dúcr var á hálsi, dvergar á ǫxlom.

Verse: 5    Afi oc Amma átto hús.

Strophe: 17 
Verse: 1    Rígr kunni þeim ráð at segia;

Strophe: 19 
Verse: 1    reis frá borði, réð at sofna;
Verse: 2    meirr lagðiz hann miðrar reccio,
Verse: 3    en á hlið hvára hión salkynna.

Strophe: 20 
Verse: 1    Þar var hann at þat þriár nætr saman;
Verse: 2    gecc hann meirr at þat miðrar brautar,
Verse: 3    liðo meirr at þat mánuðr nío.

Strophe: 21 
Verse: 1    Ióð ól Amma, ióso vatni,
Verse: 2    kǫlloðo Karl, kona sveip ripti,
Verse: 3    rauðan oc rióðan, riðoðo augo.

Strophe: 22 
Verse: 1    Hann nam at vaxa oc vel dafna;
Verse: 2    øxn nam at temia, arðr at gørva,
Verse: 3    hús at timbra oc hlǫðor smíða,
Verse: 4    karta at gørva oc keyra plóg.

Strophe: 23 
Verse: 1    Heim óco þá hanginluclo,
Verse: 2    geitakyrtlo, gipto Karli;
Verse: 3    Snør heitir sú; settiz undir ripti;
Verse: 4    biuggo hión, bauga deildo,
Verse: 5    breiddo blæior oc bú gørðo.

Strophe: 24 
Verse: 1    Born ólo þau, biuggo oc unðo;
Verse: 2    hét Halr oc Drengr, Hǫlðr, Þegn oc Smiðr,
Verse: 3    Breiðr, Bóndi, Bundinsceggi,
Verse: 4    Búi oc Boddi, Brattsceggr oc Seggr.

Strophe: 25 
Verse: 1    Enn héto svá ǫðrom nǫfnom:
Verse: 2    Snót, Brúðr, Svanni, Svarri, Spracci,
Verse: 3    Flióð, Sprund oc Víf, Feima, Ristill;
Verse: 4    þaðan ero komnar karla ættir.

Strophe: 26 
Verse: 1    Gecc Rígr þaðan réttar brautir;
Verse: 2    kom hann at sal, suðr horfðo dyrr,
Verse: 3    var hurð hnigin, hringr var í gætti.

Strophe: 27 
Verse: 1    Gecc hann inn at þat, gólf var stráð;
Verse: 2    sáto hión, sáz í augo,
Verse: 3    Faðir oc Móðir, fingrom at leica.

Strophe: 28 
Verse: 1    Sat húsgumi oc sneri streng,
Verse: 2    álm of bendi, ǫrvar scepti;
Verse: 3    enn húskona hugði at ǫrmom,
Verse: 4    strauc of ripti, sterti ermar.

Strophe: 29 
Verse: 1    Keisti fald, kinga var á bringo,
Verse: 2    síðar sloðor, serc bláfán;
Verse: 3    brún biartari, brióst liósara,
Verse: 4    háls hvítari hreinni miollo.

Strophe: 30 
Verse: 1    Rígr kunni þeim ráð at segia;
Verse: 2    meirr settiz hann miðra fletia,
Verse: 3    enn á hlið hvára hión salkynna.

Strophe: 31 
Verse: 1    Þá tóc Móðir merctan dúc,
Verse: 2    hvítan af hǫrvi, hulði bióð;
Verse: 3    hon tóc at þat hleifa þunna,
Verse: 4    hvíta af hveiti, oc hulði dúc.

Strophe: 32 
Verse: 1    Fram setti hon scutla fulla,
Verse: 2    silfri varða, setti á bióð,
Verse: 3    fán oc flesci oc fugla steicta;
Verse: 4    vín var í kǫnno, varðir kálcar;
Verse: 5    drucco oc domðo, dagr var á sinnom.

Strophe: 33 
Verse: 1    Rígr kunni þeim ráð at segia.
Verse: 2    Reis Rígr at þat, reccio gerði;
Verse: 3    þar var hann at þat þriár nætr saman;
Verse: 4    gecc hann meirr at þat miðrar brautar,
Verse: 5    liðo meirr at þat mánuðr nío.

Strophe: 34 
Verse: 1    Svein ól Móðir, silki vafði,
Verse: 2    ióso vatni, Iarl léto heita;
Verse: 3    bleict var hár, biartir vangar,
Verse: 4    ǫtul vóro augo sem yrmlingi.

Strophe: 35 
Verse: 1    Upp óx þar Iarl á fletiom;
Verse: 2    lind nam at scelfa, leggia strengi,
Verse: 3    álm at beygia, ǫrvar scepta,
Verse: 4    flein at fleygia, frǫccor dýia,
Verse: 5    hestom ríða, hundom verpa,
Verse: 6    sverðom bregða, sund at fremia.

Strophe: 36 
Verse: 1    Kom þar ór runni Rígr gangandi,
Verse: 2    Rígr gangandi, rúnar kendi;
Verse: 3    sitt gaf heiti, son kvez eiga;
Verse: 4    þann bað hann eignaz óðalvǫllo,
Verse: 5    óðalvǫllo, aldnar bygðir.

Strophe: 37 
Verse: 1    Reið hann meirr þaðan myrcan við,
Verse: 2    hélug fioll, unz at hǫllo kom;
Verse: 3    scapt nam at dýia, scelfði lind,
Verse: 4    hesti hleypti oc hiorvi brá;
Verse: 5    víg nam at vekia, vǫll nam at rióða,
Verse: 6    val nam at fella, vá til landa.

Strophe: 38 
Verse: 1    Réð hann einn at þat átián búom.
Verse: 2    Auð nam scipta, ǫllom veita
Verse: 3    meiðmar oc mǫsma, mara svangrifia;
Verse: 4    hringom hreytti, hió sundr baug.

Strophe: 39 
Verse: 1    Óco ærir úrgar brautir,
Verse: 2    kómo at hǫllo, þar er Hersir bió;
Verse: 3    motti hann miófingraðri,
Verse: 4    hvítri oc horscri, héto Erno.

Strophe: 40 
Verse: 1    Báðo hennar oc heim óco,
Verse: 2    gipto Iarli, gecc hon und líni;
Verse: 3    saman biuggo þau oc sér unðo,
Verse: 4    ættir ióco oc aldrs nuto.

Strophe: 41 
Verse: 1    Burr var inn elzti, enn Barn annat,
Verse: 2    Ióð oc Aðal, Arfi, Mǫgr,
Verse: 3    Niðr oc Niðiungr - námo leica -,
Verse: 4    Sonr oc Sveinn - sund oc tafl -;
Verse: 5    Kundr hét einn, Konr var inn yngsti.

Strophe: 42 
Verse: 1    Upp óxo þar Iarli bornir;
Verse: 2    hesta tǫmðo, hlífar bendo,
Verse: 3    sceyti scófo, scelfðo asca.

Strophe: 43 
Verse: 1    Enn Konr ungr kunni rúnar,
Verse: 2    ævinrúnar oc aldrrúnar;
Verse: 3    meirr kunni hann mǫnnom biarga,
Verse: 4    eggiar deyfa, ægi lægia.

Strophe: 44 
Verse: 1    Klǫc nam fugla, kyrra elda, .
Verse: 2    sæva of svefia, sorgir lægia,
Verse: 3    afl oc eliun átta manna.

Strophe: 45 
Verse: 1    Hann við Ríg iarl rúnar deildi,
Verse: 2    brǫgðom beitti oc betr kunni;
Verse: 3    þá ǫðlaðiz oc þá eiga gat
Verse: 4    Rígr at heita, rúnar kunna.
Strophe: 46 
Verse: 1    Reið Konr ungr kiorr oc scóga,
Verse: 2    kólfi fleygði, kyrði fugla.

Strophe: 47 
Verse: 1    Þá qvað þat kráca - sat qvisti ein -:
Verse: 2    "Hvat scaltu, Konr ungr, kyrra fugla?
Verse: 3    heldr mætti þér hestom ríða
Verse: 4    oc her fella.

Strophe: 48 
Verse: 1    Á Danr oc Danpr dýrar hallir,
Verse: 2    oðra óðal, enn ér hafit;
Verse: 3    þeir kunno vel kiól at ríða,
Verse: 4    egg at kenna, undir riúfa."




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.